ಅಸಲ್ಯಾಂಚಿ ಸಂತತಿ ವಾಡೊಂದಿ ಆನಿ ಚಡೊಂದಿ.!

"ಮ್ಹಜ್ಯಾ ಲ್ಹಾನಾಂ ಭಾವಾಂಕ್ ಕಿತೆಂ ತುಮಿ ಕೆಲೆಂ ತೆಂ ಮ್ಹಾಕಾಚ್ ತುಮಿ ಕೆಲೆಂ" - ಪೆಲ್ಯಾಕ್ ಕುಮಕ್ ಯಾ ಸೆವಾ ದಿಂವ್ಚಾಕ್ ಲಗ್ತಿ ಆಮ್ಚಾ ಸೊಮಿಯಾಚಾ ಹ್ಯಾ ಉತ್ರಾಂಕ್ ಮಿಕ್ವಾಲ್ಲಿಂ ಉತ್ರಾಂ ಬಹುಶ ಸಂಸಾರಾಚಾ ಹೆರ್ ಖಂಚಾಯೀ ಧರ್ಮ್‍ಗ್ರಂಥಾಂತ್ ವಾಚುಂಕ್ ಮೆಳ್ಚಿಂನಾಂತ್. ಪೆಲ್ಯಾಪಾಸತ್ ಕುಮಕ್ ಮಾಗ್ತೆಲ್ಯಾ ಎಕಾ ಕ್ರಿಸ್ತಾಂವಾನ್ ಪಯ್ಲ್ಯಾನ್ ಪಯ್ಲೆಂ ಉಚಾರ್ಚಿಂ ಉತ್ರಾಂ ಹಿಂಚ್. ಇಗರ್ಜೊ ಆನಿ ಇತರ್ ಸಂಘ್ ಸಂಸ್ಥ್ಯಾನಿಂ ಕುಮಕ್ ವಿಚಾರ್ನ್ ಧಾಡ್ಚಿಂ ವಿನಂತಿ ಪತ್ರಾಂ ಹ್ಯಾ ಉತ್ರಾಂಚೊ ಉಲ್ಲೇಖ್ ಕೆಲ್ಲ್ಯಾ ಬಗಾರ್ ಅಧುರಿಂಚ್ ಮ್ಹಣ್ಯೆತ್.! ಪೆಲ್ಯಾಥಂಯ್ ಹುಸ್ಕೊ ಆಸ್ಚೊ ಹರ್ಯೆಕ್ ಮನಿಸ್ ಹ್ಯಾ ಉತ್ರಾಂ ಥಾವ್ನ್ ಪ್ರೇರಿತ್ ಜಾವ್ನ್ ಆಪ್ಲ್ಯಾ ಜಿಣ್ಯೆ ಆವ್ದೆಂತ್ ಏಕ್ಪಾವ್ಟಿಂ ತರೀ ಕೊಣಾ ಪಾಪಾರಾಚ್ಯಾ ಗರ್ಜಾಂಕ್ ಪಾವ್ತಾ ತರ್, ಹೆರಾಂ ಥಂಯ್ ಎಕಾ ಸಾಸ್ವಾ ಭಿಯಾತಿತ್ಲೊಯೀ ಹುಸ್ಕೊ ನಾತ್‍ಲ್ಲೊ ವ್ಯಕ್ತಿ ಸಯ್ತ್ ಮಾರ್ಬಲಾಚ್ಯಾ ಫೊಳ್ಯಾರ್ ಆಪ್ಲೆಂ ನಾಂವ್ ಕಾಂತವ್ನ್ ಯೆತೆಲೆಂ ಮ್ಹಳ್ಳ್ಯಾ ಹೊರ್ಬೊಸಾನ್ ಲಾಖಾನಿಂ ದಾನ್ ಕರ್ತಾ ಆನಿ ಮ್ಹಣ್ತಾ "ಮ್ಹಜ್ಯಾ ಲ್ಹಾನಾಂ ಭಾವಾಂಕ್ ಕಿತೆಂ ತುಮಿ ಕೆಲೆಂ ತೆಂ ಮ್ಹಾಕಾಚ್ ತುಮಿ ಕೆಲೆಂ".!!ಕ್ರೀಸ್ತಾಚೆ ಖರೆ ಮ್ಹಣಿಯಾರಿ ಆಪ್ಣಾಕ್ ಹರ್ಯೆಕ್ ಪಾವ್ಟಿಂ ಸಂಧರ್ಭ್ ಮೆಳ್‍ಲ್ಲ್ಯಾ ತವಳ್ ಅಸಲ್ಯಾ ಗರ್ಜೆವಂತಾಂ ಥಂಯ್ ಕ್ರೀಸ್ತಾಕ್ ದೆಕೊನ್ ತಾಂಚಾ ಗರ್ಜಾಂಕ್ ಪಾಂವ್ಚೆಂಚ್ ಆಪ್ಣಾಚೆಂ ಮಿಸಾಂವ್ ಕರ್ನ್ ಘೆವ್ನ್ ಜಿಯೆತಾತ್ ತರ್, ಕಟ್ಟೊಣಾಂ ಉಬಾರ್ಚೆ ಮ್ಹಣಿಯಾರಿ ಸಯ್ತ್ ವರ್ಸಾಕ್ ಎಕ್ಪಾವ್ಟಿಂ ಚುಕಾನಾಸ್ತಾಂ ಸೊಮಿಯಾಚಾ ಹ್ಯಾ ಉತ್ರಾಂಚೆಂ ಪಾಲನ್ ಕರ್ತಾತ್ - ನಿಮಾಣ್ಯಾ ಬ್ರೇಸ್ತಾರಾ 'ವಿಂಚುನ್ ಕಾಡ್ಲೆಲ್ಯಾ' ಬಾರಾ ಜಣಾಂಚೆ ಪಾಂಯ್ ಧುಂವ್ಚಾ ಸೆರೆಮನಿಂತ್.! ಪುಣ್ ಜೆಜುಚ್ಯಾ ಹ್ಯಾ ಉತ್ರಾಂಕ್‍ಚ್ ಆಪ್ಲ್ಯಾ ಜಿಣ್ಯೆಚೊ ಧ್ಯೇಯ್ ಕರ್ನ್ ಘೆವ್ನ್, ಪೆಲ್ಯಾಚಿ ಸೆವಾ ಯಾ ಚಾಕ್ರಿ ಕರ್ಚೆಂಚ್ ಆಪ್ಲಿ ವ್ರತ್ತಿ ಮ್ಹಣ್ ಮಾಂದುನ್ ದೀಸ್ ರಾತ್ ಪೆಲ್ಯಾಚ್ಯಾ ಜತ್ನೆಂತ್ ಆಪ್ಲ್ಯಾ ಜಿಣ್ಯೆಚಿ ಸಾರ್ಥಕತಾ ದೆಕ್ಚಾಂಚೊ ಏಕ್ ವರ್ಗ್ ಆಸಾ... ತಾಂಕಾಂ ಆಮಿ ಮ್ಹಣ್ತಾಂವ್ ನರ್ಸಾಂ.!

ಆಸ್ಪತ್ರೆಕ್ ದಾಖಲ್ ಜಾಲ್ಲ್ಯಾ ಎಕಾ ವ್ಯಕ್ತಿಚಿ ಪಿಡಾ ಗೂಣ್ ಜಾಂವ್ಚಾತ್ ಯಾ ತಾಚಿ ಭಲಾಯ್ಕಿ ಸುಧಾರ್ಚಾಂತ್ ತಾಚಿ ಚಿಕಿತ್ಸಾ ಕರ್ಚಾ ದಾಕ್ತೆರಾಂಚೊ ಆನಿ ತಾಣೆಂ ದಿಂವ್ಚಾ ವಕ್ತಾಂಚೊ ಕಿತ್ಲೊ ಪಾತ್ರ್ ಆಸಾಗೀ, ತಾಚಾಕೀ ಚಡ್ ತ್ಯಾ ಪಿಡೇಸ್ತಾಚ್ಯಾ ಕುಡಿ-ಮತಿಚಾ ಹರ್ಯೇಕ್ ಗರ್ಜಾಂಕ್ ಫಾವೊತೆ ಪರಿಂ ಸ್ಪಂದನ್ ಕರ್ನ್ ಎಕಾ ಬಾಳ್ಶಾಕ್ ಸಾಂಭಾಳ್ಚಾ  ತಿತ್ಲೆಚ್ ನಾಜುಕಾಯೆನ್ ತಾಚಿ ಶುಶ್ರುಷಾ ಕರ್ಚಾ ನರ್ಸಾಚೊ ಪಾತ್ರ್ ಆಸಾ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ.! ತರಿಪುಣ್ ತೊ ಪಿಡೆಸ್ತ್ ಗೂಣ್ ಜಾವ್ನ್ ಘರಾ ವೆತಾನಾ ಆಪ್ಣಾಚಿ ಭಲಾಯ್ಕಿ ಪಾಟಿಂ ಲಾಭ್‍ಲ್ಲ್ಯಾ ಖಾತಿರ್ ಆಪ್ಣಾಚಿ ಚಿಕಿತ್ಸಾ ಕೆಲ್ಲ್ಯಾ ವಯ್ಜಾಕ್ ದೇವ್ ಭೊರೆಂ ಕರುಂ ಮ್ಹಣ್ತಾ ಶಿವಾಯ್ ಆಪ್ಣಾಚಿ ಶುಶ್ರುಷಾ ಕೆಲ್ಲ್ಯಾ ನರ್ಸಾಂಚೊ ಉಗ್ಡಾಸ್ ಕೊಣೆಂಯೀ ಕಾಡ್ಚೊ ಭಾರಿಚ್ ಆಪ್ರೂಪ್ ಮ್ಹಣ್ಯೆತ್. ತೊ ಪಿಡೆಸ್ತ್ ಘರಾ ಗೆಲ್ಯಾ ಉಪ್ರಾಂತ್, ದಿಸಾಕ್ ದೋನ್ ಪಾವ್ಟಿಂ ಆಪ್ಣಾಚಿ ಭೆಟ್ ಕರ್ನ್ ವಕ್ತಾಂ ಫರ್ಮಾವ್ನ್ ವೆಚಾ ದಾಕ್ತೆರಾಕ್ ಚಾರ್ ಜಣಾಂ ಮುಕಾರ್ ಹೊಗೊಳ್ಸುನ್ ತಾಚೊ ಹಾತ್‍ಗೂಣ್ ಬರೊ ಆಸಾ ಮ್ಹಣ್ ತಾಕಾ ಫುಗಾರ್ತಾ ಶಿವಾಯ್ ಇಲ್ಲೊಸೊಯೀ ಕಾಂಠಾಳೊ ದಾಕಯ್ನಾಸ್ತಾಂ ಮಹಿನ್ಯಾಂಗಟ್ಲ್ಯಾನ್ ಆಪ್ಣಾಚೊ ಗೂ-ಮೂತ್ ಕಾಡ್ನ್ ಚಾಕ್ರಿ ಕೆಲ್ಲ್ಯಾ ನರ್ಸಾಂಚೊ ತಾಂಕಾಂ ಉಗ್ಡಾಸ್ ಲೆಗುನ್ ಯೇನಾ.! ಅಶೆಂ ಆಸ್ತಾಂ, ಹ್ಯಾ ನರ್ಸಾಂಖಾತಿರ್‍ಚ್ ಮ್ಹಣ್ ಅಂತರಾಶ್ಟ್ರೀಯ್ ಮಟ್ಟಾರ್ ನಮಿಯಾರ್‍ಲ್ಲೊ ಏಕ್ ದೀಸ್ ಆಸಾ ಮ್ಹಳ್ಳೆಂ ಕಿತ್ಲ್ಯಾಂಕ್ ಕಳಿತ್ ಆಸಾತ್.?? ವ್ಹಯ್, ಮೇಯಾಚಿ 12 ತಾರಿಕ್ ಅಂತರಾಶ್ಟ್ರಿಯ್ ಮಟ್ಟಾರ್ ನರ್ಸಾಂಕ್ ಸಮರ್ಪಿಲ್ಲೊ ದೀಸ್ ಜಾವ್ನಾಸಾ.

ಫ್ಲೋರೆನ್ಸ್ ನೈಟಿಂಗೇಲ್ ತಿಚೆಂ ನಾಂವ್. 1820 ಮೇಯಾಚಾ 12 ತಾರಿಕೆರ್ ಇಟೆಲಿಚಾ ಏಕ್ ಮಂತನ್ ಕುಟ್ಮಾಂತ್ ತಿಚೊ ಜಲ್ಮ್ ಜಾಲೊ. ಆಪ್ಲ್ಯಾ ಸತ್ರಾ ವಾರ್ಸಾಂಚಾ ಪ್ರಾಯೆರ್‍ಚ್ ತಿಕಾ ಪಿಡೆಸ್ತಾಂಚಿ ಸೆವಾ ಕರ್ಚಿ ವೊಡ್ಣಿ ಆಯಿಲ್ಲಿ. ತಿಣೆಂ ಸಾಂಗ್ಚೆ ಫರ್ಮಾಣೆಂ ತಿಕಾ ತೆಂ ದೆವಾಚೆಂ ಆಪವ್ಣೆಂ. ಪುಣ್ ಮಂತನಾಚೆಂ ಕುಟಾಮ್ ಜಾಲ್ಲ್ಯಾನ್ ತಿಚಾ ವ್ಹಡಿಲಾನಿಂ ತಿಚಾ ಹ್ಯಾ ಆಶೆಕ್ ಆಕ್ಷೇಪ್ ಉಚಾರ್ಲೊ ಆನಿ ಘರ್ಚಾಂಕ್ ವಿರೋಧ್ ಕರುಂಕ್ ತಿಕಾ ಧಯ್ರ್ ಪಾವ್ಲೆಂ ನಾ ದೆಕುನ್ ತಿ ವಗೆ ರಾವ್ಲಿ ತರೀ ಪಿಡೇಸ್ತಾಂಚಿ ಸೆವಾ ಕರಿಜೆ ಮ್ಹಳ್ಳಿ ತಿಚಿ ಉರ್ಬಾ ಭಿತರ್ಲ್ಯಾ ಭಿತರ್‍ಚ್ ಮುರ್ಮುರ್ತಾಲಿ. ಮುಕಾರ್ ಸುಮಾರ್ ಪಂಚ್ವೀಸ್ ವರ್ಸಾಂಚಾ ಪ್ರಾಯೆರ್ ಜೆದ್ನಾ ಪಿಡೆಸ್ತಾಂಚಿ ಸೆವಾ ಕರ್ಚಿ ತಿಚೆ ಭಿತರ್ಲಿ ತಾಡ್-ವೋಡ್ ತಿಚ್ಯಾನ್ ಸೊಸಾನಾ ಜಾಲಿ ತೆದ್ನಾಂ ತಿಣೆಂ ಘರ್ಚಾಂಚೊ ವಿರೋಧ್ ಕರ್ನ್ ಪಿಡೆಸ್ತಾಂಚಿ ಚಾಕ್ರಿ ಆನಿ ಶುಶ್ರುಷಾ ಕರ್ಚೆ ವಿಶಿಂ ಅಧ್ಯಯನ್ ಕರುಂಕ್ ಸುರು ಕೆಲೆಂ ಆನಿ ಹ್ಯಾ ಮಾರಿಫಾತ್ ನರ್ಸಿಂಗ್ ಶೆತಾಂತ್ ಎಕಾ ಕ್ರಾಂತೆಚಿ ಬುನ್ಯಾದ್ ಜಾಲಿ ಆನಿ ಹ್ಯಾ ಕ್ರಾಂತೆಚೆಂ ಬಾಳ್ ಜಾವ್ನಾಸಾ ಆಜ್ ಆಮಿ ಆಮ್ಚಾ ಆಸ್ಪತ್ರಾನಿಂ ದೆಕ್ತಾಂವ್ ತಿ ಆಧುನಿಕ್ ನರ್ಸಿಂಗ್ ವೆವಸ್ತಾ.! ಅಶೆಂ ಆಸ್ತಾಂ 1853 ತ್ ರಶ್ಯಾ ವಿರೋಧ್ ಬ್ರಿಟನ್ ಆನಿ ಫ್ರಾನ್ಸ್ ರಾಶ್ಟ್ರಾಂ ಹೆರ್ ಲ್ಹಾನ್ ರಾಶ್ಟ್ರಾಂಚೊ ಸಾಂಗಾತ್ ಘೆವ್ನ್ ಝುಜಾಕ್ ದೆಂವ್ಲಿಂ ಆನಿ ಹ್ಯಾ ಝುಜಾಚೆಂ ಪರಿಣಾಮ್ ಜಾವ್ನ್ ಜಾಯ್ತೆ ಸೊಜೆರ್ ಘಾಯೆತಾಲೆ ಆನಿ ಫಾವೊತಿ ಚಿಕಿತ್ಸಾ, ವಕಾತ್ ಮೆಳಾನಾಸ್ತಾಂ ವಾಂಚೊಕೀ ನ್ಹಯ್ ಮೊರೊಂಕೀ ನ್ಹಯ್ ಮ್ಹಳ್ಳೆ ರಿತಿರ್ ಕಶ್ಟಾತಾಲೆ ತೆಂ ಪಳೆಲ್ಲ್ಯಾ ಫ್ಲೊರೆನ್ಸ್ ನೈಟಿಂಗೇಲ್ ಹಿಣೆಂ ಆಪ್ಣೆಂಚ್ ತರ್ಬೆತಿ ದೀವ್ನ್ ತಯಾರ್ ಕೆಲ್ಲ್ಯಾ ಸುಮಾರ್ ತೀಸ್ ಜಣಾಂ ಚಲಿಯಾಂಕ್ ಸಾಂಗಾತಾ ಘೆವ್ನ್ ಹ್ಯಾ ಸೊಜೆರಾಂಕ್ ಚಿಕಿತ್ಸಾ ದಿಂವ್ಚೆಂ ಕಾಮ್ ಸುರು ಕೆಲೆಂ ಆನಿ ಹೆಂ ಪಳೆಲ್ಲ್ಯಾ ಜಾಯ್ತ್ಯಾ ಕಥೊಲಿಕ್ ಮಾದ್ರಿನಿಂ ತಿಕಾ ಸಾಂಗಾತ್ ದಿಲೊ. ಸುಮಾರ್ ಅಡೇಜ್ ವರ್ಸಾಂಭರ್ ಚಲ್‍ಲ್ಲ್ಯಾ ಹ್ಯಾ ಝುಜಾಚಾ ಲಾಂಬಾಯೆಕೀ ಫಾವೊತಿ ಚಿಕಿತ್ಸಾ, ವಕಾತ್, ಪುಶ್ಟಿಕ್ ಖಾಣ್, ಕುಡಿಚಿ ನಿತಳಾಯ್ ಕರ್ಚಿ ಸುವಿಧಾ ನಾತ್ಲೆಲ್ಯಾ ತ್ಯಾ ಸೊಜೆರಾಂಕ್ ನೈಟಿಂಗೇಲ್ ಆನಿ ತಿಚ್ಯಾ ಸಾಂಗಾತ್ಯಾನಿಂ ತಶೆಂ ಉಪ್ರಾಂತ್ ಸೆರ್ವಾಲ್ಲ್ಯಾ ತ್ಯಾ ಮಾದ್ರಿನಿಂ, ತೆ ಘಾಯೆಲ್ಲೆ ಸೊಜೆರ್ ಕಾಂಯ್ ಆಪ್ಣಾಚೆಚ್ ರಗ್ತಾಸಂಬಂಧಿ ಮ್ಹಳ್ಳೆತಿತ್ಲೆ ನಾಜುಕಾಯೆನ್ ತಾಂಚಿ ಸೆವಾ ಕೆಲಿ. ಕಥೊಲಿಕ್ ಮಾದ್ರಿಂಕ್ 'ಸಿಸ್ಟರ್' ಮ್ಹಣ್ ಆಪಂವ್ಚಿ ದಸ್ತುರ್ ತವಳ್‍ಚ್ ಆಸ್ಲಿ, ನೈಟಿಂಗೇಲ್, ತಿಚ್ಯೊ ಸಾಂಗಾತಿ ಚಲಿಯೊ ಆನಿ ತ್ಯೊ ಮಾದ್ರಿ ಸಾಂಗಾತಾ ಮೆಳೊನ್ ಬೇಧ್-ಭಾವ್ ನಾಸ್ತಾನಾ ವಾವುರ್ತಾಲ್ಯೊ ಜಾಲ್ಲ್ಯಾನ್ ತಾಂಚೆಪಯ್ಕಿಂ ಕೋಣ್ ಮಾದ್ರಿ ಮ್ಹಣ್ ಪಾರ್ಕುಂಕ್ ಜಾಯ್ನಾತ್ಲೆಂ ದೆಕುನ್ ಸೊಜೆರ್ ಸಕ್ಡಾಂಕ್ ಮಾದ್ರಿಚ್ ಮ್ಹಣ್ ಲೆಗುನ್ 'ಸಿಸ್ಟರ್' ಮ್ಹಣ್ ಉಲೊ ಮಾರ್ತಾಲೆ. ಹಿ ದಸ್ತುರ್ ತಶಿಚ್ ಮುಕಾರುನ್ ಆಯ್ಲಿ ಆನಿ ತ್ಯಾಚ್ ಲಾಗೊನ್ ಆಯ್ಚಾ ಕಾಳಾರೀ ಆಮಿ ನರ್ಸಾಂಕ್ 'ಸಿಸ್ಟರ್' ಮ್ಹಣ್‍ಂಚ್ ಉಲೊ ಮಾರ್ತಾಂವ್. ಹೆಂ ಝುಜ್ ಸಂಪ್ಲ್ಯಾ ನಂತರ್ ತಿಣೆಂ ಆಪ್ಣಾಚಾ ವಾವ್ರಾಕ್ ಮೆಚ್ವೊನ್ ಲೊಕಾನ್ ದಿಲ್ಲೊ ಸಕ್ಕಡ್ ದುಡು ಒಟ್ಟುಕ್ ಘಾಲ್ನ್, ತರ್ನಾಟ್ಯಾ ಚಲಿಯಾಂಕ್ ನರ್ಸಿಂಗಾ ವಿಶ್ಯಾಂತ್ ತರ್ಭೆತಿ ದಿಂವ್ಚಾ ಉದ್ದೇಶಾನ್ ಲಂಡನ್‍ಚ್ಯಾ ಸೈಂಡ್ ತೋಮಸ್ ಆಸ್ಪತ್ರೆಂತ್ 'ನೈಟಿಂಗೇಲ್ ಟ್ರೇಯ್ನಿಂಗ್ ಸ್ಕೂಲ್' ಆರಂಭ್ ಕೆಲೆಂ. ಆಜ್ 'ಫ್ಲೊರೆನ್ಸ್ ಮೈಟಿಂಗೇಲ್ ಸ್ಕೂಲ್ ಒಫ್ ನರ್ಸಿಂಗ್ ಆಂಡ್ ಮಿಡ್‍ವೈಫರಿ' ನಾಂವಾನ್ ಫಾಮಾದ್ ಆಸ್ಚೊ ಹೊ ಸಂಸ್ಥೊ ಸಂಸಾರಾಚೆಂ ಪಯ್ಲೆಂ ಅಧಿಕ್ರತ್ ನರ್ಸಿಂಗ್ ಇಸ್ಕೊಲ್ ಜಾವ್ನಾಸಾ. ಅಶೆಂ ಆಧುನಿಕ್ ನರ್ಸಿಂಗ್ ಕ್ರಾಂತೆಚಿ ಬುನ್ಯಾದ್ ಘಾಲ್ಲ್ಯಾ ತಿಚಾ ಮಾನಾಕ್ ತಿಚೊ ಜಲ್ಮಾ ದೀಸ್, ಮೇಯಾಚಿ 12 ತಾರಿಕ್ ನರ್ಸಾಂಚೊ ದೀಸ್ ಜಾವ್ನ್ ಆಚರಣ್ ಕರ್ತಾತ್ ಮಾತ್ರ್ ನ್ಹಯ್ ಕೊರೊಡಾಂಚಿ ಆಸ್ತ್ ಆಸುನ್, ಜಿಣಿಭರ್ ಬಸೊನ್ ಖೆಲ್ಯಾರೀ ಮುಗ್ಧಾನಾ ತಿತ್ಲೊ ದುಡು ಆಸ್ಚಾ ಮಂತನಾತ್ಲ್ಯಾ ತ್ಯಾ ಚಲಿಯೆನ್ ಆಪ್ಲೆಂ ಸರ್ವಸ್ವ್ ತ್ಯಾಗ್ ಕರ್ನ್ ಪಿಡೆಸ್ತಾಂ ಖಾತಿರ್ ಆಪ್ಲಿ ಜಿಣಿಂಚ್ ಸಮರ್ಪಿಲ್ಲ್ಯಾ ತಿಚಿ ದೇಖ್ ಸರ್ವ್ ನರ್ಸಾನಿಂ ಘೆಜಯ್ ಮ್ಹಳ್ಳ್ಯಾ ಉದ್ದೇಶಾನ್, ನರ್ಸಿಂಗ್ ಶಿಕೊನ್ ವ್ರತ್ತಿ ಜೀವನ್ ಸುರು ಕರ್ಚಾ ಪಾಂವ್ಡ್ಯಾರ್ ಆಸ್ಚ್ಯಾ ಹರ್ಯೆಕಾ ನರ್ಸಾನ್ ಸ್ವೀಕಾರ್ ಕರುಂಕ್ ಆಸ್ಚಾ ಪ್ರಮಾಣ್ ವಚನಾಕ್ ತಿಚೆಂಚ್, ಮ್ಹಣ್ಜೆ 'ನೈಟಿಂಗೇಲಾಚೆಂ ಪ್ರಮಾಣ್' ವಾ Nightingale Pledge ಮ್ಹಣ್ ನಾಂವ್ ದಿಲಾಂ.!

ಏಕ್ ಘಡಿಭರ್ ಚಿಂತುನ್ ಪಳೆಯಾ, ಜರ್ ನರ್ಸಾಂ ನಾತ್ಲಿಂ ತರ್ ಆಮ್ಚ್ಯೊ ಆಸ್ಪತ್ರ್ಯೊ ಕಶ್ಯೊ ಆಸ್ತ್ಯೊ.? ಚಿಂತುಂಕ್ ಸಾಧ್ಯ್ ನಾ, ನ್ಹಯ್‍ಗೀ.? ಸುಲಭ್ ಕಾಮ್ ಕರ್ನ್ ಚಡಿತ್ ಸಾಂಬಾಳ್ ಜೊಡ್ಯೆತ್ ತಸ್ಲೆಂ ಹೆರ್ ಶಿಕಾಪ್ ಆನಿ ವ್ರತ್ತಿ ಆಸ್ಲ್ಯಾರೀ, ತ್ಯಾ ಕುಶಿನ್ ವಚಾನಾಸ್ತಾಂ ಕೇವಲ್ ಸೆವೆಚಾ ಮನೋಭಾವಾನ್ ನರ್ಸಿಂಗ್ ವ್ರತ್ತೆಕ್ ವಿಂಚುನ್ ದಿಸಾಚಿ ಬಾರಾ ವೊರಾಂ ರಾತ್ ಯಾ ದೀಸ್ ಲೆಕಿನಾಸ್ತಾಂ ಪಿಡೆಸ್ತಾಂಚ್ಯಾ ಸೆವೆಂತ್ ಆಪ್ಣೆ ಕೆಲ್ಲ್ಯಾ ವಿಂಚವ್ಣೆಚಿ ಸಾರ್ಥಕತಾ ಸೊಧ್ಚ್ಯಾ ಹ್ಯಾ ನರ್ಸಾಂಕ್ ಫಾವೊತೊ ಮಾನ್ ಮೆಳ್ತಾಗೀ.? ತಾಣಿಂ ಸಮಾಜೆಕ್ ಕರ್ಚಾ ಉಪ್ಕಾರಾಕ್ ತಾಂಕಾಂ ಕಿತೆಂ ಪಾಟಿಂ ದಿತಾ ಆಮ್ಚಿ ಸಮಾಜ್.? ಥೊಡೆ ದಾಖ್ಲೆ ತುಮ್ಚೆ ಮುಕಾರ್ ದವರ್ತಾಂ. - ಮ್ಹಜ್ಯಾ ವಳ್ಕೆಚೆಂ ತೆಂ ನರ್ಸ್ ಮಂಗ್ಳುರ್ಚಾ ಫಾಮಾದ್ ಆಸ್ಪತ್ರೆಂತ್ ಸೆವಾ ದೀವ್ನ್ ಆಸ್ಲೆಂ. ತಾಚ್ಯಾ ಸಾಂಗಾತ್ಯಾನಿ ಸಾಂಗ್ಚೆ ಫರ್ಮಾಣೆಂ ಪಿಡೆಸ್ತಾಂಚ್ಯಾ ಸೆವೆಂತ್ ಇಲ್ಲಿಶಿ ಸಯ್ತ್ ಉಬ್ಗೊಣ್ ಭೊಗಿನಾಸ್ತಾಂ ತೊ/ತಿ ಪಿಡೇಸ್ತ್ ಆಪ್ಣಾಚಾಚ್ ಕುಟ್ಮಾಚೊ ಸಾಂದೊ ಮ್ಹಳ್ಳ್ಯಾ ತಿತ್ಲ್ಯಾ ಜೊಗಾಸಾಣೆನ್ ತಾಂಚಿ ಜತನ್ ಘೆಂವ್ಚಾಂತ್ ತೆಂ ಹೆರಾಂಕ್ ದೇಕ್ ಜಾವ್ನಾಸ್‍ಲ್ಲೆಂ. ಖುಶಾಲಿ ಸ್ವಭಾವಾಚೆಂ ಜಾವ್ನಾಸ್ಚಾ ತಾಕಾ ಸಕ್ಡಾಲಾಗಿಂ ಉಗ್ತ್ಯಾನ್ ಉಲಂವ್ಚಿ ಸವಯ್. ತ್ಯಾ ದಿಸಾ ತಾಕಾ ಜನರಲ್ ವಾರ್ಡಾಂತ್ ಡ್ಯೂಟಿ ಆಸ್‍ಲ್ಲಿ ಆನಿ ತಾಚಾ ಸೆಜಾರ್ಚಿ ಎಕ್ಲಿ ಬಾಯ್ಲ್ ಮನಿಸ್ ಥಂಯ್ಸರ್ ದಾಖಲ್ ಜಾಲ್ಲ್ಯಾ ಕೊಣಾಕ್‍ಗೀ ಪಳೆಂವ್ಚಾ ಖಾತಿರ್ ಆಯಿಲ್ಲಿ. ಹ್ಯಾ ವೆಳಾರ್ ತಿಚಿ ದೀಶ್ಟ್ ಥಂಯ್ಸರ್ ದಾಕ್ತೆರ್ಗಿ ಶಿಕಾಪ್ ಶಿಕ್ಚಾ ಎಕಾ ಚಲ್ಯಾ ಲಾಗಿಂ ಹಾಸೊನ್ ಹಾಸೊನ್ ಉಲವ್ನ್ ಆಸ್ಚಾ ತ್ಯಾ ಚೆಡ್ವಾಚೆರ್ ಪಡ್ಲಿ, ತಿತ್ಲೆಂಚ್.! ತಾಂಚಾ ಗಾಂವಾತ್ ತ್ಯಾ ಬಾಯ್ಲೆಚಿ ಜೀಬ್ ಇತ್ಲಿಯೀ ಹುಳ್ವುಳ್ಳಿಗೀ ತ್ಯಾ ಚಲಿಯೆಚ್ಯಾ ಮಾನ್ಸುಗೆ ವಿಶ್ಯಾಂತ್ ಗಾಂವಾರ್ ಅಶ್ಯೊಯೀ ಖಬ್ರೊ ಜಾಲ್ಲ್ಯೊ ಆನಿ 'ದಿಸಾಚೆ ಡ್ಯೂಟೆವೆಳಾರ್‍ಚ್ ತೆಂ ಅಶೆಂ ಕರ್ತಾ ತರ್ ರಾತ್ಚಾ ಡ್ಯೂಟೆವೆಳಾರ್ ಕಿತೆಂ ಘಡ್ತಾ ಆಸೊಂಕ್ ಪುರೊ' ಮ್ಹಳ್ಳೆಂ ತರ್ಕ್ ಜರಂವ್ಕ್ ಲಾಗ್ಲ್ಯೊ ಥೊಡ್ಯೊ ಜೀಬೊ. ಪರಿಣಾಮ್, ತ್ಯಾ ಚಲಿಯೆಕ್ ನಿಘಂಟ್ ಜಾಲ್ಲಿ ಸಯ್ರಿಕ್ ತುಟ್ಲಿ. ಘರ್ಚಿಂ ದೆದೆಸ್ಪೊರ್ ಜಾಲಿಂ ಆನಿ ನರ್ಸಿಂಗಾಚೆ ಕಾಮ್ ಸೊಡುಂಕ್ ತಾಚೆರ್ ದಬಾವ್ ಘಾಲೊ ಪುಣ್ ತೆಂ ಘಟ್ ರಾವ್ಲೆಂ ಆನಿ ಆಪ್ಣಾಕ್ ಕಾಜಾರ್ ಜಾಲೆಂ ನಾ ತರೀ ವ್ಹಡ್ ನಾ ಪುಣ್ ಆಪ್ಲಿ ವ್ರತ್ತಿ ಸಾಂಡ್ಚಿಂ ನಾ ಮ್ಹಳ್ಳೊ ಘಟ್ ನಿರ್ಧಾರ್ ಕರ್ನ್ ಕೊಡ್ಯಾಳಾ ಭಾಯ್ರ್ ಕುಟ್ಮಾಥಾವ್ನ್ ಪಯ್ಸ್ ರಾವೊನ್ ಆಪ್ಲಿ ಸೆವಾ ದೀವ್ನ್ ಆಸಾ.!

ತೊ ವ್ರತ್ತೆನ್ ಇಂಜಿನಿಯರ್, ತಾಕಾ ಅಮೇರಿಕಾ ವೆಚಿ ಆಶಾ. ಪುಣ್  ಬಿ.ಇ. ಸಂಪಯಿಲ್ಲ್ಯಾ ಇಂಜಿನಿಯರಾಕ್ ಅಮೇರಿಕಾಂತ್ ತಿತ್ಲ್ಯಾ ಸುಲಭಾಯೆನ್ ಕೊಣೀ ಹುಂಗಾನಾ. ತರೀ ಅಮೇರಿಕಾ ವಚೊನ್ ಜೊಡಿಜೆ ಮ್ಹಳ್ಳೆಂ ತಾಚೆಂ ಹಟ್ ದಿಸಾನ್ ದೀಸ್ ವಾಡಾತ್ತ್ ಗೆಲೆಂ. ಥಂಯ್ಸರ್ ಆಪ್ಣಾಕ್ ಇಜ್ನೆರಾಚಿ ವ್ರತ್ತಿ ಮೆಳ್ಳಿನಾ ತರೀ ವ್ಹಡ್ ನಾ ಶೊಪಿಂಗ್ ಮೊಲಾಂತ್ ಸೇಲ್ಸ್‍ಮೇನ್ ಜಾವ್ನ್ ತರೀ ಕಾಮ್ ಕರಿನ್ ಮ್ಹಳ್ಳ್ಯಾ ನಿರ್ಧಾರಾಕ್ ಸಯ್ತ್ ತೊ ಆಯಿಲ್ಲೊ. ಪುಣ್ ಅಮೇರಿಕಾಚಿ ವೀಸಾ ತಿತ್ಲ್ಯಾ ಸುಲಭಾಯೆರ್ ಥೊಡಿ ಮೆಳ್ತಾ.?! ತಿತ್ಲ್ಯಾರ್ ತಾಚಾ ಎಕಾ ಸವಾಯ್ ಬುದ್ವಂತ್ ಇಶ್ಟಾನ್ ತಾಕಾ ಏಕ್ ಸವಾಯೆಚಿ ಐಡಿಯಾ ದಿಲಿ. ಅಮೇರಿಕಾಂತ್ ನರ್ಸಾಂಕ್ ವಿಶೇಸ್ ಡಿಮ್ಯಾಂಡ್ ಆಸಾ. ಬರ್ಯಾ ಸಾಬಾಳಾ ಸಾಂಗಾತಾ ದಾದ್ಲ್ಯಾಕೀ ವೀಸಾ ಫುಂಕ್ಯಾಕ್ ಮೆಳ್ತಾ.! ತಿತ್ಲೆಂಚ್ ಹೊ ಇಜ್ನೆರ್ ನರ್ಸಾಚ್ಯಾ ಸೊಧ್ನೆರ್ ಪಡ್ಲೊ ಆನಿ ತವಳ್‍ಚ್ ನರ್ಸಿಂಗ್ ಸಂಪವ್ನ್ ಕಾಮಾಕ್ ಲಾಗ್‍ಲ್ಲ್ಯಾ ಎಕಾ ಚಲಿಯೆಕ್ ಕಶೆಂಯೀ ಕರ್ನ್ ಹಾಣೆಂ ಮೊಗಾಜಾ ಜಾಳಾಂತ್ ಫುಸ್ಲಾಯ್ಲೆಂ. ಹಾಚಿ ಹಕೀಕತ್ ನೆಣಾಸ್ಲೆಂ ತೆಂ ಚೆಡುಂ ಹಾಚೆ ಸಾಂಗಾತಾ ಥಂಯ್ ಹಾಂಗಾ ಗೆಲೆಂ, ಪಿಕ್ಚರ್ ಪಾರ್ಕ್ ಮ್ಹಣ್ ಭೊಂವ್ಲೆಂ. ವರ್ಸಾ ಉಪ್ರಾಂತ್ ಹ್ಯಾ ಇಜ್ನೆರಾನ್ ಸವ್ಕಾಸ್ ತಾಚೆಲಾಗಿಂ ಅಮೇರಿಕಾಚೊ ಪ್ರಸ್ತಾಪ್ ಕಾಡ್ಲೊ. ತವಳ್ ತ್ಯಾ ಚೆಡ್ವಾನ್ ಆಪ್ಲಿ ಅಸಹಾಯಕತಾ ತಾಕಾ ಸಾಂಗ್ಲಿ ಆನಿ ತಾಕಾ ವಿವರಿಲೆಂ ಕೀ ಆಪುಣ್ ಆಪ್ಲ್ಯಾ ಆವಯ್ ಬಾಪಾಯ್ಚೆಂ ಎಕ್ಲೆಂಚ್ ಧುವ್, ತಾಂಕಾಂ ಸೊಡ್ನ್ ಅಮೇರಿಕಾ ವಚಾನ್ ತರ್ ತಿಂ ಎಕ್ಸುರಿಂ ಜಾತಾತ್ ದೆಕುನ್ ಆಪುಣ್ ಹಾಂಗಾಸರ್‍ಚ್ ಕಾಮ್ ಕರ್ತಾಂ ಮ್ಹಣ್. ತಿತ್ಲೆಂಚ್, ಹ್ಯಾ ಇಜ್ನೆರಾನ್ ಭಾಂದ್‍ಲ್ಲೆಂ ಸ್ವಪ್ಣಾಚೆಂ ಬುರುಜ್ ಕೊಸಾಳ್ಳೆಂ ಆನಿ ತೊ ದೆದೆಸ್ಪರ್ ಜಾಲೊ ಆನಿ ಹೆಂ ತೆಂ ಮ್ಹಣ್ ನೀಬ್ ದೀವ್ನ್ ತ್ಯಾ ಚಲಿಯೆ ಥಾವ್ನ್ ತೊ ಪಯ್ಸ್ ಜಾಲೊ. 'ತೆಂ ತಾಚೆ ಸಾಂಗಾತಾ ಥಾಂಯ್ ಹಾಂಗಾ ಭೊಂವ್ತಾಲೆಂ ಖಂಯ್' ಮ್ಹಳ್ಳೊ 'ಆಪ್ರಾಧ್' ತ್ಯಾ ಚಲಿಯೆಕ್ ಸಾಸ್ಣಾಕ್ ಚಿಡ್ಕೊನ್ ಉರ್ಲೊ.!

ಏಕ್ ನರ್ಸ್ ಆಸ್ಪತ್ರೆಂತ್ ಚಾರ್ ಜಣಾಂ ಮುಕಾರ್ ಆಪ್ಣಾ ಸಾಂಗಾತಾ ಕಾಮ್ ಕರ್ಚಾ ಎಕಾ ಚಲ್ಯಾ ಲಾಗಿಂ ಉಲಯ್ಲೆಂ ಮ್ಹಳ್ಳ್ಯಾ ಎಕಾಚ್ ಕಾರಣಾಕ್ ಲಗಾಮ್ ನಾಸ್ತಾನಾ ಒಟ್ಟಾರೆ ಹುಳ್ವುಳ್‍ಲ್ಲಿ ತಿ ಜೀಬ್ ರಾತ್ಚಾ ಪಾಳಿನಿಂಚ್ ಸೊಫ್ಟ್ ವೇರ್ ಕಂಪೆನಿಂತ್ ಬಂಧ್ ಎ.ಸಿ. ಕುಡಾನಿಂ ವಾವುರ್ಚಾ ಚಲಿಯಾಂ ವಿಶ್ಯಾಂತ್ ತಶಿಚ್ ಹುಳ್ವುಳಾತ್.? ಬಹುಶ ನಾ, ಕಿತ್ಯಾಕ್ ಹ್ಯಾ ಸಮಾಜೆಚಾ ಪಿಡೇಸ್ತ್ ಮನಾಸ್ಥಿತೆ ಪ್ರಕಾರ್ ತ್ಯೊ ಚಲಿಯೊ ಲಾಖಾನಿಂ ಜೊಡ್ತಾತ್ ಜಾಲ್ಲ್ಯಾನ್, ತಾಣಿಂ ಚಾರ್ ಜಣಾಂಕಡೆನ್ ತೆಂಯೀ ದಾದ್ಲ್ಯಾಂಕಡೆನ್ ಹಾಸೊನ್ ಖೆಳೊನ್ ಉಲಯ್ಲ್ಯಾರ್ ತೆಂ 'ಸೋಶಿಯಲ್ ಬಿಹೇವಿಯರ್' ಪುಣ್ ತೆಂಚ್ ನರ್ಸ್ ಜಾವ್ನ್ ಕಾಮ್ ಕರ್ನ್ ಕಾಂಯ್ ಥೊಡ್ಯಾ ಹಜಾರಾಂಚೊ ಸಾಂಬಾಳ್ ಜೊಡ್ಚಾ ಎಕಾ ಚಲಿಯೆನ್ ಕೆಲ್ಯಾರ್ ತೆಂ 'ಲೂಸ್ ಕ್ಯಾರೆಕ್ಟರ್"..!! ಏಕ್ ಚಲಿ ಸುಲಭಾಯೆನ್ ಕರ್ನ್ ಸಂಪವ್ಯೆತ್ ಜಾಲ್ಲೆ ಕೋರ್ಸ್ ಸೊಡ್ನ್ ಕೇವಲ್ ಸೆವೆಚಾ ಮನೋಭಾವನಾನ್ ನರ್ಸಿಂಗ್ ಶಿಕಾಪ್ ವಿಂಚುನ್, ಹರ್ಯೆಕ್ ದೀಸ್ ಮಳ್ಳೆಬರಿಂ ಲಾಂಬ್ ಲಾಂಬ್ ಜವಾಬಿ ತೊಂಡ್ಪಾಶಿ ಶಿಕೊನ್, ಲೋಡಾಂಗಟ್ಲ್ಯಾನ್ ಅಸಾಯ್ನ್ಮೆಂಟಾ ಬರವ್ನ್ ಸಾಡೆತೀನ್ ವರ್ಸಾಂ ಮಿನತ್ ಕಾಡ್ನ್ ಪಿಡೆಸ್ತಾಂಚ್ಯಾ ಸೆವೆಕ್ ಆಯ್ತಿ ಜಾತಾನಾ, ಬಾಪಾಯ್ಚ್ಯಾ ಕುಸೊನ್ ವೆಚಾ ಪಯ್ಶ್ಯಾನಿಂ ಚಾರ್ ವರ್ಸಾಂಚೊ ಇಜ್ನೆರ್ಗಿ ಕೋರ್ಸ್ ಆಟ್ ವರ್ಸಾನಿಂ ಸಂಪಯಿಲ್ಲೊ ಚೆಡೊ ಎಕ್ಲೊ ಅಮೇರಿಕಾ ವಚೊನ್ ವೆಗಿಂ ಕಾಸ್ ಕರ್ಚಾ ಇರಾದ್ಯಾಕ್ ಪಡ್ತಾ ಆನಿ ತವಳ್ ತಾಕಾ ಏಕ್ ನರ್ಸ್ 'ಕಾಮಿಯಾಬಿಚಿ ನಿಸಣ್' ಜಾತಾ.!! ಅಸಲ್ಯಾ ಮನಾಸ್ಥಿತೆಕ್ ಪಿಡೆಸ್ತ್ ಮ್ಹಣ್ಚಾ ಪ್ರಾಸ್ ತಕ್ಲೆಚೆಂ ಸ್ಥಿಮಿತ್ ಹೊಗ್ಡಾಯಿಲ್ಲಿ ಮ್ಹಣ್ಚೆಂ ಚಡ್ ಸಾರ್ಕೆಂ ಮ್ಹಣ್ ಮಾಕಾ ಭೊಗ್ತಾ.!

ಮ್ಹಜ್ಯಾ ಇಶ್ಟಾನಿಂ ಆಪ್ಣೆಂ ಶಿಕ್‍ಲ್ಲ್ಯಾ ಶಿಕ್ಪಾವಿಶಿಂ, ವಿಂಚ್‍ಲ್ಲ್ಯಾ ವತ್ತೆವಿಶಿಂ ತವಳ್ ತವಳ್ ಶಿಣ್ ಉಚಾರ್ಚೆಂ ಹಾವೆಂ ಆಯ್ಕಾಲಾಂ. "ಖಂಚಾ ಕರ್ಮಾಕ್ ಹಾವೆಂ ಇಂಜಿನಿಯರಿಂಗ್ ಕೆಲೆಂಗೀ.." , "ಖಂಚಾ ದಳ್ದಿರ್ ಘಡಿಯೆ ಹಾವೆಂ ಬ್ಯಾಂಕಿಂಗ್ ಫೀಲ್ಡ್ ವಿಂಚ್ಲೆಂಗಾಯ್.." ಅಸಲಿಂ ಉತ್ರಾಂ ಮ್ಹಜ್ಯಾ ಮಿತ್ರಾಂಚ್ಯಾ ತೊಂಡಾಥಾವ್ನ್ ತವಳ್ ತವಳ್ ಹಾಂವ್ ಆಯ್ಕಾತಾಂ. ಸಕ್ಕಡ್ ಸೊಡ್ಯಾಂ, ಸೆಮಿನರಿ ಶಿಕಾಪ್ ಕರ್ನ್ ಆಸ್ಚೊ ಮ್ಹಜೊ ಎಕ್ಲೊ ಮಿತ್ರ್ ಸಯ್ತ್ ಆಪ್ಲ್ಯಾ ವಿಂಚವ್ಣೆ ವಿಶ್ಯಾಂತ್ ಶಿಣ್ ಉಚಾರ್ತೆ ಆಸ್ತಾ.!! ಪುಣ್ ಮ್ಹಜೆ ಸಾಂಗಾತಾ ಯಾ ಮ್ಹಜ್ಯಾ ಪಾಟಿಂ ಮುಕಾರ್ ಶಿಕೊನ್ ನರ್ಸಿಂಗ್ ಶೆತಾಕ್ ಗೆಲ್ಲ್ಯೊ ಜಾಯ್ತ್ಯೊ ಇಶ್ಟಿಣ್ಯೊ ಮಾಕಾ ಆಸಾತ್. ಆಜ್ ಮ್ಹಣಾಸರ್ ತಾಂಚೆಪಯ್ಕಿಂ ಎಕ್ಲ್ಯಾನ್ ಸಯ್ತ್ ಆಪ್ಣೆಂ ನರ್ಸಿಂಗ್ ವ್ರತ್ತಿ ವಿಂಚ್‍ಲ್ಲ್ಯಾ ವಿಶ್ಯಾಂತ್ ತಾಣಿಂ ಶಿಣ್ ಉಚಾರ್‍ಲ್ಲೊ ನಾ.! ಏಕ್ ಘಡಿ ಪುರ್ಸತ್ ನಾ ತಿತ್ಲೆಂ ಕಾಮ್ ಆನಿ ಭಿಕೆಚೊ ಸಾಂಭಾಳ್, ತರೀ ಆಪ್ಲ್ಯಾ ವಾವ್ರಾಚೊ ಪ್ರತಿಫಳ್ ಪಯ್ಶಾನಿಂ ಮೆಜಿನಾಸ್ತಾಂ ಆಪ್ಣೆಂ ಸೆವಾ ಕೆಲ್ಲ್ಯಾ ವ್ಯಕ್ತಿಚಾ ಮುಕಾಮಳಾರ್ ಉದೆಂವ್ಚಾ ತ್ರಪ್ತೆಚಾ ಭೊಗ್ಣಾನಿಂ ಮೆಜುನ್ ಧಾದೊಸ್ಕಾಯ್ ಭೊಗ್ಚಿ ವ್ರತ್ತಿ ಜರ್ ಹ್ಯಾ ಸಂಸಾರಾಂತ್ ಆಸಾತ್ ತರ್ ತಿ ಜಾವ್ನಾಸಾ ನರ್ಸಾಂಚಿ ವ್ರತ್ತಿ - ಅಶಿ ಮ್ಹಜಿ ಅಭಿಪ್ರಾಯ್! 

ಮಂಗ್ಳರಾಚ್ಯಾ ತ್ಯಾ ಪ್ರಖ್ಯಾತ್ ಆಸ್ಪತ್ರೆಂತ್ ದಾಖಲ್ ಜಾಲ್ಲ್ಯಾ ಮ್ಹಜ್ಯಾ ಎಕಾ ಮಿತ್ರಾಚಿ ಭೆಟ್ ಕರುಂಕ್ ಹಾಂವ್ ಗೆಲ್ಲೊಂ. ಜನರಲ್ ವಾರ್ಡ್ ತೆಂ, ಮ್ಹಜ್ಯಾ ಇಶ್ಟಾಚ್ಯಾ ಖಟ್ಲ್ಯಾಥಾವ್ನ್ ತೀನ್ ಖಟ್ಲಿಂ ಸೊಡ್ನ್ ಚೊವ್ತ್ಯಾ ಖಟ್ಲ್ಯಾರ್ ಆಸ್‍ಲ್ಲೊ ಪಿಡೇಸ್ತ್ ಕಠೀನ್ ಹಾಕ್‍ಬೋಬ್ ಮಾರ್ತಾಲೊ. ತಾಚ್ಯಾ ಖಟ್ಲ್ಯಾ ಭೊಂವ್ತಿಂ ಜಮ್‍ಲ್ಲ್ಯಾ ತೆಗಾಂ ವಾರ್ಡ್‍ಬೋಯಾನಿಂ ತ್ಯಾ ವ್ಯಕ್ತಿಕ್ ಖಟ್ಲ್ಯಾ ವಯ್ಲೊ ಉಟಾನಾತ್ಲೆಪರಿಂ ಧರ್ನ್ ದವರ್‍ಲ್ಲೊ ಆನಿ ಎಕ್ಲಿ ನರ್ಸ್ ತ್ಯಾ ಪಿಡೇಸ್ತಾಚಿ ಚಾಕ್ರಿ ಕರ್ಚಾರ್ ಆಸ್ಲಿ. ಹಾವೆಂ ಮ್ಹಜ್ಯಾ ಮಿತ್ರಾಲಾಗಿಂ ಕಿತೆಂ ಗಜಾಲ್ ಗೀ ಮ್ಹಣ್ ವಿಚಾರ್ಲೆಂ. ತಾಣೆಂ ಸಾಂಗ್‍ಲ್ಲೆ ಫರ್ಮಾಣೆಂ, ತೊ ಪಿಡೇಸ್ತ್ ಸುಮಾರ್ ಮಹಿನ್ಯಾಂ ಥಾವ್ನ್ ಖಟ್ಲ್ಯಾರ್ ಆಸಾ, ಮ್ಹಜೊ ಮಿತ್ರ್ ಥಂಯ್ಸರ್ ದಾಖಲ್ ಜಾಂವ್ಚಾ ಪಯ್ಲೆಂಚ್ ತೊ ಆಸ್ಲೊ ಖಂಯ್. ತಾಚೆಂ ಡಯಾಬಿಟಿಸ್ ಚಡೊನ್ ತಾಚಾ ಉಜ್ವ್ಯಾ ಪಾಂಯಾಂಕ್ ಗ್ಯಾಂಗ್ರಿನ್ ಜಾಲ್ಲೆಂ ಆನಿ ತೊ ಪಾಯ್ ದೊಂಪ್ರಾ ಸಕಯ್ಲ್ ಕಾತರಲ್ಲೊ. ಥೊಡೊ ತೇಂಪ್ ಆಸ್ಪತ್ರೆಂತ್ ರಾವವ್ನ್ ಉಪ್ರಾಂತ್ ತಾಕಾ ಘರಾ ಧಾಡ್‍ಲ್ಲೊ ಖಂಯ್. ಪುಣ್ ಘರ್ಚಾಂಚಾ ಬೆಫಿಕಿರಾಯೆನ್ ಲಾಗೊನ್ ಆನಿ ತಾಣಿಂ ತೊ ಘಾಯ್ ದಿಸ್ಪಡ್ತೆಂ ಸಾರ್ಕೊ ನಿತಳ್ ಕರುನಾತ್‍ಲ್ಲ್ಯಾನ್ ತೊ ಜೋರ್ ಜಾಲ್ಲೊ ಆನಿ ತಾಂತುಂ ಫೂ ಭರೊನ್ ತೊ ಕುಸೊನ್ ಗೆಲ್ಲ್ಯಾತಿತ್ಲೊ ಘಾಣೊಂಕ್ ಸುರು ಜಾತಾನಾ ತಾಣಿಂ ತಾಕಾ ಪರ್ತ್ಯಾನ್ ಹಾಡ್ನ್ ಆಸ್ಪತ್ರೆಕ್ ದಾಖಲ್ ಕೆಲ್ಲೊ. ಆಸ್ಪತ್ರೆಂತ್ ನರ್ಸಾಂ ತೊ ಘಾಯ್ ದಿಸಾಕ್ ದೋನ್ ಪಾವ್ಟಿಂ ನಿತಳ್ ಕರ್ತಾಲಿಂ ಜಾಲ್ಲ್ಯಾನ್ ತೊ ಗೂಣ್ ಜಾಯಿತ್ ಯೆತಾಲೊ ತರೀ ಡಯಾಬಿಟಿಸ್ ಚಡ್ ಆಸ್‍ಲ್ಲೆವರ್ವಿಂ ಸಾರ್ಕೊ ಗೂಣ್ ಜಾಂವ್ಕ್ ಕಾಂಯ್ ಮಹಿನೆ ವೆತಿತ್ ಕೊಣ್ಣಾ... ಮಾಕಾ ಆತುರಾಯ್ ತಡ್ವುಂಕ್ ಜಾಲಿನಾ, ವಳೂ ತ್ಯಾ ಖಟ್ಲ್ಯಾ ತೆವ್ಶಿನ್ ಮೆಟಾಂ ಕಾಡ್ಲಿಂ ಹಾವೆಂ. ಪುಣ್ ಲಾಗಿಂ ವಚೊಂಕ್ ಮ್ಹಜ್ಯಾಣ್ ಜಾಲೆಂ ನಾ, ತಾಚ್ಯಾ ಘಾಯಾಥಾವ್ನ್ ಯೆಂವ್ಚಿ ತಿ ಘಾಣ್, ತಾಣೆಂ ಮಾರ್ಚಿ ತಿ ಬೋಬ್ ಮ್ಹಜ್ಯಾನ್ ಸೊಸುಂಕ್ ಜಾಲಿನಾ. ಥಂಯ್ಸ್ ರಾವೊನ್ ತಾಚಿ ಚಾಕ್ರಿ ಕಚ್ರ್ಯಾ ತ್ಯಾ ನರ್ಸಾಚೆರ್ ಏಕ್ ದೀಶ್ಟ್ ಘಾಲಿ ಹಾವೆಂ... ತೊ ಮನಿಸ್ ಆಪ್ಲೊಚ್ ಖಾಸ್ ಮನಿಸ್ ಮ್ಹಣ್ ಲೆಗುನ್ ತಾಚೊ ಘಾಯ್ ನಿತಳ್ ಕರ್ಚಾಂತ್ ತಿ ಮಗ್ನ್ ಜಾಲ್ಲಿ. ತಿಚ್ಯಾ ತೊಂಡಾಚೆರ್ ಕಸ್ಲೊಯೀ ಶಿಣ್, ಕಾಂಟಾಳೊ ದಿಸ್ಲೊನಾ ಮಾಕಾ, ತಿಚಾ ತೊಂಡಾಚೆರ್ ಪ್ರಶಾಂತತಾ ಆಸ್ಲಿ, ಮೊವಾಳಾಯ್ ಆಸ್ಲಿ, ಭೋವ್ ಮಯ್ಪಸಾನ್ ಮ್ಹಳ್ಳೆಪರಿಂ, ತ್ಯಾ ಪಿಡೇಸ್ತಾಕ್ ಜಾತಾತಿತ್ಲೆಂ ಉಣೆಂ ದುಖ್ಚೆಪರಿಂ ತಿ ತಾಚೊ ಘಾಯ್ ಧುತಾಲಿ, ಮಧೆಂ ಮಧೆಂ ತಿ ತ್ಯಾ ಪಿಡೆಸ್ತಾಕ್ ಭುಜಯ್ತಾಲಿ ಸಯ್ತ್.! ಸುಮಾರ್ ಆಟ್ ವರ್ಸಾದಿಂ ಹಾವೆಂ ದೆಖ್‍ಲ್ಲೆಂ ಹೆಂ ದ್ರಶ್ಯ್ ಆಜೂನ್ ಮ್ಹಜ್ಯಾ ಮತಿಂತ್ ಖಂಚೊನ್ ಉರ್ಲಾಂ ಅನಿ ಜೆದ್ನಾಂ ಹೆಂ ಘಡಿತ್ ಮ್ಹಜ್ಯಾ ಮತಿಕ್ ಉಗ್ಡಾಸಾಕ್ ಯೆತಾ ತೆದ್ನಾ ಮ್ಹಜೆಂ ಕಾಳೀಜ್ ಏಕ್‍ಚ್ ಮಾಗ್ಣೆಂ ಉಚಾರ್ತಾ - ಅಸಲ್ಯಾಂಚಿ ಸಂತತಿ ವಾಡೊಂದಿ ಆನಿ ಚಡೊಂದಿ.!

ನೈಟಿಂಗೇಲಾಚೆಂ ಪ್ರಮಾಣ್

ಹಾಂವ್ ನರ್ಸಿಂಗ್ ವ್ರತ್ತೆಚ್ಯಾ ಕಾಯ್ದ್ಯಾಂಕ್ ಆನಿ ತಿಚಾ ನೈತಿಕ್ ಮೊಲಾಂಕ್ ಬಧ್ದ್ ಜಾವ್ನ್ ರಾವ್ತೆಲಿಂ/ಲೊಂ, ಮ್ಹಜ್ಯಾ ಪಂಗ್ಡಾಚ್ಯಾ ಹೆರ್ ಸಾಂದ್ಯಾಸಂಗಿ ಭರ್ವಶ್ಯಾನ್ ಆನಿ ಸಹಕಾರಾನ್ ವಾವುರ್ತೆಲಿಂ/ಲೊಂ, ಆನಿ ಮ್ಹಜ್ಯಾ ಸರ್ವ್ ಸಕ್ತೆನ್ ಆನಿ ಮನಾನ್ ಮ್ಹಜ್ಯಾ ಊಂಚ್ ದಿಲ್ಲಿ ಜವಾಬ್ದಾರಿ ಹಾಂವ್ ಪಾಳ್ತೆಲಿಂ/ಲೊಂ. ಹಾಂವ್ ಕಸಲೆಂಚ್ ವಾಯ್ಟ್ ವಾ ನಾಲಿಸಾಯೆಚಿಂ ಕ್ರತ್ತ್ಯಾಂ ಆಧಾರ್ಚಿ/ಚೊ ನಾ ಆನಿ ಕಳಿತ್ ಆಸೊನ್ ಕೊಣಾಕೀ ಚೂಕ್ ವಕಾತ್ ದಿಂವ್ಚಿ/ವ್ಚೊ ನಾ, ಕಸಲ್ಯಾಚ್ ಅವ್ಯವಹಾರಾಕ್ ಸಾಂಗಾತ್ ದಿಂವ್ಚಿ/ವ್ಚೊ ನಾ, ಮ್ಹಜ್ಯಾ ವಾವ್ರಾವೆಳಾರ್ ಮ್ಹಜ್ಯಾ ಗುಮಾನಾಕ್ ಆಯಿಲ್ಲ್ಯೊ ಪುಣ್ ಹಾವೆಂ ಘುಟ್ ಸಾಂಭಾಳಿಜೆ ಜಾಲ್ಲ್ಯೊ ಕಸಲ್ಯೊಚ್ ಸಂಗ್ತಿ ಹಾಂವ್ ಹೆರಾಂಕ್ ಉಗ್ಡಾಪೆಂ ಕರ್ಚಿ/ರ್ಚೊ ನಾ ಆನಿ ನರ್ಸಿಂಗ್ ವ್ರತ್ತೆಚಿ ಘನತಾ ಉರಂವ್ಚಾಕ್ ಆನಿ ತಿ ಉಂಚಾಯೆಕ್ ಪಾವಂವ್ಚಾಕ್ ಮ್ಹಜಾ ತಾಂಕಿಭಿತರ್ಲೆಂ ಸಕ್ಕಡ್ ಪ್ರೇತನ್ ಹಾಂವ್ ಕರ್ತಲಿಂ/ಲೊಂ ಆನಿ ಮ್ಹಜೆಂ ಸಗ್ಳೆಂ ಜಿವಿತ್ ಮ್ಹಜ್ಯಾ ವ್ರತ್ತೆ ಖಾತಿರ್ ಆನಿ ತಿಚೆ ಉಂಚ್ಲೆ ಆದರ್ಶ್ ಸಾಂಬಾಳ್ಚೆ ಪಾಸತ್ ಭೆಟಯ್ತೆಲಿಂ ಮ್ಹಣ್ ದೆವಾಮುಕಾರ್ ಆನಿ ಹಾಂಗಾಸರ್ ಜಮ್ಲೆಲ್ಯಾ ತುಮ್ಚಾ ಸರ್ವಾಂ ಮುಕಾರ್ ಹಾಂವ್ ಖರ್ಯಾ ಕಾಳ್ಜಾನ್ ಭಾಸ್ ದಿತಾಂ.

ಅಭಿಪ್ರಾಯ್

ಮ್ಹಜ್ಯಾ ಅಧೀನ್ ಆಸ್ಚ್ಯಾ ಪಿಡೆಸ್ತಾಂಚೆ ಕಶ್ಟ್ ವಳ್ವಳೆ ಅರ್ಥ್ ಕರ್ನ್ ಘೆವ್ನ್ ತಾಂಕಾಂ ತಾಂಕಿ ಭಿತರ್ಲಿ ಉತ್ತೀಮ್ ಸೆವಾ ದೀಂವ್ಕ್ ಹಾಂವ್ ಹರ್ ಪ್ರೇತನ್ ಕರ್ತಾಂ. ಮ್ಹಜ್ಯಾ ಅಧೀನ್ ಆಸ್ಚ್ಯಾ ಹರ್ ಪಿಡೇಸ್ತಾಥಂಯ್ ಹಾಂವ್ ಆಮ್ಚ್ಯಾ ಸೊಮಿಯಾಕ್ ದೆಖ್ತಾಂ ತಾಂಚಾ ಸೆವೆಂತ್ ಮಾಕಾ ವಿಶೇಸ್ ತ್ರಪ್ತಿ ಭೊಗ್ತಾ. ಆಮ್ಚ್ಯಾ ಕಾಮಾಕ್ ಹಾಂಗಾಸರ್ ಮೆಳ್ಚೊ ಸಾಂಭಾಳ್ ಉಣೊಣಚ್ ತರೀ, ಸಾಂಭಾಳಾಚಾ ಆಶೆನ್ ನ್ಹಯ್ ಬಗಾರ್ ಸೆವೆಚ್ಯಾ ಮನೋಭಾವಾನ್ ಆಮ್ಚೆಂ ಕಾಮ್ ಕರ್ತಾಂವ್ ಆಮ್ಚಿ ಸೆವಾ ಮೆಚ್ವಾಲ್ಲ್ಯಾ ಪಿಡೇಸ್ತಾಂಚ್ಯಾ ತೊಂಡಾರ್ ಆಮಿ ತ್ರಪ್ತಿ ದೆಖ್ತಾನಾ ಆಮ್ಕಾಂ ಮೆಳ್ಚಿ ಧಾದೊಸ್ಕಾಯ್ ಪಯ್ಶಾನಿಂ ಮೆಜುನ್ ಕಾಡ್ಚೆ ತಸ್ಲಿ ನ್ಹಯ್ ದೆಕುನ್ ಮ್ಹಜ್ಯಾ ವ್ರತ್ತೆಚೆರ್ ಮಾಕಾ ವಿಶೇಷ್ ಅಭಿಮಾನ್ ಆಸಾ. ಎಕಾ ನರ್ಸಾನ್ ಆಪ್ಣಾಚೆ ವಯುಕ್ತಿಕ್ ಸಮಸ್ಯೆ ಕಿತೆಂಯೀ ಆಸ್ಲ್ಯಾರ್ ತೆ ಆಪ್ಣಾಭಿತರ್‍ಚ್ ಲಿಪವ್ನ್ ಘೆವ್ನ್, ಹಾಸ್ತ್ಯಾ ತೊಂಡಾನ್ ಆಪ್ಣಾ ಅಧೀನ್ ಆಸ್ಚಾ ಪಿಡೇಸ್ತಾಚಿ ಚಾಕ್ರಿ ಕರ್ಚಿ ಭೋವ್ ಗರ್ಜೆಚಿ. ಆಮ್ಚೆಂ ಹಾಸ್ಕುರೆಂ ಮುಖಾಮಳ್ ಆನಿ ಉಬ್ಗೊಣ್ ನಾತ್‍ಲ್ಲಿ ಸೆವಾ ತಾಂಕಾಂ ನವ್ಯಾ ಭರ್ವಶ್ಯಾನ್ ಭರ್ತಾ. ದಾಕ್ತೆರ್ ಕೇವಲ್ ಪಿಡೇಸ್ತಾಚಿ ತಪಾಸ್ಣಿ ಕರ್ನ್ ವಕ್ತಾಂ ಬರವ್ನ್ ದೀವ್ನ್ ವೆತಾತ್. ತಾಂಕಾಂ ಪಿಡೇಸ್ತಾಂ ಕಡೆನ್ ಉಲಂವ್ಕ್ ಚಡ್ ವೇಳ್ ಮೆಳಾನಾ, ದೆಕುನ್ ಪಿಡೇಸ್ತ್ ನರ್ಸಾಂಥಾವ್ನ್ ಚಡ್ ವೇಳ್ ಆಪೇಕ್ಶಿತಾತ್ ಆನಿ ಆಪ್ಲೆಂ ಸುಖ್ ದುಖ್ ನರ್ಸಾಂಕಡೆನ್ ವಾಂಟುನ್ ಘೆಂವ್ಕ್ ಆಶೆತಾತ್. ಜಾಯ್ತೆಪಾವ್ಟಿಂ ಆಮಿ ಕರ್ಚಿ ಸೆವಾ ಲೊಕಾಚಾ ಗುಮಾನಾಕ್ ಯೇನಾ ಆನಿ ನಾಂವ್ ನಾಸ್ತಾಂ ಉರ್ತಾ ತರೀ ಆಮಿ ಬೆಜಾರ್ ಪಾವಾನಾಂವ್, ಕಿತ್ಯಾಕ್ - ಪ್ರತಿಫಳ್ ಆಶೆನಾತ್‍ಲ್ಲೊ ವಾವ್ರ್ ಜಾವ್ನಾಸಾ ಆಮ್ಚಾ ವ್ರತ್ತೆಚೊ ಧ್ಯೇಯ್. ಅಶೆಂ ಆಸ್ತಾಂ ನರ್ಸಾನಿಂ ಸೊಸ್ಣಿಕಾಯೆನ್ ತಾಂಕಾಂ ಆಯ್ಕೊಂಚೆಂ ಅತೀ ಗರ್ಜೆಚೆಂ. ದಾದ್ಲ್ಯಾಕೇಂದ್ರಿತ್ ಸಮಾಜೆಂತ್ ರಾತ್ಚ್ಯಾ ಪಾಳಿನಿಂ ಕಾಮ್ ಕರ್ಚೆಂ ತಿತ್ಲೆಂ ಸುಲಭಾಯೆಚೆಂ ನ್ಹಯ್, ಆಸ್ಪತ್ರೆ ಭಿತರ್ಲ್ರ್ಯಾ ಮನ್ಶಾಂಚಾಕೀ ಚಡ್, ವಾಂಕ್ಡೆ ಉಲೊಂವ್ಚಾ ಆನಿ ವಾಂಕ್ಡೆ ನದ್ರೆನ್ ಪಳೇಂವ್ಚಾ ಸಮಾಜೆಕ್ ಆಮಿ ಫುಡ್ ಕರಿಜೆ ಪಡ್ತಾ. ಹಿ ವ್ರತ್ತಿ ಮ್ಹಾಕಾ ಶಿಕಯಿಲ್ಲ್ಯಾ ಶಿಕ್ಶಕಾಂಕ್ ಆದರ್ಶ್ ಜಾವ್ನ್ ಘೆವ್ನ್, ದೆವಾಚಾ ಕುರ್ಪೆಚೆರ್ ಪಾತ್ಯೆವ್ನ್ ಹಾಂವ್ ಮ್ಹಜಿ ವ್ರತ್ತಿ ಕರಿತ್ ಆಸಾಂ.

-ಜೀವಿತಾ ಲೋಬೊ, ಗುರ್ಪುರ್

GNM ಶಿಕಾಪ್ ಸಂಪವ್ನ್ ಪ್ರಸ್ತುತ್ ಮಂಗ್ಳುರ್ಚಾ ಯೆನೆಪೊಯಾ ಹೊಸ್ಪಿಟಲಾಂತ್ ಸ್ಟಾಫ್ ನರ್ಸ್ ಜಾವ್ನ್ ವಾವ್ರ್ ದಿಲಾ. ಪ್ರಸ್ತುತ್ ನರ್ಸಿಂಗಾಂತ್ Pc Bsc ಶಿಕೊನ್ ಆಸಾ.

ಅಭಿಪ್ರಾಯ್

ಲೊಕಾಚ್ಯಾ ದಿಸ್ಪೊಡ್ತ್ಯಾ ಜಿಣಿಯೆಚೆರ್ ಪರಿಣಾಮ್‍ಕಾರಿ ಬದ್ಲಾವಣ್ ಹಾಡ್ಯೆತ್ ತಸ್ಲಿ ಸಾಹಸಿಕ್ ವ್ರತ್ತಿ ವಿಂಚಹುಂಕ್ ಮಾಕಾ ಆಶಾ ಆಸ್ಲಿ. ದೆಕುನ್ ಹಾವೆಂ ನರ್ಸಿಂಗ್ ವ್ರತ್ತಿ ವಿಂಚ್ಲಿ. ನರ್ಸಿಂಗ್ ವ್ರತ್ತಿ ಎಕ್ಲ್ಯಾಕ್ ಅಸಲ್ಯಾ ಜಾಣ್ವಾಯೆನ್ ಆನಿ ಆನ್ಭೊಗಾನ್ ಭರ್ತಾ ಕೀ, ತಿ ಜಾಣ್ವಾಯ್ ಆನಿ ಅನ್ಭೋಗ್ ಗಳ್ಸುನ್ ತಾಣೆಂ ಆಪ್ಲ್ಯಾ, ಆಪ್ಲ್ಯಾ ಕುಟ್ಮಾಚ್ಯಾ ಆನಿ ಆಪ್ಲ್ಯಾ ಸಮಾಜೆಚ್ಯಾ ಸಾಂದ್ಯಾಂಚ್ಯಾ ಉದರ್ಗತೆ ಖಾತಿರ್ ತಿ ಭರ್ಪೂರ್ ಮಾಪಾನ್ ಗಳ್ಸಿಯೆತ್. ಖಂಚಾಯೀ ಎಕಾ ಭಲಾಯ್ಕೆ ಸಂಸ್ಥ್ಯಾಚೊ ಪಾಟಿಖಣೊ ಜಾವ್ನಾಸಾತ್ ನರ್ಸಾಂ. ಏಕ್ ಭಲಾಯ್ಕೆ ಸಂಸ್ಥೊ ತೊ ಕಿತ್ಲೊಯೀ ಆಧುನಿಕ್ ಆಸುಂ, ಜರ್ ತಾಂತುಂ ಲಾಭ್ಚಿ ನರ್ಸಿಂಗ್ ಸೆವಾ ಫಾವೊತ್ಯಾ ಮಟ್ಟಾಚೆರ್ ನಾಂ ತರ್ ತೊ ಸಂಸ್ಥೊ ಪಾಟಿಂ ಪಡ್ತಾ. ಅಶೆಂ ಆಸೊನೀ, ನರ್ಸಿಂಗ್ ವ್ರತ್ತೆ ವಿಶ್ಯಾಂತ್ ಲೊಕಾಚ್ಯಾ ಮನಾನಿಂ ಬರೆಂ ಚಿಂತಾಪ್ ನಾಂ. ನರ್ಸಿಂಗ್ ವ್ರತ್ತೆಕ್ ಸಾಮಾಜಿಕ್ ಗೌರವ್ ನಾ ಮ್ಹಳ್ಳೆಂ ಚೂಕ್ ಚಿಂತಾಪ್ ಸಯ್ತ್ ಜಾಯ್ತ್ಯಾಂಚ್ಯಾ ಮತಿಂತ್ ಆಸಾ. ಆಮ್ಚೆ ಭಲಾಯ್ಕೆ ಸಂಸ್ಥೆಯೀ ಹಾಕಾ ಪೂರಕ್ ಜಾವ್ನ್ ಮ್ಹಳ್ಳೆಪರಿಂ ಚಲ್ತಾತ್. ನರ್ಸಾಂಕ್ ಮೆಳ್ಚೊ ಸಾಂಭಾಳ್ ಜಾಯ್ತೆ ಪಾವ್ಟಿಂ ಕುಲಿಚ್ಯಾ ಕಾಮಾಗಾರಾಂಚ್ಯಾ ಮಹಿನ್ಯಾಚ್ಯಾ ಆದಾಯಾಕ್ ತುಕುನ್ ಪಳೆತಾನಾ ಮೊಸ್ತು ಉಣೊ ದಿಸ್ತಾ. ಮಾತ್ರ್ ನ್ಹಯ್, ಜಾಯ್ತೆ ಭಲಾಯ್ಕೆ ಸಂಸ್ಥೆ ಪ್ರೈವೇಟ್ ದೆಕುನ್, ನರ್ಸಾಂಕ್ ಕಾಮಾಚಾ ಭದ್ರತೆಚಿ ಭಿರಾಂತ್ ಸಯ್ತ್ ಧೊಸ್ತಾ. ತರಿಪುಣ್ ಹೆಂ ಸರ್ವ್ ಗೊತ್ತಾಸೊನೀ, ತೆಂ ಲೆಕಿನಾಸ್ತಾಂ ಹಾವೆಂಯೀ ಧರುನ್ ಹೆರಾನಿಂ ಹಿ ವ್ರತ್ತಿ ವಿಂಚ್ಲ್ಯಾ ತರ್ ಹಾಕಾ ಕಾರಣ್ ಏಕ್‍ಚ್ - ಪೆಲ್ಯಾಚಿ ಸೆವಾ ಕರಿಜಾಯ್ ಮ್ಹಳ್ಳೊ ಮನೋಭಾವ್. "ಆಮಿ ಆಮ್ಕಾಂಚ್ ಖಾಲಿ ಕೆಲ್ಲ್ಯಾ ಶಿವಾಯ್ ಆಮ್ಚೊ ಸಾಕ್ರಿಫಿಸ್ ಸಂಪೂರ್ಣ್ ನ್ಹಯ್. ಮೌನಾಚೊ ಫಳ್ ಜಾವ್ನಾಸಾ ಮಾಗ್ಣೆಂ, ಮಾಗ್ಣ್ಯಾಚೊ ಫಳ್ ಜಾವ್ನಾಸಾ ಭರ್ವಸೊ, ಭರ್ವಶ್ಯಾಚೆಂ ಫಳ್ ಜಾವ್ನಾನಾ ಮೋಗ್, ಮೊಗಾಚೊ ಫಳ್ ಜಾವ್ನಾಸಾ ಸೆವಾ ಆನಿ ಸೆವೆಚೊ ಫಳ್ ಜಾವ್ನಾಸಾ ಶಾಂತಿ" ಮ್ಹಣ್ತಾ ಭಾಗೆವಂತ್ ಮದರ್ ತೆರೆಸಾ. ತಿಚಿಂ ಉತ್ರಾಂಚ್ ಮ್ಹಜ್ಯಾ ಹ್ಯಾ ವ್ರತ್ತೆಕ್ ಪ್ರೇರಣ್. ತಿಚೆ ಭರಿಂಚ್ ಪೆಲ್ಯಾಚ್ಯಾ ಸೆವೆಕ್ ಮ್ಹಜಿ ಜಿಣಿ ಸಮರ್ಪುಂಚೆಂ ಜಾವ್ನಾಸಾ ಮ್ಹಜೆಂ ಸ್ವಪಾಣ್.

- ಅನಿಲ್ ಕುಮಾರ್, ಮಂಗ್ಳುರ್

ನರ್ಸಿಗಾಂತ್ M Sc ಶಿಕಾಪ್ ಸಂಪವ್ನ್ ಪ್ರಸ್ತುತ್ ಮಂಗ್ಳುರ್ಚಾ ಎಸ್,ಸಿ.ಎಸ್ ಕೊಲೆಜ್ ಒಫ್ ನರ್ಸಿಂಗ್ ಹಾಂತುಂ HOD ಜಾವ್ನ್ ವಾವ್ರ್ ಕರ್ನ್ ಆಸಾ.

(ಹೆಂ ಲೇಖನ್ ದಿರ್ವೆಂ ಪತ್ರಾಚಾ ಮೇ 2014 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)