ಟಿಪ್ಪು ಜಯಂತಿ, ಪುರ್ವಿಲೆ ಕ್ರೀಸ್ತಾಂವ್ ಆನಿ ಎಕ್ಲೊ ಸವಾಯ್ ಬುದ್ವಂತ್!

 ಮಂಗ್ಳುರಿ ಕಥೊಲಿಕಾಂಚಾ ಇತಿಹಾಸಾಚೆರ್ ಚರ್ಚಾ ಚಲ್ಲಿ ತರ್, ತಿ ಚರ್ಚಾ ಟಿಪ್ಪು ಸುಲ್ತಾನಾಚೊ ಉಲ್ಲೇಖ್ ಕೆಲ್ಯಾ ಶಿವಾಯ್ ಖಂಡಿತ್ ಮುಕಾರ್ ವಚಾನಾ. ಬಾಪಯ್ ಹೈದರಾಲಿ ಥಾವ್ನ್ ಮೈಸೂರ್ ಪ್ರಾಂತಾಚೊ ಅಧಿಪತಿ ಜಾವ್ನ್ ಅಧಿಕಾರ್ ಜೋಡ್ನ್ ಘೆತ್'ಲ್ಲ್ಯಾ ಟಿಪ್ಪುನ್ 1784 ವ್ಯಾ ವರ್ಸಾ ಮಂಗ್ಳುರ್ ಪ್ರಾಂತಾಚೆರ್ ತವಳ್ ಅಧಿಕಾರ್ ಚಲವ್ನ್ ಆಸ್ಲೆಲ್ಯಾ ಬ್ರಿಟಿಶಾಂಚೆರ್ ಝುಜ್ ಮಾಂಡ್'ಲ್ಲೆಂ, ಆನಿ ಹ್ಯಾ ಝುಜಾಂತ್ ಚಲ್ವೊಣಿ ಲಾಗಿಂ ಯೆತಾ ಮಣ್ ನಖ್ಖಿ ಜಾತೆಚ್ ಟಿಪ್ಪುಲಾಗಿಂ ಸೊಲ್ಲೊ ಕರುಂಕ್ ಮುಕಾರ್ ಚರ್ಲೆಲ್ಯಾ ತವಳ್ಚ್ಯಾ ಬ್ರಿಟಿಶ್ ಕರ್ನಲಾನ್ ಮಂಗ್ಳುರ್ ಪ್ರಾಂತ್ ಟಿಪ್ಪುಚ್ಯಾ ಹಾತಿಂ ಒಪ್ಸುನ್ ದಿಲ್ಲೆಂ. (ದುಸ್ರ್ಯಾ ಆಂಗ್ಲೋ-ಮೈಸೂರ್ ಝುಜಾಚಿ ಮಾಹೆತ್). ಮಂಗ್ಳುರಾಚೆರ್ ಅಧಿಕಾರ್ ಮೆಳ್'ಲ್ಲೊಚ್ ಕ್ರೀಸ್ತಾಂವಾಂಲಾಗಿಂ ಜಲ್ಮಾಂ ಜಲ್ಮಾಂಚೊ ಧ್ವೇಷ್ ಆಸಾಗಾಯ್ ಮ್ಹಣ್ಚೆಪರಿಂ ಟಿಪ್ಪುನ್ ಕ್ರೀಸ್ತಾಂವಾಂಚೆರ್ ಜುಲುಮ್ ಚಲಯ್ಲಿ, ಬಲಾತ್ಕಾರಾನ್ ತಾಂಕಾಂ ಮತಾಂತರ್ (ಒತ್ತಾಯೆನ್ ಸುನ್ನತ್) ಕೆಲೆಂ, ಇಗರ್ಜಾಂಚೆರ್ ಧಾಡ್ ಘಾಲಿ, ಕ್ರೀಸ್ತಾಂವಾಂಚಿಂ ರಗ್ತಾಂ ವಾಳಯ್ಲಿಂ  ಮ್ಹಣ್'ಯೀ ತೊಚ್ ಇತಿಹಾಸ್ ಆಮ್ಕಾಂ ಸಾಂಗ್ತಾ. ಮಾತ್ರ್ ನ್ಹಂಯ್ ತವಳ್ ತವಳ್ ಆಮ್ಚ್ಯಾ ಧಾರ್ಮಿಕ್ ಮುಖೆಲ್ಯಾಂಥಾವ್ನ್, ಆಮ್ಚ್ಯಾ ಮಾಲ್ಘಡ್ಯಾಂ ಥಾವ್ನ್'ಯೀ ಅಸಲಿಚ್ ಮಾಹೆತ್ ಆಮಿ ತೊಂಡ್ಪಾಶಿಂ ಆಯ್ಕಾಲ್ಯಾ.! 

ಪುಣ್ ಟಿಪ್ಪುನ್ ತ್ಯಾ ಪರಿಂ ಕ್ರೀಸ್ತಾಂವಾಂಚೆರ್ ಜುಲುಮ್ ಚಲಯ್ಜೆ ತರ್ ಕಾರಣ್ ಕಿತೆಂ.? ಅಸಲೆಂ ಸವಾಲ್ ಕೊಣೆಂಯೀ ವಿಚಾರ್'ಲ್ಲೆಂ ಭೋವ್ ಉಣೆಂ. ಭಾರತಾಂತ್ ಪೋರ್ಚುಗೀಸಾಂಚೆಂ ಬಳ್ ಉಣೆಂ ಜಾವ್ನ್ ಬ್ರಿಟಿಶಾಂಚೆಂ ಬಳ್ ಚಡೊನ್ ಯೆಂವ್ಚ್ಯಾ ತ್ಯಾ ದಿಸಾನಿಂ, ಟಿಪ್ಪುನ್ ಬ್ರಿಟಿಶಾಂಚೆರ್ ಝುಜ್ ಮಾಂಡ್ಲೆಲೆ ತವಳ್, ಗೊರ್ಯಾಂಥಾವ್ನ್ ಕ್ರೀಸ್ತಾಂವ್'ಪಣ್ ಜೋಡ್ನ್ ಘೆತ್ಲೆಲ್ಯಾ ಆಮ್ಚ್ಯಾ ಮಾಲ್ಘಡ್ಯಾಂ ಮಧ್ಲ್ಯಾ ಥೊಡ್ಯಾ ಮಹಂತನಿ ಕುಟ್ಮಾಂನಿಂ ಆಪ್ಲ್ಯಾ ಸ್ವಾರ್ಥಾಖಾತಿರ್ - ಗೊರ್ಯಾಂಚೆಂ ಆಡಳ್ತೆಂ ಆಸ್ತಾನಾ 'ಕ್ರೀಸ್ತಾಂವ್' ಮ್ಹಳ್ಳ್ಯಾ ಸೊಫ್ಟ್ ಕೊರ್ನರಾಚೆರ್ ಮೆಳ್ತಾತ್ ತ್ಯೊ ಸವ್ಲತ್ಯೊ ದೇಶಿ ರಾಯಾಚ್ಯಾ ಆಡಳ್ತ್ಯಾಂತ್ ಲಾಭ್ಚ್ಯೊನಾಂತ್,  ಮಾಗಿರ್ ಆಪ್ಣೆಂಯೀ ಹೆರಾಂಬರಿ ಕಾಮ್ ಕರ್ನ್ ದೀಸ್ ಕಾಡಿಜೆ ಪಡ್ತಿತ್ ಮ್ಹಳ್ಳ್ಯಾ ಭಿರಾಂತೆನ್ - ಟಿಪ್ಪು ವಿರೋಧ್, ಬ್ರಿಟಿಶಾಂಕ್ ಗುಪ್ತಿಂ ಕುಮಕ್ ಕರ್ಚೊ ನಿರ್ಣಯ್ ಘೆತ್ಲೊ. ಮಾತ್ರ್ ನ್ಹಂಯ್, ಹೆರ್ ಸಾದ್ಯಾ ಕ್ರೀಸ್ತಾಂವಾಂಕೀ ತಶೆಂ ಕರುಂಕ್ ಉಲೊ ದಿಲೊ. ಪರತ್ 'ಆಮಿ ಕ್ರೀಸ್ತಾಂವ್' ಮ್ಹಳ್ಳ್ಯಾ ತ್ಯಾಚ್ ಸೊಫ್ಟ್ ಕೊರ್ನರಾನ್'ಗೀ ಯಾ ಮಹಂತನಿ ಕ್ರೀಸ್ತಾಂವಾಚ್ಯಾ ಆದೇಶಾ ವಿರೋಧ್ ವೆಚೆಂ ಧಯ್ರ್ ನಾಸ್ತಾನಾಂಗೀ, ಸಾದ್ಯಾ ಕ್ರೀಸ್ತಾವಾಂನಿಯೀ ತಶೆಂಚ್ ಕೆಲೆಂ. ಥೊಡ್ಯಾ ಧಾರ್ಮಿಕ್ ಮುಖೆಲ್ಯಾಂಚಿ ಕುಮಕ್'ಯೀ ತಾಂಕಾಂ ಆಸ್ಲಿ! ಪುಣ್ ಟಿಪ್ಪು ಬ್ರಿಟಿಶಾಂಚೆರ್ ಬಳ್ ಜಾಯ್ತ್, ಆನಿ ಮಂಗ್ಳುರಾಚೆಂ ಸುಂಕಾಣ್ ತಾಚ್ಯಾ ಹಾತಿಂ ಯೇತ್ ಆನಿ ಆಪ್ಣೆಂ ಕೆಲ್ಲೆಂ ಆಪ್ಣಾಚೆರ್ ಭಾರಿಕ್ ಪಡಾತ್ ಮ್ಹಣೊನ್ ಆಮ್ಚ್ಯಾ ಪುರ್ವಾಜಾನಿಂ ಸ್ವಪ್ಣಾಂತೀ ಚಿಂತುಂಕ್ ನಾತ್ಲೆಂ! ಪುಣ್ ತಶೆಂಚ್ ಘಡ್ಲೆಂ. ಆನಿ ಟಿಪ್ಪುನ್ ಅಧಿಕಾರ್ ಘೆತ್'ಲ್ಲೊಚ್ ತವಳ್ಚ್ಯಾ ರಾಯಾನಿಂ ಪಾಳ್ನ್ ಆಸ್'ಲ್ಲ್ಯಾ ರಾಜ್'ದ್ರೋಹಿ ವಿರೋಧಿ ಕಾಯ್ದ್ಯಾ ಪ್ರಕಾರ್ ಬದ್ಲಾಮ್ ಘೆತ್ಲೊ.! 

ಇತಿಹಾಸಾಂತ್ ದಾಖಲ್ ಜಾಲಾಂ ಮ್ಹಳ್ಳ್ಯಾಕ್ಷಣಾ ಖಂಚಿಯೀ ಏಕ್ ಗಜಾಲ್ 100% ಸತ್ ಜಾಯ್ನಾ, ಯಾ ಇತಿಹಾಸಾಂತ್ ಉಲ್ಲೇಖ್ ನಾ ಮ್ಹಳ್ಳ್ಯಾಫರಾ ಏಕ್ ಗಜಾಲ್ 100% ಫಟ್'ಯೀ ಜಾಯ್ನಾ.! ಕ್ರೀಸ್ತಾಂವಾನಿಂ ಟಿಪ್ಪು ವಿರೋಧ್ ಕೆಲ್ಲೊ ರಾಜದ್ರೋಹ್ ಆನಿ  ಟಿಪ್ಪುನ್ ಕ್ರೀಸ್ತಾಂವಾಂಚೆರ್ ಚಲಯಿಲ್ಲ್ಯಾ ಜುಲುಮ್ ಹ್ಯಾ ದೊನೀಂ ಸಂಗ್ತಿಂಕೀ ಹೆಂ ಸತ್ ಲಾಗು ಜಾತಾ. ಆಶೆಂ ಆಸ್ತಾಂ ಟಿಪ್ಪುನ್ ಕ್ರೀಸ್ತಾಂವಾಂಚೆರ್ ಕೆಲ್ಲ್ಯಾ ಜುಲುಮಾಚೊ ಉಗ್ಡಾಸ್ ಕ್ರೀಸ್ತಾಂವ್ ಸವ್ಕಾಸ್ ವಿಸ್ರೊನ್ ಆಸ್'ಲ್ಲೆ, ಆನಿ ಎಕಾ ಮುಸ್ಲಿಂ ರಾಯಾ ವಿರೋಧ್ ಕ್ರೀಸ್ತಾವಾಂನಿ ಕೆಲ್ಲ್ಯಾ ರಾಜದ್ರೋಹಾಚೊ ಉಗ್ಡಾಸ್ ಮುಸ್ಲಿಂ ಭಾವ್'ಯೀ ವಿಸ್ರೊನ್ ಆಸ್'ಲ್ಲೆ! ಹ್ಯಾ ಮದ್ಘಾತ್ 2015 ವ್ಯಾ ವರ್ಸಾ ಸಿಧ್ಧರಾಮಯ್ಯಚ್ಯಾ ಮುಖೆಲ್ಪಣಾರ್ ಕಾಂಗ್ರೆಸ್ ಸರ್ಕಾರಾನ್ ಹರ್ಯೇಕಾ ವರ್ಸಾ ನವೆಂಬ್ರಾಚ್ಯಾ 10 ತಾರಿಕೆರ್ ಟಿಪ್ಪು ಜಯಂತಿ ಸಂಭ್ರಮ್ಚೊ ನಿರ್ಧಾರ್ ಘೆತ್ಲೊ. ಬ್ರಿಟಿಶಾಂ ವಿರೋಧ್ ಝುಜ್ಲೆಲ್ಯಾ ಭಾರತಾಚ್ಯಾ ರಾಯಾಂಪಯ್ಕಿಂ ಟಿಪ್ಪು ಪ್ರಮುಖ್, ದಲಿತ್ ಬಾಯ್ಲಾನಿಂ ಆಪ್ಲಿಂ ಥನಾಂ ಧಾಂಪುಂಕ್ ನಜೊ, ಆನಿ ಜರ್ ಧಾಂಪ್ಲಿಂ ತರ್ ಥನಾಂಚ್ಯಾ ಗಾತ್ರಾಚೆರ್ ಹೊಂದ್ವೊನ್ ತಾಣಿಂ ದಂಡ್ ಪಾವಿತ್ ಕರಿಜೆ ಮ್ಹಳ್ಳೆತಸಲ್ಯಾ ಬ್ರಾಹ್ಮಣ್'ಶಾಹೀ ಆಮಾನವೀಯ್ ಕಾನೂನಾವಿರೋಧ್ ವಚೊನ್ ದಲಿತಾಂಕ್ ಹೆರ್ ಮನ್ಶಾಂಪರಿಂಚ್ ಜೆಯೆಂವ್ಚೆಂ ಹಕ್ಕ್ ಲಾಭಯಿಲ್ಲೊ ರಾಯ್, ಅಸಲಿಂಚ್ ಹೆರ್ ಸಬಾರ್ ಸಾಮಾಜಿಕ್ ಬದ್ಲಾವಣಾಂ ಹಾಡುಂಕ್ ಆನಿ ಆಧುನಿಕ್ ತಂತ್ರಗ್ಯಾನ್ ಭಾರಾತಾಕ್ ಹಾಡುಂಕ್ ವಾವುರ್'ಲ್ಲೊ ರಾಯ್ ದೆಕುನ್ ತಾಕಾ ಮಾನ್ ಕರ್ಚ್ಯಾಕ್  ವರ್ಸಾವಾರ್ ತಾಚೊ ಉಗ್ಡಾಸ್ ಕಾಡ್ನ್ ತಾಚೊ ಜಲ್ಮಾ ದೀಸ್ ಆಚರ್ಸುಂಚೊ ನಿರ್ಧಾರ್ ಆಪ್ಣೆಂ ಕೆಲಾ ಮ್ಹಣ್ ಕಾಂಗ್ರೆಸ್ ಸರ್ಕಾರಾನ್ ಕಳಯಿಲ್ಲೆಂಚ್, ಮುಕ್ಲ್ಯಾ ಚುನಾವಾಂತ್ ಕಶೆಂ ಪುಣೀ ಜಿಕೊನ್ ಕರ್ಣಾಟಕಚೆಂ ಆಡಳ್ತೆಂ ಆಪ್ಣಾಯ್ಜೆ ಮ್ಹಣ್ ಸ್ವಪ್ಣೆವ್ನ್ ಆಸ್'ಲ್ಲೆ ಬಿ.ಜೆ.ಪಿ ಮುಖೆಲಿ ಜಾಗೆ ಜಾಲೆ ಆನಿ ಅಲ್ಪಸಂಖ್ಯಾತ್ ಮುಸ್ಲಿಂ ಲೊಕಾಚಿಂ ಮನಾಂ ಜಿಕ್ಚೆ ಖಾತಿರ್ ಹೆಂ ಪೂರಾ ಕರ್ನ್ ಆಸಾ ಮ್ಹಣ್ ಮುರಿಯೊ ದೀಂವ್ಕ್ ಲಾಗ್ಲೆ. ಮಾತ್ರ್ ನ್ಹಂಯ್ ಆಪ್ಣೆಂ ಸ್ಪೊನ್ಸರ್ ಕರ್ಚ್ಯಾ ಚಡ್ಡಿ ಸೈನಾಚ್ಯಾ ಬೇಕಾರ್ ಭೊಂವ್ಚ್ಯಾ ಶಿಪಾಯಾಂಕ್ ಘೊಟುಂಕ್ ಇಲ್ಲೊ ಸೊರೊ ಆನಿ ಗಿಳುಂಕ್ ಚಾರ್ ಫೊಡಿ ಮಾಸ್ ದೀವ್ನ್ ಸರ್ಕಾರಾ ವಿರೋಧ್ ದಂಗೆ ಕರುಂಕ್ ಲಾಯ್ಲೆಂ. 

ಹಾಕಾ ಲಾಗೊನ್ ಪಾಟ್ಲ್ಯಾ ದೋನ್ ವರ್ಸಾಂನಿಂ ಕೊಂಕಣಾಂತ್ ಕಿತೆಂ ಸಕ್ಕಡ್ ಘಡ್ಲಾಂ, ಕಿತ್ಲೆಂ ರಗತ್ ವಾಳ್ಳಾಂ ಆನಿ ಕಿತ್ಲೆ  ತೆಂ ಸಕ್ಡಾಂಕ್ ಕಳಿತ್ ಆಸಾ. ಫುಡ್ಲ್ಯಾ ವರ್ಸಾ ಚುನಾವ್ ಆಸಾ, ಆನಿ ತೊ ಚುನಾವ್ ಹ್ಯಾಚ್ ಘಡಿಯೆ ಘಡ್ಲೊ ತರ್, ಕಾಂಗ್ರೆಸ್ ಸ್ಪಷ್ಟ್ ಬಹುಮತಾನ್ ಜಿಕೊನ್ ಪರತ್ ಅಧಿಕಾರಾಕ್ ಯೆಂವ್ಚಿ ಸಾಧ್ಯತಾ ಚಡ್ ಆಸಾ ಮ್ಹಣ್ ಬಿ.ಜೆ.ಪಿ.ಕ್ ಕಳಿತ್ ಜಾಲಾಂ ಆಸ್ತಾಂ, ಟಿಪ್ಪು ಜಯಂತಿಯೊ  ವಿಷಯ್ ಘೆವ್ನ್ ಕಾಂಗ್ರೆಸ್ ಸರ್ಕಾರಾಕ್ ಅಲ್ಪ್'ಸಂಖ್ಯಾತಾಂಕ್ ಪುಸ್ಲಾಂವ್ಕ್ ಪಳೆತಾ ಮ್ಹಣ್ ಅಪಪ್ರಚಾರ್ ಕೆಲ್ಲ್ಯಾಂತ್ ಆಮ್ಕಾಂ ಚಡ್ ಫಾಯ್ದೊ ನಾಂ ಮ್ಹಳ್ಳೆಂಯೀ ತಾಂಕಾಂ ಸ್ಪಷ್ಟ್ ಜಾಲಾಂ ದೆಕುನ್ ಕಾಂಗ್ರೆಸಾಚ್ಯಾ ವಿರೋಧ್ ವಾಪಾರುಂಕ್ ತಾಣಿಂ ಏಕ್ ನವೆಂ ಹಾತೆರ್ ವಾಪಾರುಂಕ್ ಸುರು ಕೆಲಾಂ - ಕಾಂಗ್ರೆಸಾಕ್ ಕ್ರೀಸ್ತಾಂವಾಚೊ ಹುಸ್ಕೊ ಭಿಲ್ಕುಲ್ ನಾಂ ದೆಕುನ್, ಹಜಾರೊಂ ಕ್ರೀಸ್ತಾಂವಾಂಚೊ ಸಂಹಾರ್ ಕೆಲ್ಲ್ಯಾ ಟಿಪ್ಪುಕ್ ಹೀರೋ ಕರ್ನ್ ತಾಂಚ್ಯಾ ಧಾರ್ಮಿಕ್ ಭಾವನಾಂಕ್ ದುಖಯ್ಲಾಂ - ಮ್ಹಳ್ಳೊ ಅಪಪ್ರಚಾರ್.! ಕ್ರೀಸ್ತಾಂವಾಚ್ಯಾ ತೆಂಪ್ಲಾಂಕ್ ಫಾತರ್ ಉಡಯ್ತಾನಾ ಕ್ರೀಸ್ತಾಂವಾಂಚೆರ್ ತಾಂಕಾಂ ನಾತ್ಲೆಲಿ ಭಿರ್ಮತ್ ಆತಾಂ ಟಿಪ್ಪು ಜಯಂತಿ ಆಚರಣ್ ಕರ್ತಾನಾ ಎಕಾಚ್ಛಾಣೆ ಜೀವ್ ಜಾಲ್ಯಾ.. ಹೆಂ ಇತ್ಲೆಂ ಪಾವಾನಾತ್'ಲ್ಲ್ಯಾಕ್ ಆಮ್ಚೆ ಮಧ್ಲೊ ಎಕ್ಲೊ ಆಪ್ಣಾಕ್'ಚ್ ಬರಯ್ಣಾರ್, ಸಂಪಾದಕ್, ಪ್ರಕಾಶಕ್, ಇತಿಹಾಸ್'ಕಾರ್ ಮ್ಹಣ್ ಆಪವ್ನ್ ಘೆಂವ್ಚೊ ಸವಾಯ್ ಬುದ್ವಂತ್, ಕ್ರೀಸ್ತಾಂವಾಂಕ್ ಕಾಂಗ್ರೆಸಾಚ್ಯಾ ವಿರೋಧ್ ಸಾಳ್ವಂವ್ಚೆಂ ಹರ್ ಪ್ರೇತನ್ ಕರಿತ್ ಆಸಾ, ಫೇಸ್ಬುಕಾಚೆರ್ ಲಾಂಬ್ ಲಾಂಬ್ (ತೆಂಯೀ ಕನ್ನಡ ಭಾಶೆಂತ್) ಬರವ್ನ್.! ಹ್ಯಾ ಸವಾಯ್ ಬುದ್ವಂತಾಕ್ ಬಿ.ಜೆ.ಪಿ. ಚೆರ್ ಮೋಗ್ ಯಾ ಕಾಂಗ್ರೆಸಾಚೆರ್ ಕಾಂಟಾಳೊ ಮ್ಹಣ್ಚ್ಯಾಕೀ,  ಸ್ವಪ್ರಚಾರ್ ಜೋಡ್ನ್ ಘೆಂವ್ಚಿ ಪಿಸಾಯ್ ಚಡ್ ಮ್ಹಳ್ಳೆಂ ಸಕ್ಡಾಂಕ್ ಕಳಿತ್ ಆಸ್ಲೆಂ ದೆಕುನ್ ತ್ಯಾ ಸವಾಯ್ ಬುದ್ವಂತಾಕ್ ಪ್ರತಿಕ್ರಿಯಾ ದೀಂವ್ಕ್ ಯಾ ತಾಂಚೊ ವಿರೋಧ್ ಕರುಂಕ್ ಕೊಣೀ ವಚೊಂಕ್ ನಾ, ಆನಿ ಹೊ ಸವಾಯ್ ಬುದ್ವಂತ್ 'ಕೊಂಕ್ಣೆಂತ್ ಹೊಗ್ಡಾಯಿಲ್ಲೊ ಮಾನ್ ಕನ್ನಡಾಂತ್ ಮೆಳಾತ್'ಗಾಯ್?' ಮ್ಹಳ್ಳ್ಯಾ ಅಬ್ಲೆಸಾನ್ ದೀಸ್ ಗೆಲ್ಲೆಬರಿಂ ಬರ್ಪಾಂಯೀ ಲಾಂಬ್ ಲಾಂಬ್ ಕರಿತ್ ಘೆಲೊ. ತಾಚೆಂ ಬರಪ್ ವಾಚ್ಲೆಲ್ಯಾ ಎಕಾ ದೊಗಾನಿಂ ಮ್ಹಜೆಲಾಗಿಂ 'ನೀವು ಎಂತದು ಮಾರ್ರೇ, ಟಿಪ್ಪು ಜಯಂತಿಯನ್ನು ಸಮರ್ಥಿಸುತ್ತಿದ್ದೀರಿ?  ನಿಮ್ಮವರೇ ಆದ _______ರವರು ಬರೆದುದನ್ನು ಓದಿ, ಟಿಪ್ಪು ಕ್ರಿಶ್ಚಿಯನ್ನರಿಗೆ ಮಾಡಿದ ಅನ್ಯಾಯಗಳನ್ನು ಬಿಡಿಸಿ ಬರೆದಿದ್ದಾರೆ" ಅಶೆಂ ಸವಾಲ್ ಘಾಲೆಂ ದೆಕುನ್, ಹೆಂ ಬರಯ್ಜೆ ಪಡ್ಲೆಂ.!

ಸಾಯ್ಬಾ, ಸಂಪಾದಕ್/ಬರವ್ಪಿ/ಪ್ರಕಾಶಕ್/ಇತಿಹಾಸ್'ಕಾರಾ ತುಜೆತಸ್ಲ್ಯಾ ಚೊರೆಪಟ್ ಮನ್ಶಾಕ್ ಕಿತೆಂ ದಾಖಯ್ಲ್ಯಾರೀ, ಸಮ್ಜಯ್ಲ್ಯಾರಿ ಸಮ್ಜೊಂಚೆಂ ನಾ ದೆಕುನ್ "ಕ್ರೀಸ್ತಾವಾನಿಂ ಟಿಪ್ಪು ವಿರೋಧ್ ಕಸಲೊಚ್ ರಾಜದ್ರೋಹ್ ಕರುಂಕ್ ನಾ ಬದ್ಲಾಕ್ ಟಿಪ್ಪು ಧರ್ಮಾಂದ್ಳೊ ದೆಕುನ್ ಕಿತೆಂಚ್ ಕಾರಣ್ ನಾಸ್ತಾಂ ತಾಣೆಂ ಕ್ರೀಸ್ತಾಂವಾಚೊ ಸಂಹಾರ್ ಕೆಲೊ ಮ್ಹಳ್ಳೊ ವಿಷಯ್ ಸ್ಪಷ್ಟ್ ಕಳಿತ್ ಆಸೊನೀ ಕಾಂಗ್ರೆಸ್ ಸರ್ಕಾರ್ ಟಿಪ್ಪು ಜಯಂತಿ ಆಚರ್ಸಿತಾ" ಮ್ಹಳ್ಳೆಂ ತುಜೆಂ ಉಳ್ಟೆಂ ರಾಜಾಂವ್ ತತ್ಕಾಲಾಕ್ ಮಾನುನ್ ಘೆವ್ನ್‍ಂಚ್ ತುಕಾ ಥೊಡಿಂ ಸವಾಲಾಂ ವಿಚಾರ್ತಾಂ

1. ತುಕಾ ಆನಿ ತುವೆಂ ಸಮರ್ಥನ್ ಕರ್ಚಾ ಬಿ.ಜೆ.ಪಿ ಕ್ ಕ್ರೀಸ್ತಾಂವಾಂಚೆರ್ ಆನಿ ತಾಂಚ್ಯಾ ದೇವ್ ತೆಂಪ್ಲಾಂಚೆರ್ ಎದೊಳ್ ನಾತ್'ಲ್ಲೊ ಹುಸ್ಕೊ ಆತಾಂ ಚುನಾವ್ ಲಾಗಿಂ ಯೆತಾಂ ಯೆತಾಂ ಕಿತೆಂ ಅಚಾನಕ್ ಉದೆಲೊ.? ತೆಂಪ್ಲಾಂಚೆರ್ ಆಕ್ರಮಣ್ ಚಲ್ತಾನಾ ಬಿ.ಜೆ.ಪಿ ಮುಖೆಲಿ ತರೀ ರೆಸಾರ್ಟಾಂತ್ ಅಸ್ಲೆ, ತುಂ ಖಂಚ್ಯಾ ಬಿಳಾಂತ್ ಲಿಪೊನ್ ಬಸ್'ಲ್ಲೊಯ್.?

2. ತುಜ್ಯಾ ಲೆಕಾರ್ ಬಿ.ಜೆ.ಪಿ ಚ್ಯಾ ಧೋರಣಾಂಕ್ ವಿರೋಧ್ ಕೆಲ್ಲೊ ಕಾಂಗ್ರೆಸಾಚೊ ಸಮರ್ಥಕ್/ಏಜೆಂಟ್/ಎಡಬಿಡಂಗಿ ಜಾತಾ, ಜಾಂವ್.! ಪ್ರಸ್ತುತ್ ಪರಿಸ್ಥಿತೆಂತ್ ಕ್ರೀಸ್ತಾಂವಾಂಕ್ ಖಂಚೆಂ ಚಡ್ ಬರೆಂ.? ಅಧಿಕಾರಾಕ್ ಆಯ್ಲ್ಯಾರ್, ಚಡ್ ಕಾಂಯ್ ಕರ್ನಾ ತರೀ ಕ್ರೀಸ್ತಾವಾಂಕ್ ಉಪಾದ್ರ್ ದೀನಾಸ್ತಾಂ ಸುಶೆಗಾನ್ ದೀಸ್ ಕಾಡುಂಕ್ ಸೊಡ್ಚ್ಯಾ ಕಾಂಗ್ರೆಸ್ ಪಾಡ್ತಿಕ್ ಪಾಟಿಂಬೊ ದಿಂವ್ಚೆಂ ಯಾ, ಸುಮಾರ್ ಅಡೆಯ್ಶಿಂ ವರ್ಸಾಂ ಆದಿಂ ಟಿಪ್ಪುನ್ ಕ್ರೀಸ್ತಾಂವಾಚೆರ್ ಹಲ್ಲೊ ಕೆಲ್ಲೊ ಮ್ಹಳ್ಳ್ಯಾ ಎಕಾಚ್ ಕಾರಣಾಕ್ ಲಾಗೊನ್, ಕಾಂಗ್ರೆಸ್ ಸರ್ಕಾರಾಚೊ ವಿರೋಧ್ ಕರ್ನ್, ಇಗರ್ಜಾಂಚೆರ್ ಫಾತರ್ ಮಾರುಂಕ್ ಮ್ಹಣ್'ಂಚ್ ಧರ್ಮಾಂದ್ಳ್ಯಾಂಕ್ ಪೊಸುನ್ ಬಿ.ಜೆ.ಪಿ.ಚ್ಯಾ ಹಾತಾಂತ್ ಅಧಿಕಾರ್ ದಿಂವ್ಚೊ.?

3. 2008 ಮೇಯಾಂತ್ ಬಿ.ಜೆ.ಪಿ ಸರ್ಕಾರ್ ಅಧಿಕಾರಾಕ್ ಆಯಿಲ್ಲೊ ಆನಿ ಮೆಜುನ್ ಪಾಂಚ್ ಮಹಿನ್ಯಾಂ ಭಿತರ್ ಇಗರ್ಜಾಂಚೆರ್ ಹಲ್ಲೊ ಜಾಲ್ಲೊ. ತವಳ್ ಕೇಂದ್ರಾಂತ್ ಯು.ಪಿ.ಎ ಸರ್ಕಾರ್ ಆಸ್ಲೊ ಆನಿ ಕರ್ನಾಟಕಾಂತ್ ಬಿ.ಜೆ.ಪಿ ಸರ್ಕಾರ್ ನವ್ಯಾನ್ ವಿಂಚುನ್ ಆಯಿಲ್ಲೊ ಮಾತ್ರ್.! ತಶೆಂ ಆಸೊನೀ ಧರ್ಮಾಂದ್ಳ್ಯಾಂಕ್ ತಿತ್ಲೆಂ ಧಯ್ರ್! ತರ್, ಆತಾಂ ಕೇಂದ್ರಾಂತ್ ಆಸಾ ಬಿ.ಜೆ.ಪಿ ಚೊ ಸಂಪೂರ್ಣ್ ಬಹುಮತಾಚೊ ಆನಿ ಸರ್ವಾಧಿಕಾರಿ ಧೋರಣಾಂಚೊ ಸರ್ಕಾರ್, ತ್ಯಾ  ವಯ್ರ್ ರಾಜ್ಯಾಂತ್'ಯೀ ಬಿ.ಜೆ.ಪಿ ಸರ್ಕಾರ್ ಪುಣೀ ಯೇತ್ ತರ್ ಕ್ರೀಸ್ತಾಂವಾಂ ವಿರೋಧ್ ಕಿತೆಂ ಪೂರಾ ಘಡೊಂಕ್ ಸಕಾತ್ ಮ್ಹಳ್ಳ್ಯಾಚೊ ಕನಿಷ್ಟ್ ಅಂದಾಜ್ ತರೀ ತುಕಾ ಆಸಾ.?

4. ಜರ್ ಕರ್ನಾಟಕಾಂತ್ ಫುಡ್ಲೊ ಸರ್ಕಾರ್ ಬಿ.ಜೆ.ಪಿ. ಚೊ ಜಾಲೊ ಆನಿ ಕ್ರೀಸ್ತಾಂವಾಂಚೆರ್ ಹಲ್ಲೊ ಆನಿ ಇಗರ್ಜೆಂಚೆರ್ ಆಕ್ರಮಣ್ ಪರತ್ ಜಾಲೆಂ ಆನಿ ತವಳ್ ಆದ್ಲೆಪಾವ್ಟಿಂ ಪೊಲೀಸ್ ಇನ್ಸ್ಪೆಕ್ಟರ್ ಗಣಪತಿ ಆಸ್ಲೆಪರಿಂ ಹ್ಯಾ ಪಾವ್ಟಿಂ ಆನಿ ಕೋಣ್ ಎಕ್ಲೊ ಆಂಗಾರ್ ಖಾಕಿ ಆನಿ ಮೆಂದ್ವಾಂತ್ ಖಾಕಿ ಚಡ್ಡೆಚಿಂ ಧೋರಣಾಂ ಆಸ್ಲಲೊ ಪೊಲೀಸ್ ಇನ್ಸ್ಪೆಕ್ಟರ್ ಮತಾಂಧ್ಳ್ಯಾ ಗೂಂಡಾಂ ಸಾಂಗಾತಾ ಮೆಳೊನ್ ಸ್ತ್ರೀಯೊ, ಭುರ್ಗಿಂ, ಧರ್ಮ್ ಭಯ್ಣಿಂ ಮ್ಹಣ್'ಯೀ ಲೆಕಿನಾಸ್ತಾಂ ಲಾಠಿಚಾರ್ಜ್ ಕರಿತ್ ತರ್ ತಾಣಿಂ ಕೊಣಾಚಿ ಮಜತ್ ಮಾಗ್ಚಿ.? ತುವೆಂ ಧುಂಪಂವ್ಚ್ಯಾ ಬಿ.ಜೆ.ಪಿ ಮುಖೆಲ್ಯಾಂಲಾಗಿಂ ವಾ ಕ್ರೀಸ್ತಾಂವಾಂಚೆರ್ ಹಮ್ಲೊ ಜಾತಾನಾ ಬಿಳಾಂತ್ ಲಿಪೊನ್ ಬಸೊನ್ ಪೂರಾ ಮುಗ್ಧಾಲ್ಯಾ ಉಪ್ರಾಂತ್ ಲಾಂಬ್ ಲಾಂಬ್ ವರ್ದಿ ಬರವ್ನ್ ಮುರಿಯೊ ದಿಂವ್ಚ್ಯಾ ತುಜೆಲಾಗಿಂ.?

5. ಬಿ.ಜೆ.ಪಿ.ಚಿಂ ಧರ್ಮಾದ್ಳಿಂ ಧೋರಣಾಂ ವಿರೋಧ್ ಕರ್ತೆಂಲ್ಯಾಂಕ್ 'ಷಂಡ ಪರಿವಾರ' ಮ್ಹಣ್ತಾಯ್ ತುಂ, ಬರೆಂ! ಆದ್ಲೆಪಾವ್ಟಿಂ ಜಾಲ್ಲ್ಯಾ ಚರ್ಚ್ ಅಟ್ಯಾಕಾಂತ್ ಬಿ.ಜೆ.ಚೊ ಶೀದಾ ಯಾ ಘುಟಾನ್ ಇಲ್ಲೊಸೊಯೀ ಪಾತ್ರ್ ನಾ ಮ್ಹಣ್ ತ್ಯಾಚ್ ಫೇಸ್ಬುಕಾರ್ ಧಯ್ರಾನ್ ಆನಿ ಉಗ್ತ್ಯಾನ್ ಸಾಂಗ್ಶಿ ಗೀ.? ಜರ್ ತುಜ್ಯಾನ್ ಹೆಂ ಸಾಧ್ ನಾ ತರ್ ಬಿ.ಜೆ.ಪಿ ಯಾ ತಾಚ್ಯಾ ಅಂಗ್ ಸಂಸ್ಥ್ಯಾಂ ವಿಶಿಂ 'ಷಂಡ' ಮ್ಹಳ್ಳೊ ಸಬ್ದ್ ವಾಪಾರ್ನ್ (ಸ್ತ್ರೀಯಾಂಚೆರ್ ಹಲ್ಲೊ ಕೆಲ್ಲ್ಯಾಂಕ್ ಹೊ ಸಬ್ದ್'ಯೀ ಉಣೊಂಚ್) ಕೇವಲ್ ಏಕ್ ವಾಕ್ಯ್ ಬರವ್ನ್ 'ತುಂ ಖುದ್ ಷಂಡ ನ್ಹಂಯ್' ಮ್ಹಣ್ ರುಜು ಕರ್ಶಿ ಗೀ.? ಜರ್ ತೆಂಯೀ ತುಜ್ಯಾನ್ ಜಾಲೆಂನಾ ತರ್ ತುಜ್ಯಾ Under Construction ವೆಬ್'ಸಾಯ್ಟಿಂತ್ ದಿಸ್ಪೊಡ್ತೆಂ ಮುರಿಯೊ ದಿಂವ್ಚೆಂ ಪುಣೀ ರಾವಯ್ಶಿಗೀ..?

 ಮಾಕಾ ತರೀ, ಹಾವೆಂ ಪಳೆವ್ನ್ ಸಯ್ತ್ ನೆಣಾಸ್ಚಿಂ ಮ್ಹಜಿಂ ಪೊಣ್ಜೊ-ಪೊಣ್ಜಿ ಕಶಿಂ ಜಿಯೆಲ್ಲಿಂ, ಕಿತೆಂ ಕರ್ತಾಲಿಂ ಆನಿ ಕಶಿಂ ಮೆಲ್ಲಿಂ ಮಣ್ಯಾಕೀ ಚಡ್ ಮ್ಹಜಿಂ ಯೆಂವ್ಕ್ ಆಸ್ಚಿಂ ಭುರ್ಗಿಂ ಆನಿ ನಾತ್ರಾಂ ಕಶಿಂ ಜಿಯೆತೆಲಿಂ, ಕಿತೆಂ ಕರ್ತಲಿಂ ಮ್ಹಳ್ಳೆಂ ಚಡ್ ಗರ್ಜೆಚೆಂ. ಪುರ್ವಿಲ್ಯಾ  ಕ್ರೀಸ್ತಾಂವಾಂಕ್ ಧಣ್ಶಿಲ್ಲ್ಯಾ ಟಿಪ್ಪುಕ್ ಮಾನ್ ಕೆಲ್ಲೆ ವರ್ವಿಂ ಆಯ್ಚ್ಯಾ ಕ್ರೀಸ್ತಾಂವಾಂಚೆಂ ಬರೆಂ ಚಿಂತ್ಚ್ಯಾ ಪಾಡ್ತಿಕ್ ದೋನ್ ವೋಟ್ ಚಡ್ ಪಡೊನ್ ಕೋಮುವಾದಿ ಆನಿ ಮನ್ಶಾಜೀವಾ ವಿರೋಧಿ ಪಾಡ್ತ್ ಅಧಿಕಾರಾ ಥಾವ್ನ್ ಪಯ್ಸ್ ಉರ್ತಾ ತರ್ ಸದಾಂನೀತ್ ಟಿಪ್ಪು ಜಯಂತಿ ಸಂಭ್ರಮುಂಕೀ ಹಾಂವ್ ತಯಾರ್! ತುಮಿಂಯೀ ಸಯ್ ಮ್ಹಣ್ತಾತ್ ತರ್  ಮಹಾನ್ ಬರಯ್ಣಾರ್/ಸಂಪಾದಕ್/ಪ್ರಕಾಶಕ್/ಇತಿಹಾಸ್ ತಜ್ಞ್ Etc Etc ಜಾವ್ನಾಸ್ಚ್ಯಾ ಹ್ಯಾ ಮನ್ಶಾಚ್ಯಾ ಮತಿಕ್ ಬರಿ ಭಲಾಯ್ಕಿ ಲಾಭೊಂ ಮ್ಹಣ್ ಮಾಗಾ...  

Get Well Soon ಬುಡ್ಕುಲೊ ಬಾಬಾ! 

ಹಾವೆಂ ಎಕ್ಲ್ಯಾನ್ ಕಿತ್ಯಾಕ್ ಉಲಯ್ಜೆ...?

ಪಾಟ್ಲ್ಯಾ ದಿಸಾನಿಂ ಆಮ್ಚ್ಯಾ ರಾಜ್ಯಾಂತ್ ಘಡ್‍ಲ್ಲ್ಯಾ ಭೋವ್ ಚರ್ಚಿತ್ ಘಡಿತಾಂಪಯ್ಕಿಂ ಪ್ರಮುಖ್ ಜಾವ್ನಾಸಾ ಡಿ.ವೈ.ಎಸ್ಪಿ ಎಂ.ಕೆ ಗಣಪತಿ ಹಾಚೆಂ ಆತ್ಮಹತ್ಯಾ ಪ್ರಕರಣ್. ಹ್ಯಾ ಗಣಪತಿಕ್ ಆನಿ ಮಂಗ್ಳುರಿ ಕ್ರೀಸ್ತಾಂವ್ ಸಮುದಾಯಕ್ ಲಾಗ್ಶಿಲೊ ಬಾಂಧ್ ಆಸಾ. 2008 ವರ್ಸಾ ರಾಜ್ಯಾಂತ್ ಬಿ.ಜೆ.ಪಿ ಚೊ ಸರ್ಕಾರ್ ಆಸ್ತಾನಾ ಆಮ್ಚ್ಯಾ ಸಮುದಾಯಾಚೆರ್ ಜಾಲ್ಲೊ ಜುಲುಮ್ ಕೊಣೆಂಯೀ ಸುಲಭಾಯೆನ್ ವಿಸರ್ಚೆ ತಸ್ಲೊ ನ್ಹಂಯ್. ಜಾಯ್ತೆಕಡೆನ್ ಅಸಲೊ ಜುಲುಮ್ ಬಿ.ಜೆ.ಪಿ ಕೃಪಾಪೋಷಿತ್ ಬಜರಂಗ ದಳ್ ಆನಿ ಇತರ್ ಸಂಘಟನಾನಿಂ ಕೆಲ್ಲೊ ತರ್ ಥೊಡೆಕಡೆ, ಬಿ.ಜೆ.ಪಿ ಸರ್ಕಾರಾನ್ ಆಪ್ಣಾಚ್ಯಾ ಹುಕ್ಮೆಖಾಲ್ ಕಾಮ್ ಕರ್ಚಾ ಪೊಲಿಸ್ ವ್ಯವಸ್ಥೆಕ್ ಹಾತೆರ್ ಜಾವ್ನ್ ವಾಪಾರ್‍ಲ್ಲೆಂಯೀ ಆಸಾ. ಸರ್ಕಾರಾಚ್ಯಾ ಹ್ಯಾ ಬುರ್ಶ್ಯಾ ಖೆಳಾಂತ್ ಶೀದಾ ಭಾಗಿದಾರ್ ಜಾಲ್ಲಿ ಅಪಕೀರ್ತ್ ಹ್ಯಾ ಗಣಪತಿವಯ್ರ್ ಆಸ್ಲಿ. ಕೋರ್ಡೆಲ್ ಇಗರ್ಜೆಭಿತರ್ ಮಾಗ್ಣೆ ಚಲೊನ್ ಆಸ್ತಾನಾಂಚ್ ಥಂಯ್ಸರ್ ಧಾಡ್ ಘಾಲ್ಲ್ಯಾ ಗಣಪತಿಚ್ಯಾ ಪೊಲೀಸ್ ಪಂಗ್ಡಾನ್ ಮಾಗ್ಣೆಂ ಅರ್ಧ್ಯಾರ್  ರಾವಾಯಿಲ್ಲೆಂ ಆನಿ ಜಮ್ಲೆಲ್ಯಾ ಲೊಕಾನ್ ಭಾಯ್ರ್ ಯೇಶೆಂ ಒತ್ತಾಯ್ ಕೆಲ್ಲಿ, ಆನಿ ಭಾಯ್ರ್ ಯೆತಾಯೆತಾಸ್ತಾನಾ ತರ್ನಾಟೆ, ಸ್ತ್ರೀಯೊ, ಧರ್ಮ್‍ಭಯ್ಣಿಂ, ಭುರ್ಗಿಂ, ವ್ಹಡಾಂ ಕಿತೆಂಚ್ ಲೆಕಿನಾಸ್ತಾಂ ಆಪ್ಲ್ಯಾ ಯುನಿಫೊರ್ಮಾಚೆಂ ಬಳ್ ಲಾಟಿಯೆಮುಖಾಂತ್ರ್ ದಾಕಯಿಲ್ಲೆಂ ಮಾತ್ರ್ ನ್ಹಯ್, ಮುಳಾನ್ ಆರೆಸ್ಸೆಸ್ ಸಂಘಟನಾಚೊ ಸಾಂದೊಚ್ ಜಾವ್ನಾಸ್ಲೆಲ್ಯಾ ಗಣಪತಿನ್ ಆರೆಸ್ಸೆಸ್ ಪೋಷಿತ್ ಸರ್ಕಾರಾಕ್ ಆಪ್ಲಿ ಪುರ್ತಿ ನಿಶ್ಠಾ ದಾಖಯಿಲ್ಲಿ ಆನಿ ಲೊಕಾಕ್ ಪೋಲಿಸ್ ವೆವಸ್ಥೆಚೆರ್ ಆಸ್ಲೆಲಿ ನಾಪಾತ್ಯೆಣಿ ದೊಡ್ತಿ ಕೆಲ್ಲಿ.! ಹ್ಯಾಚ್ ಗಣಪತಿನ್ ಜುಲೈ 7 ತಾರಿಕೆರ್ ಮಡಿಕೇರಿಂತ್ಲ್ಯಾ ಎಕಾ ಲೋಡ್ಜಾಂತ್ ಗಳ್ಪಾಸ್ ಘೆವ್ನ್ ಸಂಸಾರಾಕ್ ಆದೇವ್ಸ್ ಮ್ಹಳೊ.. ಕೆದೊ ವ್ಹಡ್ ದುಸ್ಮಾನ್ ತರೀ ತಾಚ್ಯಾ ಮೊರ್ನಾಥಂಯ್ ಕೊಣೆಂಯೀ ಸಂತೊಸ್ ಪಾವೊಂಕ್ ನಜೊ ಅಶೆಂ ಮ್ಹಣ್ತಾತ್. ಖರೆಂಚ್..! ತ್ಯಾ ದಿಸಾ ಲಾಟಿಯೆಚೆ ಮಾರ್ ಖಾವ್ನ್ ಆಂಗ್ ಸುಜವ್ನ್ ಘೆತ್ಲೆಲ್ಯಾಂಕಡೆನ್, ರಗತ್ ಪಾಜ್ರಾವ್ನ್  ಘೆತ್ಲೆಂಲ್ಯಾಂಕಡೆನ್ ವಿಚಾರ್ಲೆಂ ತರ್ ತಿಂಯೀ ಅಶೆಂಚ್ ಮ್ಹಣ್ತಿತ್ ಕೊಣ್ಣಾ... 

ವಿಡೀಯೋ ಪಳೆಂವ್ಕ್ ಹೊ ಲಿಂಕ್ ವಾಪಾರಾ

ಪುಣ್, ಗಣಪತಿಚೆಂ ಮರಣ್ ಕೇವಲ್ ಎಕಾ ವ್ಯಕ್ತಿಚೆಂ ಮರಣ್ ನ್ಹಯ್, ಬಗಾರ್ ತೆಂ ಮರಣ್ ಎಕಾ ಮನಾಸ್ಥಿತೆಚೆಂ.! ಇಗರ್ಜಾಂಚೆರ್ ಧಾಡ್ ಘಾಲ್ಲ್ಯಾ ಬಜರಂಗದಳ ಯಾ ಹೆರ್ ಖಂಚಾಯೀ ಎಕಾ ಸಂಘಟನಾಚ್ಯಾ ಸಾದ್ಯಾ ಕಾರ್ಯಕರ್ತಾಚೆಂ ಮರಣ್ ನ್ಹಯ್, ಬಗಾರ್ ಲೊಕಾಕ್ ರಾಕ್ವಣ್ ಆನಿ ಪಾತ್ಯೆಣಿ ದೀಜಾಯ್ ಜಾಲ್ಲ್ಯಾ ಎಕಾ ಜವಾಬ್ದಾರೆಭರಿತ್ ವ್ಯಕ್ತಿನ್ ಎಕಾ ಸಂಘಟನಾಚ್ಯಾ ಸಿಧ್ಧಾಂತಾಂಕ್ ಭುಲೊನ್, ಆಪ್ಲ್ಯಾ ವೃತ್ತೆಕ್ ತ್ಯಾ ಸಂಘಟನಾಚೊ ಗುಲಾಮ್ ಕರ್ನ್ ತ್ಯಾ ವೃತ್ತೆಚೆಂ ಪವಿತ್ರ್‍ಪಣ್ ಮಸ್ತುನ್ ಉಡಯ್ಶೆಂ ಕೆಲ್ಲ್ಯಾ ದಳ್ದಿರ್ ಮನಾಸ್ಥಿತೆಚೆಂ ಮರಣ್ ಹೆಂ! ಅಸಲ್ಯಾ ಮನಾಸ್ಥಿತೆಚೆಂ ಅಂತ್ಯ್ ಜಾತಾನಾ ಕೊಣಾಕೀ ಜರ್ ಸಂತೊಸ್ ಜಾಲೊ ತರ್ ತೇಂವಿ ಸಹಜ್ ಮ್ಹಣ್ಯೆತ್, ಅಶಿ ಮ್ಹಜಿ ಖಾಸ್ಗಿ ಅಭಿಪ್ರಾಯ್.! 

    ಆಯ್ಚೊ ಕಾಳ್ ಸ್ಮಾಟ್‍ಫೋನಾಂಚೊ.! ದಾಂಬ್‍ಲ್ಲ್ಯಾ ಎಕಾ ಖಿಣಾಭಿತರ್ ಸಂಸಾರ್ ಭೊಂವ್ಡಾಂವ್ಚಿ ತಾಕತ್ ಆಸ್ಚ್ಯಾ ಹ್ಯಾ ಸ್ಮಾರ್ಟ್‍ಫೋನಾಂನಿ ದಿಲ್ಲೆಂ ವಡ್ಲೆಂ ಭೆಸಾಂವ್ ಮ್ಹಳ್ಯಾರ್ Social Media Activism ಯಾ ಸಾಮಾಜಿಕ್ ಮಾಧ್ಯಮಾನಿಂ ಕ್ರೀಯಾಶೀಳತಾ.! ಸಾದ್ಯಾ ಉತ್ರಾನಿಂ ಸಾಂಗ್ಚೆಂ ತರ್, ಫೇಸ್ಬುಕ್, ಟ್ವೀಟರ್, ವಾಟ್ಸಾಪ್ ತಸಲ್ಯಾ ಸಾಮಾಜಿಕ್ ತಾಣಾನಿಂ ಖಂಚಾಯೀ ಎಕಾ ನಿರ್ದಿಷ್ಟ್ ವಿಶಯಾಚೆರ್ ಚರ್ಚಾ ಚಲಂವ್ಚಿ, ಎಕಾ ಘಡಿತಾಕ್ ಆಪ್ಲೊ ಸಹಮತ್ ಯಾ ವಿರೋಧ್ ವೆಕ್ತ್ ಕರ್ಚೊ, ಆಪ್ಲೆಂ ಚಿಂತಾಪ್ ಉಗ್ತ್ಯಾನ್ ವೆಕ್ತ್ ಕರ್ನ್ ಹೆರಾಂಕ್ ತ್ಯಾ ವಿಶಿಂ ಕಳಿತ್ ಕರ್ನ್ ಎಕಾ ವಿಶಯಾಚೆರ್ ಜಾಗೃತಿ ಉಟಂವ್ಚಿ, ತ್ಯಾ ಚಿಂತ್ಪಾಭೊಂವಾರಿ ಲೋಕಾಭಿಪ್ರಾಯ್ ಜಮವ್ನ್, ವೆವಸ್ತೆಚೆರ್ ದಬಾವ್ ಹಾಡ್ಚೊ - ಒಟ್ಟಾರೆ ಎಕಾ ಕಾಳಾರ್ ಪತ್ರಾಂಕ್ ಆನಿ ಪತ್ರಕಾರಾಂಕ್ ಮಾತ್ರ್ ಮ್ಹಣ್ ಸೀಮಿತ್ ಮ್ಹಣ್ ಆಸ್ಲೆಲೆಂ ಕಾಮ್ - ಪ್ರಜಾತಂತ್ರಾಚಿ ರಾಕ್ವಣ್ ಕರ್ಚೆಂ.! ಪ್ರಸ್ತುತ್ ಸಮಾಜೆಂತ್ Social Media Activism  ಸಕಾಳಿಕ್ ಆನಿ ಭೋವ್ ಚರ್ಚಿತ್. ಸಾಮಾಜಿಕ್ ಜಾಳಿಮಾಧ್ಯಮಾನಿಂ ಉಟಯಿಲ್ಲ್ಯಾ ನವ್ಯಾ ಚಿಂತ್ಪಾಂಕ್ ಲಾಗೊನ್ ಮಹತ್ವಾಚಿಂ ಘಡಿತಾಂ ಘಡ್ಲ್ಯಾಂತ್, ಘಡ್ತೇ ಆಸಾತ್.! 

ಸೋಶಿಯಲ್ ಮೀಡಿಯಾಚಿ ವ್ಹಳಕ್ ಮಾಕಾ ಜಾಲ್ಲ್ಯಾ ತವಳ್ ಥಾವ್ನ್ ಆಜ್ ಪರ್ಯಾಂತ್ ಹಾಂವ್ Social Media Activism  ತ್ ಸಕ್ರಿಯ್ ಆಸಾಂ, ವೆಳಾಕಾಳಾ ಫರ್ಮಾಣೆ ಪ್ರಚಲಿತ್ ಘಡಿತಾಂಕ್ ಸ್ಪಂದನ್ ಕರ್ಚೊ ಹವ್ಯಾಸ್ ಹಾವೆಂ ಭಾಂದುನ್ ಹಾಡ್ಲಾ. ಪುಣ್ ಮ್ಹಜ್ಯಾ ಗುಮಾನಾಕ್ ಆಯಿಲ್ಲೆ ಫರ್ಮಾಣೆಂ ಆಮ್ಚೊ ಸಮುದಾಯ್ Social Media Activism ತ್ ಪಾಟಿಂ ಆಸಾ, ಆನಿ ಭೋವ್ ಚರ್ಚಿತ್ ಸಾಮಾಜಿಕ್ ವಿಶಂಯಾಚ್ಯಾ ಮಟ್ಟಾಕ್ ಸಾಂಗ್ಚೆಂ ತರ್  ನಿಷ್ಕ್ರಿಯ್ (Inactive) ಆಸಾ. ವಯ್ರ್ ಹಾವೆಂ ಉಲ್ಲೇಖ್ ಕೆಲ್ಲೆಂ ಡಿ.ವೈ.ಎಸ್ಪಿ ಗಣಪತಿಚೆಂ ಆತ್ಮ್ ಹತ್ಯಾ ಪ್ರಕರಣ್ ನಿಯಾಳ್ತಾನಾ ಮ್ಹಜ್ಯಾ ಚಿಂತ್ಪಾಕ್ ಬಳ್ ಮೆಳ್ತಾ. ಗಣಪತಿಚ್ಯಾ ಮೊರ್ನಾ ಪಾಟ್ಲ್ಯಾನ್ ರಾಜಕೀಯ್ ಹುನ್ನರ್ ಆಸಾ ತೆಂ ಸ್ಪಷ್ಟ್. ಆನಿ ಹ್ಯಾ ರಾಜಕೀಯ್ ಹುನ್ನರಾಚೊ ಏಕ್ ಗಾಂಚ್ ಇಗರ್ಜೆಂಚೆರ್ ಧಾಡ್ ಘಾಲ್ಲ್ಯಾ ಘಡಿತಾಂಸವೆಂ ಶೀದಾ ಘಡ್ಸಾತಾ. ಕಿತ್ಯಾಕ್ ಗಣಪತಿನ್ ಮೊರ್ಚ್ಯಾ  ಥೊಡ್ಯಾಚ್ ಘಂಟ್ಯಾಂಪಯ್ಲೆಂ ಟಿ.ವಿ. ಚಾನೆಲಾಕ್ ದಿಲ್ಲ್ಯಾ ಸಂದರ್ಶನಾಂತ್ ಪುರ್ವಿಲೊ ಗೃಹಮಂತ್ರಿ ಜಾವ್ನಾಸ್‍ಲ್ಲ್ಯಾ ಕೆ.ಜೆ. ಜೋರ್ಜ್ ಆನಿ ಆಪ್ಲ್ಯಾ ಹೆರ್ ದೋಗ್ ಉಂಚ್ಲ್ಯಾ ಅಧಿಕಾರಿಂಚಿಂ ನಾಂವಾಂ ಉಲ್ಲೇಖ್ ಕರ್ನ್ ಆಪ್ಣಾಕ್ ಕಾಂಯ್ ಕೀಸ್ ಘಡ್ಲೆಂ ತರ್ ತಾಕಾ ಹೆ ತೇಗ್ ಮಾನೆಸ್ತ್ ಕಾರಣ್ ಜಾವ್ನಾಸ್ತೆಲೆ ಮ್ಹಣ್ ವಾಕ್ಮುಲ್ ದಿಲ್ಲೆಂ.! ಜಾತಿ ಆಧಾರಾಚೆರ್ ಲೇಕ್ ಘಾಲೆಂ ತರ್ ಕೆ.ಜೆ. ಜೋರ್ಜ್ ಆಮ್ಚ್ಯಾ ಸಮುದಾಯಾಚೊ ಪ್ರತಿನಿಧಿ ಜಾತಾ, ಆನಿ ಇಗರ್ಜ್ ಗಲಾಟ್ಯಾಂತ್ ಗಣಪತಿಚೊ ಪಾತ್ರ್ ಸರ್ವಾಂಕ್ ಕಳಿತ್ ಆಸಾ ಆಸ್ತಾಂ, "ಕೊಂಗ್ರೆಸ್ ಪಾಡ್ತ್ ರಾಜ್ಯಾಂತ್ ಅಧಿಕಾರಾಕ್ ಯೆತಚ್ ಕೆ.ಜೆ. ಜೋರ್ಜಾಕ್ ಗೃಹಮಂತ್ರಿ ನೆಮ್ಲೊ, ಆನಿ ಜೋರ್ಜಾನ್ ಆಪ್ಲ್ಯಾ ಸಮುದಾಯಾಚೆರ್ ಜಾಲ್ಲ್ಯಾ ಹಮ್ಲ್ಯಾಚೆಂ ಬದ್ಲಾಮ್ ಕಾಡುಂಕ್ ಮಾಕಾ ಟಾರ್ಗೆಟ್ ಕೆಲೊ, ಆನಿ ಪಾಟ್ಲ್ಯಾ ತೀನ್ ವರ್ಸಾನಿಂ ವಿವಿಧ್ ರಿತಿನಿ ಆಪ್ಣಾಕ್ ಮಾನಸಿಕ್ ಹಿಂಸಾ ದಿಲಿ" ಅಶೆಂ ಮ್ಹಣ್ ಗಣಪತಿನ್ ನ್ಯೂಸ್ ಚಾನೆಲಾಕ್ ದಿಲ್ಲೆಂ ತೆಂ ವಾಕ್ಮುಲ್ ವಿರೋಧ್ ಪಾಡ್ತೆಂಕ್, ಬಿ.ಜೆ.ಪಿ ಕ್ ಆನಿ ಪ್ರತ್ಯೇಕ್ ಜಾವ್ನ್ ಸಂಘ್‍ಪರಿವಾರಾಚ್ಯಾ ಸಮರ್ಥಕಾಂಕ್ 'ಭಾಜ್‍ಲ್ಲೆಂ ಮೆಳ್ಳೆ'ಪರಿಂ ಜಾಲೆಂ. ಗಣಪತಿಕ್ ಆನಿ ಚರ್ಚ್ ಅಟ್ಯಾಕಾವೆಳಾರ್ ತಾಣೆಂ ದಾಖಯಿಲ್ಲ್ಯಾ ಧೋರಣಾಂಕ್ ಪಾಟಿಂಬೊ ವೆಕ್ತ್ ಕರುನ್ ಕೊಂಗ್ರೆಸ್ ಪಾಡ್ತಿಚೆರ್ ರಾಜಕೀಯ್ ದಾಳ್ ಶಿಜಂವ್ಕ್ ಸುರು ಕರ್ಚಾ ಬರಾಬರ್ ಮಂಗ್ಳುರಿ ಕಥೊಲಿಕಾಂಚೆರ್ ಫಟ್ ಆಪ್ರಾಧ್ ಮಾಂಡುನ್ "ಫಾತೊರ್, ದೊಣ್ಣೆ ಘೆವ್ನ್ ಇಗರ್ಜೆ ಭಿತರ್ ಜಮ್‍ಲ್ಲ್ಯಾ ಗೂಂಡಾಂಚೆರ್, ಲಾಠಿಚಾರ್ಜ್ ಕರಿನಾಸ್ತಾಂ ಕಿತೆಂ ತಾಂಚ್ಯಾ ಗಳ್ಯಾಕ್ ಫುಲಾಂಝೆಲೊ ಘಾಲಿಜೆ ಆಸ್ಲೊಗೀ" ಮ್ಹಳ್ಳೆಂ ರಾಜಾಂವಿಕ್ ಪುಣ್ ಖರೋಖರ್ ಫಟ್ ಚಿಂತಾಪ್ ಲೊಕಾಮತಿಂತ್ ಭರ್ನ್ ಕಥೊಲಿಕ್ ಸಮುದಾಯಾಕ್ ಹಲ್ಕ್ ಕರ್ನ್ ಸೋಶಿಯಲ್ ಮೀಡಿಯಾಚೆರ್ ಬರಂವ್ಕ್ ಸುರು ಕೆಲೆಂ. ಹಾಚ್ಯಾ ಪಯ್ಲೆಂ ಗಣಪತಿಚ್ಯಾ ಮೊರ್ನಾ ಬರಾಬರ್ ತಾಣೆಂ ಕೆಲ್ಲ್ಯಾ ಜುಲುಮಾಚೊ ಉಗ್ಡಾಸ್ ಕಾಡುನ್, ತಾಕಾ ಭೊಗ್ಸುನ್, ತಾಚ್ಯಾ ಆತ್ಮ್ಯಾಕ್ ಸಾಸ್ಣಾಚೊ ವಿಶೆವ್ ಆಶೆವ್ನ್ ಜಾಯ್ತೆ 'ರೆಸ್ಟ್ ಇನ್ ಪೀಸ್' ಸಂದೇಶ್ ಆಮ್ಚ್ಯಾ ಕಥೊಲಿಕ್ ಭಾಂವ್ಡಾನಿ, ಪ್ರತ್ಯೇಕ್ ಜಾವ್ನ್ ದೇಶ್-ವಿದೇಶಾಂತ್ಲ್ಯಾ ಯುವಜಣಾನಿಂ ಸೋಶಿಯಲ್ ಮಿಡಿಯಾಚೆರ್ ಬರವ್ನ್ ಕಾಂಯ್ ಥೊಡಿ ಪ್ರತಿಕ್ರಿಯಾ ದಾಖಯಿಲ್ಲಿ ತರೀ, ಏಕ್-ದೋನ್ ದಿಸಾಂ ಭಿತರ್ ಸವ್ಕಾಸ್ ಸಕ್ಕಡ್ ಥಂಡ್ ಪಡ್ಲೆಂ. 'ರೆಸ್ಟ್ ಇನ್ ಪೀಸ್' ಸಂದೇಶ್ ಬರಯಿಲ್ಲಾ ಆಮ್ಚ್ಯಾ ಕ್ರೀಸ್ತಾಂವ್ ಭಾಂವ್ಡಾನಿಂ, ಇಲ್ಲೆಶೆಂ ಮುಕಾರ್ ವಚೊನ್ ಚರ್ಚ್ ಅಟ್ಯಾಕಾತವಳ್ ಗಣಪತಿನ್ ಕೆಲ್ಲ್ಯಾ ಖೊಟ್ಯಾ ಕರ್ತುಂಬಾಂಚೊ ಪ್ರಚಾರ್ ಜಾರಿಯೆರ್ ದವರ್ನ್, 'ತಾಚ್ಯಾ ಮೊರ್ನಾನಿಮ್ತಿಂ ತಾಚ್ಯಾ ಕುಟ್ಮಾಕ್ ಸೊಡ್ಲ್ಯಾರ್ ಸಮಾಜೆಕ್ ಕಾಂಯ್ ವಡ್ಲೊ ನಶ್ಟ್ ಜಾಂವ್ಕ್ ನಾ' ಮ್ಹಳ್ಳೆಂ ಚಿಂತಾಪ್ ಗೂಂಡ್ ರೊಂಬ್ಚೆಪರಿಂ ಕರಿಜಾಯ್ ಆಸ್ಲೆಂ - ಅಶೆಂ ಮಾಕಾ ಭೊಗ್ತಾ. ಅಸಲಿ ಏಕ್ ಪ್ರತಿಕ್ರಿಯಾ ಆಮಿ ದಾಖಯಿಲ್ಲ್ಯಾನ್ ಸರ್ಕಾರಾಚೆರ್ ಪಡ್ಚೊ ದಬಾವ್ ಉಣೊ ಜಾತೊ ಆನಿ ಜೋರ್ಜಾನ್ ಆಪ್ಲ್ಯಾ ಮಂತ್ರಿ ಪದ್ವೆಕ್ ರಾಜಿನಾಂಮೊ ದೀಂವ್ಕ್ ಪಡ್ತೊ ನಾ ಮ್ಹಣ್ ಹಾಂವ್ ಮ್ಹಣಾನಾ, ಪುಣ್ 'ಕ್ರೀಸ್ತಾಂವ್ ಲೋಕ್ ಸಂವೇದನ್ ಹೊಗ್ಡಾಯಿಲ್ಲೊ ಲೋಕ್, ತಾಂಚೆ ವಿರೋಧ್ ಕಿತೆಂ ಕೆಲ್ಯಾರೀ ಚಲ್ತಾ. ಕರ್ಚೆಂ ಪೂರಾ ಕರ್ನ್ ಉಗ್ತ್ಯಾನ್ ತಾಂಕಾಂ ಗೂಂಡಾ, ರೌಡಿ ಮ್ಹಣ್ ಆಪಯ್ಲ್ಯಾರೀ ಚಲ್ತಾ' ಮ್ಹಣ್ಚೆಂ ಲೊಕಾಮತಿಂತ್ಲೆಂ ಚೂಕ್ ಚಿಂತಾಪ್ ಪುಸುನ್ ಉಡಂವ್ಕ್ ಪ್ರೇತನ್ ಖಂಡಿತ್ ಕರ್ಯೆತೆಂ.!

ಪುಣ್ ಅಶೆಂ ಘಡ್ಲೆಂ ನಾ.! ತಾಚ್ಯಾಕೀ ವಿಶೇಸ್ ಗಜಾಲ್ ಮ್ಹಳ್ಯಾರ್, ಕೊಂಕ್ಣೆಂತ್ ಕ್ರೀಸ್ತಾಂವ್ ಲಾಯಿಕಾನಿಂ ತಶೆಂ ಧಾರ್ಮಿಕಾನಿಂ ಚಲಂವ್ಚಿಂ ಇತ್ಲಿಂ ಪತ್ರಾಂ ಆಸಾತ್, ಜಾಳಿಜಾಗೆ ಆಸಾತ್, ಪುಣ್ ಕೊಣೆ ಪುನೆಗೆಲ್ಲ್ಯಾನ್ ಹಳ್ತಾಚಿ ಏಕ್ ಖೊಂಕ್ಲಿ ಸಯ್ತ್ ಕಾಡ್ಲಿ ನಾ. ಕಿತ್ಲೆಶೆ ಕೊಂಕ್ಣಿ ಕ್ರೀಸ್ತಾಂವ್ ಕಲಾಕಾರ್ ಸಂಗೀತ್, ಟಿ.ವಿ, ಸಿನೇಮಾ ತಸಲ್ಯಾ ಪ್ರಭಾವಿಕ್ ಮಾಧ್ಯಮಾಮುಖಾಂತ್ರ್ ಲೊಕಾಮೊಗಾಳ್ ಆಸಾತ್, ತಾಣಿಂಯೀ ಕಾಂಯ್ ಹ್ಯಾ ವಿಶಿಂ ಗುಮಾನ್ ದಿಲೆಂ ನಾ.  ಆಪಾಪ್ಣೆಂ ಚಲಂವ್ಚ್ಯಾ/ವಾವುರ್ಚಾ ಮಾಧ್ಯಮಾನಿಂ ಪ್ರತಿಕ್ರಿಯಾ ದೀಂವ್ಕ್ ತಾಂಕಾಂ ಆಡ್ಕಳ್ಯೊ ಆಸ್‍ಲ್ಲ್ಯೊ ಜಾಂವ್ಕ್ ಪುರೊ, ತೆಂ ಸಮ್ಜಾತಾ. ಪುಣ್ ಸೋಶಿಯಲ್ ಮೀಡಿಯಾಚೆರ್ ಏಕ್ ಖಾಸ್ಗಿ ಅಭಿಪ್ರಾಯ್ ದಾಖಲ್ ಕರುಂಕ್ ತಾಂಚ್ಯಾನ್ ಜಾಲೆಂನಾ ಕಿತ್ಯಾಕ್.? ಕಶೆಂ ಕಶೆಂ ಚಿಂತ್ಲ್ಯಾರೀ ಮಾಕಾ ಸಮ್ಜಾಣಾ.!! ಗಣಪತಿಚೆಂ ಮೊರ್ನಾ ಘಡಿತ್ ಹಾವೆಂ ದಿಲ್ಲೆಂ ಏಕ್ ಉದಾಹಾರಣ್ ಮಾತ್ರ್. ಅಸಲಿಂ ಆಮ್ಚ್ಯಾ ಸಮುದಾಯಕ್ ಲಾಗ್ಶಿಲ್ಯಾನ್ ಲಾಗು ಜಾಂವ್ಚಿ ಜಾಯ್ತಿಂ ಘಡಿತಾಂ ಹಾಚ್ಯಾ ಆದಿಂ ಘಡ್ಲ್ಯಾಂತ್, ಆನಿ ಸೋಶಿಯಲ್ ಮೀಡಿಯಾಚ್ಯಾ ಮಟ್ಟಾಕ್ ಸಾಂಗ್ಚೆಂ ತರ್ - ಚಡಾವತ್ ಹರ್ಯೆಕ್ ಘಡಿತಾನಿಂ ಅಸಲಿಚ್ ನೀರಸ್ ಪ್ರತಿಕ್ರಿಯಾ ಆಮಿ ವೆಕ್ತ್ ಕೆಲ್ಯಾ. ಕೊಣೆಂ ಎಕ್ಲ್ಯಾಣ್ ಕಾಂಯ್ ಬರವ್ನ್ ಇಲ್ಲಿಶಿ ಜಾಗ್ ಹಾಡುಂಕ್ ಪಳೆತಾನಾ, ತಾಕಾ ಸ್ಪಂದನ್ ಕರುಂಕೀ ಶೆಂಭರ್ ಪಾವ್ಟಿಂ ಚಿಂತುನ್, "ಕೊಣಾಕೀ ಕಾಂಯ್ ಬೆಜಾರ್ ಜಾತಾಗೀ..?, ಆಪ್ಣಾಕ್ ಕಾಂಯ್ ರಿಸ್ಕ್ ಆಸಾಗೀ..?, ಫಲಾಣ್ಯಾ ಮನ್ಶಾಕ್ ದುಕಾತ್‍ಗೀ..? ಆಪ್ಣಾಚ್ಯಾ ಬಿಸಿನೆಸಾಚೆರ್ ಕಾಂಯ್ ಪರಿಣಾಮ್ ಜಾಯ್ತ್‍ಗೀ..?" ಆನಿ ಕಿತೆಂ ಕಿತೆಂ ಲೆಕಾಚಾರಾಂ ಘಾಲ್ನ್ ಏಕ್ ಬಸ್ತಾಂವ್. ಆಮ್ಚೆಂ ರಾಜಾಂವ್ ಎಕ್ದಮ್ ಶೀದಾ ಆನಿ ಸಿಂಪಲ್ - ಕ್ರೀಸ್ತಾಂವಾಂಕ್ ಕೊಣೀ ಗೂಂಡಾ ಮ್ಹಣುಂ ಯಾ ಗಾಡಾಂವ್ ಮ್ಹಣುಂ, ಮಾಕಾ ಕಿತೆಂ ಫರಕ್ ಪಡ್ತಾ..? ತಾಣೆಂ ಮಾಕಾ ಎಕ್ಲ್ಯಾಕ್ ಮ್ಹಳ್ಳೆಂ ನ್ಹಯ್, ಸಕ್ಕಡ್ ಕ್ರೀಸ್ತಾಂವಾಂಕ್ ಮ್ಹಳ್ಳೆಂ, ತರ್ ಹಾವೆಂ ಎಕ್ಲ್ಯಾನ್ ಕಿತ್ಯಾಕ್ ಉಲಯ್ಜೆ..? 

'ಆಪುಣ್ ಆಪ್ಣಾಕ್ ದೇವ್ ಸಮೇಸ್ತಾಂಕ್' ಮ್ಹಳ್ಳೆಂ ಚಿಂತಾಪ್ ಮತಿಂತ್ ದವರ್ನ್, ಅನ್ಯಾಯ್, ಆನೀತಿ ವಿರೋಧ್ ತಾಳೊ ಕಾಡ್ಚೆಂ ಧಯ್ರ್ ಘೆನಾಸ್ತಾಂ, ಸೊಂತಾ ದೀಸ್ ಬಾವ್ಟೊ ಉಬವ್ನ್, ಹರ್ದೆಂ ಫುಲವ್ನ್ ಸೆಲ್ಯೂಟ್ ಮಾರ್ನ್ ಆಮಿ ಸಂಭ್ರಮ್ಚೊ ಸ್ವಾತಂತ್ರೋತ್ಸವ್ ಆಮ್ಕಾಂ ಸುಟ್ಕೆಚೊ ನೀಜ್ ಅನ್ಭೋಗ್ ದೀಂವ್ಕ್ ಸಕಾತ್.??

-ಓಸ್ಕರ್ ವಗ್ಗ

(ಹೆಂ ಲೇಖನ್ ದಿರ್ವೆಂ ಪತ್ರಾಚ್ಯಾ ಅಗೋಸ್ತ್ 2016 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)

ಪಯ್ಲೆಂ ಮನಿಸ್ ಆನಿ ಮನ್ಶಾಪಣ್ ಉಪ್ರಾಂತ್ ದೇವ್ ಆನಿ ದೆವಾಸ್ಪಣ್...

ರೋಶನ್ ಡಿಸೋಜಾ ಬೆಳ್ಮಣ್ ಆನಿ ಹ್ಯಾರಿ ಕೊರೆಯಾ ಹಾಂಣಿ ನಿರ್ಮಿಲ್ಲೊ ಕೊಂಕ್ಣಿ ವೀಡಿಯೋ ಆಲ್ಬಮ್ ಮೊಗಾಕ್ ಆಶೆತಾಂ ಆಯ್ಲೆವಾರ್ ಮೊಕ್ಳಿಕ್ ಜಾಲ್ಲೊ. ಚಾರ್ ಆಪುರ್ಬಾಯೆಚಿಂ ಪದಾಂ ತಶೆಂ ಏಕ್ ಮಟ್ವೆಂ ಫಿಲ್ಮ್ ಆಟಾಪ್ಚೊ ಹೊ ಆಲ್ಬಮ್ ಬರೊಚ್ ಲೊಕಾಮೊಗಾಳ್ ಜಾಲಾ. ಕೊಂಕ್ಣೆಂತ್ ವೀಡಿಯೊ ಆಲ್ಬಮ್ ಯೆಂವ್ಚೆಂ ಹೆಂ ಪಯ್ಲೆಪಾವ್ಟಿಂ ಖಂಡಿತ್ ನ್ಹಯ್, ಪುಣ್ ಹ್ಯಾ ಆದಿಂ ಜಿತ್ಲೆ ವೀಡಿಯೋ ಆಲ್ಬಮ್ ಆಯ್ಲ್ಯಾತ್ ತ್ಯಾ ಸರ್ವ್ ಆಲ್ಬಮಾನಿಂ ಲೊಕಾಮೊಗಾಳ್ ಜಾಲ್ಲ್ಯಾ ಪನ್ರ್ಯಾ ಪದಾಂಕ್ ಇಲ್ಲೆಶೆಂ ನವೆಸಾಂವ್ ಪುಸುನ್ ಸಾದರ್ ಕೆಲ್ಲೆಂ.

ಪುಣ್ ಮೊಗಾಕ್ ಆಶೆತಾಂ ಆಲ್ಬಮಾಂತ್ ಆಸ್ಚಿಂ ಪಾಂಚ್ ಪದಾಂಯೀಂ ನವಿಂಚ್, ರೋಶ್ ಬೆಳ್ಮಣ್ ಹಾಣೆಂಚ್ ಉತ್ರಾಂ ಬರವ್ನ್, ತಾಳೆ ಬಸವ್ನ್ ರಚ್‍ಲ್ಲ್ಯಾ ಹ್ಯಾ ಆಲ್ಬಮಾಚೆಂ ಮುಖೆಲ್ ಆಕರ್ಶಣ್ ಜಾವ್ನಾಸಾ - ಹ್ಯಾ ಪದಾಂಸಂಗಿ ಸಾದರ್ ಜಾಲ್ಲೊ ನಾಚ್, ತೊ ನಾಚ್ ಪಿಂತ್ರಾಂವ್ಕ್ ವಿಂಚ್‍ಲ್ಲೆ ಜಾಗೆ (Spot Selection), ಪಿಂತ್ರಾಯಿಲ್ಲಿ ರೀತ್ (Choreography) ಆನಿ ನಿರ್ದೇಶನ್ (Direction). ಹ್ಯಾ ದಿಶ್ಟೆನ್ ಪಳೆತಾನಾ ಹಿ ಕೊವ್ಳಿ ಖಂಚಾಯೀ ಬೊಲಿವುಡ್ ಕೊವ್ಳೆಕ್ ಸೊಡ್ನ್ ದೀನಾ. ಬೆಳ್ಮಣ್‍ಚ್ಯಾ ಗಾದ್ಯಾಮೆರಾಂ ಥಾವ್ನ್ ದುಬಾಯ್ಚ್ಯಾ ಐಶಾರಾಮಿ ಹೊಟ್ಲಾಂಚ್ಯಾ ಸ್ವಿಮ್ಮಿಂಗ್ ಪೂಲಾ ಪರ್ಯಂತ್, ಹರ್ಯೇಕ್ ಪದಾಂಚ್ಯಾ ಉತ್ರಾಂಕ್ ಆನಿ ಸಂಧರ್ಬಾಂಕ್ ಜೊಕ್ತೆ ಜಾಗೆ (Spot) ವಿಂಚುನ್, ಕಲಾಕಾರಾಂಥಾವ್ನ್ ಆಪುರ್ಬಾಯೆಚೆಂ ಸಹಜ್ ನಟನ್ ಸಾದರ್ ಕಚ್ರ್ಯಾಂತ್ ನಿರ್ದೇಶಕ್ ರೋಶ್-ಹೆರಾ ಜೋಡಿ ಕಾಮಿಯಾಬ್ ಜಾಲ್ಯಾ. ಡೊಲ್ವಿನಾಚಾ ಸಂಗೀತಾಕ್ ರೋಶನಾಚ್ಯಾ ಉತ್ರಾಂಚೊ ಮೇಳ್ ಆನಿ ಸರ್ವ್ ಕಲಾಕಾರಾಂಚ್ಯಾ ನಾಚ್ಪಾಚೊ ತಾಳ್ - ಹಾಂಚ್ಯಾ ಮಿಲನಾನ್ ಎಕಾ ಆಪುರ್ಬಾಯೆಚ್ಯಾ ಕೃತಿಯೆಕ್ ಜಲ್ಮ್ ದಿಲಾ.!

  

'ಸೊಭಿತ್ ಹ್ಯಾ ಸಂಸಾರಾಂತ್' ಪದಾಬರಾಬರ್ ಸಾದರ್ ಕೆಲ್ಲ್ಯಾ ನಾಚ್ಪಾಂತ್ ಎಲ್ಟನ್ ಆನಿ ಮೋಹಿನಿ ಸಿನ್ಹಾ ಹಾಣಿಂ ನಟನ್ ಕೆಲ್ಲೆಂ ದ್ರಶ್ಯ್

'ಮೊಗಾಕ್ ಆಶೆತಾಂ' ಟಾಯ್ಟಲ್ ಸೋಂಗಾಚೆರ್ ಸಾದರ್ ಜಾಲ್ಲ್ಯಾ ನಾಚಾಂತ್ ಹ್ಯಾರಿ ಆನಿ ಪಂಗ್ಡಾನ್ ನಟನ್ ಕೆಲ್ಲೆಂ ದ್ರಶ್ಯ್

              'ಕಿತೆಂ ಸಾಂಗೊಂ' ಗಾಯನಾಂತ್ ರೋಶ್-ಹೆರಾ ಹಾಣಿಂ ನಟನ್ ಕೆಲ್ಲೆಂ, ದುಬಾಂಯ್ತ್ ಚಿತ್ರೀಕರಣ್ ಜಾಲ್ಲೆಂ ದ್ರಶ್ಯ್

'ಹಾಯ್ ಹಾಯ್' ಗಾಯನಾಂತ್ಲೆಂ ದ್ರಶ್ಯ್

ರೋಶನಾಚ್ಯೊ ಆಡಿಯೋ ಕೊವ್ಳ್ಯೊ ಆಯ್ಕೊನ್ ಜಾಣಾಸ್ಚ್ಯಾ ಸರ್ವಾಂಕ್ ತಾಚ್ಯಾ ಸಂಗೀತಾಚಿ ಜರೂರ್ ವಳೊಕ್ ಆಸಾ ದೆಕುನ್ ಹ್ಯಾ ಕೊವ್ಳೆಂತ್ಲ್ಯಾ ಪದಾಂ ವಿಶ್ಯಾಂತ್ ಚಡ್ ಪಾತ್ಳಾವ್ನ್ ಬರಂವ್ಚಿ ಗರ್ಜ್ ಮ್ಹಣ್ ಮಾಕಾ ದಿಸಾನಾ. ರೋಶನಾನ್ ತಾಚ್ಯಾ ಸಂಗೀತಾಚಿ ಸದಾಂಚಿ ಕಾಲೆತ್ ಸಾಂಭಾಳ್ಳ್ಯಾ ಆನಿ ಕೊಂಕ್ಣಿ ವೀಡಿಯೋ ಆಲ್ಬಮ್ ಸಾದರ್ ಕರ್ಚಾ ತಾಚ್ಯಾ ನವೀನ್ ಪ್ರೇತನಾಂತ್ ತಾಣೆಂ ಎಕಾ ಹೆಳ್‍ಲ್ಲ್ಯಾ ಕಲಾಕಾರಾನ್ ಮಾತ್ರ್ ಪಾಳ್ಯೆತ್ ತಸಲಿ ವೃತ್ತಿಪರತಾ ದಾಖಯ್ಲ್ಯಾ. ಹೆಂ ನಿಜಾಯ್ಕೀ ಹೊಗ್ಳಿಕೆಕ್ ಫಾವೊ.! ಹ್ಯಾ ಆಲ್ಬಮಾಂತ್ ತಾಣೆಂ ಸಾದರ್  ಕೆಲ್ಲ್ಯಾ ಮಟ್ವ್ಯಾ ಫಿಲ್ಮಾಮುಖಾಂತ್ರ್ ಕ್ರೀಸ್ತಾಂವ್ ಸಮೊಡ್ತ್ ಆನಿ ತಾಕಾ ಲಗ್ತಿ ಥೊಡ್ಯಾ ಆಚರಣಾಂತ್ಲ್ಯಾ ಪೊಕ್ಳೆಪಣಾಚೆಂ ಖಂಡನ್ ಕರ್ನ್ ಥೊಡಿಂ ಸವಾಲಾಂ ಉಟಯ್ಲ್ಯಾಂತ್ ಆನಿ 'ಪಯ್ಲೆಂ ಮನಿಸ್ ಆನಿ ಮನ್ಶಾಪಣ್, ಉಪ್ರಾಂತ್ ದೇವ್ ಆನಿ ದೆವಾಸ್ಪಣ್' ಮ್ಹಳ್ಳೊ ಆಪುರ್ಬಾಯೆಚೊ ಸಂದೇಶ್ ದಿಂವ್ಚೆಂ ಪ್ರೇತನ್ ಕೆಲಾಂ ಆಸ್ತಾಂ ತ್ಯಾ ವಿಶ್ಯಾಂತ್ ಇಲ್ಲೊಸೊ ನಿಯಾಳ್...

ದೇವ್, ಧರ್ಮ್ ಆನಿ ಮನ್ಶಾಪಣಾಂಚೆರ್ ಆಧಾರಿತ್ ಜಾಯ್ತಿಂ ಫಿಲ್ಮಾಂ ಆಯ್ಲ್ಯಾಂತ್ ಆನಿ ಘೆಲ್ಯಾಂತ್. ಆಯ್ಲೆವಾರ್ ರಿಲೀಜ್ ಜಾವ್ನ್ ಯಶಸ್ವಿ ಜಾಲ್ಲೆಂ ಅಕ್ಶಯ್ ಕುಮಾರಾಚೆಂ 'ಓಹ್ ಮೈ ಗಾಡ್' ಯಾ ಪೊರ್ಚಾ ಪೋರ್ ರಿಲೀಜ್ ಜಾಲ್ಲೆಂ ಸಂಸಾರ್‍ಭರ್ ಸಂಚಲನ್ ಉಟಯಿಲ್ಲೆಂ ಅಮೀರ್ ಖಾನಾಚೆಂ ಪಿ.ಕೆ - ಹ್ಯಾ ಯಾದಿಂತ್ ಚಡಾವತ್ ಉಟೊನ್ ದಿಸ್ಚಿಂ ದೋನ್ ಫಿಲ್ಮಾಂ. ಹ್ಯಾ ದೊನೀ ಫಿಲ್ಮಾನಿಂ ಸಂಸಾರಾಚ್ಯಾ ತೀನ್ ಪ್ರಮುಖ್ ಧರ್ಮಾಂಚೊ ಆನಿ ತಾಂಚ್ಯಾ ಆಚರಣಾಂಚೊ ವಿಡಂಬನಾತ್ಮಕ್ ವಿಮರ್ಸೊ ಕೆಲಾ ಆನಿ ತಾಂತುಂಯೀ ಪಿ.ಕೆ ಪಿಂತುರಾಂತ್ ಧರ್ಮಾಚ್ಯಾ ಆಂದ್ಳೆಪಣಾಂತ್ ಮನ್ಶಾಪಣ್ ಕಶೆಂ ದಿಸಾನ್ ದೀಸ್ ನಾಗ್ಡೆಂ ಜಾಯಿತ್ ವೆತಾ ಮ್ಹಳ್ಳೆಂ ಭೋವ್ ಪರಿಣಾಮ್‍ಕಾರಿ ರಿತಿರ್ ಪಿಂತ್ರಾಯ್ಲಾಂ. ಮಂಗ್ಳುರಿ ಕೊಂಕ್ಣಿ ಕಥೊಲಿಕಾಂ ಮಧೆಂ ದೇವ್ ಆನಿ ದೇವ್‍ಮನ್ಶಾಂವಿಶ್ಯಾಂತ್ ಹ್ಯಾ ಆದಿಂಯೀ ಜಾಯ್ತಿಂ ಸವಾಂಲಾಂ ಉಟ್ಲ್ಯಾಂತ್. ಪುಣ್ ಅಶೆಂ ಸವಾಲಾಂ ಉಟಯಿಲ್ಲ್ಯಾಂ ಪಯ್ಕಿ ಪತ್ರಾಂ ಆನಿ ಬರವ್ಪ್ಯಾಂಚೊ ವಾಂಟೊಚ್ ಚಡ್. ಹಾವೆಂಯೀ ಧರುನ್ ಜಾಯ್ತ್ಯಾ ಬರಯ್ಣಾರಾನಿಂ ಹ್ಯಾ ಆದಿಂ ಆಮ್ಚ್ಯಾ ಕ್ರೀಸ್ತಾಂವ್ ಸಮಡ್ತೆವಿಶಿಂ ಆನಿ ಆಚರಣಾವಿಶಿಂ ವಿಮರ್ಸೊ ಕರ್ತಾನಾ ಜಾಯ್ತೊ ವಿರೋಧ್ ಫುಡ್ ಕರುಂಕ್ ಮೆಳ್‍ಲ್ಲೊ ಆಸಾ. ಆಮ್ಚ್ಯಾ ಧಾರ್ಮಿಕ್ ಮುಖೆಲ್ಯಾನಿಂ ತಾಂಚ್ಯಾ ಮುಳಾಕ್ ಕುರಾಡ್ ಪಡ್ತಾ ಮ್ಹಣ್ತಾನಾ ಫಲಾಣ್ಯಾ ಬರಯ್ಣಾರಾಕ್ 'ನಾಸ್ತಿಕ್' ಮ್ಹಣ್ ವೊಲಾವ್ನ್ 'ಭಾವಾಡ್ತಿ' ಲೊಕಾಂಕ್ ಫಟಯಿಲ್ಲೆ ದಾಖ್ಲೆ ಆಸಾತ್. ಬರವ್ಪಿ ಆಂಕ್ವಾರ್ ತರ್, 'ತುಜೆಂ ರೆಸ್ಪೆರ್ ಕೋಣ್ ಕರ್ತಾ ಆನಿ ಕಶೆಂ ಕರ್ತಾ ಪಳೆಯಾಂ' ಮ್ಹಣ್ ಧಮ್ಕಿ ದಿಲ್ಲೆ ದಾಖ್ಲೆಯೀ ಆಸಾತ್. ಅಶೆಂ ಆಸ್ತಾನಾ 'ಕ್ರೀಸ್ತಾಂವ್ ಧರ್ಮಾಚ್ಯಾ ಆಚರಣಾಂ ಬಾಬ್ತಿಂ ಕೊಣಾಚ್ಯಾ ಮತಿಂತ್ ಕಾಂಯ್ ಸವಾಲ್ ಉಟ್ಲೆಂ ತರ್ ತೆಂ ಬರ್ಪಾರುಪಾರ್ ಲೊಕಾಮುಕಾರ್ ಹಾಡ್ಚಾಕೀ ದೃಶ್ಯ್ ರುಪಾರ್ ಸಾದರ್ ಕೆಲೆಂ ತರ್ ಚಡ್ ಪರಿಣಾಮ್ ಜಾಯ್ತ್' ಅಸಲೆಂ ಚಿಂತಾಪ್ ಮಾಕಾ ಕಾಂಯ್ ವರ್ಸಾದಿಂ ಆಯಿಲ್ಲೆಂ. ಬಹುಶ: ಅಸಲೆಂಚ್ ಚಿಂತಾಪ್ ರೋಶನಾಕ್ ಸಯ್ತ್ ಆಸ್‍ಲ್ಲೆಂ ಕೊಣ್ಣಾ - ಆನಿ ತಾಣೆಂ ತೆಂ ಚಿಂತಾಪ್ ಹ್ಯಾ ಮಟ್ವ್ಯಾ ಫಿಲ್ಮಾದ್ವಾರಿಂ ಭೋವ್ ಆಪುರ್ಬಾಯೆನ್ ಕಾರ್ಯಾರುಪಾಕ್ ಹಾಡ್ಲಾಂ.

                 

                 
ಆಂಗಾರ್ ಕಿಲೊಭರ್ ಭಾಂಗಾರ್ ನ್ಹೆಸೊನ್ 'ಮೊಲಾಧಿಕ್ ದಿರ್ವೆಂ, ಭಾಂಗಾರ್ ರುಪೆಂ ನಾ ಸೊಮಿಯಾ ಮಜೆಲಾಗಿಂ' ಮ್ಹಣ್ ಕೊಯರಾಂತ್ ಕಂತಾರ್ ಗಾಂವ್ಚ್ಯಾ ಕೊಗುಳೆಕ್ ದಾಕಂವ್ಚೆ ಬರಾಬರ್ ಹ್ಯಾ ಫಿಲ್ಮಾಚಿ ಸುರ್ವಾತ್ ಜಾತಾ. ಫುಡ್ಲ್ಯಾ ಸತ್ರಾ ಮಿನುಟಾನಿಂ ಹೆಂ ಪಿಂತುರ್ ಮನ್ಶಾಪಣ್ ಆನಿ ದೆವಾಸ್ಪಣಾಚ್ಯಾ ಭೊಂವಾರಿ ಆಪುರ್ಬಾಯೆಚ್ಯೊ ಪಾಸಾಯೊ ಮಾರ್ತಾ...  ಕ್ರೀಸ್ತಾಚ್ಯಾ ಮೌಲ್ಯಂಚ್ಯಾಕೀ 'ಹನಿಸಿಂಗಾ'ಚ್ಯಾ ರ್ಯಾಪ್ ಮ್ಯೂಸಿಕಾಕ್ ಚಡ್ ವೆಂಗ್‍ಲ್ಲಿ - ಕ್ರಿಸ್ಮಸ್ ಮ್ಹಳ್ಯಾರ್ ಸೊರೊ, ಸಿಗ್ರೆಟ್ ಆನಿ ಡಿ.ಜೆ ಪಾರ್ಟಿ ಮಾತ್ರ್ ಮ್ಹಣ್ ಲೆಕ್ಚಿ ತರ್ನಿ ಪಿಳ್ಗಿ; ಕಾಂಬ್ಳಾಂತ್ ರೆಡೆ ಧಾಂವ್ಚಾ ಪ್ರಾಸ್ ಚಡ್ ವೆಗಾನ್ ಅಮೊರಿ ಕರ್ಚೆಂ ಕುಟಾಮ್; ಮಾಗ್ಣ್ಯಾ ವೆಳಾರ್ ಝೆಮೆಂವ್ಚ್ಯಾ, ಮೊಬಾಯ್ಲಾರ್ ಖೆಳ್ಚಾ ನಾತ್ರಾಂಕ್ ತಿದ್ವೊಣಿ ದೀಂವ್ಕ್ ವಚೊನ್ ತಾಂಚ್ಯೊ ಚ್ಯಾರ್ ಗಾಳಿ ಖಾಂವ್ಚಿ, ತರೀ ಪಾಟ್ ಸೊಡಿನಾಸ್ತಾಂ 'ಸಗ್ಳೊ ಸಂಸಾರ್ ಜಿಕೊನ್ ಆತ್ಮೊ ಹೊಗ್ಡಾಯ್ಶಿ ತರ್ ಕಿತೆಂ ಫಾಯ್ದೊ' ಮ್ಹಳ್ಳೊ ಕ್ರೀಸ್ತಾಚೊ ಸಂದೇಶ್ ಉಗ್ಡಾಸಾಕ್ ಹಾಡ್ಚಿ ಕುಟ್ಮಾಚಿ ಪ್ರಾಯ್ವಂತ್ ವ್ಹಡಿಲ್ನ್; ಸಂಭ್ರಮಾಚ್ಯಾ ಕಾರ್ಯಾಂತ್ ಘಟ್ಟ್ ಸೊರೊ ಘೊಟುನ್ ಜೆವ್ಣಾಚೆರ್ ಆಶಿರ್ವಾದ್ ಮಾಗ್ತಾನಾ 'ಸೊಮಿಯಾ ಖಾಣ್ ಜೆವಾನ್ ಮೆಳಾನಾತ್‍ಲ್ಲ್ಯಾಂಚಿ ಭಿರ್ಮತ್ ಪಾವ್' ಮ್ಹಣ್ ಮಾಗ್ಚೊ ವಾಡ್ಯಾಚೊ ಗುರ್ಕಾರ್; 'ತುಮಿ ತೀನ್ ಭಾಗಾಂಚೆಂ ಮಾಸ್ ಘಟ್ಟ್ ಖಾಯಾ ಆನಿ ಜೆವಾಣ್ ಮೆಳಾನಾತ್‍ಲ್ಲ್ಯಾಂಚಿ ಭಿರ್ಮತ್ ಪಾಂವೊಕ್ ಸೊಮಿಯಾಕ್ ಸಾಂಗಾ' ಮ್ಹಣ್ ಜಾಗಂವ್ಚೊ ವಿಮರ್ಶಕ್; ವಾಯ್ನಾಚೊ ಗೊಬ್ಳೊ ಘೆವುನ್ ಭಲಾಯ್ಕಿ ಮಾಗ್ಚೊ ಮ್ಹಣಿಯಾರಿ; ತಾಜ್‍ಮಹಲಾಕ್ ಸಯ್ತ್ ಲಜೆಕ್ ಘಾಲ್ಚೆಂ ಕೊರೊಡಾಂಚೆಂ ದೆವಾಳ್; ಭುರ್ಗ್ಯಾಚ್ಯಾ ಪಯ್ಲ್ಯಾ ಕುಮ್ಗಾರಾಕ್ ಬೆಂಗ್ಳುರ್ಚಾ ಡಿ.ಜೆ ಕ್ ಆನಿ ಮುಂಬಯ್ಚ್ಯಾ ಈವೆಂಟ್ ಒರ್ಗನೈಸರಾಕ್ ಬುಕ್ ಕರ್ನ್ ಆಪ್ಲ್ಯಾ ಧುವೆಚ್ಯಾ ಪಯ್ಲ್ಯಾ ಕುಮ್ಗಾರಾ ದಿಸಾ ಆಪ್ಲ್ಯಾ ದವ್ಲತೆಚೆಂ ಪ್ರದರ್ಶನ್ ಕರುಂಕ್ ತಯಾರಾಯ್ ಕರ್ಚಿ ಆವಯ್; ಧುವೆಚ್ಯಾ ಆತ್ಮಿಕ್ ತಯಾರಾಯೆ ವಿಶಿಂ ಜಾಗ್ವಣಿ ದಿಂವ್ಚೊ ಬಾಪಯ್; ಪಯ್ಲ್ಯಾ ಕುಮ್ಗಾರಾಕ್ ನ್ಹೆಸೊಂಕ್  ಸಾರ್ಕಿ ಮುಸ್ತಾಯ್ಕಿ ನಾತ್‍ಲ್ಲ್ಯಾ ಇಶ್ಟಿಣಿ ವಿಶ್ಯಾಂತ್ ಭಿರ್ಮತ್ ಪಾವೊನ್ ತಾಕಾ ಕುಮಕ್ ಕರುಂಕ್ ಬಾಪಯ್ ಲಾಗಿಂ ಉಪ್ಕಾರ್ ಮಾಗ್ಚೆಂ ನೆಣ್ತುಲೆಂ ಭುರ್ಗೆಂ; ಬಾಪಯ್ನ್ ಕೆಲ್ಲ್ಯಾ ಪರೋಕ್ಶ್ ಭೃಶ್ಟಾಚಾರಾವಿಶಿಂ ತಾಚೆ ದೊಳೆ ಉಜ್ವಾಡಾಂವ್ಚೊ ಪೂತ್; ಮಾಪ್ಳ್ಯಾಪಾಟ್ಲ್ಯಾನ್ ಧಾಂವ್‍ಲ್ಲ್ಯಾ ತರೆಜಾಚ್ಯಾ ಧುವೆವಿಶಿಂ ಖಬ್ರೊ ಉಲಂವ್ಚಿಂ ಕಾರ್ಮಿನ್ ಆನಿ ಸ್ಟೆಲ್ಲಾ; ಮೊಡರ್ನ್ ಡ್ರೆಸ್ ಘಾಲ್ನ್ ಬೊಂವ್ಚ್ಯಾ ತನ್ರ್ಯಾ ಚಲಿಯೆಕ್ ಪಳೆವ್ನ್ 'ಸೆಕ್ಸಿ ಹಲ್ವಾ' ಮ್ಹಣ್ ಲಾಳ್ ಗಳಂವ್ಚೊ ಪುಣ್ ತಾಚ್ಯಾಚ್ ಭಯ್ಣಿಕ್ ಆನ್ಯೇಕ್ಲ್ಯಾ ಚೆಡ್ಯಾನ್ ತ್ಯಾಚ್ ದಿಶ್ಟಿನ್ ಪಳೆವ್ನ್ 'ಬೋಂಬ್' ಮ್ಹಣ್ ಲಾಳ್ ಗಳಯ್ತಾನಾ ತಾಪೊನ್ ಉಚಾಂಬಳ್ ಜಾಂವ್ಚೊ ತರ್ನಾಟೊ... ಅಶೆಂ ಹ್ಯಾ ಮಟ್ವ್ಯಾ ಫಿಲ್ಮಾಂತ್ ಯೇವ್ನ್ ವೆಚೆ ಹರ್ಯೆಕ್ ಕಿರ್ದಾರ್ ಆಮ್ಚೆ ಮಧ್ಲೆಚ್, ಸದಾಂ ಭೆಟ್ಚೆ, ಥಂಯ್ ಹಾಂಗಾ ಪಳೆಂವ್ಕ್ ಮೆಳ್ಚೆ, ಥೊಡೆ ಪಾವ್ಟಿಂ 'ತೊ ಮನಿಸ್ ಹಾಂವ್‍ಚ್' ಮ್ಹಣ್ ಭೊಗ್ಚೆ ತಸಲೆ ಸಯ್ತ್!! ತೆ ಆಪ್ಲೊ ಪಾತ್ರ್ ಖೆಳೊನ್ ಪಾಟಿಂ ವೆತಾನಾ ಮಾತ್ಯಾಕ್ ಏಕ್ ಕೂಟ್ ಘಾಲ್ನ್‍ಚ್ ವೆತಾತ್. ಹ್ಯಾ ಕೂಟಿಚಿ ದೂಖ್ ಆಮ್ಕಾಂ ಚಿಂತುಂಕ್ ಲಾಯ್ತಾ, ಆಟವಾಕ್ ದೆಂವಯ್ತಾ... ಕೋಣ್ ತೊ ಕಿರ್ದಾರ್..? ಮಾಕಾ ಕಿತ್ಯಾತ್ ತೊ ಕಿರ್ದಾರ್ ಇತ್ಲೊಯೀ ಧೊಸ್ತಾ..?? ಅಸಲೆಂ ಏಕ್ ಸವಾಲ್ ಜರೂರ್ ಉಬೆಂ ಜಾತಾ. ಆಟವ್ ಸಂಪ್ತಚ್ 'ಹರ್ಯೆಕ್ ಕಿರ್ದಾರಾಂತ್ ಪ್ರತ್ಯಕ್ಶ್ ಯಾ ಪರೋಕ್ಶ್ ರಿತಿರ್ ಹಾಂವ್ ಆಸಾಂ ದೆಕುನ್ ತೊ ಕಿರ್ದಾರ್ ಬದ್ಲಾಜಯ್ ತರ್ ಪಯ್ಲೆಂ ಹಾವೆಂ ಬದ್ಲಾಜಯ್...' ಮ್ಹಳ್ಳೆಂ ಸತ್ ಮಸ್ತಕಾಭಿತರ್ ಘುಸ್ತಾ.!!

                       

ಜೆಜು ಆನಿ ಪೆದ್ರು ಮಧ್ಲ್ಯಾ ಸಂಭಾಶಣಾಚೆಂ ದ್ರಶ್ಯ್

ಆಮೊರೆಚೆಂ ದ್ರಶ್ಯ್

                   

 ಮಣಿಯಾರ್ಯಾನ್ ವಾಯ್ನಾಚೊ ಗ್ಲಾಸ್ ಹಾತಾಂತ್ ಘೆವ್ನ್ ಭಲಾಯ್ಕಿ ಮಾಗ್ಚೆಂ ದ್ರಶ್ಯ್

                   

                     (ಮೊಡರ್ನ್ ಡ್ರೆಸ್ ನ್ಹೆಸುಲ್ಲ್ಯಾ ಚೆಡ್ವಾಕ್ ಪಳೆವ್ನ್ ಚೆಡ್ಯಾನ್ ಲಾಳ್ ಗಳಂವ್ಚೆಂ  ದ್ರಶ್ಯ್)

                       

ಭುಕೆಲ್ಲ್ಯಾ ಚೆಡ್ಯಾನ್ ಖಾಣಾಚಾ ಆಶೆನ್ ಆಂಗ್ಡಿ ಮುಕಾರ್ ಉಬೆಂ ರಾವುಲ್ಲೆಂ ದ್ರಶ್ಯ್

ಚಿಲ್ಲರ್ ಇಜ್ಮೊಲ್ ಘಾಲ್ತೆಲ್ಯಾಂಕ್, ಸಾಂತಾ ಭಕ್ತಾಂಕ್ ವಾತಿ ಪೆಟಯ್ತೆಲ್ಯಾಂಕ್, ನಿರ್ಜೀವ್ ಇಮಾಜಿಂಕ್ ಫುಲಾಂ ಕಾಣಿಕೊ ಅರ್ಪುಂಚ್ಯಾಂಕ್, ಪಿಡೆಸ್ತ್ ಭಾಂವಾಚ್ಯಾ ಗರ್ಜಾಂಕ್ ಪಾವೊಂಕ್ ಪಾಟಿಂ ಮುಕಾರ್ ಪಳೆಂವ್ಚ್ಯಾಂಕ್, ಪಿಂಜ್ಕರ್ ನ್ಹೆಸೊನ್ ಕುಡಿಚಿ ಸೊಭಾಯ್ ಉಗ್ತ್ಯಾನ್ ಪ್ರದರ್ಶನ್ ಕರ್ತೆಲ್ಯಾಂಕ್, ಸೊರೊ, ಸೆಕ್ಸ್ ಆನಿ ಡ್ರಗ್ಸಾಂತ್ ಬುಡುನ್ ಗೆಲ್ಲ್ಯಾ ಮೊಡರ್ನ್ ಪಿಳ್ಗೆಕ್, ವಿಗ್ಯಾನಾಚೆರ್ ವಿಪ್ರೀತ್ ಪಾತ್ಯೆವ್ನ್ ದೆವಾಚ್ಯಾ ಆಸ್ಮಿತಾಯೆಕ್‍ಚ್ ಸವಾಲಾ ಘಾಲ್ಚಾ 'ವಿಶೇಸ್ ಜ್ಞಾನಿಂ'ಕ್, ಚೊವೀಸ್ ವರಾಂ ಕಾಮ್ ಆನಿ ಬ್ಯುಸಿನೆಸ್ ಮ್ಹಣ್ ಕುಟ್ಮಾಥಾವ್ನ್ ಪಯ್ಸ್ ರಾವ್ತೆಲ್ಯಾಂಕ್, ಚಾಟಿಂಗ್ ಆನಿ ಡೇಟಿಂಗ್ ಆನಿ ಫ್ಲರ್ಟಿಂಗ್‍ಚ್ ಆಪ್ಲೆಂ ಮಿಸಾಂವ್ ಜಶೆಂ ಜಿಯೆಂವ್ಚಾ 'ಸ್ಮಾರ್ಟ್' ಪಿಳ್ಗೆಕ್, ಸನ್ನಿ ಲಿಯೋನಾಚಿ ಉಗ್ತಿ ಕೂಡ್ ಪಡ್ದ್ಯಾರ್ ಪಳೆವ್ನ್ ಸಂಸಾರ್ ವಿಸ್ರಾತೆಲ್ಯಾಂಕ್, ಹಫ್ತ್ಯಾಕ್ ಏಕ್ ಉಪಾಸ್ ಕರ್ಚಾ ಹಿಂದ್ವಾಂಕ್ ಆಣಿ ವರ್ಸಾಕ್ ತೀಸ್ ಉಪಾಸ್ ಕರ್ಚಾ ಮುಸ್ಲಿಮಾಂಕ್ ಆನ್ಭಾವಾಡ್ತಿ ಮ್ಹಣ್ ವೊಲಾಂವ್ಚಾ - ವರ್ಸಾಕ್ ಏಕ್ ಗತ್ತಿಕಾಟಾಚೊ ಉಪಾಸ್ ಕರ್ಚಾ 'ಭಾವಾಡ್ತ್ಯಾಂ'ಕ್, ಬೈಕಾರ್ ಸ್ಟಂಟ್ ಕರುನ್, ಬ್ರಾಂಡೆಡ್ ಮುಸ್ತಾಯ್ಕಿ ನ್ಹೆಸುನ್ ಕ್ಲಬ್ಬಾನಿ ಡಿಸ್ಕೋ ನಾಚೊಂಕ್ ವೆಚಾ ತರ್ನಾಟ್ಯಾಂಕ್... ಮಾಕಾ, ತುಕಾ, ತಾಕಾ ಆನಿ ಆಮ್ಚೆಮಧ್ಲ್ಯಾ ಹರ್ಯೆಕ್ಲ್ಯಾಕ್ ಹೆಂ ಮಟ್ವೆಂ ಫಿಲ್ಮ್ ವಿವಿಧ್ ರಿತಿನಿಂ ಚಿಂತುಂಕ್ ಲಾಯ್ತಾ, ಸವಾಲಾಂ ವಿಚಾರ್ತಾ, ಥೊಡ್ಯೊ ಜಾಪಿ ದಿತಾ ಆನಿ ಥೊಡಿಂ ತರ್ಕಾಂ ಉಚಾರ್ತಾ ಆನಿ ನಿಮಾಣೆಂ ದಿತಾ ಏಕ್ ಅಪುರ್ಬಾಯೆಚೊ ಸಂದೇಶ್ - ಮನ್ಶಾಪಣಾಕ್ ಜೀವ್ ದಿಲ್ಲೊ ಜೆಜುಚ್ ಆಮ್ಚೊ ಹೀರೊ ದೆಕುನ್ - ಪಯ್ಲೆಂ ಮನಿಸ್ ಆನಿ ಮನ್ಶಾಪಣ್, ಉಪ್ರಾಂತ್ ದೇವ್ ಆನಿ ದೆವಾಸ್ಪಣ್.! 

  ಯೂ ಟ್ಯೂಬಾಚೆರ್ ಮನ್ಶಾಪಣ್ V/s ದೆವಾಸ್ಪಣ್ ವಿಡಿಯೋ ಪಳೆಂವ್ಕ್ ಹೊ ಲಿಂಕ್ ಕ್ಲಿಕ್ ಕರಾ

ಹ್ಯಾ ಮಟ್ವ್ಯಾ ಫಿಲ್ಮಾಂತ್ ಥಂಯ್ ಹಾಂಗಾ ಥೊಡೆ ತಾಂತ್ರಿಕ್ ದೋಶ್ ಆಸಾತ್.

ಪಯ್ಲಿಂ ಚ್ಯಾರ್ ಪದಾಂ ಘಡ್ತಾನಾ ಪಾಳ್‍ಲ್ಲಿ ವೃತ್ತಿಪರತಾ ಹ್ಯಾಂ ಫಿಲ್ಮಾಂತೀ ಪಾಳ್‍ಲ್ಲಿ

ತರ್ ಹೆಂ ಫಿಲ್ಮ್ ಆನಿಕೀ ಬರೆಂ ಕರ್ಯೆತೆಂ ಆಸ್ಲೆಂ. ತಶೆಂಮ್ಹಣ್ ಫಿಲ್ಮಾಚೊ ಒಟ್ಟಾರೆ

ಪರಿಣಾಮ್ ಮಾತ್ರ್ ಭಿಲ್ಕುಲ್ ಹಿಶಿನ್ ತಿಶಿನ್ ಜಾವ್ನಾ.

ರೋಶನ್ ಆನಿ ತಾಚ್ಯಾ ಪಂಗ್ಡಾನ್ ಸೊಡ್‍ಲ್ಲೊ ತೀರ್  ಸಾರ್ಕ್ಯಾ ಜಾಗ್ಯಾರ್ ವಚೊನ್

ನಾಟ್ವಾಲಾ. ಕೊಂಕ್ಣಿ ಸಂಸಾರಾಚ್ಯಾ ಪ್ರಸ್ತುತ್ ಪರಿಗತೆಂತ್ ಅಸಲೆಂ ಏಕ್ ಧರ್ಯಾಧಿಕ್

ಪ್ರೇತನ್ ಭೋವ್ ಗರ್ಜ್ ಆಸ್ಲೆಂ ತೆಂ ರೋಶನ್ ಆನಿ ತಾಚ್ಯಾ ಪಂಗ್ಡಾನ್ ಕೆಲಾಂ ಆಸ್ತಾಂ

ತಾಂಚಿ ಪಾಟ್ ಥಾಪುಡ್ನ್ ತಾಂಕಾ ಅಭಿನಂದನ್ ಪಾಟಂವ್ಚಿ ಆನಿ ಫುಡಾರಾಂತ್

ಅಸಲ್ಯಾ ಚಡ್ ಆನಿ ಚಡ್ ಪ್ರೇತನಾಂಕ್ ಪ್ರೇರಣ್ ದಿಂವ್ಚಿ ಜವಾಬ್ದಾರಿ ಆಮ್ಚೆರ್ ಆಸಾ.!

(ಹೊ ವಿಮರ್ಸೊ ದಿರ್ವೆಂ ಪತ್ರಾಚ್ಯಾ ಮಾರ್ಚ್ 2015 ಅಂಕ್ಯಾಂತ್ ಫಾಯ್ಸ್ ಜಾಲಾ)

ಹ್ಯಾಪಿ ಬರ್ಥ್‍ಡೇ ಉಡಿ ಉಡಿ..

 ಸಂಗೀತ್ ಸಂಸಾರಾಂತ್ ನವೆಸಾವಾಂಚಿ ವಾದಾಳಾಂ ಉಟಯಿಲ್ಲೊ ತರುಣ್ ಗಾವ್ಪಿ ಪ್ರಜೋತ್ 'ಕೊಂಕಣಾಚೊ ಸೋನು ನಿಗಮ್' ಮ್ಹಣ್‍ಂಚ್ ನಾಂವಾಡ್ದಿಕ್. ತಾಚಾ ಮಧುರ್ ತಾಳ್ಯಾಕ್ ಆನಿ ಏಕೀಣ್ಪಣಾನ್ ಗಾಂವ್ಚಾ ತಾಚ್ಯಾ ಶೈಲೆಕ್ ಮನ್ ಪಿಸ್ವಾನಾತ್‍ಲ್ಲೊ ಕೊಣೀ ಆಸ್ಚೊನಾ. ಸುಮಾರ್ ತೀಸ್ ಕೊಂಕ್ಣಿ ಕೊವ್ಳ್ಯಾಂಕ್ ತಾಳೊ ದಿಲ್ಲ್ಯಾ ಪ್ರಜೋತಾನ್ ಪಾಟ್ಲ್ಯಾ ವರ್ಸಾ ದಶೆಂಬ್ರಾಂತ್ ಆಪ್ಲಿ ಫುಡ್ಲದ್ ಕೊಂಕ್ಣಿ ಕೊವ್ಳಿ 'ಉಡಿ ಉಡಿ' ಮೊಕ್ಳಿಕ್ ಕೆಲ್ಲಿ. ಕೊಂಕ್ಣಿ ಸಂಗೀತ್ ಸಂಸಾರಾಚೆಂ ನವಾಲ್ ಜಶೆಂ ಹಿ ಕೊವ್ಳಿ ಮೊಕ್ಳಿಕ್ ಜಾಲ್ಲ್ಯಾ ದಿಸಾ ಥಾವ್ನ್ ಆಜ್ ಪರ್ಯಾಂತ್ ಎಕಾ ಪಾಟ್ಲ್ಯಾನ್ ಏಕ್ ದಾಖ್ಲೊ ಮೊಡುನ್, ಯುವಜನಾಂಗಾಚಿ, ಗಾವ್ಪ್ಯಾಂಚಿ, ನಾಚ್ಪ್ಯಾಂಚಿ, ಡಿ.ಜೆ, ಲೈವ್ ಬ್ಯಾಂಡ್ ತಶೆಂ ಹೆರ್ ಸಂಗೀತ್‍ಗಾರಾಂಚಿ 'ಹೊಟ್ ಫೇವರಿಟ್' ಕೊವ್ಳಿ ಜಾವ್ನ್ ಸರ್ವಾಂಚ್ಯಾ ಹೊಗ್ಳಿಕೆಕ್ ಪಾತ್ರ್ ಜಾಲ್ಯಾ. ಹ್ಯಾಚ್ ಕೊವ್ಳೆಂತ್ಲೆಂ ಪ್ರಜೋತಾಚೆಂ ಮಧುರ್ ಗಾಯನ್ 'ತುಜೊ ಮೋಗ್ ಮಾಕಾ ಜಾಲಾ' ಯುವಜನಾಂಗಾಚೆಂ Love Anthem  ಮ್ಹಣ್‍ಂಚ್ ನಾಂವಾಡ್ಲಾಂ ತರ್, 'ಪರತ್ ಪರತ್' ಗಾಯನಾಕ್ ಜಾಯ್ತ್ಯಾನಿಂ Stress Reliever ಮ್ಹಳ್ಳೊ ದರ್ಜೊ ದಿಲಾ .!! ಇಂಟರ್ನೆಟ್ ಆನಿ ವಾಟ್ಸಾಪಾಚ್ಯಾ ಹ್ಯಾ ಕಾಳಾರ್ ಸಯ್ತ್ ಉಡಿ ಉಡಿ ಕೊವ್ಳೆಚ್ಯೊ ಸ ಹಜಾರ್ ಪ್ರತಿಯೊ ವಿಕುನ್ ಗೆಲ್ಯಾತ್ ಆನಿ ಆಜಿಕೀ ವಿಕುನ್ ವೆತೆ ಆಸಾತ್ ಮ್ಹಣ್ತಾನಾ, ಹ್ಯಾ ಕೊವ್ಳೆಚಿ ಲೊಕಾಮೊಗಾಳಾಯ್ ಕಿತ್ಲಿ ಮ್ಹಳ್ಳೆಂ ಅಂದಾಜ್ ಕರುಂಕ್ ಖಂಚಾಯೀ ಸಂಗೀತ್ ಪಂಡಿತಾಚಿ ಗರ್ಜ್ ಭಿಲ್ಕುಲ್ ನಾ.!

'ಉಡಿ ಉಡಿ'ಚಾ ಉಡ್ಕಾಣಾಂಕ್ ವರ್ಸಾಚಿ ಪ್ರಾಯ್ ಭರ್ಚಾ ಹ್ಯಾ ಸುವಾಳ್ಯಾರ್ ಪ್ರಜೋತ್ ಆಪ್ಲೆಂ ಸ್ವಪ್ಣಾಚೆಂ ಬಾಳ್ಶೆಂ 'ಉಡಿ ಉಡಿ' ವಿಶಿಂ, ಸಂಗೀತ್ ಸಂಸಾರಾಂತ್ಲ್ಯಾ ತಾಚಾ ಎದೊಳ್ಚಾ ಸಾಧನಾವಿಶಿಂ, ಫುಢ್ಲ್ಯಾ ಯೆವ್ಜಣಾಂವಿಶಿಂ ಉಗ್ತ್ಯಾನ್ ಉಲಯ್ತಾ.

                                                                                      - ಓಸ್ಕರ್ ವಗ್ಗ

ಹಾಂವ್ : ಫುಡ್ಲದ್ ಕೊವ್ಳಿ, ಏಕ್ ವರಸ್ ಆನಿ ಸ ಹಜಾರ್ ಪ್ರತಿಯಾಂಕ್ ಮಿಕ್ವಾಲ್ಲೊ ವಿಕ್ರೊ.! ಕಿತೆಂ ಮ್ಹಣ್ತಾಯ್.?

ಪ್ರಜೋತ್ : ಸರ್ವ್ ಏಕ್ ಸ್ವಪಾಣ್ ಜಶೆಂ ದಿಸ್ತಾ. ವರ್ಸಾಕ್ ಪಂದ್ರಾ-ವೀಸ್ ಕೊವ್ಳ್ಯೊ ಮೊಕ್ಳಿಕ್ ಜಾಂವ್ಚಾ ಹ್ಯಾ ವೆಳಾರ್ ಮ್ಹಜ್ಯಾ ಕೊವ್ಳೆಕ್ ಲೊಕಾಥಾವ್ನ್ ಲಾಭ್‍ಲ್ಲ್ಯಾ ಪ್ರತಿಕ್ರಿಯೆಂತ್ ಮ್ಹಜ್ಯಾ ವಾವ್ರಾಚಿ ಸಾರ್ಥಕತಾ ದಿಸ್ತಾ. ಮ್ಹಜಿ ಕೊವ್ಳಿ ಲೋಕಾರ್ಪಣ್ ಜಾಂವ್ಚೆವೆಳಿಂ ಸುಮಾರ್ ಪಂದ್ರಾ ಕೊವ್ಳ್ಯೊ ಚಡುಣೆಂ ಏಕ್ ಮಹಿನ್ಯಾಚ್ಯಾ ಆವ್ದೆ ಭಿತರ್ ಲೋಕಾರ್ಪಣ್ ಜಾಲ್ಲ್ಯೊ. ಆನಿ ಹಾಂವ್ ಘಾಬ್ರೆವ್ನ್ ಗೆಲ್ಲೊಂ ಕೀ, ಮ್ಹಜಿ ಕೊವ್ಳಿ ಹ್ಯಾ ಪಂದ್ರಾ ಕೊವ್ಳ್ಯಾಂಚ್ಯಾ ವಾಳ್ಯಾಂತ್ ವಾಳೊನ್ ವಸಾತ್ ಮ್ಹಣ್. ಕಿತ್ಯಾಕ್ ಮ್ಹಳ್ಯಾರ್, ಹ್ಯಾ ಪಂದ್ರಾ ಕೊವ್ಳ್ಯಾಂ ಪಯ್ಕಿಂ ಚಡ್‍ಶೆಂ ಕೊವ್ಳ್ಯಾಂಚೆ ಘಡ್ಣಾರ್ ಸಂಗೀತ್ ಶೆತಾಂತ್ ಲಾಂಬ್ ಕಾಳಾರ್ ಥಾವ್ನ್ ಆಸ್ಮಿತಾಯೆರ್ ಆಸೊನ್, ಹೆಳೊನ್ ಗೆಲ್ಲೆ ಆನ್ಭೋಗಿ ಮನಿಸ್ ಆನಿ ಹಾಂವ್ ಹಾಂಚೆಮಧೆಂ ನವೊ.! ತರಿಪುಣ್ ಮಾಕಾ ಮ್ಹಜ್ಯಾ ತಾಲೆಂತಾಚೆರ್, ಮ್ಹಜ್ಯಾ ವಾವ್ರಾಚೆರ್ ಪಾತ್ಯೆಣಿ ಆಸ್ಲಿ. ಆನಿ ಮ್ಹಜೊ ಸಂಗೀತ್ ವಾವ್ರ್ ಲೊಕಾಕ್ ಖಂಡಿತ್ ರುಚ್ತಲೊ ಮ್ಹಳ್ಳೊ ಭರ್ವಸೊಯೀ ಆಸ್ಲೊ. ಅಶೆಂ ಇಲ್ಲಿ ಕಾವ್ಜೆಣಿ ಇಲ್ಲೆಂ ಧಯ್ರ್ ಒಟ್ಟುಕ್ ಘಾಲ್ನ್ 1000 ಕೊವ್ಳ್ಯೊ ಮಾರ್ಕೆಟಿಕ್ ಘಾಲ್ಯೊ. ಹಾಂತುಂ ವಿಕುನ್ ವಸೊಂಕ್ ನಾತ್‍ಲ್ಲ್ಯೊ ಅರ್ಧ್ಯಾಕ್ ಅರ್ಧ್ಯೊ ಕೊವ್ಳ್ಯೊ ಪಾಟಿಂ ಹಾಡ್ನ್ ಘರಾ ದಾಸ್ತಾನ್ ದವ್ರಿಜೆ ಪಡ್ತಲ್ಯೊ ಮ್ಹಣ್ ಚಿಂತುನ್, ಘರಾ ಭಿತರ್ ಕೊಣಾಕೀ ದಿಸಾನಾತ್‍ಲ್ಲೆಪರಿಂ ಖಂಚ್ಯಾ ಜಾಗ್ಯಾರ್ ಲಿಪವ್ನ್ ದವರ್ಯೆತ್ ಮ್ಹಣ್‍ಯೀ ಪಯ್ಲೆಂಚ್ ನಖ್ಖಿ ಕರ್ನ್ ದವರ್‍ಲ್ಲೆಂ.! ಪುಣ್, ಆಜ್ಯಾಪ್... ಮಾರ್ಕೆಟಿಕ್ ಸಿ.ಡಿ ಗಾಲ್ಲ್ಯಾ ಚವ್ತ್ಯಾ ದಿಸಾಸ್ ಚಡಾವತ್ ಸರ್ವ್ ವಿತರಕಾಂಚಿಂ ಫೋನಾ ಯೇಂವ್ಕ್ ಸುರು ಜಾಲಿಂ ಮಾಕಾ - 'ತುಜ್ಯೊ ಸಿ.ಡಿ ಪುರಾ ಖಾಲಿ ಜಾಲ್ಯಾತ್. ಚಡ್ತಿಕ್ ಸಿ.ಡಿ ವೆಗಿಂಚ್ ಆಮ್ಕಾಂ ಪಾವಿತ್ ಕರ್' ಮ್ಹಣ್.!! ಅಶೆಂ ಎಕಾ ವರ್ಸಾದಿಂ ಭರಾನ್ ಆರಂಭ್ ಜಾಲ್ಲೊ 'ಉಡಿ ಉಡಿ'ಚೊ ವಿಕ್ರೊ ಎದೊಳ್ ಥಂಡ್ ಪಡೊಂಕ್ ನಾ. ಪೊರ್ಚಾ ಪೋರ್ ಹಾಂವ್ ಮ್ಹಜೆಂ ಮಂಗ್ಳುರ್ಚೆಂ ಕಾಮ್ ಸೊಡ್ನ್ ಬೆಂಗ್ಳುರಾಕ್ ಆಯ್ಲೊಂ. ನವೆಂ ಕಾಮ್, ರೂಮ್ ತೆಂ ಹೆಂ ಮ್ಹಣ್ ಥೊಡೆ ದೀಸ್ ವೆಸ್ತ್ ಆಸ್ಲೊಂ. ಆನಿ ಸಂಗೀತಾಚ್ಯಾ ಸಂಸ್ರಾಥಾವ್ನ್ ಇಲ್ಲೊ ಪಯ್ಸ್ ಆಸ್ಲೊಂ. ಆನಿ ಹ್ಯಾಚ್ ವೆಳಾರ್ ಮ್ಹಜ್ಯಾ ವಿತರಕಾಂಚಿಂ ಪರ್ತ್ಯಾನ್  ಫೋನಾಂ - 'ತುಜ್ಯೊ ಸಿ.ಡಿ ಖಾಲಿ ಜಾಲ್ಯಾತ್. ಮೊಸ್ತು ಜಣ್ ಯೇವ್ನ್ ವಿಚಾರ್ನ್ ಪಾಟಿಂ ಗೆಲೆ. ಆಮ್ಕಾಂ ಸಿ.ಡಿ ಅರ್ಜೆಂಟ್ ಹಾಡ್ನ್ ಪಾವಿತ್ ಕರ್.!! ಹೆಂ ನ್ಹಯ್ ಆಸ್ತಾಂ, ಆನಿಕೀ ಜಾಯ್ತ್ಯಾ ಜಣಾನಿಂ, 'ತುಜಿ ಸಿ.ಡಿ. ಪ್ಲೇ ಕರ್ನ್ ಕರ್ನ್ ಜರೊನ್ ಗೆಲ್ಯಾ ಸಾಯ್ಬಾ, ಆತಾಂ ತಿ ಚಲಾನಾ, ಮಾಕಾ ಏಕ್ ನವಿ ಸಿ.ಡಿ ದಿಶಿಗೀ..? ಅಶೆಂ ವಿಚಾರ್‍ಲ್ಲೆಂಯೀ ಆಸಾ.! ಕೊಂಕ್ಣಿ ಸಂಗೀತಾಂತ್ ಪಯ್ಲೆಪಾವ್ಟಿಂ ಮ್ಹಣ್ಯೆತ್ ಕೊಣ್ಣಾ - ಹಾವೆಂ 'ಉಡಿ ಉಡಿ' ಕೊವ್ಳೆಚಿಂ ಪದಾಂ ಅಂತರ್ಜಾಳಿಚೆರ್ ಮೊಲಾಕ್ ಘೆಂವ್ಚಿ ವ್ಯವಸ್ತಾ ಕರುನ್, iTunes  Amazon , CD Baby   ತಸಲ್ಯಾ ಜಾಳಿಜಾಗ್ಯಾಂಚೆರ್ ವಿಕ್ರ್ಯಾಕ್  ಘಾಲ್ಲಿ. ಅಶೆಂ ಒಟ್ಟುಕ್ ಕರ್ನ್ ಸಾಂಗ್ಚೆಂ ತರ್ ಎದೊಳ್ಚಾಕ್ ಸ ಹಜಾರಾಂ ಪ್ರಾಸ್ ಚಡ್ ಪ್ರತಿಯೊ ವಿಕುನ್ ಗೆಲ್ಯಾತ್, ಆನಿಕೀ ವಚೊನ್ ಆಸಾತ್.

ಕೊಂಕ್ಣಿ ಸಂಗೀತ್ ಮೊಗಿಂಚ್ಯಾ ಕಾಳ್ಜಾಂತ್ ವಾದಾಳ್ ಉಟಯಿಲ್ಲೆಂ 'ತುಜೊ ಮೋಗ್ ಮಾಕಾ ಜಾಲಾ' ಗಾಯನ್ ಆಯ್ಕೊಂಕ್ ಹೊ ಗಾಂಚ್ ಕ್ಲಿಕ್ ಕರಾ

ಕೊವ್ಳೆಚೊ ಸಗ್ಳೊ ವಾವ್ರ್ ಮಧ್ಯಾನೆ ರಾತಿ ಉಪ್ರಾಂತ್ ಚಲ್ತಾಲೊ. ಹಾಂವ್ ಮಂಗ್ಳುರ್ ಥಾವ್ನ್ ಕಾಮ್ ಸಂಪವ್ನ್ ಉಡ್ಪಿ ಘರಾ ಪಾವ್ತಾನಾ ವೊರಾಂ ಇಕ್ರಾ ಜಾತಾಲಿಂ, ತ್ಯಾ ಉಪ್ರಾಂತ್ 'ಉಡಿ ಉಡಿ'ಚೊ ವಾವ್ರ್ ಸುರು. ಸಂಗೀತ್ ಸಂಯೋಜಕ್ ಇಸ್ರಾಯೆಲಾಂತ್, ಸಂಗೀತ್ ದಿರೆಕ್ತೊರ್ ಬೆಂಗ್ಳುರಾಂತ್, ಉತ್ರಾಂ ಬರಯ್ಣಾರ್ ಮಂಗ್ಳುರಾಂತ್, ಹಾಂವ್ ಉಡ್ಪಾಂತ್, ಗಾವ್ಪಿಣೊ ದುಬಾಯ್, ಬೆಂಗ್ಳುರ್, ಆನಿ ಮಂಗ್ಳುರಾಂತ್, ಸರ್ವ್ ಕಾಮಾಂ ಇಮೇಯ್ಲಾಂತ್ ಆನಿ ವಾಟ್ಸಾಪಾಂತ್. ಕೊವ್ಳೆಚೆಂ ಕಾಮ್ ಸುರು ಕೆಲ್ಲ್ಯಾ ದಿಸಾಥಾವ್ನ್ ಸಂಪಯ್ತಾ ಪರ್ಯಾಂತ್ ಆಮಿ ಎಕಾಮೆಕಾಕ್  ಭೆಟ್‍ಲ್ಲೆಂ ನಾ, ತೆರೀ ಸಕ್ಕಡ್ ಭೋವ್ ಸೊಂಪ್ಯಾ ರಿತಿನ್ ಜಾಲೆಂ.!

ಅನ್ಯೇಕ್ ಸಂಗತ್ ಮಾಕಾ ವಿಶೇಷ್ ದಾದೊಸ್ಕಾಯೆಚಿ ಮ್ಹಳ್ಯಾರ್, ಮಾಕಾ ಸದಾಂನೀತ್ ಕೋಣ್ ನಾ ಕೊಣಾಚ್ಯಾ ಫೇಸ್ಬುಕ್ ಯಾ ವಾಟ್ಸಾಪಾಚಿ ಸ್ಟೇಟಸ್ ಮೆಸೇಜ್ 'ತುಜೊ ಮೋಗ್ ಮಾಕಾ ಜಾಲಾ' ಮ್ಹಣ್ ಬರಯಿಲ್ಲಿ ಪಳೆಂವ್ಕ್ ಮೆಳ್ತಾ. ಏಕ್ ಕಲಾಕಾರ್ ಜಾವ್ನ್ ಹಾಚಾಕೀ ವರ್ತೆಂ ಹಾವೆಂ ಕಿತೆಂ ಆಶೆವ್ಯೆತ್.? 'ಉಡಿ ಉಡಿ'ಚಿ ಕೀರ್ತ್ ಇತ್ಲ್ಯಾ ಉಂಚಾಯೆಕ್ ಪಾವ್ಲ್ಯಾ ತರ್ ಮ್ಹಜ್ಯಾ ಮಿನತೆ ಬರಾಬರ್ ಜಾಯ್ತ್ಯಾ ಮ್ಹಜ್ಯಾ ಇಶ್ಟಾಂಚೊ, ಹಿತೈಶಿಂಚೊ ಪಾಟಿಂಬೊಯೀ ಕಾರಣ್ ಜಾವ್ನಾಸಾ. ವನಿಲ್ ವೇಗಸ್, ರೋಶನ್ ಕ್ರಾಸ್ತಾ, ಕೊವ್ಳೆಕ್ ತಾಳೊ ದಿಲ್ಲೆ ಸರ್ವ್ ಗಾವ್ಪಿ/ಗಾವ್ಪಿಣೊ, ಉತ್ರಾಂ ಬರಯ್ಣಾರ್; 'ಉಡಿ ಉಡಿ' ಕೊವ್ಳೆಚೊ ಪ್ರಚಾರ್ ಆನಿ ಮಾರ್ಕೆಟಿಂಗ್ ಪಳೆವ್ನ್ ಘೆತ್‍ಲ್ಲೊ ಮ್ಹಜೊ ಮಿತ್ರ್ ಓಸ್ಕರ್ ವಗ್ಗ, ಪ್ರಚಾರ್ ದಿಲ್ಲಿಂ ಸರ್ವ್ ಮಾಧ್ಯಮಾಂ, ವಿಶೇಸ್ ಕರುನ್ 'ದಿರ್ವೆಂ-ಕೊಂಕ್ಣಿ ಮಹಿನ್ಯಾಳೆಂ' ಆನಿ ತಾಚೊ ಸಂಪಾದಕ್ ಜೊನಾಬ್ ತಶೆಂ ತಾಂಚೊ ಪಂಗಡ್ ಹಾಂಚೊ ಹಾಂವ್ ಹ್ಯಾ ವೆಳಿ ವಿಶೇಸ್ ಥರಾನ್ ಉಪ್ಕಾರ್ ಬಾವ್ಡುಂಕ್ ಆಶೆತಾಂ. ನವ್ಯಾ ಕೊವ್ಳೆಂಕ್ 'ಸ್ಪೊನ್ಸರ್ಸ್' ಮೆಳ್ಚೆಂಚ್ ಕಶ್ಟ್. ಅಶೆಂ ಆಸ್ತಾಂ ಮ್ಹಜೆ ಸ್ಪೊನ್ಸರ್ ಜಾವ್ನಾಸ್‍ಲ್ಲ್ಯಾ ಕೊಂಕಣ್ ಘರ್ ರಿಯಾದ್ ಆನಿ ರೋಸನ್-ಶೆರ್ಲಿ ಆನಿ ಮ್ಹಜ್ಯಾ ಹೆರಾಂ ಸ್ಪೊನ್ಸರಾನಿಂ ಮಾಕಾ ಕೆದ್ನಾಂಚ್ 'ನಾ' ಮ್ಹಳ್ಳೆಂ ನಾ. 'ಆಮಿ ಆಸಾಂವ್, ಧಯ್ರಾನ್ ಮುಕಾರ್ ಸರ್' ಅಶೆಂ ಮ್ಹಣ್ ಪಾಟ್ ಥಾಪುಡ್ನ್ ತಾಣಿಂ ಮಾಕಾ ಪ್ರೋತ್ಸಾವ್ ದಿಲಾ, ತಾಂಕಾಂ ಹಾಂವ್ ಸದಾಂಕಾಳ್ ಅಭಾರಿ.!

ಹಾಂವ್ : 'ಕೊಂಕ್ಣಿ ಸಿ.ಡಿ. ಕೊಣೀ ಖಾಯ್ಸ್ ಕರಿನಾ. ಪಾಂಯ್ಶಾ ವಯ್ರ್ ಸಿ.ಡಿ ವಿಕುನ್ ವಚಾನಾಂತ್' - ಕೊಂಕ್ಣಿ ಸಂಸಾರಾಂತ್ ಅಶಿ ಏಕ್ ಜೆರಾಲ್ ಅಭಿಪ್ರಾಯ್ ಆಸಾ. 'ಉಡಿ ಉಡಿ' ವಿಶ್ಯಾಂತ್ ಸಾಂಗ್ಚೆಂ ತರ್ ಹಿ ಅಭಿಪ್ರಾಯ್ ಕಿತ್ಲಿ ಸಾರ್ಕಿ.?

ಪ್ರಜೋತ್ : ವ್ಹಯ್ ಅಸಲೆಂ ಏಕ್ ಚೂಕ್ ಚಿಂತಾಪ್ ಮ್ಹಜಾಯೀ ಮತಿಂತ್ ಆಸ್ಲೆಂ. ಪುಣ್ ಕೊಂಕ್ಣಿ ಸಂಗೀತಾಕ್ ಆಯ್ಲ್ಯಾ ಉಪ್ರಾಂತ್, ಆನಿ ತೆಂಯೀ ಆತಾಂ ಹಿ 'ಉಡಿ ಉಡಿ' ಕೊವ್ಳಿ ಇತ್ಲಿ ಲೊಕಾಮೊಗಾಳ್ ಜಾಲ್ಯಾ ಉಪ್ರಾಂತ್ - ಹೆಂ ಚಿಂತಾಪ್ ಚೂಕ್ ಮ್ಹಣ್ ಹಾಂವ್ ಧಯ್ರಾನ್ ಸಾಂಗ್ತಾಂ. ಕೊವ್ಳ್ಯಾಂಚೊ ವಿಕ್ರೊ ದೋನ್ ಸಂಗ್ತಿಚೆರ್ ಹೊಂದೊನ್ ಆಸಾ. ಏಕ್ ಕೊವ್ಳೆಚಿ ಕಾಲೆತ್ ತರ್ ದುಸ್ರೆಂ ಕೊವ್ಳೆಕ್ ಆಮಿ ದಿಂವ್ಚೊ ಪ್ರಚಾರ್ ವಾ ಮಾರ್ಕೆಟಿಂಗ್. ಖಂಚಿಗೀ ಏಕ್ ಕೊಂಕ್ಣಿ ಸಿ.ಡಿ ಘೆಂವ್ಚೆಚ್ ಖಾತಿರ್ ದುಕಾನಾಂಕ್ ವೆಚೆ ಸಂಗೀತ್ ಪ್ರೇಮಿ ಕೊಂಕ್ಣೆಂತ್ ಕಿತ್ಲೆ ಆಸಾತ್ ತೆಂ ಹಾಂವ್ ನೆಣಾಂ. ಪುಣ್ ಎಕಾ ಕೊವ್ಳೆಚೆಂ ಮಾರ್ಕೆಟಿಂಗ್ ಯಾ ಪ್ರಚಾರ್ ಪಳೆವ್ನ್ ತಿಚ್ ಸಿ.ಡಿ ಘೆಂವ್ಚೆ ಖಾತಿರ್ ದುಕಾನಾಕ್ ವೆಚೆ, ತಿ. ಸಿ.ಡಿ ರುಚ್ಲಿ ತರ್ ತ್ಯಾ ವಿಶ್ಯಾಂತ್ ಹೆರಾಂಕ್ ಖಬರ್ ದಿಂವ್ಚೆ, ಆಪ್ಲ್ಯಾ ಮೊಗಾಚ್ಯಾಂಕ್ ತಿಚ್ ಕೊವ್ಳಿ ಕಾಣಿಕ್ ಜಾವ್ನ್ ಧಾಡ್ನ್ ದಿಂವ್ಚೆ, ಯಾ ಪರ್ಗಾವಾಂತ್ ಥಾವ್ನ್ ಸುಟಿಯೆರ್ ಆಯಿಲ್ಲೆ ತರ್ ಪಾಟಿಂ ವೆತಾನಾ ಆಪ್ಲ್ಯಾ ಇಶ್ಟಾಮಂತ್ರಾಕ್ ದಿಂವ್ಚೆ ಖಾತಿರ್ ತ್ಯಾ ಕೊವ್ಳೆಚ್ಯೊ ಧಾ-ಪಂದ್ರಾ ಪ್ರತಿಯೊ ಘೆವ್ನ್ ವೆಚೆ ಸಂಗೀತ್ ಪ್ರೇಮಿ ಕೊಂಕ್ಣೆಂತ್ ಆಸಾತ್ ಮ್ಹಣ್ಚ್ಯಾಕ್ ಹಾಂವ್ ಆನಿ ಮ್ಹಜಿ ಕೊವ್ಳಿಚ್ ಸಾಕ್ಸ್. ಕಾಲಿಚ್ ಕ್ವಾಲಿಟಿ ಸಾಂಭಾಳ್ಳ್ಯಾರ್ ಪಾವಾನಾ, ಪ್ರಚಾರಾಕ್ ಗುಮಾನ್ ದೀಜಯ್ ಪಡ್ತಾ. ಅಸಲಿ ಏಕ್ ಸಿ.ಡಿ ಮಾರ್ಕೆಟಿಂತ್ ಆಸಾ ಆನಿ ತಾಂತುಂ ಕಿತೆಂ ಪುಣೀ ವಿಶೇಸ್ ಆಸಾ ತೆಂ ಲೊಕಾಮನಾಂಕ್ ಪಾವಯ್ಜಾಯ್ ಪಡ್ತಾ. ತಶೆಂ ಮ್ಹಣ್ ವಿಶೇಸ್ ಪ್ರಚಾರ್ ದೀವ್ನ್ ಕೊವ್ಳೆಭಿತರ್ ಶೆಳೆಂ ಶಿತ್ ಭರ್ನ್ ದಿಲೆಂ ತರ್ ಕೊವ್ಳಿ ರಿಲೀಜ್ ಜಾಲ್ಲ್ಯಾ ದಿಸಾ, ಪ್ರಚಾರಾಕ್ ಲಾಗೊನ್ ಕಾಂಯ್ ದೊನ್ಶಿಂ ತಿನ್ಶಿಂ, ದಾಕ್ಶೆಣೆಕ್ ಲಾಗೊನ್ ಶೆಂಬರ್ ಆನಿ ಒತ್ತಾಯೆನ್ ವಿಕುನ್ ಕಾಂಯ್ ಶೆಂಬರ್ ಕೊವ್ಳ್ಯೊ ವಿಕುನ್ ವೆತಿತ್ ಆನಿ ಉರ್‍ಲ್ಲ್ಯೊ ಪ್ರತಿಯೊ ಘರಾ ಶೋಕೇಸಿಂತ್ ನೆಟವ್ನ್ ದವ್ರಿಜೆ ಪಡ್ತಿತ್.! ಆತಾಂ, ಹಾವೆಂ ಸಾಂಗ್‍ಲ್ಲೆಂ ಹೆಂ ಆಯ್ಕೊನ್, 'ಕೇವಲ್ ಏಕ್ ಕೊವ್ಳಿ ಕಾಡ್ನ್ ಹೊ ಇತ್ಲೆಂ ಉಲಯ್ತಾಗೀ' ಮ್ಹಣ್ ಕೊಣೀ ಮ್ಹಣುಂಕ್ ಪುರೊ. ಪುಣ್ ಹಾಂವ್ ಪರತ್ ಸಾಂಗ್ತಾಂ - ಕೊವ್ಳೆಂಚೊ ವಿಕ್ರೊ 500 ಯಾ 5000 ಯಾ ತಾಚ್ಯಾಕೀ ಚಡ್ ಹೆಂ ನಿರ್ಧಾರ್ ಕಚ್ರ್ಯೊ ಸಂಗ್ತಿ ದೋನ್‍ಂಚ್ - ಕ್ವಾಲಿಟಿ ಆನಿ ಮಾರ್ಕೆಟಿಂಗ್.! ಹೊ ಮ್ಹಜೊ ಆನ್ಭೋಗ್ - ಕೇವಲ್ ಏಕ್ ಕೊವ್ಳಿ ಕಾಡುನ್ ಹಾವೆಂ ಜೊಡ್ಲಲೊ.!!

 ಉಡಿ ಉಡಿ ಕೊವ್ಳೆಚ್ಯಾ ಪ್ರಚಾರಾಕ್ ವಾಪಾರ್ ಲ್ಲಿಂ ಟೀ ಶರ್ಟಾಂ

ಹಾಂವ್ : ತರ್ ಕೊಂಕ್ಣಿ ಲೋಕ್ ಆಜ್ 'ಕ್ವಾಲಿಟಿ' ಆಶೆತಾ ಆನಿ ತಿ ಮೆಳ್ಳಿ ತರ್ ಮೋಲ್ ದೀವ್ನ್ ಘೆಂವ್ಕ್ ಸುರಾತ್ ಕರಿನಾ ಮ್ಹಳ್ಳೆಂ ತುಂ ಒಪ್ತಾಯ್.?

ಪ್ರಜೋತ್ : ಖಂಡಿತ್ ಆನಿ ಖಂಡಿತ್.! ಶೆಂಬರ್ ರುಪಯ್ ಖರ್ಚುಂಕ್ ಸುರಾತ್ ಕರ್ತಾತ್ ಮ್ಹಣ್ ಜಾಯ್ತ್ಯಾ ಕೊವ್ಳೆ ಘಡ್ಣಾರಾನಿಂ ದುರ್ಸೊಚೆಂ ಆಸ್ತಾ. ಇತ್ಲ್ಯಾಕೀ 'ತುಂ ಹೆಂಚ್ ಮೊಲಾಕ್ ಘೆ ಯಾ ತೆಂಚ್ ಮೊಲಾಕ್ ಘೆ' ಮ್ಹಣ್ ತಾಕಿದ್ ದೀಂವ್ಕ್ ಆಮಿ ಕೋಣ್.? ತಾಂಚೊ ದುಡು ದೆಕುನ್ ತಾಂಕಾಂ ಜೆಂ ಕಿತೆಂ ಪಸಂದ್ ಭೊಗ್ತಾ ತೆಂ ಮೊಲಾಕ್ ಘೆತಾತ್.! ಆಮಿ ಕೊವ್ಳಿ ಘಡ್ಣಾರಾನಿಂ 'ಆಮಿ ಇತ್ಲಿ ಮಿನತ್ ಕಾಡ್ನ್ ಕೊಂಕ್ಣೆಖಾತಿರ್ ಇತ್ಲೊ ವಾವ್ರ್ ಕರ್ನ್ ಕೊಂಕ್ಣಿ ಭಾಸ್ ಉರಂವ್ಚೆ ಆನಿ ವಾಡಂವ್ಚೆ ಖಾತಿರ್ ಹಿ ಕೊವ್ಳಿ ಘಡ್ಲ್ಯಾ, ತುಮಿ ತಿ ಮೊಲಾಕ್ ಘೆಜೆ ಆನಿ ಕೊಂಕ್ಣಿ ಉರಂವ್ಚ್ಯಾ ಮಿಸಾಂವಾಂತ್ ಆಮ್ಕಾಂ ಸಾಂಗಾತ್ ದೀಜೆ' ಮ್ಹಳ್ಳೆಂ ತೆಂಚ್ ಪರ್ನೆಂ ಮಾರ್ಕೆಟಿಂಗ್ ಗಿಮಿಕ್ ಆನಿಕೀ ಪಾತ್ಯೆವ್ನ್ ರಾವ್ಲ್ಯಾರ್ ಕಶೆಂ..?

ಯೂಟ್ಯೂಬಾಚೆರ್ ಉಡಿ ಉಡಿ ಕೊವ್ಳೆಚೊ ಒಫೀಶಿಯಲ್ ಪ್ರೊಮೋ ವೀಡಿಯೊ

ಹಾಂವ್ : ಕೊಂಕ್ಣಿ ಸಂಗೀತಾಚೊ 'ಪ್ರತಿಶ್ಟಿತ್' ಮ್ಹಣ್ ನಾಂವಾಡ್‍ಲ್ಲೊ ಪುರಸ್ಕಾರ್ ತುಜ್ಯಾ ಕೊವ್ಳೆಕ್ ಲಾಭ್ಚಿ ನಿರೀಕ್ಶಾ ಆಸ್ಲಿ ತರೀ, ಸಫಳ್ ಜಾಲಿ ನಾ. ತುಂ ಕಿತೆಂ ಮ್ಹಣ್ತಾಯ್.?

ಪ್ರಜೋತ್ : ತೀನ್ ವಿಭಾಗಾನಿಂ ಮ್ಹಜಿ ಕೊವ್ಳಿ ನೊಮಿನೇಟ್ ಜಾಲ್ಲಿ ತರೀ ತೀನ್ ಪುರಸ್ಕಾರಾಂಚಿ ನಿರೀಕ್ಶಾ ಆಮ್ಕಾಂ ಖಂಡಿತ್ ನಾತ್ಲಿ. ಪುಣ್ ಸತ್ ಸಾಂಗ್ಚೆಂ ತರ್ 'ಅತ್ಯುತ್ತಮ್ ಕೊವ್ಳಿ' ಪುರಸ್ಕಾರ್ ಆಮ್ಕಾಂ ಲಾಭಾತ್ ಮ್ಹಳ್ಳಿ ಮೊಸ್ತು ನಿರೀಕ್ಶಾ ಆಮ್ಕಾಂ ಆಸ್ಲಿ. ಆನಿ ಹ್ಯಾ ನಿರೀಕ್ಶೆಕ್ ಕಾರಣ್ ಸಯ್ತ್ ಆಸ್ಲೆಂ. ಕೊಂಕ್ಣಿ ಸಂಗೀತಾಂತ್ ಎಕಾಚ್ ಕೊವ್ಳೆಂತ್ ಧಾ ವಿವಿಧ್ ಪ್ರಕಾರಾಚಿಂ ಗಾಯನಾಂ ಎದೊಳ್ ಸಾದರ್ ಜಾಲ್ಲಿಂ ನಾಂತ್. ಆಮಿ ಪಯ್ಲೆಂ ಪ್ರಯತ್ನ್ ಕೆಲ್ಲೆಂ ಆನಿ ತೆಂ ಕಿತ್ಲ್ಯಾ ಮಟ್ಟಾಕ್ ಯಶಸ್ವಿ ಜಾಲಾಂ ತೆಂ ಸಕ್ಡಾಂಕ್ ಕಳಿತ್ ಆಸಾ.! ಹರ್ಯೆಕ್ ವರ್ಗಾಚ್ಯಾ ಲೊಕಾಕ್ ಹಾಂತ್ಲೆಂ ಏಕ್ ನಾ ಏಕ್ ಪದ್ ರುಚ್ಲಾಂ. ನೊಮಿನೇಶನ್ ಲಿಸ್ಟ್ ಪ್ರಗಟ್ ಜಾತಾನಾ ಕಿತ್ಲೆಶ್ಯಾ ಮ್ಹಜ್ಯಾ ಅಭಿಮಾನಿಂನಿ, ಇಶ್ಟಾನಿಂ ಮಾಕಾ ಫೋನ್ ಕರುನ್ 'ಅತ್ಯುತ್ತಮ್ ಕೊವ್ಳಿ' ಅವಾರ್ಡ್ ತುಜ್ಯಾಚ್ ಕೊವ್ಳೆಕ್ ಮೆಳಾಜೆ ಆನಿ ಖಂಡಿತ್ ಮೆಳ್ತಾ ಅಶೆಂ ಮ್ಹಣ್ ಸಾಂಗ್‍ಲ್ಲೆಂ ಆಸಾ. ಸೋಶಿಯಲ್ ಮೀಡಿಯಾಂತ್ ಸಯ್ತ್ ಹಿಚ್ ಅಭಿಪ್ರಾಯ್ ಚಡಾವತ್ ಸರ್ವಾನಿಂ ವೆಕ್ತ್ ಕೆಲ್ಲಿ ತರೀ ಅಕ್ರೇಕ್ ಘಡ್ಲೆಂ ದುಸ್ರೆಂಚ್.!  ಕಿತೆಂಯೀ ಆಸೊಂ, ಏಕ್ ಕಲಾಕಾರ್ ಜಾವ್ನ್ ಹೊ ಅವಾರ್ಡ್ ಆಯೋಜನ್ ಕೆಲ್ಲ್ಯಾಂಚೆಂ ಆನಿ ತಾಣಿಂ ನಿಯುಕ್ತ್ ಕೆಲ್ಲ್ಯಾ 'ಜಡ್ಜಾಂಚೆ' ಫೈಸಲ್ ಹಾವೆಂ ಮಾಂದುಂಕ್ ಜಾಯ್ ದೆಕುನ್ ಮಾಂದ್ತಾಂ. ಹ್ಯಾ ವಿಶ್ಯಾಂತ್ ಚಡ್ತಿಕ್ ಉಲಯ್ನಾಸ್ತಾಂ ಕೇವಲ್ ಇತ್ಲೆಂಚ್ ಸಾಂಗೊಂಕ್ ಆಶೆತಾಂ - ಏಕ್ ನಿರೀಕ್ಶಾ ಆಸ್ಲಿ, ತಿ ಫಸ್ಲಿ.! ಆನಿ ಮುಕಾರ್ ಏಕ್‍ಚ್ ಏಕ್ ನಿರೀಕ್ಶಾ ಆಸ್ತೆಲಿ, ತಿ ಕೆದಿಂಚ್ ಫಸ್ಚಿ ನಾ - ತಿ ನಿರೀಕ್ಶಾ ನ್ಹಯ್ ಕಸಲ್ಯಾಯೀ ಅವಾರ್ಡಾಚಿ ಬದ್ಲಾಕ್ ಕೊಂಕ್ಣಿ ಸಂಗೀತ್ ಅಭಿಮಾನಿಂಚ್ಯಾ ನಿರಂತರ್ ಪ್ರೋತ್ಸಾವಾಚಿ.! ಹೊ ಪ್ರೋತ್ಸಾವ್ ಕೆದಿಂಚ್ ಉಣೊ ಜಾಂವ್ಚೊ ನಾ ಮ್ಹಳ್ಳ್ಯಾ ನಿರೀಕ್ಶೆನ್, ಆನಿ ಹ್ಯಾ ನಿರೀಕ್ಶೆಂತ್ ಕಸ್ಲೆಂಯೀ 'ಫಿಕ್ಸಿಂಗ್' ಆಸ್ಚೆಂ ನಾ ಮ್ಹಳ್ಳ್ಯಾ ಅಖಂಡ್ ಪಾತ್ಯೆಣೆನ್ ಹಾಂವ್ ಮ್ಹಜೊ ಕೊಂಕ್ಣಿ ಸಂಗೀತ್ ವಾವ್ರ್ ಮುಕಾರ್ಸಿತಾಂ!.

ಹಾಂವ್ : ತರೀಪುಣ್ 'ಪ್ರಜೋತಾಚಿ ಸಿ.ಡಿ ಕೇವಲ್ ಯುವಜಣಾಂಕ್ ಮಾತ್ರ್ ಆಂವಡ್ಚೆ ತಸಲಿ, ಪ್ರಾಯೆಚಿ ಬಂಧಡ್ ನಾಸ್ತಾಂ ಸರ್ವಾಂಕ್ ಪಸಂದ್ ಜಾಂವ್ಚೆ ತಸ್ಲಿ ನ್ಹಯ್, ಪುರಸ್ಕಾರಾಕ್ ಫಾವೊತ್ಯಾ ಕಾಲೆತಿಚಿ ನ್ಹಯ್' ಅಶೆಂ ಮ್ಹಣ್ ತ್ಯಾ ಪುರಸ್ಕಾರಾಚ್ಯಾ ಸಂಯೋಜಕಾನಿಂ ತಶೆಂ ವಿಜೇತಾನಿಂ ಅಭಿಪ್ರಾಯ್ ಉಚಾರ್ಲ್ಯಾ  - ಹ್ಯಾ ವಿಶಿಂ ತುಂ ಕಿತೆಂ ಮ್ಹಣ್ತಾಯ್.?

ಪ್ರಜೋತ್ : ಸಾಯ್ಬಾ ಭೊಗೊಸ್.! ಕೊಂಕ್ಣಿ ಸಂಗೀತಾತ್ ಯೆದೊಳ್ ಆಸ್‍ಲ್ಲ್ಯೊ ಬಂದಡ್ಯೊ ಪಾವಾನಾತ್‍ಲ್ಲ್ಯಾಕ್ ಹಾಣಿಂ ಆತಾಂ ನವ್ಯಾನ್ ಪ್ರಾಯೆಚಿ ಬಂಧಡ್ ಘಾಲುಂಕ್ ಸುರು ಕೆಲೆಂ ಗೀ..? ತರ್ ತಾಣಿಂ ಮ್ಹಣ್ಚೆಂ ಪ್ರಜೋತಾಚಿಂ ಪದಾಂ ತರ್ನಾಟ್ಯಾಂಕ್ ಮಾತ್ರ್ ರುಚ್ತಾತ್ ಮ್ಹಣ್ತಾತ್ ತರ್ ಜಾಯ್ತೆ ಜಾಂಟೆ ಮಾನೆಸ್ತ್ ಮಾಕಾ ಥಂಯ್ ಹಾಂಗಾ ಭೆಟ್ತಾನಾ 'ಪ್ರಜೋತ್ ತುಜಿ ಸಿ.ಡಿ ಆಯ್ಕಾಲಿ. ಪದಾಂ ಪುರಾ ಬರಿಂ ಆಸಾತ್' ಮ್ಹಣ್ ಪಾಟ್ ಥಾಪುಡ್ತಾತ್ ತೆಂ ಕಿತ್ಯಾಕ್.? ಸೊಡ್ಯಾಂ, ಆಮ್ಚೊ ಮಾನಾಧಿಕ್ ಬಿಸ್ಪ್ ಸಾಯ್ಬ್ ಕೊವ್ಳಿ ರಿಲೀಜ್ ಜಾಲ್ಲ್ಯಾ ಸುರ್ವಿಲ್ಯಾ ದಿಸಾನಿಂ ಆಪ್ಲ್ಯಾ ಕಾರಾಚೆರ್ ಹಿಚ್ ಕೊವ್ಳಿ ಸದಾಂಯ್ ಘಾಲ್ನ್ ಆಯ್ಕಾತಾಲೆ ಆನಿ ತಾಂಕಾ ಏಕ್ ಪದ್ ಜಾಲ್ಯಾಪ್ರಾಂತ್ ಮುಕಾರ್ ಖಂಚೆ ಪದ್ ಯೆತಾ ಮ್ಹಳ್ಳೆಂ ಸಯ್ತ್ ಉಡಾಸ್ ಆಸ್ಲೆಂ ಅಶೆಂ ಮ್ಹಣ್ ತಾಣಿಂಚ್ ಮ್ಹಜೆಕಡೆನ್ ಸಾಂಗ್‍ಲ್ಲೆಂ ಆಸಾ. ಹಾಕಾ ಕಿತೆಂ ಮ್ಹಣ್ತಾತ್.?

ಆನಿ ಪುರಸ್ಕಾರ್ ಆನಿ ಕಾಲೆತಿ ವಿಶ್ಯಾಂತ್ ಸಾಂಗ್ಚೆಂ ತರ್, ಮಾಕಾ ಜಾಯ್ ಆಸ್ಲೊ ಪುರಸ್ಕಾರ್ ಲೊಕಾನ್ ದಿಲಾ ಕಿತ್ಯಾಕ್ ಮ್ಹಳ್ಯಾರ್ ತಾಂಕಾಂ ಹಾವೆಂ ದಿಲ್ಲ್ಯಾ ಕೊವ್ಳೆಚಿ ಕಾಲೆತ್ ರುಚ್ಲ್ಯಾ. ದೆಕುನ್ ತಿ ಸಾಂಭಾಳ್ಚೆಂ ಹರ್ ಏಕ್ ಪ್ರೇತನ್ ಹಾಂವ್ ಕರ್ತಾಂ. ಪುರಸ್ಕಾರಾಚಾ ಆಶೆನ್ ಕೊಣಾ ಎಕ್ಲ್ಯಾ ದೊಗಾಂಕ್ ಭುಲಂವ್ಚೆ ಖಾತಿರ್ 'ಪುರಸ್ಕಾರಾಕ್ ಯೋಗ್ಯ್ ಕಾಲೆತಿಚಿ' ಕೊವ್ಳಿ ಕಾಡ್ಚೆಂ ಕಾಮ್ ಹಾಂವ್ ಭಿಲ್ಕುಲ್ ಕರ್ಚೊ ನಾ.!

ಹಾಂವ್ : ತರ್ - ಎಕಾ ಕ್ರತಿಯೆಕ್ ಹಜಾರ್ ಪುರಸ್ಕಾರ್ ಮೆಳ್ಳ್ಯಾರೀ, ತಿ ಕ್ರತಿ ಲೊಕಾ ಮನಾಂಕ್ ಪಾವ್ಲಿನಾ ಯಾ ರುಚ್ಲಿನಾ ತರ್ ತಿ ವ್ಯರ್ಥ್ - ಮ್ಹಣ್ಚೆಂ ತುವೆಂ.?

ಪ್ರಜೋತ್ : ಖಂಚಿಯೀ ಕೃತಿ ವ್ಯರ್ಥ್ ಮ್ಹಣುಂಕ್ ಜಾಯ್ನಾ, ಕಿತ್ಯಾಕ್ ತಿ ಕೃತಿ ಕಿತ್ಲಿ ಪಾಡ್ ಆಸ್ಲ್ಯಾರೀ, ತಾಚ್ಯಾ ಪಾಟ್ಲ್ಯಾನ್ ತಿ ಕೃತಿ ರಚ್‍ಲ್ಲ್ಯಾಚಿ ಮಿನತ್ ಆಸ್ತಾ. ಸಾಮಾನ್ಯ್ ಜಾವ್ನ್ ಅವಾರ್ಡ್ ಸಂಭ್ರಮ್ ಜಾಲ್ಯಾ ಉಪ್ರಾಂತ್ ಪುರಸ್ಕಾರ್ ಲಾಭ್‍ಲ್ಲ್ಯಾ ಕೃತಿಯೆ ವಿಶ್ಯಾಂತ್ ಆನಿ ನೊಮಿನೇಟ್ ಜಾಲ್ಲ್ಯಾ ಇತರ್ ಕೃತಿಯಾಂ ವಿಶ್ಯಾಂತ್ ಲೊಕಾಮಧೆಂ ಉಲವ್ಣೆಂ ಚಲ್ತಾ. ಹೆಂ ಏಕ್ ಘಡಿತ್ ತುಮಿ ಚಿಂತುನ್ ಪಳೆಯಾ - ಅವಾರ್ಡ್ ಸಂಭ್ರಮ್ ಜಾಲ್ಯಾ ಉಪ್ರಾಂತ್ ಅವಾರ್ಡ್ ಫಾವೊ ಜಾಲ್ಲ್ಯಾ ಕೊವ್ಳೆವಿಶ್ಯಾಂತ್ ಸಕ್ಕಡೀ ಉಲಯ್ತಾತ್, ಪುಣ್ ಚಡಾವತ್ ಸರ್ವಾಂಚೆಂ ಸವಾಲ್ ಏಕ್‍ಚ್ ಆಸ್ತಾ - 'ಖಂಚಿ ಸಿ.ಡಿ ಸಾಯ್ಬಾ ತಿ.? ಕೆದಾಳಾ ರಿಲೀಜ್ ಜಾಲ್ಲಿ? ತುವೆಂ ಪುಣೀ ಆಯ್ಕಾಲ್ಯಾಯ್ ಗೀ.?' ಅಶೆಂ ಆಸ್ತಾಂ, ಕೊಂಕ್ಣೆಚ್ಯಾ ಸಾದ್ಯಾ ಲೊಕಾನ್ ಜ್ಯಾ ಕೊವ್ಳೆಚೆಂ ನಾಂವ್ ಸಯ್ತ್ ಆಯ್ಕೊಂಕ್ ನಾ, ತಿ ಕೊವ್ಳಿ ಆಯಿಲ್ಲಿ ಕೆದಾಳಾ ಆನಿ ಗೆಲ್ಲಿ ಕೆದಾಳಾ ಮ್ಹಣ್ ಸಯ್ತ್ ಕೊಣಾಕೀ ಕಳಿತ್ ನಾ ತ್ಯಾ ಕೊವ್ಳೆಕ್ ಜರ್ ಕೊಣೀ 'ವರ್ಸಾಚಿ ಅತ್ಯುತ್ತಮ್ ಕೊವ್ಳಿ' ಮ್ಹಳ್ಳೊ ಪುರಸ್ಕಾರ್ ದಿತಾತ್ ತರ್ ಹಾವೆಂ ಕಿತೆಂ ಮ್ಹಣ್ಯೆತ್.?

ಹಾಂವ್ : 'ಉಡಿ ಉಡಿ'ಕ್ ಫಾವೊತೊ ಪುರಸ್ಕಾರ್ ಲೊಕಾಚಾ ಪ್ರೋತ್ಸಾವಾ ರುಪಾರ್ ತುಕಾ ಲಾಭ್ಲಾಗಿ?

ಪ್ರಜೋತ್ : ಖಂಡಿತ್.! ಹಾಂವೆಂ ಚಿಂತ್‍ಲ್ಲ್ಯಾ ಪ್ರಾಸ್ ಚಡ್ ಮಾಪಾಚೊ ಪ್ರೋತ್ಸಾವ್ ಲಾಭ್ಲಾ.! ಆಮಿ ಕಲಾಕಾರ್, ಲೊಕಾಕ್ ಆಮ್ಚಿ ಕಲಾ ಮೆಚ್ವಾಲ್ಯಾರ್ ಆಮಿ ಆಸಾಂವ್. ಪಯ್ಶೆ ಆಸ್ಲ್ಯಾರ್ ಯಾ ಫಾವೊತೆ ಸ್ಪೊನ್ಸರ್ಸ್ ಮೆಳ್ಳ್ಯಾರ್ ಎಕ್ಲ್ಯಾನ್ ಶೆಂಬರ್ ಕೊವ್ಳ್ಯೊಯೀ ಕಾಡ್ಯೆತ್.! ಪುಣ್ ತ್ಯೊ ಜರ್ ಲೊಕಾನ್ ಆಯ್ಕಾಲ್ಯೊ ನಾಂತ್ ತರ್ ಕಿತೆಂ ಫಾಯ್ದೊ.? ಚಡ್ ಮ್ಹಳ್ಯಾರ್ ಆಮ್ಚೆಂ ಫುಡ್ಲೆಂ ಜನಾಂಗ್ ಪುಣೀ ತಿ ಕೊವ್ಳಿ ಆಯ್ಕಾತ್ ಮ್ಹಳ್ಳ್ಯಾ ಭರ್ವಶ್ಯಾನ್ ತ್ಯೊ ಕೊವ್ಳ್ಯೊ ವರುನ್ ಮ್ಯೂಸಿಯಮಾಂತ್ ಪುಂಜಾವ್ನ್ ದವರ್ಯೆತ್ - ತಿತ್ಲೆಂಚ್.! 'ಉಡಿ ಉಡಿ' ಕೊವ್ಳಿ ಲೊಕಾನ್ ಆಯ್ಕಾಲ್ಯಾ ಆನಿ ಪಸಂದ್ ಕೆಲ್ಯಾ ಮಾತ್ರ್ ನ್ಹಯ್ ಕೊವ್ಳೆಕ್ ಪ್ರಚಾರ್ ದಿಲಾ.! ಹರ್ಯೆಕಾ ಕಾರ್ಯಾ ಸೊಭಾಣಾಂತ್ 'ಉಡಿ ಉಡಿ'ಚಿಂ ಪದಾಂ ವಾಜ್ತಾತ್; ಪಯ್ಲೆಪಾವ್ಟಿಂ ಪದ್ ಆಯ್ಕಾಲ್ಲ್ಯಾ ಜಾಯ್ತ್ಯಾನಿಂ ಸೌಂಡ್ ಒಪರೇಟರಾ ಕಡೆನ್ ವಚೊನ್ 'ಹೆಂ ಖಂಚ್ಯಾ ಕೊವ್ಳೆಂತ್ಲೆಂ ಪದ್?' ಮ್ಹಣ್ ವಿಚಾರುನ್ ಮ್ಹಜಿ ಕೊವ್ಳಿ ಮೊಲಾಕ್ ಘೆವ್ನ್ ತಿ ಆಯ್ಕೊನ್ ಮಾಕಾ ಫೋನಾಚೆರ್ ಉಲ್ಲಾಸ್ ಪಾಟಯಿಲ್ಲೊ ದಾಖ್ಲೊ ಆಸಾ ಮ್ಹಜೆಲಾಗಿಂ. ಹಾವೆಂ ಮ್ಹಜ್ಯಾ ಕೊವ್ಳೆಚಿಂ ಪದಾಂ ಒನ್‍ಲೈನ್ ಪೇಮೆಂಟ್ ಕರ್ನ್ ಡೌನ್‍ಲೋಡ್ ಕರುಂಕ್ ಜಾಂವ್ಚೆಪರಿಂ iTunes , Amazon , CD Baby   ತಸಲ್ಯಾ ಜಾಳಿಜಾಗ್ಯಾನಿಂ ಘಾಲ್ಲಿಂ. ಅಸ್ಟ್ರೇಲಿಯಾ, ಆಫ್ರಿಕಾ, ಅಮೇರಿಕಾ, ಮೆಕ್ಸಿಕೋ ತಸಲ್ಯಾ ದೇಶಾಂತ್ಲ್ಯಾ ಕೊಂಕ್ಣಿ ಲೊಕಾನಿಂ ತಿಂ ಡೌನ್‍ಲೋಡ್ ಕರ್ನ್ ಘೆತ್‍ಲ್ಲೆ ದಾಖ್ಲೆ ಆಸಾತ್ ಮ್ಹಜೆಲಾಗಿಂ. ಹಾಚಾಕೀ ವರ್ತೆಂ ಕಿತೆಂ ಜಾಯ್ ಮಾಕಾ.?

ಪ್ರಜೋತ್ ಡೇಸಾ ಲಾಯ್ವ್ ಕಾರ್ಯಾಂತ್ 'ತುಜೊ ಮೋಗ್ ಮಾಕಾ ಜಾಲಾ'

ಹಾಂವ್ : ಕೊಂಕ್ಣಿ ಸಂಗೀತಾಂತ್ ತುಜಿ ಫುಡಾರಾಚಿ ಯೆವ್ಜಣ್ ಕಸಲಿ?

ಪ್ರಜೋತ್ : ಕಾಮಾಕ್ ಲಾಗೊನ್ ಹಾಂವ್ ಬೆಂಗ್ಳುರ್ ಪಾವ್ಲಾಂ. ಮ್ಹಜ್ಯಾ ಸಂಗೀತಾಚ್ಯಾ ಹವ್ಯಾಸಾಕ್ ಹಾಂಗಾಸರ್ ಚಡ್ ಆವ್ಕಾಸ್ ಆಸಾತ್ ಆನಿ ತೆಂ ಉಪ್ಯೋಗ್ ಕರುಂಕ್ ಹಾಂವ್ ಚಿಂತುನ್ ಆಸಾಂ. ಕೊಂಕ್ಣಿ ಸಂಗೀತಾಕ್ ಮಜ್ಯಾ ತಾಂಕಿಪುರ್ತೆಂ ದೀಂವ್ಕ್ ಹಾಂವ್ ಖಂಡಿತ್ ಪ್ರೇತನ್ ಕರ್ತಲೊಂ. ಹೆರ್ ಕೊಂಕ್ಣಿ ಕೊವ್ಳೆಂಕ್ ತಾಳೊ ದಿಂವ್ಚೆಂ ಕಾಮ್ ಆಜೂನ್ ಚಾಲು ಆಸಾ. ಹ್ಯಾ ವರ್ಸಾಚ್ಯಾ ಅಕ್ರೇಕ್ ಅನ್ಯೇಕ್ ಕೊಂಕ್ಣಿ ಕೊವ್ಳಿ ಕಾಡುಂಕ್ ಯೆವ್ಜಣ್ ಆಸಾ.

ಹಾಂವ್ : 'ಉಡಿ ಉಡಿ'ಕ್ ಮೆಳ್‍ಲ್ಲೊಚ್ ಪಾಟಿಂಬೊ ತುಜಾ ಫುಡ್ಲ್ಯಾ ಕೊವ್ಳೆಕ್ ಲಾಭತ್ ಮ್ಹಳ್ಳೊ ಭರ್ವಸೊ ತುಕಾ ಆಸಾ.?

ಪ್ರಜೋತ್ : ಖಂಡಿತ್ ಮೆಳ್ತಲೊ ಮ್ಹಳ್ಳೊ ಭರ್ವಸೊ ಆಸಾ ಆನಿ ತ್ಯಾಚ್ ಭರ್ವಶ್ಯಾನ್ ಹಾವೆಂ ಅನ್ಯೇಕ್ ಕೊವ್ಳಿ ಕಾಡ್ಚಿ ಯೆವ್ಜಣ್ ಕೆಲ್ಯಾ. ಹ್ಯಾ ಕೊವ್ಳೆಂತೀ ಥೊಡೆ ನವೆ ಪ್ರಯೋಗ್ ಕರುಂಕ್ ಹಾವೆಂ ಚಿಂತ್ಲಾಂ ಆನಿ ಲೊಕಾಕ್ ತಿ ಮೆಚ್ವತೆಲಿ ಆನಿ 'ಉಡಿ ಉಡಿ' ಕ್ ಲಾಭ್‍ಲ್ಲ್ಯಾಚಾಕೀ ಚಡ್ ಪಾಟಿಂಬೊ ಲಾಭ್ತಲೊ ಮ್ಹಳ್ಳೊ ವಿಶ್ವಾಸ್ ಆಸಾ.!

ಹಾಂವ್ : ಕೊಂಕ್ಣಿ ಸಂಗೀತ್ ಮೊಗಿಂಕ್ ಅನಿ ತುಜ್ಯಾ ಅಭಿಮಾನಿಂಕ್ ಕಾಂಯ್ ಸಂದೇಶ್ ದೀಂವ್ಕ್ ಆಸಾ.?

ಪ್ರಜೋತ್ : ಮ್ಹಜ್ಯಾ ಸಂಗೀತ್ ವಾವ್ರಾಕ್ ತಶೆಂ ಮ್ಹಜ್ಯಾ ಫುಡ್ಲದ್ ಕೊವ್ಳೆಕ್ ತುಮಿ ದಿಲ್ಲ್ಯಾ ಸಹಕಾರಾಕ್ ಆನಿ ಪ್ರೋತ್ಸಾವಾಕ್ ಹಾಂವ್ ಅಭಾರಿ ಆಸಾಂ. ತುಮ್ಚೆಲಾಗಿಂ ಏಕ್ ವಿನಂತಿ ಆಸಾ - ಜಾಂವ್ ತಿ ಮ್ಹಜಿ ಕೊವ್ಳಿ ಯಾ ಹೆರ್ ಖಂಚಾಯೀ ಕಲಾಕಾರಾಚಿ ಕೊವ್ಳಿ - ತಿ ತುಮಿ ಮೋಲ್ ಫಾರಿಕ್ ಕರ್ನ್ ಕಾಣ್ಘೆಯಾ ಆನಿ ಕೊವ್ಳಿ ಘಡ್ಣಾರಾಂಚ್ಯಾ ಮಿನತೆಕ್ ಫಾವೊ ತೊ ಮಾನ್ ದಿಯಾ. ತುಮ್ಕಾಂ ಕೊಂಕ್ಣಿ ಸಂಗೀತಾಚೆಂ ಮನೋರಂಜನ್ ದಿಂವ್ಚೆಂ ಮ್ಹಜೆಂ ಮಿಸಾಂವ್ ಜಾರಿ ಆಸ್ತೆಲೆಂ, ವೆಗಿಂಚ್ ನವಿ ಕೊವ್ಳಿ ಘೆವ್ನ್ ತುಮ್ಚೆ ಸಮೊರ್ ಯೆತಲೊಂ. ಮೋಗ್ ಆಸೊಂ.

ಹ್ಯಾಪಿ ಬರ್ಥ್‍ಡೇ ಉಡಿ ಉಡಿ...

(ಹೆಂ ಸಂದರ್ಶನ್  ದಿರ್ವೆಂ ಪತ್ರಾಚ್ಯಾ ಮಾರ್ಚ್ 2015 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)

ಉಪ್ಕಾರ್ ಕರ್ನ್, ಉಪ್ಕಾರ್ ಕರಿನಾಕಾ ಸೊಮಿಯಾ.!!

ತಾ. 9-8-2014 ರ ನಮ್ಮ ಪತ್ರಿಕೆಯ ಮಂಗಳೂರು ಆವೃತ್ತಿಯ ಪುಟ 6 ರಲ್ಲಿ ಪ್ರಕಟವಾದ Thanks Giving  ಜಾಹೀರಾತಿನಲ್ಲಿ ಪ್ರಕಟವಾದ ಏಸು ಸ್ವಾಮಿಯ ಫೋಟೋ ಇಂಟರ್ನೆಟ್‍ನಿಂದ ಉಪಯೋಗಿಸುವಾಗ ಪಮಾದವಶಾತ್ ಆದ ಕಣ್ತಪ್ಪಿನಿಂದ ಪ್ರಕಟವಾಗಿದೆ. ಈ ಪ್ರಮಾದಕ್ಕೆ ವಿಷಾದ ಸೂಚಿಸುತ್ತಾ ಯಾವುದೇ ಸಮಾಜದ, ವ್ಯಕ್ತಿಗಳ ಭಾವನೆಗಳಿಗೆ ನೋವುಂಟುಮಾಡುವ ಉದ್ದೇಶವಿಲ್ಲ ಎಂಬುದನ್ನು ಈ ಮೂಲಕ ತಿಳಿಯಪಡಿಸುತ್ತೇವೆ. - ಸಂಪಾದಕ. 

ಅಸಲೆಂ ಏಕ್ ಸೃಶ್ಟೀಕರಣ್ ಕರಾವಳೆಚೆಂ ನಂಬರ್ ವನ್, ತಶೆಂ ಕರ್ಣಾಟಕ್ ರಾಜ್ಯಾಚೆಂ ಪ್ರಮುಖ್ ದಿಸಾಳೆಂ ಮಣ್ ನಾಂವಾಡ್‍ಲ್ಲ್ಯಾ 'ಉದಯವಾಣಿ'ನ್ ಆಗೋಸ್ತಾಚಾ 11 ತಾರಿಕೆಚಾ ಆಪ್ಲ್ಯಾ ಮಂಗ್ಳರ್ ಆವೃತ್ತೆಚೆರ್ ಫಾಯ್ಸ್ ಕೆಲ್ಲೆಂ.! ಕಾರಣ್..?

ಕಾರಣ್ ಇತ್ಲೆಂಚ್ : Thanks For The Favours Received. Thanks To Jesus. -A. Crasta, Neermarga - ಅಸಲೆಂ ಏಕ್ ಇಸ್ತಿಹಾರ್ ದೋನ್  ದಿಸಾಂದಿಂ ಮ್ಹಣ್ಜೆ ಅಗೋಸ್ತಾಚಾ 9 ತಾರಿಕೆರ್ ತ್ಯಾಚ್ ಪತ್ರಾಚೆರ್ ಫಾಯ್ಸ್ ಜಾಲ್ಲೆಂ ಆನಿ ತಾಂತು ವಾಪಾರ್ಲೆಲ್ಯಾ ಕ್ರೀಸ್ತಾಚ್ಯಾ ತಸ್ವೀರೆಚ್ಯಾ ಎಕಾ ಹಾತಾಂತ್ ಕೋಕಾಕೋಲಾಚೆಂ ಟಿನ್ ಆಸ್ಲೆಂ ತರ್ ದುಸ್ರ್ಯಾ ಹಾತಿಂ ಜಳ್ಚಿ ಸಿಗ್ರೇಟ್.!

ಪತ್ರಾಚೆರ್ ಜೆದ್ನಾ ಆಮ್ಚಾ 'ಭಾವಾಡ್ತಿ' ಲೊಕಾನಿಂ ಹಿ ತಸ್ವೀರ್ ದೆಖ್ಲಿ ತೆದ್ನಾಂ ತಾಂಚಿ ತಕ್ಲಿ ಫಿರ್ಲಿ ಆನಿ ಎಕಾಎಕಿಂ ಫೇಸ್ಬುಕ್, ವಾಟ್ಸಾಪ್, ಎಸ್ಸೆಮ್ಮೆಸ್ ಆನಿ ಇತರ್ ಜಾಳಿಜಾಗ್ಯಾನಿಂ ಹಿ ತಸ್ವೀರ್ ಅದಲ್ ಬದಲ್ ಜಾಲಿ, ಹಾಚೆಥಾವ್ನ್ ತಾಕಾ ಆನಿ ತಾಚೆ ಥಾವ್ನ್ ಆನ್ಯೇಕ್ಲ್ಯಾನ್ ಖಬರ್ ಪಾಚಾರ್ಲಿ, ಫೆಸ್ಬುಕ್ ತಸಲ್ಯಾ ಸಾಮಾಜಿಕ್ ಜಾಳಿಜಾಗ್ಯಾನಿಂ ಹುನುನಿ ಚರ್ಚಾ ಚಲ್ಲಿ, 'ಉದಯವಾಣಿ' ಪತ್ರಾಚೆರ್, ಸಂಪಾದಕಾಚೆರ್ ಆನಿ ಆಡಳ್ತ್ಯಾ ಮಂಡಳೆಚೆರ್ ಹೆ ಆಮ್ಚೆ 'ಭಾವಾಡ್ತಿ' ಭಾವ್ ತಾಪ್ಲೆ. ಥೊಡ್ಯಾನಿಂ ಪ್ರತಿಭಟನ್ ಕರುಂಕ್ ಉಲೊ ದಿಲೊ ತರ್, ಆನಿ ಥೊಡ್ಯಾನಿಂ ಏಕ್ ಮೇಟ್ ಮುಕಾರ್ ವಚೊನ್ 'ಉದಯವಾಣಿ' ಪತ್ರಾಕ್ ಸರ್ವ್ 'ಭಾವಾಡ್ತಿ' ಲೊಕಾನ್ ಬಹಿಶ್ಕಾರ್ ಘಾಲಿಜಾಯ್, ತೆಂ ಪತ್ರ್ ಘೆಂವ್ಚೆಂ ಆನಿ ವಾಚ್‍ಚೆಂ ರಾವಾಯ್ಜಾಯ್, ಆಮ್ಚಾ ಸೊಮಿಯಾಕ್ ಆಕ್ಮಾನ್ ಕೆಲ್ಲ್ಯಾಕ್ ತಾಂಕಾಂ ಸಾರ್ಕಿ ಬೂದ್ ಶಿಕಯ್ಜಾಯ್ - ಆಸೊ ಸಯ್ತ್ ಉಲೊ ದಿಲೊ. ಹ್ಯಾ ಮಧ್ಗಾತ್ ಹೆಳ್ಕೆವಿಣೆಂಚ್ ಏಕ್ ಸಂಗತ್ ಘಡ್‍ಲ್ಲಿ ತಿ ಕೊಣಾಚಾಯೀ ಗುಮಾನಾಕ್ ಗೆಲಿನಾ. ಹ್ಯಾ ಆಮ್ಚಾ 'ಭಾವಾಡ್ತಿ' ಭಾವಾಂಚಾ ಸವಾಯ್ ಬುದ್ವಂತ್ಕಾಯೆಕ್ ಲಾಗೊನ್ ತ್ಯಾ ದಿಸಾಚ್ಯಾ 'ಉದಯವಾಣಿ' ಪತ್ರಾಕ್ ಡಿಮಾಂಡ್ ವಾಡ್ಲೊ. ಮೋರ್ನ್ ಪಾವ್‍ಲ್ಲ್ಯಾ ಆಪ್ಲ್ಯಾ ಭಾವಾಕ್ ಶೃಧ್ಧಾಂಜಲಿ ಭೆಟವ್ನ್ ಕುಟ್ಮಾಚ್ಯಾನಿಂ ತಾಚಿ ತಸ್ವೀರ್ ಛಾಪಯಿಲ್ಲೆ ದೀಸ್ ಸಯ್ತ್ ಪತ್ರ್ ಉಸ್ಣೆಂ ಘೆವ್ನ್ ವಾಚಿನಾತ್‍ಲ್ಲ್ಯಾನ್ ತ್ಯಾ ದೀಸ್ ಪತ್ರ್ ಮೊಲಾಕ್ ಘೆತ್‍ಲ್ಲೆಂ! ಉದಯವಾಣಿ ಇ-ಪೇಪರ್ ವಾಚ್ಪ್ಯಾಂಚೊ ಸಂಖೊ ತ್ಯಾ ದೀಸ್ ಗಣನೀಯ್ ಮಾಪಾನ್ ಚಡ್‍ಲ್ಲೊ.! ದೋನ್‍ಂಚ್ ದೀಸ್.. ವ್ಹಯ್.. ಫಕತ್ ದೋನ್ ದೀಸ್.. ಉದಯವಾಣಿ ಪತ್ರಾನ್ ಹಾವೆಂ ವಯ್ರ್ ಉಲ್ಲೇಖ್ ಕೆಲ್ಲೆಂ ಸೃಶ್ಟೀಕರಣ್ ಛಾಪ್‍ಲ್ಲೆಂಚ್ ಆಮ್ಚಾ 'ಭಾವಾಡ್ತಿ' ಭಾವಾಂಚೊ ಜೋಶ್ ಥಂಡ್ ಪಡ್ಲೊ, ಕ್ರೀಸ್ತಾಚೊ ಉಪದೆಸ್ ತಾಂಕಾಂ ಅಚಾನಕ್ ಉಗ್ಡಾಸಾಕ್ ಯೇವ್ನ್ ಸಕ್ಕಡ್ ಎಕಾಚ್ಛಾಣೆಂ ಭೊಗ್ಸಾಣ್ಯಾಚ್ಯಾ ಸ್ಪಿರಿತಾನ್ ಭರ್ಲೆ ಆನಿ 'ಉದಯವಾಣಿ' ಪತ್ರಾಕ್, ತಾಚ್ಯಾ ಸಂಪಾದಕಾಕ್ ಆನಿ ಜಾಹೀರಾತ್ ದಿಲ್ಲ್ಯಾ ತ್ಯಾ ಮಾನೆಸ್ತಾಕ್ ತಾಣಿಂ ಉದಾರ್‍ಮನಿಂ ಭೊಗ್ಶಿಲೆಂ. ಇತ್ಲ್ಯಾರ್ ವಿಶಯ್ ಸಂಪ್ಲೊ. ಕ್ರೀಸ್ತಾಚೆಂ ಪವಿತ್ರ್ ಕಾಳಿಜ್ ದೆಗೆಕ್ ದವರ್ನ್ ಸದಾಂಚಿ - 'ಮೊದಿಚ್ಯಾ ಬರ್ಯಾ ದಿಸಾಂ' ವಿಶಿಂತ್ಲಿ, ಚರ್ಚಾ ಮುಕಾರ್ಸಿಲಿ.!!

ಪುಣ್ ಮ್ಹಜೆತಸ್ಲ್ಯಾ ಉಣ್ಯಾಭಾವಾಡ್ತ್ಯಾಚ್ಯಾ (ಅನ್ಭಾವಾಡ್ತಿ ಮ್ಹಣ್ತೆಲೆಯೀ ಆಸಾತ್. ಮಾಕಾ ಪಡೊನ್ ವಚೊಂಕ್ ನಾ) ಮತಿಂತ್ ಹೆಂ ಘಡಿತ್ ಜಾಯ್ತ್ಯಾ ಸವಾಲಾಂಚಿಂ ಭಿಂಯಾಂ ಒಂಪುನ್ ಘೆಲಾಂ.. ಉದಯವಾಣಿ ತಸ್ಲ್ಯಾ ಸಾಮಾಜಿಕ್ ಜವಾಬ್ದಾರಿ ಆಸ್ಚ್ಯಾ ಎಕಾ ಪತ್ರಾನ್ ಅಸಲಿ ತಸ್ವೀರ್, ತಾಂತ್ಲ್ಯಾ ತಾಂತುಂ ಕರಾವಳಿ ತಸಲ್ಯಾ ಕೋಮುಸುಕ್ಶಿಮ್ ಜಾಗ್ಯಾಚ್ಯಾ ಆವೃತ್ತೆಚೆರ್ ಫಾಯ್ಸ್ ಕರ್ತಾನಾ ಇಲ್ಲಿ ಪುಣಿ ಜವಾಬ್ದಾರಿ ಘೆಜೆ ಆಸ್‍ಲ್ಲಿ ನ್ಹಯ್.? ಸಂದಾಪದಕ್ ಹೆಂ ಘಡಿತ್ ಅಪ್ರಚೋದಿತ್ ಆನಿ ಅಚಾನಕ್ ಘಡ್‍ಲ್ಲೆಂ ತಸಲೆಂ ಮ್ಹಣ್ತಾ ತರೀ ಪತ್ರಾಚ್ಯಾ ಭಿತರ್ ಆಸ್ಚಿಂ ಥೊಡಿಂ ಮುಳಾಂ ಹೆಂ ಉದ್ದೇಶ್‍ಪೂರ್ವಕ್ ಕೆಲ್ಲೆಂ ಏಕ್ ಪಬ್ಲಿಸಿಟಿ ಸ್ಟಂಟ್ ಮ್ಹಣ್ತಾತ್ - ಸತ್ ಕಿತೆಂ.?? ಇತ್ಲ್ಯಾಕೀ, ಹೆಂ ಸರ್ವ್ ಘಡ್ಚಾ ಪಾಟ್ಲೆಂ ಮೂಳ್ ಕಾರಣ್ ಕಿತೆಂ .? ಜರ್ 'ಎ.ಕ್ರಾಸ್ತಾ' ಮ್ಹಳ್ಳ್ಯಾ ತ್ಯಾ ಮಾನೆಸ್ತಾನ್ ಜೆಜುನ್ ತಾಕಾ ಕೆಲ್ಲ್ಯಾ ಉಪ್ಕಾರಾಂಬಾಬ್ತಿಂ ಅರ್ಗಾಂ ಪಾಟವ್ನ್ ತಸಲೆಂ ಏಕ್ ಇಸ್ತಿಹಾರ್ ಘಾಲುಂಕ್ ನಾತ್‍ಲ್ಲೆಂ ತರ್ ಯಾ ತಾಕಾ ತಸಲೆಂ ಇಸ್ತಿಹಾರ್ ಘಾಲಿಜೆಚ್ ಮ್ಹಳ್ಳಿ ತಿತ್ಲಿಯೀ ತಾಡ್‍ವೋಡ್ ಆಸ್‍ಲ್ಲಿ ತರ್, ಪಯ್ಶಾಂಚ್ಯಾ ರಾಶಿರ್ ಘೊರೆಂವ್ಚಾ ಉದಯವಾಣಿ ಪತ್ರಾಚೆರ್ ತಿ ಛಾಪ್ಚಾ ಬದ್ಲಾಕ್ ಆಮ್ಚಾಚ್ ಸಮುದಾಯಾಚಾ ಆನಿ ಆಮ್ಚಾಚ್ ಭಾಶೆಚೊ ಪೋಸ್ ಕರ್ಚಾ (ಧರ್ಮ್ ಚಲಂವ್ಚಾ ನ್ಹಯ್ ಹಾಂ.!) ಖಂಚಾಯೀ ಪತ್ರಾಚೆರ್ ವಾ ಜಾಳಿ ಜಾಗ್ಯಾಂಚೆರ್ ತಿ ಪ್ರಗಟ್ ಕೆಲ್ಲಿ ತರ್ ತಾಕಾ ಉಪ್ಕಾರ್ ಕೆಲ್ಲ್ಯಾ ಸೊಮಿಯಾಚೊ ತಾಣೆಂ ಉಪ್ಕಾರ್ ಬಾವುಡ್ಚಾ ತೃಪ್ತೆ ಬರಾಬರ್ ಎಕಾ ಕೊಂಕ್ಣಿ ಪತ್ರಾಚೊ ಧಾಕ್ಟ್ಯಾ ಮಾಪಾನ್ ತರೀ ಪೋಸ್ ಕೆಲ್ಲಿ ಧಾದೊಸ್ಕಾಯ್ ಸಯ್ತ್ ತಾಕಾ ಲಾಭ್ತಿ ನ್ಹಯ್.?!

ಆದ್ಲೆಪಾವ್ಟಿಂ ಆಮ್ಚ್ಯಾ ತೆಂಪ್ಲಾಂಚೆರ್ ನಿರಂತರಿಂ ಧಾಡ್ ಜಾಲಿ, ಆಮ್ಚಾ ಮುಖೆಲ್ಯಾನಿಂ ಲೊಕಾಕ್ ಪ್ರತಿಭಟನ್ ಕರುಂಕ್ ಉಲೊ ದಿಲೊ. ತೆಂಪ್ಲಾಂಚೆರ್ ಧಾಡ್ ಘಾಲ್ಯಾ ಮ್ಹಳ್ಳ್ಯಾ ಗಂಭೀರ್ ಸಂಗ್ತಿಚಾಕೀ ಚಡ್ ಧರ್ಮಾಚೆರ್ ಹಲ್ಲೊ ಜಾಲಾ ಮ್ಹಳ್ಳ್ಯಾ ಸಿಂತಿಮೆಂತಾಕ್ ಆಮ್ಚ್ಯಾ ಮುಖೆಲ್ಯಾನಿಂ ಚಡ್ ಒತ್ತು ದಿಲೊ ಆನಿ ಆಮ್ಚ್ಯಾ ತರ್ನಾಟ್ಯಾಂಕ್ ಏಕ್ ಘೊಟ್ ಧರ್ಮಾಚೆಂ ಅಮಾಲ್ ತಾಣಿಂ ಭರಯ್ಲೆಂ. ಉಪ್ರಾಂತ್ ಘಡ್‍ಲ್ಲೆಂ ಸಕ್ಡಾಂಕ್ ಕಳಿತ್ ಆಸಾ. ಗಲ್ಫಾಚ್ಯಾ ಕಾಮಾಚೆರ್ ಆಸುನ್ ಸುಟಿಯೆರ್ ಆಯಿಲ್ಲ್ಯಾಂಕ್ ಧರ್ನ್, ಕುಲಿಕಾಮಾಕ್ ವೆತೆಲ್ಯಾಂ ಪರ್ಯಾಂತ್ಲೆ ಜಾಯ್ತೆ ಆಮ್ಚೆ ತರ್ನಾಟೆ ಕ್ರಿಮಿನಲ್ ಕೇಜಿ ಮಾತ್ಯಾರ್ ಘೆವ್ನ್ ಜಯ್ಲಾ ಪರ್ಯಾಂತ್ ಪಾವ್ಲೆ. ಕೊಣಾಚ್ಯಾ ಘರಾ ಎಕ್ಲೊಚ್ ಪೂತ್ ತರ್ ಆನಿ ಕೊಣಾಚ್ಯಾ ಘರಾ ಭಯ್ಣಿಚೆಂ ಕಾಜಾರ್.! ಕಿತ್ಯಾಚಿಚ್ ಪರ್ವಾ ಕರಿನಾತ್‍ಲ್ಲ್ಯಾ ಕಾನುನಾಚೆ ದುಸ್ಮಾನ್ ಜಾಲ್ಲೆಂ ತಾಂಚೆಪಯ್ಕಿಂ ಥೊಡೆ ಆಜಿಕಿಯೀ ಕೊಡ್ತಿಚಿಂ, ಪೊಲಿಸ್ ಸ್ಟೆಶನಾಚಿಂ ಬಾಗ್ಲಾಂ ರಾಕೊನ್ ಆಸಾತ್ ತರ್ ತಾಂಕಾಂ ಚಾಳ್ವಾಯಿಲ್ಲೆ ಮುಖೆಲಿ ತ್ಯಾಚ್ ಕೋಮುವಾದಿ ಸರ್ಕಾರಾಚ್ಯಾ ಕೇಸರಿ ಮುಂಡಾಸ್‍ವಾಲ್ಯಾಂಕ್ ವೆದಿರ್ ಆಪವ್ನ್ ಫುಲಾಂತುರೆ ದೀವ್ನ್ ಮಾನ್ ಕರ್ಚೆಂ ಸಯ್ತ್ ಆಮಿ ಆಮ್ಚ್ಯಾ ನಿರ್ಭಾಗಿ ದೊಳ್ಯಾನಿ ಪಳೆಯ್ಜಯ್ ಪಡ್ಲೆಂ.! ಆತಾಂ ಸಾಂಗಾ  ಮಾಕಾ, ಜರ್ ಹ್ಯಾ ಘಡಿತಾಂತೀ ಅಶೆಂಚ್ ಘಡ್‍ಲ್ಲೆಂ ತರ್..? ಕ್ರೀಸ್ತಾಚೆ ಬಾವ್ಳೆ ಮೊಡ್ಚೆ ಆನಿ ತಾಚ್ಯಾ ಹಾತಾಂತ್ ಕೋಕಾಕೋಲಾ ಆನಿ ಸಿಗ್ರೆಟ್ ದಿಂವ್ಚಿಂ ದೊನೀ ಘಡಿತಾಂ ಏಕ್‍ಚ್ ತಾಕ್ಡೆರ್ ದವರ್ನ್ ಸಮಾಸಮ್ ತುಕ್ಯೆತ್ ಆಸ್ತಾಂ ಧಾರ್ಮಿಕ್ ಭೊಗ್ಣಾಂಕ್ ಚಾಳ್ವಂವ್ಚಿ ಸಕತ್ ತೆಂಪ್ಲಾಂಚೆರ್ ಧಾಡ್ ಘಾಲ್ಲ್ಯಾ ತ್ಯಾ ಘಡಿತಾಕ್ ಆಸ್ಲೆತಿತ್ಲಿಚ್ ಯಾ ತಾಚಾ ಪ್ರಾಸ್ ಮಾತ್ಶಿ ಚಡ್‍ಚ್ ಹ್ಯಾ ಘಡಿತಾಕ್ ಆಸ್ಲಿ. ಜರ್ ತಶೆಂ ಕಾಂಯ್ ಘಡ್‍ಲ್ಲೆಂ ತರ್..? ಪರತ್ ತಸಲೆಚ್ ದಂಗೆ ಜಾತೆ ತರ್..?? ಹ್ಯಾ ಮಾನೆಸ್ತಾಕ್ ಸೊಮಿಯಾನ್ ಉಪ್ಕಾರ್ ಕೆಲ್ಲ್ಯಾ ಕರ್ಮಾಕ್ ಆಮ್ಚ್ಯಾ ತರ್ನಾಟ್ಯಾನಿಂ ಪರತ್ ಧರ್ಮಾಝುಜ್ ಝುಜಾಜೆ ಪಡ್ತೆಂ ಆನಿ ಪರತ್ ಜಯ್ಲಾಕ್ ವಚಾಜಾಯ್ ಪಡ್ತೆಂ.??? ಜರ್ ಅಶೆಂ ವ್ಹಯ್, ತರ್ ಸೊಮಿಯಾ, ಉಪ್ಕಾರ್ ಕರ್ನ್ ಆನಿ ಮುಕಾರ್ ಚುಕೊನೀ ಅಸಲ್ಯಾಂಕ್ ಉಪ್ಕಾರ್ ಕರುಂಕ್ ವಚಾನಾಕಾ.!!
ಅಸಲೆ ಅರ್ಗಾಂ ಬ್ಲೋಕ್ ಉದಯವಾಣಿ ಮಾತ್ರ್ ನ್ಹಂಯ್ ಹರ್ಯೆಕಾ ಪತ್ರಾಚೆರ್ ಸದಾಂಚೆ. ಘಾಲ್ಚಿ ಯಾ ಸೊಡ್ಚಿ ತಾಂಚಿ ವೆಗ್ತಿಗತ್ ವಿಂಚವ್ನ್ ತರ್ ತಿ ಛಾಪ್ಚಿ ವಿಂಚವ್ನ್ ತ್ಯಾ ಪತ್ರಾಚ್ಯಾ ಸಂಪಾದಕಾಚಿ ಆನಿ ಪ್ರಕಾಶಕಾಚಿ ದೆಕುನ್ ತ್ಯಾ ವಿಶೀ ಸಾರ್ಕೆಂ ಯಾ ಚೂಕ್ ಮ್ಹಣ್ ಎಕಾಎಕಿಂ ಹಾಂವ್ ಫೈಸಲ್ ದೀನ್ ತರ್ ಖಂಡಿತ್ ಚೂಕ್ ಜಾತಾ. ಪುಣ್ ಚಿಂತಾ... ಆಮಿ ಆಮ್ಕಾಂ ಲಾಭ್‍ಲ್ಲ್ಯಾ ಉಪ್ಕಾರಾಂಕ್ ಅರ್ಗಾಂ ದೀವ್ನ್ ಫಲಾಣ್ಯಾ ಪತ್ರಾಚೆರ್ ಇಸ್ತಿಹಾರ್ ಛಾಪ್ತಾಂವ್,  ವಾಚುನ್ ಧಾಧೊಶಿ ಜಾತಾಂವ್  ಆನಿ ಇಶ್ಟಾಂಲಾಗಿಂ, ಕುಟ್ಮಾದಾರಾಂ ಲಾಗಿಂ ತೆಂ ವಾಂಟುನ್ ಘೆತಾಂವ್. ಪುಣ್ ಹೆಂ ಪತ್ರ್ ಆ ಮಿ ಮಾತ್ರ್ ಘೆನಾಂವ್, ಹೆರ್ ಲೋಕ್‍ಯೀ ಘೆತಾ. ಆ ಮಿ, ಆಮ್ಚೊ ಅರ್ಗಾಂ ಬ್ಲೋಕ್ ಆಸಾ ದೆಕುನ್ ತೆಂ ಪತ್ರ್ ಸಾಂಭಾಳ್ನ್ ದವರ್ಶಾಂವ್,  ಪುಣ್  ಹೆರ್.. ? ತಾಂಕಾಂ ತೊ ದೀಸ್ ಸಂಪೊನ್ ದುಸ್ರಿ ಸಕಾಳ್ ಉದೆತಾನಾ ತೆಂ ಪತ್ರ್ 'ಪರ್ನೆಂ ಪೇಪರ್' ಜಾತಾ. ಪರ್ನ್ಯಾ  ಪೇಪರಾಚೊ ಎಕ್ಲ್ಯಾನ್ ಕಸೊಯೀ ಉಪಯೋಗ್ ಕರ್ಯೆತ್. ಸಕಾಳಿಫುಡೆಂ ಶೆಳೆಲ್ಲ್ಯಾ ಲಾಂಕ್ಡಾಂಕ್ ಉಜೊ ಲಾಗಾನಾತ್ಲ್ಯಾ ವೆಳಾರ್ ತೆಂ ಗಳ್ಶಿಯೆತ್, ಧಾಕ್ಟುಲ್ಯಾ ಭುರ್ಗ್ಯಾನ್  ಅಚಾನಕ್ 'ಕಕ್ಕ' ಕೆಲ್ಲೆ ತವಳ್ ಸುಕಿ ಆಂಗೊಟಿ ಮೆಳ್ಲಿ ನಾ ತರ್ ತೊ 'ಕಕ್ಕ' ಪುಸುನ್ ಕಾಡುಂಕೀ ತೆಂ ವಾಪಾರ್ಯೆತ್..! ಸೊಮಿಯಾಚ್ಯಾ ಹಾತಾಂತ್ ಸಿಗ್ರೆಟ್ ಆನಿ ಕೋಕಾಕೋಲಾ ದಿಲ್ಲ್ಯಾತವಳ್ ಆಮ್ಚಾ ಮನಾಕ್ ದುಖ್ತಾ ತರ್, ಸೊಮಿಯಾಚಿ ತಸ್ವೀರ್ ಛಾಪ್‍ಲ್ಲೆಂ ತೆಂ ಪತ್ರ್ ಉಜ್ಯಾಂತ್ ಹುಲ್ಪೊನ್ ಗೊಬೊರ್ ಜಾಲ್ಲೆ ತವಳ್ ಯಾ ತ್ಯಾ ತಸ್ವೀರೆಕ್ 'ಕಕ್ಕ' ಲಾಗ್‍ಲ್ಲೆ ತವಳ್‍ಯೀ ಆಮ್ಕಾಂ ದುಖ್ತಾ ನ್ಹಯ್.?! ತಶೆಂ ಮ್ಹಣ್ ಆಮಿ ತಾಂಚೆರೀ ಬದ್ಲಾಮ್ ಘಾಲುಂಕ್ ಜಾತಾ..? ಆಮ್ಚಾ ಧಾರ್ಮಿಕ್ ಭೊಗ್ಣಾಂಕ್ ಮಸ್ತಿಲೆಂ ಮ್ಹಣ್ ಪ್ರತಿಭಟನ್ ಕರುಂಕ್ ಜಾತಾ.?? 'ಕಕ್ಕ' ಪುಸುಲ್ಲ್ಯಾ ತ್ಯಾ ಪತ್ರಾಚಿ ತಸ್ವೀರ್ ಕಾಡ್ನ್ ವಾಟ್ಸಾಪಾಚೆರ್ ಚಿಡ್ಕಾವ್ನ್ ಸಂಸಾರ್‍ಭರ್ ತ್ಯಾ ಘಡಿತಾ ವಿರೋಧ್ ಜಾಗೃತಿ ಹಾಡುಂಕ್ ಜಾತಾ..? ಯಾ ತಿ ತಸ್ವೀರ್ ಫೇಸ್ಬುಕಾಚ್ಯಾ ವೊಣ್ದಿರ್ ಚಿಡ್ಕಾವ್ನ್ 'ವರ್ಚುವಲ್ ಕೋಡ್ತ್' ಘಡ್ನ್ ತ್ಯಾ ಘಡಿತಾಚೆರ್ ವಾದ್ ವಿವಾದ್ ಕರ್ನ್ ಫೈಸಲ್ ದೀಂವ್ಕ್ ಜಾತಾ..?? ನಾಂ ಮೂ..?? 

ಸೊಮಿಯಾನ್ ಸಾಂಗ್‍ಲ್ಲಿ ಧಾ ಕೊಡ್ಕಾರಾಂಚಿ ಒಪಾರ್ ಆಯ್ಕೊನ್ ತಾಚೆಥಾವ್ನ್ ಪ್ರಭಾವಿತ್ ಜಾಲ್ಲ್ಯಾಂ ಪಯ್ಕಿಂ ಹಾವೀಂ ಎಕ್ಲೊ ದೆಕುನ್ ಆಮ್ಕಾಂ ಉಪ್ಕಾರ್ ಕೆಲ್ಲ್ಯಾಕ್ ಪ್ರತ್ಯುಪ್ಕಾರ್ ಕರಿಜಯ್, ಪ್ರತ್ಯುಪ್ಕಾರ್ ಕರುಂಕ್ ಜಾಯ್ನಾ ತರ್ ಉಣ್ಯಾರ್ ಉಣೆಂ ತಾಚೊ ಉಪ್ಕಾರ್ ಪುಣೀ ಆಮಿ ಭಾವ್ಡಿಜಾಯ್ ತೆಂ ಹಾಂವೀ ಮಾಂದ್ತಾಂ. ಇತ್ಲ್ಯಾಕೀ ಮ್ಹಜೊ ಶಿಣ್ ಉಪ್ಕಾರ್ ಭಾವುಡ್ಚಾ ಪ್ರಕ್ರಿಯೆಚೆರ್ ನ್ಹಯ್ ಬದ್ಲಾಕ್ ಉಪ್ಕಾರ್ ಭಾವ್ಡುಂಕ್ ಆಮಿ ವಾಪ್ರುಂಚ್ಯಾ ವಿಧಾನಾಂಚೆರ್.! ಚಿಂತ್ಯಾಂ, ಸಬಾರ್ ವರ್ಸಾಂಥಾವ್ನ್ ಭುರ್ಗ್ಯಾಚೆಂ  ದೆಣೆಂ ನಾತ್‍ಲ್ಲ್ಯಾ ಎಕಾ ಜೊಡ್ಯಾಕ್ ಸೊಮಿಯಾಚಾ ಕುರ್ಪೆನ್ ಭುರ್ಗ್ಯಾಚೆಂ ದೆಣೆಂ ಲಾಭ್ಲೆಂ ಆನಿ ತ್ಯಾ ಉಪ್ಕಾರಾಕ್ ಅರ್ಗಾಂ ದೀವ್ನ್ ಬ್ಲೋಕ್ ಫಾಯ್ಸ್ ಕರ್ಚಾ ಬದ್ಲಾಕ್ ತಾಣಿಂ - ಜರ್ ತಾಂಕಾಂ ಆರ್ಥಿಕ್ ತಾಂಕ್ ಆಸಾ ತರ್ ಖಂಚಾಯೀ ಎಕಾ ಅನಾಥ್ ಆಸ್ರ್ಯಾಂತ್ಲ್ಯಾ ಎಕಾ ಭುಗ್ಯಾಚೊ ಪೋಶಕ್ ಜಾವ್ನ್ ತ್ಯಾ ಭುಗ್ರ್ಯಾಚ್ಯಾ ಅಂಧ್ಕಾರಿ ಜಿವಿತಾಂತ್ ಭರ್ವಶ್ಯಾಚೊ ದಿವೊ ಪೆಟವ್ಯೆತ್ ನ್ಹಯ್.? ಜರ್ ತಿತ್ಲಿ ಆರ್ಥಿಕ್ ತಾಂಕ್ ತಾಂಕಾಂ ನಾ ತರ್ ಆಪ್ಲ್ಯಾ ತಾಂಕಿಫುರ್ತೆಂ ಕಾಂಯ್‍ಪುಣೀ (ಚಡ್ ನ್ಹಂಯ್ ತರೀ ಪತ್ರಾಚೆರ್ ಇಸ್ತಿಹಾರ್ ಘಾಲುಂಕ್ ಖರ್ಚುಂಚೊ ಐವಜ್ ತರೀ) ದೀವ್ನ್ ತೆಂ ಆಶ್ರಮ್ ಚಲಯ್ತೆಲ್ಯಾಂಚ್ಯಾ ಬರ್ಯಾ ಮನಾಕ್ ಈಟ್ ಜಾವ್ಯೆತ್ ನ್ಹಂಯ್.? ಜರ್ ಕೊಣಾ ಎಕ್ಲ್ಯಾಕ್ ಮದರ್ ತೆರೆಸಾಜಾ ಮಾಗ್ಣ್ಯಾ ಮಾರಿಫಾತ್, ದಾಕ್ತೆರಾನ್ ಗೂಣ್ ಕರುಂಕ್ ಜಾಯ್ನಾ ಮ್ಹಣ್ ಆಶಾ ಸಾಂಡ್‍ಲ್ಲ್ಯಾ ಪಿಡೆಥಾವ್ನ್ ಸುಟ್ಕಾ ಲಾಭ್ಲ್ಯಾ ಮ್ಹಣ್ ಭೊಗ್ತಾ ತರ್ ತಿಕಾ ಅರ್ಗಾಂ ದೀವ್ನ್ ಪತ್ರಾಚೆರ್ ಬ್ಲೋಕ್ ಘಾಲ್ಚಾ ಬದ್ಲಾಕ್, ಪಾವ್ಟ್ ಆಸ್‍ಲ್ಲ್ಯಾ ದಿಸಾನಿಂ ಆಸ್ಪತ್ರೆಂಚಿ ಭೆಟ್ ಕರ್ನ್, ಕುಟ್ಮಾಚ್ಯಾನಿಂ ಇಶ್ಟಾಮಂತ್ರಾನಿಂ ಸಾಂಡುನ್ ಘಾಲ್ಲ್ಯಾ ಪಿಡೆಸ್ತಾಂಸಂಗಿ ಥೊಡೊ ವೇಳ್ ಖರ್ಚುನ್ ತಾಂಕಾಂ ಕಾಂಯ್ ಇಲ್ಲೆಂ ಭುಜವ್ನ್ ಸಾಧ್ಯ್ ತರ್ ತಾಂಚಾ ಖರ್ಚಾಕ್ ಕಾಂಯ್ ಇಲ್ಲಿ ಮಜತ್ ಕೆಲಿ ತರ್ - ಕೊಲ್ಕತ್ತಾಚ್ಯಾ ಗಲ್ಲ್ಯಾನಿಂ ಕುಸೊನ್ ಗೆಲ್ಲ್ಯಾ ಮಾಸಾಚ್ಯಾಮುದ್ಯಾಂಪರಿಂ ಲೊಳೊನ್ ಆಸ್ಚ್ಯಾ ಕೊಡ್ಕಾರಾಂಕ್ ಆಪ್ಲ್ಯಾ ತಾಬೆನ್ ಘೆವ್ನ್ ತಾಂಚಾ ಸೆವೆಂತ್ ಆಪ್ಲಿ ಜಿಣಿ ಖರ್ಚಿಲ್ಲ್ಯಾ ತ್ಯಾ ಆವಯ್ ತೆರೆಜಾಜೊ ಉಪ್ಕಾರ್ ಭಾವ್ಡುಂಕ್ ಬಹುಶ ಹಾಚಾಕೀ ಸೊಂಪಿ ವಾಟ್ ದುಸ್ರಿ ಆಸ್ಚಿನಾ.! ಉಗ್ಡಾಸ್ ಆಸುಂ - ಮದರ್ ತೆರೆಜಾ ಜಂಯ್ ಆಸಾ ಥಂಯ್ಸರ್ ಸಂಸಾರಾಚೆಂ ಖಂಚೆಂಯೀ ಪತ್ರ್ (ಆಮ್ಚೆಂಯೀ ಧರುನ್) ಪಾವಿತ್ ಜಾಂವ್ಚಿ ವ್ಯವಸ್ಥಾ ಸದ್ಯಾಕ್ ನಾ, ಪುಣ್ ಆಮಿ ಕೆಲ್ಲ್ಯಾ ಎಕಾ ಬರ್ಯಾ ಕರ್ನೆಚಿ ಝಳಕ್ ತಿಕಾ ಲಾಭ್ತೆಲಿ ಖಂಡಿತ್.!! ಮಾಕಾ ತರೀ, ಪತ್ರಾಚೆರ್ ಬ್ಲೋಕ್ ಘಾಲ್ನ್ ಅರ್ಗಾಂ ಪಾಟಂವ್ಚಾ ಕರ್ನೆಂತ್, 'ಹಾವೆಂ ಮಾಕಾ ಮೆಳ್‍ಲ್ಲ್ಯಾ ಉಪ್ಕಾರಾಂಕ್ ಅರ್ಗಾಂ ದೀವ್ನ್ ಮ್ಹಜೊ ಕಾಯ್ದೊ ಫಾಳ್ಳಾ' ಮ್ಹಳ್ಳೆಂ ವಯ್ವಾಟಿ ಚಿಂತಾಕ್ ಉಟೊನ್ ದಿಸ್ತಾ ಶಿವಾಯ್ ಭಕ್ತ್ ನ್ಹಯ್.! 'ಹ್ಯಾ ಪಾವ್ಟಿಂ ಉಪ್ಕಾರ್ ಭಾವ್ಡಿನಾತ್ಲ್ಯಾರ್ ಮುಕ್ಲೆಪಾವ್ಟಿಂ ಮಾಗ್‍ಲ್ಲೊ ಉಪ್ಕಾರ್ ಮೆಳ್ಚೊ ನಾ' ಮ್ಹಣ್ತೆಲ್ಯಾಂಕ್ ಬಿಸಿನೆಸ್‍ಮೆನ್ ಮ್ಹಣ್ಯೆತ್ ಶಿವಾಯ್ ಭಕ್ತಿಕ್ ಮ್ಹಣುಂಕ್ ಮ್ಹಜೆಂ ರಾಜಾಂವ್ ಒಪ್ವಾನಾ.!!
ಅರ್ಗಾಂ ಬ್ಲೋಕ್ ದಿಂವ್ಚೆಂ ಫೆಶನ್ ದಿಸಾನ್ ದೀಸ್ ವೇಗ್ ಆಪ್ಣಾವ್ನ್ ಆಸ್ತಾನಾಂಚ್ ಆನಿ ಏಕ್ ನವೆಂ ಪಿಶೆಂಪಣ್ ಹ್ಯಾ ದಿಸಾನಿಂ ಸುರು ಜಾಲಾಂ. ಇ ಮೇಯ್ಲ್, ಎಸ್ಸೆಮೆಸ್, ವಾಟ್ಸಾಪ್, ಫೆಸ್ಬುಕ್ ತಸಲ್ಯಾ ಮಾಧ್ಯಮಾನಿಂ ಮಾಗ್ಣಿಂ ಬರವ್ನ್ ಸರ್ಕ್ಯುಲೆಟ್ ಕರ್ಚೆಂ ಆನಿ ಹೆರಾಂಕೀ ಕರುಂಕ್ ಸಾಂಗ್ಚೆಂ. ತಿತ್ಲೆಂಚ್ ತರ್ ವ್ಹಡ್ ನ್ಹಂಯ್ ಆಸ್ಲೆಂ, ಪುಣ್ ಹ್ಯಾ ಮಾಗ್ಣ್ಯಾಚ್ಯಾ ಅಕ್ರೇಕ್ ಏಕ್ ಹಿಶಾರೊ (ಭೆಶ್ಟಾವ್ಣಿ ಮ್ಹಣ್ಯೆತ್ ಕೊಣ್ಣಾ..) ಆಸ್ತಾ - ಜರ್ ಹೆಂ ಮಾಗ್ಣೆಂ ತುಮಿ ಧಾ ಜಣಾಂಕ್ ಧಾಡ್ಲೆಂ ತರ್ ತುಮ್ಚ್ಯಾ ಜಿಣ್ಯೆಂತ್ ನವಾಲ್ ಘಡ್ತೆಲೆಂ. ತುಮ್ಕಾಂ ಧಾ ಲಾಖಾಂಚೊ ಫೆರ್ಗೊ ಉಟ್ತಲೊ. ಜರ್ ತುಮಿ ಹಿ ಮಾಗ್ಣ್ಯಾಚಿ ಸಾಂಕಾಳ್ ಮುಕಾರಿನಾಸ್ತಾಂ ಅರ್ಧ್ಯಾರ್ ತುಟಯ್ಲಿ ತರ್ ತುಮ್ಚ್ಯಾ ಜಿವಿತಾಂತ್ ಎಕಾ ಪಾಟ್ಲ್ಯಾನ್ ಏಕ್ ಅನ್ವಾರಾಂ ಯೆತಲಿಂ, ವಹಿವಾಟ್ ನಶ್ಟಾಂತ್ ಪಡ್ತಲೊ, ತುಮ್ಚಾ ವಾಹನಾಚೆಂ ಭಿರಾಂಕುಳ್ ಅವ್ಘಡ್ ಘಡ್ತೆಲೆಂ... ಇತ್ಯಾದಿ ಇತ್ಯಾದಿ... ಥೊಡೆಪಾವ್ಟಿಂ ಹೆಂ ವಾಚುನ್ ಹಾಸ್ಚೆಂಗೀ ರಡ್ಚೆಂ ಮ್ಹಣ್ ಕನ್‍ಫ್ಯೂಶನ್ ಜಾತಾ ತರ್ ಥೊಡೆ ಪಾವ್ಟಿಂ 'ಹಾಂಚಾ ತಕ್ಲೆಚೆ ಸ್ಕ್ರೂ ಪುಣೀ ಝಡೊನ್ ಪಡೊಂಕ್ ನಾಂತ್‍ಮೂ.?' ಮ್ಹಳ್ಳೊ ದುಬಾವ್‍ಯೀ ಧೊಸ್ತಾ.! ನಾ ತರ್ ಸಾಂಗಾ ಮಾಕಾ.. ಜರ್ ಮಾಗ್ಣೆಂ ಕರ್ನ್‍ಂಚ್ ಆಮ್ಕಾಂ ಜಾಯ್ ಜಾಲ್ಲೆಂ ಸರ್ವ್ ಮೆಳ್ಚೆಂ ಆಸ್‍ಲ್ಲೆಂ ತರ್ ದೆವಾನ್ ಮನ್ಶಾಕ್ ರಚ್ತಾನಾ ದೋನ್ ಹಾತ್ ಆನಿ ಎಕೆಕಾ ಹಾತಾಂತ್ ಪಾಂಪಾಂಚ್  ಬೊಟಾಂ ಕಿತ್ಯಾಕ್ ದಿಲಿಂ.? ಧಾ ತೊಂಡಾ ಆನಿ ಎಕೆಕಾ ತೊಂಡಾಭಿತರ್ ಚಾಚಾರ್ ಜಿಬೊ ಕಿತ್ಯಾಕ್ ದಿಲ್ಯೊನಾಂತ್.? ತೆಂ ಸೊಡ್ಯಾಂ, ಆಮ್ಚ್ಯಾ ಮಾಲ್ಘಡ್ಯಾನಿಂ ಧಾ ಬೊಟಾಂ ಝರವ್ನ್ ಪಾಂಚ್ ಬೊಟಾಂ ತೊಂಡಾಕ್ ವರ್ ಮ್ಹಳ್ಳಿ ಸಾಂಗ್ಣಿ ಕಿತ್ಯಾಕ್ ರಚ್ಲಿ.? ದೀಸ್ ಭರ್ ದೊನೀ ವೋಂಟ್ ಘಳಯ್ ಆನಿ ಪೋಟ್ ಭರ್ ಮ್ಹಣ್ಯೆತೆಂ ನ್ಹಂಯ್.?? ಆಮಿ ಫಿತಿಸ್ಪಣಾಂ ವಿಶ್ಯಾಂತ್ ಭಾಶಣಾಂ ಬಿಗ್ದಿತಾಂವ್, ಹೆರ್ ಧರ್ಮಾಚಾನಿಂ ತಿಂ ಆಚರ್ಸಿತಾನಾ ತಾಂಚೆರ್ ಬೋಟ್ ಜೊಕುನ್ ಹಾಸ್ತಾಂವ್.. ಪುಣ್ ಆಮಿ ಖುದ್ ಕಿತೆಂ ಕರ್ನ್ ಆಸಾಂವ್.?? ಮತಾಂತರಾಕ್ ನಾಂವಾಡ್‍ಲ್ಲೊ ಧರ್ಮ್ ಆಮ್ಚೊ. ಕೊಣಾ ದುಬ್ಳ್ಯಾಚ್ಯಾ ಪೊಟಾಭುಕೆಚೊ ಫಾಯ್ದೊ ಉಟವ್ನ್, ಸರ್ಗಾಚಿ ಆಶಾ ದಾಖವ್ನ್ ತಾಚಾ ಕಪಲಾರ್ ಖುರಿಸ್ ವೊಡುಂಕ್ ಕೊಣೆಂಯೀ ಆಮ್ಚೆಥಾವ್ನ್ ಶಿಕಾಜೆ..! ಕೊಣೆಂ ಎಕ್ಲ್ಯಾ ದೊಗಾನಿಂ ಕೆಲ್ಲ್ಯಾ ಅಸಲ್ಯಾ ಮುನ್ನಾಯಾಂಕ್ ಲಾಗೊನ್ ಅಖ್ಖ್ಯಾ ಸಮುದಾಯಾಕ್ 'ಮತಾಂತರಿ' ಮ್ಹಳ್ಳೊ ಬಿಲ್ಲೊ ಲಾಭ್‍ಲ್ಲೊ ಪಾವಾನಾತ್ಲ್ಯಾಕ್ ಹೊ ಏಕ್ ನವೊ ಆವ್ತಾರ್ ಆಮಿ ಸುರು ಕೆಲಾ - ಫೇಸ್ಬುಕ್ ವೊಣ್ದಿಂಚೆರ್ ಮಾಗ್ಣಿಂ ಚಿಡ್ಕಾವ್ನ್ ತಿಂ ಆಪ್ನಾಯ್ನಾತ್ಲ್ಯಾಂಚೆರ್ ಶಿರಾಪ್ ಮಾಗೊನ್ ತಾಂಕಾಂ ಕ್ರೀಸ್ತಾಂವ್ ಸಮುದಾಯಾಚೆರ್ ಆಸ್ಚೊ ತಾತ್ಸಾರ್ ಆನಿಕೀ ಚಡಂವ್ಕ್.!! 

(ಹೆಂ ಲೇಖನ್ ದಿರ್ವೆಂ ಪತ್ರಾಚಾ ಅಕ್ಟೋಬರ್  2014 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)

    

    

ಅಸಲ್ಯಾಂಚಿ ಸಂತತಿ ವಾಡೊಂದಿ ಆನಿ ಚಡೊಂದಿ.!

"ಮ್ಹಜ್ಯಾ ಲ್ಹಾನಾಂ ಭಾವಾಂಕ್ ಕಿತೆಂ ತುಮಿ ಕೆಲೆಂ ತೆಂ ಮ್ಹಾಕಾಚ್ ತುಮಿ ಕೆಲೆಂ" - ಪೆಲ್ಯಾಕ್ ಕುಮಕ್ ಯಾ ಸೆವಾ ದಿಂವ್ಚಾಕ್ ಲಗ್ತಿ ಆಮ್ಚಾ ಸೊಮಿಯಾಚಾ ಹ್ಯಾ ಉತ್ರಾಂಕ್ ಮಿಕ್ವಾಲ್ಲಿಂ ಉತ್ರಾಂ ಬಹುಶ ಸಂಸಾರಾಚಾ ಹೆರ್ ಖಂಚಾಯೀ ಧರ್ಮ್‍ಗ್ರಂಥಾಂತ್ ವಾಚುಂಕ್ ಮೆಳ್ಚಿಂನಾಂತ್. ಪೆಲ್ಯಾಪಾಸತ್ ಕುಮಕ್ ಮಾಗ್ತೆಲ್ಯಾ ಎಕಾ ಕ್ರಿಸ್ತಾಂವಾನ್ ಪಯ್ಲ್ಯಾನ್ ಪಯ್ಲೆಂ ಉಚಾರ್ಚಿಂ ಉತ್ರಾಂ ಹಿಂಚ್. ಇಗರ್ಜೊ ಆನಿ ಇತರ್ ಸಂಘ್ ಸಂಸ್ಥ್ಯಾನಿಂ ಕುಮಕ್ ವಿಚಾರ್ನ್ ಧಾಡ್ಚಿಂ ವಿನಂತಿ ಪತ್ರಾಂ ಹ್ಯಾ ಉತ್ರಾಂಚೊ ಉಲ್ಲೇಖ್ ಕೆಲ್ಲ್ಯಾ ಬಗಾರ್ ಅಧುರಿಂಚ್ ಮ್ಹಣ್ಯೆತ್.! ಪೆಲ್ಯಾಥಂಯ್ ಹುಸ್ಕೊ ಆಸ್ಚೊ ಹರ್ಯೆಕ್ ಮನಿಸ್ ಹ್ಯಾ ಉತ್ರಾಂ ಥಾವ್ನ್ ಪ್ರೇರಿತ್ ಜಾವ್ನ್ ಆಪ್ಲ್ಯಾ ಜಿಣ್ಯೆ ಆವ್ದೆಂತ್ ಏಕ್ಪಾವ್ಟಿಂ ತರೀ ಕೊಣಾ ಪಾಪಾರಾಚ್ಯಾ ಗರ್ಜಾಂಕ್ ಪಾವ್ತಾ ತರ್, ಹೆರಾಂ ಥಂಯ್ ಎಕಾ ಸಾಸ್ವಾ ಭಿಯಾತಿತ್ಲೊಯೀ ಹುಸ್ಕೊ ನಾತ್‍ಲ್ಲೊ ವ್ಯಕ್ತಿ ಸಯ್ತ್ ಮಾರ್ಬಲಾಚ್ಯಾ ಫೊಳ್ಯಾರ್ ಆಪ್ಲೆಂ ನಾಂವ್ ಕಾಂತವ್ನ್ ಯೆತೆಲೆಂ ಮ್ಹಳ್ಳ್ಯಾ ಹೊರ್ಬೊಸಾನ್ ಲಾಖಾನಿಂ ದಾನ್ ಕರ್ತಾ ಆನಿ ಮ್ಹಣ್ತಾ "ಮ್ಹಜ್ಯಾ ಲ್ಹಾನಾಂ ಭಾವಾಂಕ್ ಕಿತೆಂ ತುಮಿ ಕೆಲೆಂ ತೆಂ ಮ್ಹಾಕಾಚ್ ತುಮಿ ಕೆಲೆಂ".!!ಕ್ರೀಸ್ತಾಚೆ ಖರೆ ಮ್ಹಣಿಯಾರಿ ಆಪ್ಣಾಕ್ ಹರ್ಯೆಕ್ ಪಾವ್ಟಿಂ ಸಂಧರ್ಭ್ ಮೆಳ್‍ಲ್ಲ್ಯಾ ತವಳ್ ಅಸಲ್ಯಾ ಗರ್ಜೆವಂತಾಂ ಥಂಯ್ ಕ್ರೀಸ್ತಾಕ್ ದೆಕೊನ್ ತಾಂಚಾ ಗರ್ಜಾಂಕ್ ಪಾಂವ್ಚೆಂಚ್ ಆಪ್ಣಾಚೆಂ ಮಿಸಾಂವ್ ಕರ್ನ್ ಘೆವ್ನ್ ಜಿಯೆತಾತ್ ತರ್, ಕಟ್ಟೊಣಾಂ ಉಬಾರ್ಚೆ ಮ್ಹಣಿಯಾರಿ ಸಯ್ತ್ ವರ್ಸಾಕ್ ಎಕ್ಪಾವ್ಟಿಂ ಚುಕಾನಾಸ್ತಾಂ ಸೊಮಿಯಾಚಾ ಹ್ಯಾ ಉತ್ರಾಂಚೆಂ ಪಾಲನ್ ಕರ್ತಾತ್ - ನಿಮಾಣ್ಯಾ ಬ್ರೇಸ್ತಾರಾ 'ವಿಂಚುನ್ ಕಾಡ್ಲೆಲ್ಯಾ' ಬಾರಾ ಜಣಾಂಚೆ ಪಾಂಯ್ ಧುಂವ್ಚಾ ಸೆರೆಮನಿಂತ್.! ಪುಣ್ ಜೆಜುಚ್ಯಾ ಹ್ಯಾ ಉತ್ರಾಂಕ್‍ಚ್ ಆಪ್ಲ್ಯಾ ಜಿಣ್ಯೆಚೊ ಧ್ಯೇಯ್ ಕರ್ನ್ ಘೆವ್ನ್, ಪೆಲ್ಯಾಚಿ ಸೆವಾ ಯಾ ಚಾಕ್ರಿ ಕರ್ಚೆಂಚ್ ಆಪ್ಲಿ ವ್ರತ್ತಿ ಮ್ಹಣ್ ಮಾಂದುನ್ ದೀಸ್ ರಾತ್ ಪೆಲ್ಯಾಚ್ಯಾ ಜತ್ನೆಂತ್ ಆಪ್ಲ್ಯಾ ಜಿಣ್ಯೆಚಿ ಸಾರ್ಥಕತಾ ದೆಕ್ಚಾಂಚೊ ಏಕ್ ವರ್ಗ್ ಆಸಾ... ತಾಂಕಾಂ ಆಮಿ ಮ್ಹಣ್ತಾಂವ್ ನರ್ಸಾಂ.!

ಅಜ್ಯಾಪಾಂಚಾ ಸಾಂತೆಂತ್...

ಧರ್ಮ್ ಮ್ಹಳ್ಳೊ ಎಕಾ ಅಮಾಲಾ ಭಾಶೆನ್, ತೆಂ ಅಮಾಲ್ ಮಿತಿ ಭಿತರ್ ಉರತ್ ತರ್ ಮನ್ಶಕುಳಾಚೆ ವಾಡಾವಳೆಕ್ ವಕಾತ್ ಜಾಯ್ತ್ ಪುಣ್ ತಕ್ಲೆಕ್ ಚಡಾತ್ ತರ್ ಮನ್ಶಾಕುಳಾಚಾ ದೆಸ್ವಾಟೆಕ್ ಕಾರಣ್ ಜಾಯ್ತ್. ವೆಳಾ ಕಾಳಾ ಫರ್ಮಾಣೆಂ ಸಮಾಜೆಚಾ ವಿವಿಧ್ ಥಳಾನಿಂ ವಿವಿಧ್ ಆಯಾಮಾನಿಂ ಹೆಂ ಸತ್ ರುಜು ಜಾಯಿತ್ ಆಯ್ಲಾಂ. ಧರ್ಮಾಂಚಾ ನಾಂವಾನ್ ದಂಗೆ ಜಾಲ್ಯಾತ್, ರಗಾತ್ ವಾಳ್ಳಾಂ, ಏಕ್ ಆಸ್‍ಲ್ಲೆ ರಾಶ್ಟ್ರ್ ದೋನ್, ತೀನ್ ಕುಡ್ಕೆ ಜಾಲ್ಯಾತ್, ಆನಿ ಹೆಂ ಸರ್ವ್ ಆಜೂನ್ ಘಡೊನ್ ಆಸಾ. ಹಿ ಧಾರ್ಮಿಕ್ ಆಮಾಲಾಚಾ ಪರಿಣಾಮಾಂಚಿ ದಿಸ್ತಿ ಕೂಸ್ ತರ್ ನಾದಿಸ್ತಿ ಕೂಸ್ ಅನ್ಯೇಕ್ ಆಸಾ. - ಧರ್ಮ್ ಮ್ಹಣ್ತಾನಾ, ತ್ಯಾ ಧರ್ಮಾಚೊ ಏಕ್ ಸ್ಥಾಪಕ್ ಆಸ್ತಾಸ್, ಆನಿ ತ್ಯಾ ಸ್ಥಾಪಕಾಕ್ ರಾವೊಂಕ್ ಏಕ್ ಬಿಡಾರ್ ಜಾಯ್ ಪಡ್ತಾ, ದೆಕುನ್ ತಾಜ್ ಮಹಲಾಕ್ ಲಜೆರ್ ಘಾಲ್ಚೆ ತಸ್ಲಿಂ ಬಾಂದ್ಪಾಂ ಉಬಾರ್ತಾತ್, ಥಂಯ್ಸರ್ ತ್ಯಾ ಧರ್ಮ್ ಸ್ಥಾಪಕಾಚೆಂ ಆರಾಧಾನ್ ಚಲ್ತಾ, ಆರಾಧಾನಾಕ್ ಭುಲೊನ್ ಸಂತುಶ್ಟ್ ಜಾಲ್ಲೊ ತೊ ಧರ್ಮ್ ಸ್ಥಾಪಕ್ ಸವ್ಕಾಸ್ ಆಜಾಪಾಂ ಕರುಂಕ್ ಸುರು ಕರ್ತಾ, ಸವ್ಕಾಸ್ ಹ್ಯಾ ಆಜಾಂಪಾಚ್ಯಾ ನಾಂವಾನ್ ಧಂದೊ ಸುರು ಜಾತಾ, ಕಿತ್ಲೆ ಚಡ್ ಪಯ್ಶೆ ಯೆಟ್ತಾಯ್ ತಿತ್ಲಿಂ ಚಡ್ ಆಜಾಪಾಂ, ಕಿತ್ಲೊ ವ್ಹಡ್ ನೋಟ್ ಫಾರಿಕ್ ಕರ್ತಾಯ್ ತಿತ್ಲೆಂ ವಡ್ ಆಜಾಪ್.! ಕಿತ್ಲಿಂ ಚಡ್ ಆಜಾಪಾಂ ತಿತ್ಲೊ ಚಡ್ ಮುನಾಫೊ, ಹೊ ಧಂದೊ ಚಲಯ್ತೆಲ್ಯಾಂಕ್.! ಕೊರೊಡೊಂ ರುಪಿಯಾಂಚೆಂ ಟರ್ನ್ ಓವರ್.!! 

ಒಟ್ಟಾರೆ ಹೊ ಧಂದೊ ಸರಾಗ್ ಆನಿ ಸುಶೆಗ್ ಚಲಾಜಾಯ್ ತರ್ ಏಕ್ 'ಗೊಂಗೊ' ಜಾಯ್.! ತ್ಯಾ ಗೊಂಗ್ಯಾಕ್ ಪಳೆವ್ನ್ ಲೊಕಾನ್ ಭಿಯೆಜಾಯ್, 'ತ್ಯಾ ಗೊಂಗ್ಯಾಕ್ ಆರಾಧಾನ್ ಕರಿನಾಂತ್ ತುಮ್ಚೆರ್ ತೊ ಶಿರಾಪಾಂಚೊ ಪಾವ್ಸ್ ಪಡ್ತಲೊ, ವರ್ಸಾವಾರ್ ಚುಕಾನಾಸ್ತಾಂ ತಾಚೆಂ ಆರಾಧಾನ್ ಕರ್ಶಾತ್ ತರ್ ತುಮ್ಚಾ ಜಿಣ್ಯೆಂತ್ ಸದಾಂನೀತ್ ಭಾಂಗಾರ್ ಪಿಕ್ತಲೆಂ' ಅಸಲೆಂ ಏಕ್ ಭೆಂ ಲೊಕಾಚಾ ಮನಾಂತ್ ಕಿರ್ಲಾವ್ನ್ ಸೊಡ್ಲ್ಯಾರ್ ಪುರೊ, ತ್ಯಾ ಗೊಂಗ್ಯಾಚಾ ಮೊಗಾನ್ ನ್ಹಯ್ ತರೀ ಭಿಯಾನ್ ಪುಣೀ ಲಾಖಾನಿಂ ಲೋಕ್ ತಾಚೆಸರ್ಶಿಂ ಧಾಂವ್ತಾ, ತಾಚೆ ಮುಕಾರ್ ಸರ್ಪಡ್ತಾ, ಭಿಕ್ ಮಾಗ್ತೆಲ್ಯಾ ಮನ್ಶಾಕ್ ರುಪಿಯಾಚಿ ಪಾವ್ಲಿ ದೀಂವ್ಕ್ ಕಾಂಪ್ಚೆ ಹಾತ್ ತ್ಯಾ ಗೊಂಗ್ಯಾ ಮುಕಾರ್ ಪಾವ್ತಚ್ ಉದಾರ್ ಜಾತಾತ್ ಪಾಂಯ್ಶಿಂ, ಹಜಾರಾಂಚೆ ನೋಟ್ ಪೆಟೆಂತ್ ಗಳ್ತಾತ್, ವ್ಹಾವ್.! ಕಸ್ಲೆಂ ಆಜಾಪ್.!! ಕಶೆಂ ಲ್ಹಾನ್ ಭುಗ್ರ್ಯಾನಿಂ ಜೇಂವ್ಕ್ ಸಳ್ ಕರ್ತಾನಾ 'ವೆಗಿಂ ಜೇಂವ್, ನಾ ತರ್ ಗೊಂಗೊ ಯೇವ್ನ್ ತುಕಾ ವರ್ತಾ' ಮ್ಹಣ್ ಭೆಶ್ಟಾಯ್ಲ್ಯಾರ್ ಶಿತಾಚಿ ವಾಟ್ಲಿ ಆಪಾಪಿಂ ಖಾಲಿ ಜಾತಾ ತಶಂಚ್ ಹಾಂಗಾಯೀ, ಗೊಂಗ್ಯಾಕ್ ಪಳೆಲ್ಲೆಂಚ್ ಭಕ್ತಿಕಾಚಿ ಪರ್ಸ್ ಆಪಾಪಿಂ ಖಾಲಿ ಜಾತಾ.! ಮಾಗಿರ್ ತೊ ಗೊಂಗೊ ಜಾಂವ್ ಮಕ್ಕಾಂತ್ಲೊ ಪ್ರವಾದಿ ಮೊಹಮ್ಮದ್, ತಿರುಪತಿಚೊ ತಿಮ್ಮಪ್ಪ ಯಾ ಆಮ್ಚಾಚ್ ಅತ್ತೂರ್ಚೊ ಸಾಂ. ಲೊರೆಸ್! ಆಜ್‍ಕಾಲ್ಚಿಂ ಭುರ್ಗಿಂ ಸಯ್ತ್ ಗೊಂಗೊ ಮ್ಹಳ್ಯಾರ್ ಭಿಯೆನಾಂತ್, ಪುಣ್ ಮತಿಚೊ ವಿಕಾಸ್ ಜಾಲ್ಲಿಂ ಆಮಿ.?!

ಪಾಟ್ಲ್ಯಾ ದಿಸಾನಿಂ ಧರ್ಮ್, ಪಾತ್ಯೆಣಿ ಆನಿ ಆಜ್ಯಾಪಾಂ ಸಂಬಂಧಿ ಆಮ್ಚಾ ರಾಜ್ಯಾಂತ್ ಭಾರಿಚ್ ಚರ್ಚಾ ಜಾಯ್ತ್ ಆಸಾ. ನವೆಂಬ್ರಾಂತ್ ಬೆಳ್ಗಾವಾಂತ್ ಚಲ್‍ಲ್ಲ್ಯಾ ವಿಧಾನ್ ಸಭಾ ಅಧಿವೇಶನಾಂತ್ ಮುಖೆಲ್ ಮಂತ್ರಿ ಸಿಧ್ಧರಾಮಯ್ಯ ಮೂಢ್ ಪಾತೆಣ್ಯಾಂ ವಿರೋಧಿ ಕಾನೂನ್ ಜಾರಿಯೆಕ್ ಹಾಡ್ಚೊ ವಿಧೇಯಕ್ ಮಂಡನ್ ಕರ್ಚಾರ್ ಆಸ್‍ಲ್ಲೊ. ಮಹರಾಶ್ಟ್ರಾಂತ್ ಯೆದೊಳ್‍ಚ್ ಚಾಲ್ತೆರ್ ಆಸ್ಚೆಂ ಹೆಂ ಕಾನೂನ್ ಹಾಂಗಾಯೀ ಜಾರಿಯೆಕ್ ಯೇತ್ ತರ್  ಧಾರ್ಮಿಕ್ ವಿಧಿ ಮ್ಹಣ್ ಆಚರಣ್ ಕರ್ಚಾ ಜ್ಯಾ ಫಿತಿಸ್ಪಣಾಂಕ್ ತ್ಯಾ ಕಾನೂನಾ ಫರ್ಮಾಣೆಂ ಆಡ್ವಾರ್ಲಾಂ ತಿಂ ಫಿತಿಸ್ಪಣಾಂ ಕೊಣೆಂಯೀ ಆಧಾರ್ಲಿಂ ತರ್ ತಾಂಚೆರ್ ಕಾನೂನ್ ಕ್ರಮ್ ಘೆವ್ಯೆತಾ ಆನಿ ತಾಂಕಾಂ ಕಾನೂನಿ ಶಿಕ್ಶಾ ದಿವ್ಯೆತಾ. ಫಿತಿಸ್ಪಣಾಂಚಾ ಪರಿಣಾಮಾಚೆರ್ ಹೊಂದ್ವೊನ್ ತಿ ಶಿಕ್ಶಾ ಜೈಲಾ ಥಾವ್ನ್ ಫಾಶಿಯೆಚ್ಯಾ ಕಾಂಬ್ಯಾ ಪರ್ಯಾನ್ ಥರಾವಳ್ ಆಸ್ಯೆತ್.!

ಭಾರಿಚ್ ಚರ್ಚೆರ್ ಆಸ್‍ಲ್ಲೆಂ ಸುಬ್ರಮಣ್ಯ ದಿವ್ಳಾಚೆಂ ಮಡೆಸ್ನಾನ, ದೇವ್-ದೇವಿಂಕ್ ಮನ್ಶಾ ಬಲಿ ದಿಂವ್ಚೆಂ, ಮಾಟ್ ಮಂತ್ರ್, ಪಿಡಾ ಶಿಡಾ ಗೂಣ್ ಕರ್ಚಾ ನಿಬಾನ್ ಮನ್ಶಾಂಕ್ ಹಿಂಸಾತ್ಮಕ್ ರಿತಿನ್ ಚಲಂವ್ಚೆಂ, ಆಪ್ಣಾಕ್ ಆಜಾಪಾಂ ಕರ್ಚಿ ದೈವಿಕ್ ಸಕತ್ ಆಸಾ ಮ್ಹಣ್ ಸಾಂಗೊನ್ ಲೊಕಾಕ್ ಭಾನಾಂವ್ಚೆಂ,  ಭುರ್ಗ್ಯಾಂಚಿ ಕುಡಿಚಿ ಸಕತ್ ವಾಡಾಂವ್ಕ್ ತಾಂಕಾ ಉಬಾರಾಯೆ ಥಾವ್ನ್ ವಸ್ತುರಾಚಾ ಪಾಳ್ಣ್ಯಾರ್ ಉಡಂವ್ಚೆಂ, ಸ್ತ್ರೀಯಾಂಚಾ ಮಾಸಿಕ್ ಸ್ರಾವಾಚಾ ದಿಸಾನಿಂ ತಾಂಕಾ ಘರಾ ಭಾಯ್ರ್ ರಾವಂವ್ಚೆಂ ಅಸಲಿಂ ಫಿತಿಸ್ಪಣಾಂ ಜಿಂ ಧಾರ್ಮಿಕ್ ಪಾತ್ಯೆಣೆಚಾ ನಾಂವಾನ್ ಚಲ್ತಾತ್ ಆನಿ ತಾಂಚೆ ಮಾರಿಫಾತ್ ಮನ್ಶಾಪಣಾಚೆರ್ ನಿರಂತರ್ ಅತ್ಯಚಾರ್ ಚಲ್ತಾ, ತಸಲ್ಯಾ ಸಬಾರ್ ಆಚರಣಾಂಕ್ ಆಡ್ವಾರ್ಲೆಲ್ಯಾ ಆಚರಣ್ ಪಟ್ಟೆಂತ್ ದಾಖಲ್ ಕೆಲ್ಲೆಂ.

ಪುಣ್ ಹ್ಯಾ ಪಯ್ಕಿಂ ಚಡಾವತ್ ಸರ್ವ್ ಆಚರಣಾಂ ಹಿಂದು ಧರ್ಮಾಚಾ ಆಚರಣ್ ಪಟ್ಟೆಂತ್ಲಿಂ ದೆಕುನ್ ಅಲ್ಪಸಂಖ್ಯಾತ್ ಲೊಕಾಕ್ ಪುಸ್ಲಾಂವ್ಕ್ ಹಿಂದು ವಿರೋಧಿ ಕೊಂಗ್ರೆಸ್ ಸರ್ಕಾರ್ ಫಿತೂರಿ ಕರಿತ್ ಆಸಾ ಮ್ಹಳ್ಳೊ ಆರೋಪ್ ವಿರೋಧ್ ಪಾಡ್ತೆನಿಂ ಉಗ್ತ್ಯಾನ್ ಉಚಾರ್ಲೊ ಆನಿ ಪ್ರತಿಭಟನ್ ಕೆಲೆಂ ದೆಕುನ್ ಪಾಟ್ಲ್ಯಾ ವಿಧಾನ್ ಸಭಾ ಅಧಿವೇಶನಾಂತ್ ಹ್ಯಾ ಕಾಯ್ದ್ಯಾಚೊ ವಿಧೇಯಕ್ ಮಂಡನ್ ಜಾಲೊ ನಾ ಆನಿ ಸದ್ದ್ಯಾಕ್ ಹೊ ವಿದೇಯಕ್ ಪುನರ್‍ವಿಮರ್ಸೊ ಕರ್ಚಾ ನಿಬಾನ್ ಪಾಟಿಂ ಘಾಲಾ. ಹ್ಯಾ ಮಧ್ಗಾತ್ ಆಪುಣ್ ದೇವ್‍ಮನಿಸ್, ದೇವ್ ಆಪ್ಣಾ ಮಾರಿಫಾತ್ ಆಜಾಪಾಂ ಕರಯ್ತಾ, ಅಶೆಂ ಮ್ಹಣ್ ಸಂಸಾರ್‍ಭರ್ ಲೊಕಾಕ್ ಮಾಂಕೊಡ್ ಕರಿತ್ ಆಪ್ಲೆಂ ಪೋಟ್ ಭರ್ಚೊ, ವಿಗ್ಯಾನಿನಿಂ ಸಯ್ತ್ ಎದೊಳ್ ಗೂಣ್ ಕರುಂಕ್ ಸಕೊನಾಸ್ಚಾ ಏಯ್ಡ್ಸ್ ತಸಲ್ಯಾ ಮಾರೆಕಾರ್ ಪಿಡೆಕ್ ಆಪುಣ್ ಆಜಾಪಾಂ ಕರ್ನ್ ಗೂಣ್ ಕರ್ತಾಂ ಮ್ಹಣ್ಚೊ ಅಮೇರಿಕಾಚೊ ಬೆನ್ನಿ ಹಿನ್ ನಾಂವಾಚೊ ಅರ್ಧೊ ಪಿಸೊ ಎಕ್ಲೊ ಪರ್ತ್ಯಾನ್ ಭಾರತಾಕ್ ಯೇಂವ್ಕ್ ಆಯ್ತೊ ಜಾಲ್ಲೊ. ಹ್ಯಾಚ್ ಜನೆರಾಚಾ 15 ತಾರಿಕೆ ಥಾವ್ನ್ 19 ತಾರಿಕೆ ಪರ್ಯಾಂತ್ ಬೆಂಗ್ಳರಾಂತ್ ತಾಚೆಂ ಆಜಾಪಾಂ ಕರ್ಚೆಂ ಶಿಬಿರ್ ಚಲ್ಚೆಂ ಆಸ್ಲೆಂ. ಮೂಢ್ ಪಾತೆಣ್ಯಾಂವಿರೋಧ್ ಕಾನೂನ್ ರಚುಂಕ್ ಭಾಯ್ರ್ ಸರ್‍ಲ್ಲ್ಯಾ ಸಿಧ್ಧರಾಮಯ್ಯಾಚಾ ಕೊಂಗ್ರೆಸ್ ಸರ್ಕಾರಾನ್ ಹ್ಯಾ ಬೆನ್ನಿ ಹಿನಾಕ್ ಉಗ್ತ್ಯಾನ್ ಸ್ವಾಗತ್ ಪಾಚಾರ್‍ಲ್ಲೊ. ಪುಣ್ ಚಾರಾಂಯೀ ಕುಶಿಂ ಥಾವ್ನ್ ಹಾಚೆ ವಿರೋಧ್ ಆವಾಜ್ ಉಟ್ತಾನಾ ಕೊಂಗ್ರೆಸ್ ಸರ್ಕಾರಾಕ್ ನಿಜಾಕೀ ದುಸ್ರೊ ಉಪಾವ್ ನಾಸ್ಲೊ. ಮಾತ್ರ್ ನ್ಹಯ್, 'ಮೂಢ್ ಪಾತ್ಯೆಣ್ಯಾಂಕ್ ಖಾಡುಂ ಘಾಲುಂಕ್ ಭಾಯ್ರ್ ಸರ್‍ಲ್ಲೊ ಕೊಂಗ್ರೆಸ್ ಸರ್ಕಾರ್ ಬೆನ್ನಿ ಹಿನ್ ತಸಲ್ಯಾಕ್ ಆವ್ಕಾಸ್ ದಿತಾ ತರ್ ಕೊಂಗ್ರೆಸಾಚೊ ಉದ್ದೇಶ್ ಮೂಢ್ ಪಾತ್ಯೆಣ್ಯಾಂ ವಿರೋಧ್ ಕಾಯ್ದೊ ಹಾಡ್ಚೊ ನ್ಹಯ್ ಬದ್ಲಾಕ್ ಹಿಂದ್ವಾಂಚಿ ಧಾರ್ಮಿಕ್ ಭೊಗ್ಣಾಂ ಮಸ್ತುನ್ ಅಲ್ಪಸಂಖ್ಯಾತ್ ಲೊಕಾಂಕ್ ಖುಶ್ ಕರ್ಚೊ' ಮ್ಹಳ್ಳೊ ಆರೋಪ್ ಜೋರ್ ಜಾತಾನಾ ನಿಮಾಣೆಂ ಬೆನ್ನಿ ಹಿನಾಕ್ ಭಾರತಾಚಿ ವೀಸಾ ಮೆಳೊಂಕ್ ನಾ ಮ್ಹಳ್ಳೆಂ ನೀಬ್ ದೀವ್ನ್ ಬೆಂಗ್ಳುರಾಂತ್ ಚಲಾಜೆ ಆಸ್ಲೆಂ ತಾಚೆಂ ಆಜಾಪಾಂಚೆಂ ಶಿಬಿರ್ ರದ್ದ್ ಕರಿಜಾಯ್ ಪಡ್ಲೆಂ. ಕಸಲೊ ವಿಪರ್ಯಾಸ್ ಪಳೆಯಾ, ವಕಾತ್ ನಾಸ್ತಾಂ ಏಯ್ಡ್ಸ್ ಗೂಣ್ ಕರುಂಕ್ ಸಕ್ಚೊ ದೇವ್‍ಮನಿಸ್ ವೀಸಾ ನಾಸ್ತಾನಾ ಭಾರತಾಕ್ ಯೇಂವ್ಕ್ ಸಕ್ಲೊ ನಾ.!!

 ಬೆನ್ನಿ ಹಿನ್ ತಸಲೆ ಸ್ಕ್ರೂ ಸಢೀಳ್ ಜಾಲ್ಲೆ ಮನಿಸ್ ಆಮ್ಚಾ ಭೊಂವಾರಾಂತ್ ಜಾಯ್ತೆ ಭರೊನ್ ಗೆಲ್ಯಾತ್. ಆಪ್ಣಾಕ್ ದೈವಿಕ್ ಸಕತ್ ಆಸಾ, ಆಪುಣ್ ಸಯ್ತಾನ್ ಧಾಂವ್ಡಾಯ್ತಾಂ, ಮಾಟ್ ಕಾಡ್ತಾಂ ತೆಂ ಕರ್ತಾಂ ಹೆಂ ಕರ್ತಾಂ ಮ್ಹಣ್ ಲೊಕಾಕ್ ಭಾನಾವ್ನ್ ಮೀಟ್, ತೇಲ್, ಮಿಂಜಿತ್ರ್, ಅರ್ಲುಕ್ಯೊ, ಉದಾಕ್, ಲಿಂಬೊ, ಗೊಬೊರ್ ಆನಿ ಕಿತೆಂ ಸಂಕಪಾಶನ್ ಭರ್ನ್ ದೀವ್ನ್ ಕಾಸ್ ಕರ್ತಾತ್ ಹೆಂ ಆಮ್ಕಾಂ ದಿಸೊನೀ ದಿಸಾನಾ ಕಿತ್ಯಾಕ್.? ಆಮ್ಚಾ ಬೆಳ್ತಂಗಡಿ ಲಾಗ್ಶಿಲ್ಯಾ ಗುರುವಾಯನ ಕೆರೆಂತ್ ಎಕ್ಲೊ 'ಲೋಕಲ್ ಬೆನ್ನಿ ಹಿನ್' ಆಸ್‍ಲ್ಲೊ. ಕಾಂಯ್ ಥೊಡ್ಯಾ ವರ್ಸಾಂ ಪಯ್ಲೆಂ ದೆಂವ್ಚಾರ್ ಆನಿ ಹೆರ್ ದುಶ್ಟ್ ಸಕ್ತ್ಯಾಂಕ್ ಧಾಂವ್ಡಾಂವ್ಚಾಂತ್ ತೊ ಭಾರಿಚ್ ಫೇಮಸ್. ಕೆದ್ಯಾ ವ್ಹಡ್ ಜಾತಿಚೊ, ಖಂಚಾಯೀ ಸಾಂದಿ ಮುಲ್ಯಾಂತ್ಲೊ ದೆಂವ್ಚಾರ್ ತರೀ ತಾಣೆಂ ಮಾತ್ಯಾರ್ ಹಾತ್ ದವರ್ನ್ 'ಮಣ ಮಣ' ಮಂತ್ರಾಂ ಮ್ಹಳ್ಯಾರ್ ಪಾಟ್ಲ್ಯಾ ಪಾಯಾನಿಂ ಧಾಂವ್ತಾ ಅಶಿ ಸಕ್ಡಾಂಚಿ ಪಾತ್ಯೆಣಿ ಆನಿ ಗಾಂವ್‍ಭರ್ ಗಾಬ್. ಅಶೆಂ ದೆಂವ್ಚಾರ್ ಸುಟಂವ್ಕ್ ಮ್ಹಣ್ ಪಿಡೇಸ್ತ್ ವೆಕ್ತಿಕ್ ಘೆವ್ನ್ ಗುರುವಾಯನ ಕೆರೆಚಾ ತಾಚಾ ಘರಾ ಗೆಲ್ಲ್ಯಾಂಕ್ ತೇಲ್, ಪಿಟೊ, ಆನಿ ಸಂಕಪಾಶನ್ ಮ್ಹಣ್ ಪೊಟ್ಲಿ ಭಾಂದುನ್ ದಿತಾಲೊ - ಧರ್ಮಾಕ್ ನ್ಹಯ್, ತೆಲಾಕ್ ಕುಟ್ಟ್ಯಾ ಲೆಕಾರ್ ಆನಿ ಪಿಟ್ಯಾಕ್ ಗ್ರಾಮಾ ಲೆಕಾರ್ ಪಯ್ಶೆ ವಸೂಲ್ ಕರ್ನ್.!! ಉಣೆಂ ಶಿಕ್ಪಾಚಾ ತಶೆಂ ಆಧುನಿಕ್ ಸಂಸಾರಾಚಾ ಸಾರ್ಕ್ಯಾ ಸಂಪರ್ಕಾಕ್ ಯೇಂವ್ಕ್ ನಾತ್‍ಲ್ಲ್ಯಾ ತ್ಯಾ ಕಾಳಾರ್ ತಾಚೆಂ ಮ್ಯಾಜಿಕ್ ಕಾಮ್ ಕರ್ತಾಲೆಂ. ಪುಣ್ ಆಜ್ ಕಾಳ್ ಬದಲ್ಲಾ, ಮಾನಸಿಕ್ ಪಿಡೆಕ್ ದೆಂವ್ಚಾರಾಚಿ ನಾಡ್ ಮ್ಹಣ್ಚೆಂ ಚಿಂತಾಪ್ ಸವ್ಕಾಸ್ ಲೊಕಾ ಮತಿತ್ಲೆಂ ಪಯ್ಸ್ ಸರೊನ್, ಮಾನಸಿಕ್ ಪಿಡೆಕ್ ಹೆರ್ ಪಿಡೆಂಬರಿಂಚ್ ವೆಗ್ಯಾನಿಕ್ ರಿತಿನ್ ಗೂಣ್ ಕರ್ಚಾ ವಿಶಿಂ ಸಮ್ಜೊಣಿ ವಾಡೊನ್ ಯೆತಾನಾ ಹಾಚಾ ಪಿಟ್ಯಾಕ್ ಆನಿ ತೆಲಾಕ್ ಸವ್ಕಾಸ್ ಡಿಮ್ಯಾಂಡ್ ಉಣೊ ಜಾಯಿತ್ ಆಯ್ಲೊ. ಆತಾಂ ಹಾಕಾ ವಾಂಚಾಜೆನೇ..? ಪರಿಗತ್ ಅಶಿ ಬದಲ್ತಾನಾ ಶೆರಾಂಚಿ ಜಿಣ್ಯೆಶೈಲಿ ಬೆಳ್ತಂಗಡಿಕ್ ರಿಗೊನ್ ಭೊಂವ್ತಿಲ್ಯಾ ಪರಿಸರಾಂತ್ ರಾನ್ ಉಣೆಂ ಜಾವ್ನ್ ಉದ್ಕಾಚೆಂ ಮಟ್ಟ್ ಉಣೆಂ ಜಾಯಿತ್ ಆಯ್ಲೆಂ ಆನಿ ಬಾಂಯೊಂ ಆಸ್‍ಲ್ಲ್ಯಾ ಕಡೆನ್ ಬೋರ್‍ವೆಲಾಂ ಖೊಂಡ್ಚೆಂ ಸದಾಂಚೆಂ ಜಾಲೆಂ. ಹ್ಯಾ ಆಮ್ಚಾ ದೇವ್‍ಮನ್ಶಾನ್ ನವೊ ವೇಸ್ ಪಾಂಗರ್ಲೊ, ಆಪ್ಣಾಕ್ ಪವಿತ್ರ್ ಆತ್ಮ್ಯಾಚೊ ಸಂದೇಶ್ ಮೆಳ್ಳಾ ಆನಿ ತಾಣೆಂ ಮಾಕಾ ನವೆಂ ಮಿಸಾಂವ್ ದಿಲಾಂ - ಉದಾಕ್ ದಾಖಂವ್ಚೆಂ.! ಅಶೆಂ ಮ್ಹಣ್ ಭೊಂವ್ತಿಲ್ಯಾ ಗಾವಾನಿಂ ಹಾಚಿಂ 'ಉದಾಕ್ ದಾಖಂವ್ಚಿಂ' ಆಜಾಪಾಂ ಸುರು ಕೆಲಿಂ.

ಸುರ್ವೆರ್ ಹಾಚಾ ದೋನ್ ಚಾರ್ ಬೋರ್‍ವೆಲಾನಿಂ ಬರೆಂ ಉದಾಕ್ ಮೆಳ್ಳೆಂ ಆನಿ ಹೆಂ ಪಳೆಲ್ಲೊ ಲೋಕ್ ಹ್ಯಾ ಮನ್ಶಾಕ್ ಪರ್ತ್ಯಾನ್ ಪಾತ್ಯೆಲೊ ಆನಿ ಭೊಂವ್ತೊಣಿಚಾ ಗಾವಾನಿಂ ಹಾಚಾ ಉದಾಕ್ ದಾಖಂವ್ಚಾ ಆಜಾಪಾಂಕ್ ಡಿಮ್ಯಾಂಡ್ ಸುರು ಜಾಲೊ. ಭುಂಯ್ ಪಂದ್ಲೆಂ ಉದ್ಕಾಚೆಂ ಮೂಳ್ ಪಾರ್ಕುಂಚಿ ವೆಗ್ಯಾನಿಕ್ ರೀತ್ ಕಳಿತ್ ನಾತ್‍ಲ್ಲ್ಯಾ ಹಾಣೆಂ ಖಾಂಬೊ ಪಳೆಲ್ಲೆ ಕಡೆಂ ಸುಣ್ಯಾನ್ ಪಾಯ್ ಉಕಲ್‍ಲ್ಲೆ ಬರಿಂ ಮನ್ ಆಯಿಲ್ಲೆ ಕಡೆಂ ಹಾತ್ ಉಬಾರ್ನ್ 'ಪ್ರೇಯ್ಜ್ ದ ಲೋರ್ಡ್' ಮ್ಹಳೆಂ ಆನಿ 'ಉದಾಕ್ ದಾಖಯ್ಲೆಂ' ಆನಿ ಹಾಚೆರ್ ಪಾತ್ಯೆವ್ನ್ ಲೊಕಾನ್ ಲಾಖಾನಿಂ ಯೆಟುನ್ ಖೊಂಡಯಿಲ್ಲಿಂ ಬೋರ್‍ವೆಲಾಂ ಪೂರಾ ಎಕಾ ಪಾಟ್ಲ್ಯಾನ್ ಏಕ್ ಪೊಟ್ಟು ಜಾಲಿಂ. 'ಉದಾಕ್ ದಾಖಾಯಿಲ್ಲ್ಯಾಕ್' ಪಯ್ಶೆ ಕಶೆಂಯೀ ಘೆತಾಲೊಚ್ ಮೂ, ಬೋರ್‍ವೆಲ್ ಖೊಂಡ್ಚಾ ಕೊಂಟ್ರೆಕ್ಟರಾ ಥಾವ್ನ್ ಸಯ್ತ್ ದರಬಸ್ತ್ ಕಮಿಶನ್‍ಯೀ ತಾಕಾ ಮೆಳ್ತಾಲೆಂ.! ಕ್ರಮೇಣ್ ಹಾಚಿ ಹಿ ಹಿಕ್ಮತ್‍ಯೀ ಲೊಕಾಕ್ ಕಳ್ಳಿ ಆನಿ ತಾಚೆಂ 'ಉದಾಕ್ ದಾಖಂವ್ಚೆಂ' ಆಜಾಪ್ ರಾವ್ಲೆಂ. ತಾಚಾ ಲೇಟೆಸ್ಟ್ ಆವ್ತಾರಾ ವಿಶಿಂ ಆನಿ 'ಪವಿತ್ರ್ ಆತ್ಮ್ಯಾನ್' ತಾಕಾ ದಿಲ್ಲ್ಯಾ ನವ್ಯಾ ಮಿಸಾಂವಾ ವಿಶಿಂ ಮಾಕಾ ಖಬರ್ ನಾ.!


ಹೆಂ ಸರ್ವ್ ನಿಯಾಳ್ತಾನಾ ಥೊಡಿಂ ಸವಾಲಾಂ ಮತಿಂತ್ ಉಬಿಂ ಜಾಲ್ಯಾಂತ್, ಹಿಂದ್ವಾನಿ ಮಾಟ್‍ಮಂತ್ರ್ ಕರ್ಚೆಂ, ದೆಂವ್ಚಾರಾಕ್ ಧಾಂವ್ಡಾಂವ್ಚೆಂ, ಕೋಲ, ಭೂತಾರಾಧನೆ ಕರ್ಚೆಂ ಮೂಢ್‍ಪಾತ್ಯೆಣಿ ವ್ಹಯ್ ತರ್ ಧರ್ಮಾಚಾ ನಾಂವಾನ್ ಆಮಿ ಕ್ರೀಸ್ತಾವಾನಿಂ ಕರ್ಚಿಂ ಅಸಲಿಂಚ್ ಫಿತಿಸ್ಪಣಾಂ ಕಿತ್ಯಾಕ್ ಮೂಢ್‍ಪಾತ್ಯೆಣಿ ನ್ಹಯ್.? ತಿರುಪತಿ ತಿಮ್ಮಪ್ಪಾಕ್ ಆಂಗಂವ್ಚೆಂ ಮೂಢ್‍ಪಾತ್ಯೆಣಿ ವ್ಹಯ್ ತರ್, ಅತ್ತೂರ್ಚಾ ಲೊರೆಸಾಕ್ ಆಂಗಂವ್ಚೆಂ ಕಿತ್ಯಾಕ್ ಮೂಢ್‍ಪಾತ್ಯೆಣಿ ನ್ಹಯ್.? ಕಾರ್ಕೊಳ್ಚಾ ಗುಮ್ಟ್ಯಾಕ್ ದೂದ್, ತೆಲಾ ತುಪಾಂತ್ ಅಭಿಷೇಕ್ ಕರ್ಚಾಂತ್ ವಸ್ತುಂಚೊ ವಿಭಾಡ್ ಜಾತಾ ತರ್ ಲಾಗಿಂಚ್ ಆಸ್ಚಾ ಸಾಂ ಲೊರೆಸಾಕ್ ಲಾಖಾನಿಂ ವಾತಿ ಪೆಟವ್ನ್ ಖಂಚೊ ಗಾಂವ್ ಉದ್ದಾರ್ ಜಾತಾ.?

ಕ್ರೀಸ್ತಾಂವ್ ಧರ್ಮಾ ವಿಶ್ಯಾಂತ್ ಕೊಂಗ್ರೆಸಾಕ್ ಸೊಫ್ಟ್ ಕೊರ್ನರ್ ಕಿತ್ಯಾಕ್.? ಮಡೆಸ್ನಾನ ವಿಶ್ಯಾಂತ್ ಕಠೋರ್ ನಿರ್ಧಾರ್ ಘೆಂವ್ಚೆಂ ಧಯ್ರ್ ಆಸ್ಚಾ ಸರ್ಕಾರಾಕ್ ಕಾರ್ಕೊಳ್ಚಾ ಅಜ್ಯಾಪಾಂಚಾ ತಳ್ಯಾವಿಶಿಂ ಕಿತ್ಯಾ ಪಾಸೊತ್ ದಾಕ್ಶೆಣ್.? ಪಂಗ್ತಿ ಭೇದಾ ವಿಶಿಂ ಉಗ್ತ್ಯಾನ್ ಉಲಂವ್ಚೊ ಆಮ್ಚೊ ಸರ್ಕಾರ್ 'ಪ್ರೇಯ್ಜ್ ದ ಲೋರ್ಡ್ ಆನಿ ಆಲ್ಲೆಲೂಯಾ ಕ್ಯಾಂಪಾಂ' ವಿಶ್ಯಾಂತ್ ಕಿತ್ಯಾಕ್ ಪಿಂರ್ಗೊಂಕ್ ಸಯ್ತ್ ಕಾವ್ಜೆತಾ.? ತೆಂ ಚೂಕ್ ವ್ಹಯ್ ತರ್ ಹೆಂ ಕಶೆಂ ಸಾರ್ಕೆಂ.? ಹೆಂ ಸಾರ್ಕೆಂ ವ್ಹಯ್ ತರ್ ತೆಂ ಕಿತ್ಯಾಕ್ ಚೂಕ್.? ಸರ್ಕಾರಾನ್ ಮೂಢ್ ಪಾತೆಣ್ಯಾ ವಿಶ್ಯಾಂತ್ ಕಾಯ್ದೊ ಹಾಡ್ತಾಂ ಮ್ಹಣ್ತಾನಾ ಆಮಿ ಖುಶೆನ್ ಧೆಂಕ್ ಕಾಡ್ಲೊ ಆನಿ ಮ್ಹಳೆಂ 'ಬರೆಂ ಜಾಲೆಂ, ತಶೆಂಚ್ ಜಾಯ್ಜೆ ಫಿತಿಸ್ಪಣಾಂ ಆಧಾರ್ತೆಲ್ಯಾಂಕ್!'. ಪುಣ್ ಆಮ್ಚಾಚ್ ಧರ್ಮಾಂತ್ ಚಲ್ಚಾ ಫಿತಿಸ್ಪಣಾಂಚಿ ಆಮ್ಕಾಂ ಕಿತ್ಲಿ ಖಬರ್ ಆಸಾ.?

ಜರ್ ಆಸಾ ತರ್ ಆಮಿ ಕಿತ್ಯಾಕ್ ಆಜೂನೀ ಮೊನೆ ಆಸಾಂವ್.? ಧರ್ಮಾಂಚಾ ನಾಂವಾನ್ ಆಮಿಂಚ್ ಫಿತಿಸ್ಪಣಾಂ ಆಧಾರ್ತಾಂವ್ ಆಸ್ತಾಂ ಹಿಂದ್ವಾಂಕ್ ಯಾ ಹೆರ್ ಧರ್ಮಾಚಾಂಕ್ ಫಿತಿಸ್ಪಣ್ ಆಧಾರ್ತಾತ್  ಮ್ಹಣ್ ಖೆಂಡ್ಚೆಂ ನೈತಿಕ್ ಹಕ್ಕ್ ಆಮ್ಕಾಂ ಕಿತ್ಲೆಂ ಆಸಾ.? ಘರ್ ಭಾಂದ್ತಾನಾ ವಾಸ್ತು ಶಾಸ್ತ್ರಿಕ್ ಆಪವ್ನ್ ಹಾಡ್ನ್ ದಿಕ್ಕಾಂ ಪಳೆಯ್ನಾಸ್ತಾಂ ಘರ್ ಭಾಂದ್ಚಿ ಹಿಮ್ಮತ್ ಆಮ್ಕಾಂ ಕಿತ್ಲ್ಯಾಂಕ್ ಆಸಾ.? ಘರ್ ಸೊಡ್ಯಾಂ, ಆಜ್‍ಕಾಲ್ ಇಗರ್ಜೊ ಭಾಂದಯ್ತಾನಾ ಸಯ್ತ್ ವಾಸ್ತು ಶಾಸ್ತಿರ್ ಸಾಂಗ್ತೆಲೆ ತವಳ್ ತವಳ್ ಯೇವ್ನ್ ಭೆಟ್ ಕರ್ತಾತ್ ಮ್ಹಳ್ಳೆಂಯೀ ಆಯ್ಕಾಲಾಂ ಹಾವೆಂ.!

ಇತ್ಲ್ಯಾಕೀ, ಕ್ರಿಸ್ತಾಂವ್ ಧರ್ಮಾಂತ್ ಇತ್ಲಿಂ ಸಕ್ಕಡ್ ಫಿತಿಸ್ಪಣಾಂ ಆಸ್ಲ್ಯಾರೀ, ತ್ಯಾ ವಿಶ್ಯಾಂತ್ ಖಬರ್ ಸಯ್ತ್ ಕಾಡ್ನಾಸ್ತಾಂ ಕೇವಲ್ ಹಿಂದೂ ಧರ್ಮಾಚಿಂ ಆಚರಣಾಂ ಮಾತ್ರ್ ಫಿತಿಸ್ಪಣಾಂಚಾ ಪಟ್ಟೆಂತ್ ದಾಖಲ್ ಕರುಂಕ್ ಭಾಯ್ರ್ ಸರ್‍ಲ್ಲ್ಯಾ ಕೊಂಗ್ರೆಸ್ ಸರ್ಕಾರಾಚೊ ನೀಜ್ ಉದ್ದೇಶ್ ತರೀ ಕಿತೆಂ.? ನಿಜಾಕೀ ಮೂಢ್ ಪಾತ್ಯೆಣೆಂಕ್ ಖಾಡುಂ ಘಾಲ್ಚೊ ಯಾ ಹಿಂದೂ ವಿರೋಧಿ ಕಾಯ್ದೆ ಜಾರಿಯೆಕ್ ಹಾಡ್ನ್ ಅಲ್ಪಸಂಖ್ಯಾತಾಂಚಿಂ ಮನಾಂ ಜಿಕೊನ್ ಮುಕ್ಲ್ಯಾ ಲೋಕ್‍ಸಭಾ ಎಲಿಸಾವಾಂತ್ ತಾಚೊ ಫಾಯ್ದೊ ಉಟಂವ್ಚೊ.? ಜರ್ ವ್ಹಯ್, ತರ್ ಧಿಕ್ಕಾರ್ ಆಸೊಂ ಅಸಲ್ಯಾ ದೋನ್ ಧರ್ಮಾಂ ಮಧೆಂ ವೀಕ್ ಒಂಪುನ್ ಆಪ್ಲೆಂ ಪೋಟ್ ಭರ್ತೆಲ್ಯಾಂಚಾ ಹಿಕ್ಮತ್ಯಾಂಕ್. ಜರ್ ನ್ಹಯ್, ತರ್ ಮೂಢ್‍ಪಾತ್ಯೆಣೊ ಆನಿ ಫಿತಿಸ್ಪಣಾಂ ವಿರೋಧ್ ಏಕ್ ಬಳ್ವಂತ್ ಕಾನೂನ್ ವೆಗಿಂಚ್ ಯೇಂವ್ದಿ ಆನಿ ಆಡ್ವಾರ್ಲೆಲ್ಯಾ ಆಚರಣಾಂಚಾ ಪಟ್ಟೆಂತ್ ಕ್ರಿಸ್ತಾಂವಾನಿಂ ಆಧಾರ್ಚಿಂ ಫಿತಿಸ್ಪಣಾಂಯೀ ದಾಖಲ್ ಜಾಂವ್ದಿತ್.!

                           (ಹೆಂ ಲೇಖನ್  ದಿರ್ವೆಂ ಪತ್ರಾಚಾ ಫೆಬ್ರೆರ್ 2014 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)