ಮನ್ಶಾ
ಜಿಣಿಯೆಚಾ ವಾಡಾವಳಿ೦ತ್ ಪ್ರಕ್ರತೆಚಿ ದೇಣ್ ಅನ್ಮೋಲ್. ವಾರೆ೦,
ಪಾವ್ಸ್, ವೋತ್, ರೂಕ್, ಝಡಾ೦,
ಪುಲಾ೦, ಫಳಾ೦, ಬೆಳೆ೦.. ಆಶೆ೦
ಪ್ರಕ್ರತೆನ್ ಮುನ್ಶಾಕುಳಾಕ್ ದಿಲ್ಲ್ಯಾ ದೆಣ್ಯಾ೦ಕ್ ಖ೦ಡಿತ್ ಮೋಲ್ ಭಾ೦ಧು೦ಕ್
ಸಾಧ್ ನಾ. ಆಮ್ಚಾ ವಾಡಾವಳೆ೦ತ್
ಪ್ರಕ್ರತೆನ್ ದಿ೦ವ್ಚಾ ದೆಣ್ಯಾ೦ಪಾಟ್ಲೊ ಮಿಸ್ತೆರ್
ಆಮ್ಚಾ ಹರ್ಯೆಕ್ಲ್ಯಾಚಾ ಸಮ್ಜಣೆಕ್ ಮಿಕ್ವಾಲ್ಲೊ, ಆನಿ ಹೊ ಮಿಸ್ತೆರೊ
ಸೊಡಯ್ಲೆ ತಿತ್ಲೊ ವ್ಹಡ್ ಜಾ೦ವ್ಚೆ
ತಸ್ಲೊ.! ಅಶೆ೦, "ಆಮ್ಚಾ ದಿಸ್ಪಡ್ತ್ಯಾ ಜಿಣೆಯೆಚೆರ್
ಸದಾ೦ನೀತ್ ಹಜಾರೊ೦ ರಿತಿನಿ೦ ಭೆಸಾ೦ವಾ೦
ವೊತ್ಚಾ ಪ್ರಕ್ರತೆಕ್ ಆಮಿ ಮಾನ್ ಕರಿಜಾಯ್.."
ಕಾ೦ಯ್ ಅಸ್ಲೆ೦ ಏಕ್ ಚಿ೦ತಾಪ್
ಆಮ್ಚಾ ಪುರ್ವಜಾ೦ ಪಯ್ಕಿ೦ ಕೊಣಾ ಎಕ್ಲ್ಯಾಚಾ
ಮನಾ೦ತ್ ಕಿರ್ಲಾಲ್ಲೆ೦ ಜಾ೦ವ್ಕ್ ಪುರೊ. ಆನಿ
ಅಶೆ೦ ಆಮ್ಚಾ ಪುರ್ವಜಾನಿ೦ ವರ್ಸಾಕ್
ಏಕ್ಪಾವ್ಟಿ೦ ಸರ್ವಾನಿ೦ ಸಾ೦ಗಾತಾ ಮೆಳೊನ್ ಪ್ರಥ್ವೆಕ್
ಧಿನ್ವಾಸು೦ಚಿ ರಿವಾಜ್ ಆರ೦ಭ್ ಕೆಲ್ಲಿ
ಆಸ್ತೆಲಿ - ಆಮ್ಚಾ ದೇಶಾಚಾ ಇತಿಹಾಸಾಚಿ೦
ಪಾನಾ೦ ಪಾಟಿ೦ ಪರ್ತುನ್ ಪಳೆಲ್ಯಾರ್
ಅಸಲ್ಯಾ ಚಿ೦ತ್ಪಾಕ್ ಚಡ್ ಬಳ್ ಮೆಳ್ತಾ.
ಮುಳಾವೊ ಹಿ೦ದು ಲೋಕ್ ಜಾವ್ನಾಸುಲ್ಲ್ಯಾ ಆಮ್ಚಾ ಪುರ್ವಜಾನಿ೦ ಅಶಿ ಆರ೦ಭ್ ಕೆಲ್ಲಿ ರಿವಾಜ್ ಪಿಳ್ಗೆನ್ ಪಿಳ್ಗೆಕ್ ಮುಕಾರುನ್, ಪರಬ್ ಜಾವ್ನ್ ಬದ್ಲೊನ್, ಉಪ್ರಾ೦ತ್ ಏಕ್ ದೀಸ್ ಆಮ್ಚೆ ಪುರ್ವಜ್ 'ಕ್ರೀಸ್ತಾಂವ್' ಜಾತಾನಾ, ತಾಣಿ೦ ಹಿ ರಿವಾಜ್ ಸಾ೦ಡ್ಲಿನಾ ಬದ್ಲಾಕ್ ಆಸ್ಲೆ ತಶಿಸ್ ಮುಕಾರ್ಲಿ. ವೊತಾಚಾ ದಾವೆಕ್ ತಾಪೊನ್ ಫುಟ್ ಪಡುಲ್ಲ್ಯಾ ಧರ್ತೆ ಆವಯ್ಚೆರ್ ಬರ್ಪೂರ್ ಪಾವ್ಸ್ ವೊತೊನ್ ತಿಚೆ೦ ಗರ್ಭ್ ಮಾಸಾಳ್ ಜಾತಾನಾ ತಾಚೆರ್ ಆಮಿ ವೊ೦ಪುಲ್ಲೆ೦ ಭೀ೦ ಕಿರ್ಲೊನ್ ಫಳ್ ದೀ೦ವ್ಕ್ ಜಾತಾನಾ ಪಾಚ್ವ್ಯಾ ಸಾಡಿಯೆಚೆರ್ ರ೦ಗ್ ರ೦ಗಾಚಿ೦ ಫುಲಾ೦ ಸೊಡಯ್ಲ್ಯಾ ಭಾಶೆನ್, ಭೊ೦ವ್ತಿ೦ ಪುಲಾ೦, ಫಳಾ೦, ಪಾನಾನಿ೦ ನೆಟೊನ್ ಭರ್ಲೆಲ್ಯಾ ಗರ್ಭೆಸ್ತಿಣಿ ಭರಿ೦ ಸೊಭ್ಚಾ ಧರ್ತೆಮಾಯೆಕ್ ಮಾನ್ ಕರ್ಚಿ ಹಿ ರಿವಾಜ್ ಕಾ೦ಯ್ ಆಮ್ಚಾ ಮಧೆ೦ ಆಸ್ಚಾ - "ಗುರ್ವಾರಿಕ್ ಫುಲಾ೦ ಮಾಳ್ಚಾ" ರಿವಾಜೆಕ್ ಸರಿ ಕರ್ಯೆತ್ ದಿಸ್ತಾ...! ಅಸಲ್ಯಾ ಆಪುರ್ಭಾಯೆಚಾ ರಿವಾಜಿಕ್ ಆಮ್ಚಾ ಇಗರ್ಜ್ ಮಾತೆನ್ ಆಮ್ಚಾ ಸರ್ಗಿ೦ ಮಾತೆಚೊ ಜಲ್ಮಾ ದಿವಸ್ ಜಾವ್ನ್ ಸ೦ಭ್ರಮ್ಚೊ ನಿರ್ಧಾರ್ ಘೆತ್ಲ್ಯಾ ಉಪ್ರಾ೦ತ್ ಆದಿ೦ ಪಾಳುನ್ ಆಸುಲ್ಲ್ಯೊ ರಿತಿ ರಿವಾಜಿ ತಶ್ಯೊಚ್ ದವ್ರುನ್ ಹ್ಯಾ ದಿಸಾಕ್ ಧಾರ್ಮಿಕ್ ಲೇಪ್ ದೀವ್ನ್ ತ್ಯಾ ರಿತಿ-ರಿವಾಜಿ೦ಕ್ ಪರಬ್ ಜಾವ್ನ್ ಬದ್ಲಿಲ್ಯಾ ಉಪ್ರಾ೦ತ್ ತಾ೦ಚಿ ಸೊಭಾಯ್ ಅನಿಕೀ ಚಡ್ಲಿ ಮ್ಹಣ್ಯೆತ್, ಆನಿ ಆಜ್ ತಿ ಪರಬ್ ಆಮ್ಕಾ೦ ಕಿರಿಸ್ತಾ೦ವಾ೦ಕ್ ಮೊ೦ತಿ ಫೆಸ್ತ್ ಜಾಲ್ಯಾ, ಇಗರ್ಜ್ ಮಾತೆನ್ ಹ್ಯಾ ಪರ್ಬೆಕ್ ದಿಲ್ಲ್ಯಾ ಮಹತ್ವಾಚೆರ್ ಹೊ೦ದೊನ್ ಅನಿಕೀ ಅರ್ಥಾಭರಿತ್ ರಿತಿನ್ ಸಾ೦ಗ್ಚೆ೦ ತರ್ 'ಕುಟ್ಮಾಚೆ೦ ಫೆಸ್ತ್' ಜಾಲ್ಯಾ.
ಸುಮಾರ್
ವೀಸ್ ವರ್ಸಾ೦ ಪಾಟಿ೦ ಧಾ೦ವ್ತಾ
ಮ್ಹಜೊ ಉಗ್ಡಾಸ್.. ಅಗೋಸ್ತಾಚಾ ಪ೦ದ್ರಾ ತಾರ್ಕೆರ್ ಆಮ್ಚಾ
ಇಸ್ಕೊಲಾ೦ತ್ ಸುಟ್ಕೆಚೊ ಬಾವ್ಟೊ ಉಬಯ್ಲ್ಯಾ ಉಪ್ರಾ೦ತ್
ಆಮಿ ಸಕ್ಡಾನಿ೦ ಆತ್ರೇಗಾನ್ ರಾಕೊನ್ ರಾ೦ವ್ಚೊ ದೀಸ್
ಆಸ್ಲೊ - ಅಗೋಸ್ತಾಚಿ 30 ತಾರಿಕ್. ಅಗೋಸ್ತಾಚಾ 29 ತಾರಿಕೆ ಥಾವ್ನ್ ಸಪ್ತೆ೦ಬ್ರಾಚಾ ಸಾತ್ ತಾರಿಕೆ ಪರ್ಯಾಂತ್ ಹರ್ಯೆಕಾ ದಿಸಾ ಇಸ್ಕೊಲಾ
ಥಾವ್ನ್ ಪಾಟಿ೦ ಆಯಿಲ್ಯಾ ಉಪ್ರಾ೦ತ್
ಪಯಿಲೆ೦ ಕಾಮ್, ಇಸ್ಕೊಲಾಚೆ೦ ಪೊತೆ೦
ಕೊನ್ಶಾಕ್ ಉಡವ್ನ್ ಹಾತಿ೦ ಪ್ಲಾಸ್ಟಿಕಾಚೆ೦
ಪೊತೆ೦ ಘೆವ್ನ್, ದುಸ್ರ್ಯಾ ದಿಸಾ
ಆಮ್ಚಾ ಸರ್ಗಿ೦ ಆವಯ್ಕ್ ಮಾಳು೦ಕ್
ಜಾಯ್ ಆಸ್ಚಾ ಫುಲಾ೦ಚಿ ಶಿಕಾರಿ.!
ಪೊಟಾಕ್ ಕಾ೦ಯ್ಚ್ ಕಾಯ್ನಾಸ್ತಾನಾ೦, ಆವಯ್ನ್
ದಿಲ್ಲಿ ಚಾ ಸಯ್ತ್ ಪಿಯೆನಾಸ್ತಾ೦
ಆಮ್ಸೊರಾನ್ ಭಾಯ್ರ್ ಸರ್ಚಾ ಆಮ್ಚಿ
ತವಳ್ಚಿ ಹುಮೆದ್ ಆತಾ೦ ಉತ್ರಾನಿ೦
ವರ್ಣು೦ಕ್ ಅಸಾಧ್.! ತಾ೦ಚಾ೦ ಹಾ೦ಚಾ
ಹಿತ್ಲಾನಿ೦ ಭೊ೦ವೊನ್, ಗಾದ್ಯಾ ಮೆರಾನಿ೦ ಚಲೊನ್,
ವಾಳ್ಚೆ ವಾಳ್ ಉತ್ರೊನ್, ಪಾವ್ಸಾಕ್
ಭಿಜೊನ್ ತರೀ ನವ್ಯಾ ನವ್ಯಾ
ರಿತಿಚಿ೦ ಫುಲಾ೦ ತಲಾಸ್ ಕರ್ಚೊ
ಅತ್ರೇಗ್, ತಲಾಸ್ ಕೆಲ್ಲಿ೦ ಫುಲಾ೦
ಶಾಭಿತಾಯೆನ್ ಘರಾ ಹಾಡ್ನ್ ಪಾಡ್
ಜಾಯ್ನಾತ್ಲೆಬರಿ೦ ತೊಡ್ಪ್ಯಾನಿ೦ ಸೊಡವ್ನ್ ದವರ್ನ್, ತಾ೦ತು೦ಯೀ
ಮರಿಯೆಚಾ ಇಮಾಜೆಕ್ ದವರ್ಚೊ ತೊ
ಗುಲೊಬ್ ಆನಿಕೀ ಜಾಗ್ರುತ್ಕಾಯೆನ್ ದವ್ರುನ್,
ದುಸ್ರ್ಯಾ ದಿಸಾ ತಿ೦ ಫುಲಾ೦ ದಾಲಿಯಾನಿಂ ಭರ್ನ್ ಇಸ್ಕೊಲಾಕ್ ಚಲೊನ್
ವೆತಾನಾ, ಇಶ್ಟಾ೦ ಇಶ್ಟಿಣ್ಯಾ೦ ಕಡೆನ್
ತಿ೦ ಫುಲಾ೦ ಎಕ್ಟಾ೦ವ್ಕ್ ಆಮಿ
ಆದ್ಲ್ಯಾ ಸಾ೦ಜೆರ್ ಕೆಲ್ಲೆ ಸಾಹಸ್
ವಾ೦ಟುನ್ ಘೆವ್ನ್, ಆಮ್ಚೆ ಕಡೆ೦
ಆಸ್ಚಿ ತಾ೦ಚೆ ಕಡೆ೦ ನಾಸ್ಚಿ೦
ಫುಲಾ೦ ತಾ೦ಕಾ೦ ದೀವ್ನ್, ಆಮ್ಚೆ
ಕಡೆ೦ ನಾಸ್ಲಿ೦ ತಾ೦ಚೆ ಕಡೆ೦
ಆಸ್ಚಿ೦ ಫುಲಾ೦ ಆಮಿ ಘೆವ್ನ್,
ಸಕ್ಡಾ೦ಚಿ ದಾಲಿ೦ ಸಮಾನ್ ಜಾತಾನಾ
ಆಮಿ ಇಸ್ಕೊಲಾಕ್ ಪಾವ್ತೆಲ್ಯಾ೦ವ್. ಉಪ್ರಾ೦ತ್ ಫುಲಾ೦ ಉಡ೦ವ್ಚೊ ಸ೦ಭ್ರಮ್.!
ಮಾಗಿರ್ ಸುರು ದಿಸ್ಪೊಡ್ತೆ೦ ಇಸ್ಕೊಲಾಚೆ೦
ಲಿಸಾ೦ವ್. ಕಿತ್ಲೆಗೀ ಪಾವ್ಟಿ೦ ನೊವೆನ್ ಜಾಲ್ಯಾಪ್ರಾ೦ತೀ
ಆಮ್ಚಿ ಮತ್ ಆನಿಕೀ ಫುಲಾ೦
ತೊಟಾನಿ೦ಚ್ ಪಾಸಾಯೊ ಮಾರ್ತಾಲಿ. ಫಾಲ್ಯಾ೦
ಕಸ್ಲಿ೦ ಫುಲಾ೦ ಎಕ್ಟಾವ್ಚಿ೦..? ಕೊಣಾಚಾ
ತೊಟಾಕ್ ವೆಚೆ೦..? ಪೆಲ್ಯಾ ಘರ್ಚಾ ತೊಟಾಕ್
ವೆತಾನಾ ತಾ೦ಚೊ ತೊ ಚಾಬ್ಕೊರ್
ಪೆಟೊ ಮುಕಾರ್ ಮೆಳ್ಳೊ ತರ್..??!
ವಯ್ಲ್ಯಾ ಘರ್ಚಾ ತೊಟಾಕ್ ಗೆಲ್ಯಾರ್,
ತಾಣಿ೦ ಥ೦ಯ್ ತಾ೦ಚಾ ಹಾ೦ಡ್ಕೊರ್
ಪಾಡ್ಯಾಕ್ ಭಾ೦ಧುನ್ ಘಾಲಾ೦ ತರ್..?!
ಲಿಸಾ೦ವಾ ಮಧೆ೦ ಅಶೆ೦ ಚಿ೦ತುನ್
ಮತ್ ವಾರ್ಯಾರ್ ಆಸ್ತಾನಾ, ಟಿಚೆರಿಚಾ ನಾಗು ಬೆತಾನ್ ಜಾಯ್ತೆ
ಪಾವ್ಟಿ೦ ಆಮ್ಕಾ೦ ಜಾಗಾಯಿಲ್ಲೆ೦ ಆಸಾ.!
ಕಸಲೆ೦ ಬಾಳ್ಪಣ್ ತೆ೦, ತವಳ್
ಆಮ್ಕಾ೦ ಹೆ೦ ಸರ್ವ್ ಏಕ್
ಖೆಳಾ ಭಾಶೆನ್ ಮನೋರ೦ಜನ್ ದಿತಾಲೆ೦
ತರ್, ಆಜ್ ಹ್ಯಾ ಪ್ರಭುದ್ಧ್
ಪ್ರಾಯೆರ್ ರಾವೊನ್ ಜಿಣ್ಯೆಪಯ್ಣಾಚೆರ್ ಪಾಟಿ೦
ದೀಶ್ಟ್ ಘಾಲ್ತಾನಾ ತವಳ್ ಆಮ್ಕಾ೦ ಕಳಿತ್
ನಾಸ್ತಾ೦ಚ್ ಆಮಿ ಶಿಕುಲ್ಲ್ಯಾ ಲಿಸಾ೦ವಾ೦ಚಿ,
ಅನ್ಭೋಗಾ೦ಚಿ ಝಳಕ್ ಮಾರ್ತಾನಾ ಲೋ೦ವ್
ಉಭಿ ರಾವ್ತಾ. ಫುಲಾ೦ ಫಳಾನಿ೦
ಭರೊನ್ ರಾವುಲ್ಲ್ಯಾ ಪ್ರಕ್ರತೆಚಿ ತಿ ಸೊಭಾಯ್ ಸಾಕುಲ್ಲೊ
ತೊ ಅನ್ಭೋಗ್, ಗಾದ್ಯಾ ಮೆರೊ, ವಾಳ್ಚೆ
ವಾಳ್, ಚಾಬ್ಚೆ ಪೆಟೆ, ಹಾ೦ಡ್ಚೆ
ಪಾಡೆ, ಹಾ೦ಕಾ೦ ಭಿಯೆನಾಸ್ತಾ, ಯಾ
ಭಿ೦ಯಾನ್ ತರೀ ಫುಡ್ ಕರುನ್
ಫುಲಾ೦ ಎಕ್ಟಾಯ್ಜೆಚ್ ಮ್ಹಳ್ಳೆ೦ ಹಟ್, ಕಶ್ಟಾನಿ೦ ಆರಯಿಲ್ಲಿ೦
ಫುಲಾ೦ ತರೀ ಆಮ್ಚಾ ಇಶ್ಟಾ-ಇಶ್ಟಿಣ್ಯಾ೦ಸವೆ೦ ತಿ೦ ವಾ೦ಟುನ್ ಘೆ೦ವ್ಚಿ
ತಿ ಉರ್ಬಾ, ನಾ ಮೊಸೊರ್
ನಾ ಸ್ವಾರ್ಥ್..! ಫೆಸ್ತಾ ದಿಸಾ ತರೀ
ಆಮ್ಚೊ ಸ೦ಭ್ರಮ್ ಸಾ೦ಗ್ಚೊಚ್ ನ್ಹ೦ಯ್,
ಆಸುಲ್ಲ್ಯಾ ಪಯ್ಕಿ೦ ಬರಿ ಮುಸ್ತಾಯ್ಕಿ
ನೆಸೊನ್ ಫುಲಾ೦ ದಾಲ್ಯಾನಿ೦ ಭರುನ್
ಪುರ್ಶಾ೦ವಾರ್ ವೆಚೆ೦, ಮರಿಯೆಕ್ ಹೊಗುಳ್ಸುನ್
ಫುಲಾ೦ ಉಡ೦ವ್ಚೆ೦, ಉಪ್ರಾ೦ತ್ಲ್ಯಾ ಮೀಸ್ ರಜಾರಾಚೆರ್ ಆಮ್ಚೆ
ಗುಮಾನ್ ಚಡ್ ವಸಾನಾತುಲ್ಲೆ೦, ಕಾರಣ್
- ಕೊಬು! ಮೊಟೊ ಆಸಾತ್ ಗೀ,
ಭಾರಿಕ್, ಕಾಳೊಗೀ ಧವೊ.. ಗೋಡ್
ಆಸ್ಲ್ಯಾರ್ ಪುರೊ.. ಕೀಡ್ಯಾರೊ ನ೦ಯ್
ಪುರೊ.. ಮೌರಿಸ್ ಅ೦ಕಲ್ ವಾ೦ಟುಕ್
ರಾವ್ಲ್ಯಾರ್ ಮಸ್ಕಾ ಮಾರ್ನ್ ದೋನ್
ಕಾಣ್ಘೆವೆತ್..!
ಮೀಸ್
ಮುಗ್ಧುನ್ ಘರಾ ಪಾವ್ಲ್ಯಾರ್ ಉಪ್ರಾ೦ತ್
ರಾ೦ದ್ಚೊ ಸ೦ಭ್ರಮ್.. ಆಳ್ವಾಚಿ, ಘೊಸಾಳ್ಯಾಚಿ ಸಾಲ್ ವೊಡ್ಚೆ೦, ವೊರ್ನಾಕ್
ಘಾಲು೦ಕ್ ನಾರ್ಲ್ ಕಾ೦ತ್ಚೊ, ಪೊಣ್ಣಾಕ್
ಘಾಲು೦ಕ್ ಬೆವಾಚೊ ಪಾಲೊ ಸೊಧುನ್
ಹಾಡ್ಚೊ, ನಿಸ್ತ್ಯಾ೦ಕ್ ಘಾಲು೦ಕ್ ಆ೦ಬಾಡೆ ಧಾಡಾ೦ವ್ಚೆ೦,
ಕನ್ಶಾ೦ಚಿ ಸರ್ಲಾ೦ ಸೊಲ್ಚಿ೦, ಅಸಲಿ೦
ಲಾಲಾನ್ ಕಾಮಾ೦ ಆಮ್ಚಾ ಭುರ್ಗ್ಯಾ೦ಚಾ
ವಾ೦ಟ್ಯಾಕ್ ಪಡ್ತಾಲಿ೦. ಕಸಲಿ ಉರ್ಬಾ ಫೆಸ್ತಾಚೆ೦
ರಾ೦ದಾಪ್ ಘರ್ಚಾ ಸಕ್ದಾನಿ೦ ಮೆಳೊನ್
ಸಾ೦ಗಾತಾ ರಾ೦ದ್ಚಿ.! ಜೆವ್ಣಾಕ್ ನಿಸ್ತಿ೦ ತರೀ ಕಿತ್ಲಿ೦..
ಕಾ೦ಯ್ ನಾ ಮಳ್ಯಾರೀ ಧಾ
ಬಾರಾ..! ಜೆವ್ಣಾ ಉಪ್ರಾ೦ತ್ ವೋರ್ನ್
ಶಿರೊ೦ತೆಕ್ ಪಡಾಜೆ ತರ್, ಕೊಬು
ಆನಿ ಕೊಯ್ತಿ ಹಾತಾಕ್ ಮೆಳಾಜೆ
ತರ್ ವಾಡುಲ್ಲೆ೦ ಪುಸುನ್ ಜೆವಿಜೆ, ಸಗ್ಳಿ೦
ನಿಸ್ತಿ೦ ತೊ೦ಡ್ಲಾಯ್ಜೆಚ್... ಸಗ್ಳೆ೦ಯೀ ರುಚ್ತಾಲೆ೦, ಕಾರೆತೆ೦ ಏಕ್ ಸೊಡ್ನ್.!
ಹರ್ಶೆ೦ ವಾಡ್ಲ್ಯಾರ್ ಖಾ೦ಯ್ನಾ೦ತ್ ಮ್ಹಣ್ ತ್ಯಾ ದಿಸಾ
ಆಮ್ಚಾ ಭುರ್ಗ್ಯಾ೦ಚಾ ಶಿರೊ೦ತೆಚೆರ್ ಇಲ್ಲೆ೦ ಚಡುಚ್ ವಾಡ್ತಾಲೆ.
ಆಮಿ ತರೀ ಕಶ್ಟಾನಿ೦ ಉಪ್ರಾ೦ತ್
ಮೆಳ್ಚಾ ಗೊಡ್ಸಾಣೆಕ್ ಅಶೆವ್ನ್ ತಿ ಕೊಡ್ಸಾಣ್
ಸೊಸ್ತೆಲ್ಯಾ೦ವ್.! ಜೆವಾಣ್ ಮುಗ್ದಾಲೆ೦ ತರ್
ಮಾಗಿರ್ ಸುರು ಕೊಬಾಚೆರ್ ಆಮ್ಚಿ
ಧಾಡ್. ಸೆಜಾರ್ಚಿ೦ ಅಕ್ರಿಸ್ತಾ೦ವ್ ಕುಟ್ಮಾಚಿ೦ ಮಾಗಿರ್ ಜೆವ್ಣಾಕ್ ಆಯ್ಲ್ಯಾರ್
ತಾ೦ಕಾ೦ ಸಾ೦ಭಾಳ್ಚಿ ಜವಾಬ್ದಾರಿ ಆಮ್ಚಿ ನ್ಹ೦ಯ್..! ತೊ
ಸಗ್ಳೊ ದೀಸ್, ನೊವೆನಾಚೊ ತೊ
ಸಗ್ಳೊ ಹಫ್ತೊ ಕಸೊ ಪಾಶಾರ್
ಜಾತಾಲೊ ತೆ೦ ಕಳಿತ್ ಜಾಯ್ನಾತ್ಲೆ೦
ತರೀ ಫೆಸ್ತ್ ಮುಗ್ಧಾಲ್ಯಾ ಉಪ್ರಾ೦ತ್
ಯೆ೦ವ್ಚಾ ವರ್ಸಾಚಾ ಫೆಸ್ತಾಕ್ ರಾಕೊನ್
ರಾವಾಶೆ೦ ಕರ್ತಾಲೆ೦ ತೆ೦ ಖ೦ಡಿತ್..!
ಹಾವೆ೦
ಪಳೆಲ್ಲ್ಯಾ ತ್ಯಾ ಪಾಟ್ಲ್ಯಾ ವೀಸ್
ವರ್ಸಾ೦ನಿ ಅಮ್ಚ್ಯಾ ಸಮಾಜೆಚಿ ಪರಿಗತ್
ಅಶಿಯೀ ಬದಲ್ಲ್ಯಾಗೀ, ಹಾವೆ೦ ವೀಸ್ ವರ್ಸಾದಿ೦
ಆಸುಲ್ಲೊ ಸ೦ಸಾರ್ ಹೊಚ್ ಗಾಯ್
ಅಶೆ೦ಯೀ ಚಿ೦ತುನ್ ಸೊಡ್ತಾ೦ ಥೊಡೆಪಾವ್ಟಿ೦..!
ಆಧುನಿಕ್ ಮಾಧ್ಯಾಮಾ೦ಚಾ ಪ್ರಭಾವಾಕ್ ವಿಪ್ರೀತ್ ಮ್ಹಣ್ಚೆತಿತ್ಲೆ೦ ವೊಳ್ಸೊನ್ ಗೆಲ್ಲ್ಯಾ ಆಯ್ಚ್ಯಾ ಸಮಾಜೆ೦ತ್ ಕುಟ್ಮಾಚೆ೦
ಫೆಸ್ತ್ ಆಪ್ಲೊ ಉದ್ದೇಶ್ ಉರೊವ್ನ್
ಕಾಣ್ಘೆ೦ವ್ಚಾ೦ತ್ ಸಲ್ವಲಾ೦ಗೀ..? ಅಸೊ ದುಬಾವ್ ಮಾರ್ತಾ
ಮಾಕಾ. ಎಕಾ ಘರಾ ಪ೦ದ್ರಾ-ಸೊಳಾ ಜಣಾ೦ ಆಸುಲ್ಲಿ೦
ಕುಟ್ಮಾ೦ ಚಾಚಾರ್-ಪಾ೦ಪಾ೦ಚ್ ಕುಟ್ಮಾ೦
ಜಾವ್ನ್ ಎಕೇಕಾ ಘರಾ೦ತ್ ತೆಗಾ೦-ಚವ್ಗಾನಿ೦ ವಸ್ತಿ ಕರ್ಚಾ ಆಯ್ಚಾ
ಸಮಾಜೆ೦ತ್, ಬೊಟಾ ತುದಿಯೆನ್ ಬುತಾ೦ವ್
ದಾ೦ಬುನ್ ಸಾತ್ ದರ್ಯಾ೦ ಪಯ್ಸ್
ಆಸ್ಚಾ ಗಾ೦ವಾ೦ತ್ ಕಿತೆ೦ ಘಡ್ತಾ ಮ್ಹಣ್
ಖಿಣಾನ್ ಜಾಣಾ೦ ಜಾ೦ವ್ಚ್ಯೊ ಆಧುನಿಕ್
ಸವ್ಲತ್ಯೊ ಅಸ್ಚ್ಯಾ, ತರೀ ಕುಶಿಲ್ಯಾ ಘರಾ೦ತ್
ಕೊಣೀ ಮರೊನ್ ಪಡ್ಲ್ಯಾರೀ ಖಬ್ರೆರ್
ನಾಸ್ಚ್ಯಾ ಪ್ರಸ್ತುತ್ ಪರಿಗತೆ೦ತ್ ಮೊ೦ತಿ ಫೆಸ್ತ್ ನಿಜಾಕೀ
ಕುಟ್ಮಾಚೆ೦ ಫೆಸ್ತ್ ಜಾವ್ನ್ ಉರ್ಲಾ೦ಗೀ..?
ದುಬಾವ್ ಮಾಕಾ.! ಆಯ್ಚ್ಯಾ ಸಮಾಜೆ೦ತ್
ಮೊ೦ತಿ ಫೆಸ್ತಾಚೊ ಮಹತ್ವ್ ಅಸೊಯೀ ದೆ೦ವೊನ್
ಗೆಲಾಕೀ, ಆಯ್ಚ್ಯಾ ಪಿಳ್ಗೆಕಡೆನ್ ಮೊ೦ತಿ
ಫೆಸ್ತ್, ಕುಟಾಚೆ೦ ಫೆಸ್ತ್, ಅಶೆ೦
ಮ್ಹಳೆ೦ ತರ್ ತಾ೦ಚಾ ಇ೦ಗ್ಲಿಶ್
ಪಿ೦ತುರಾ೦ತ್ ಯೆ೦ವ್ಚಾ Alien ಕ್ ಪಳೆಲ್ಲ್ಯಾ
ಭಾಶೆನ್ ದೊಳೆ ವಾಟಾರ್ನ್ ತುಮ್ಕಾ೦
ಪಳೆತೆಲೆ, ಖ೦ಡಿತ್. ತಾ೦ಕಾ ಸಮ್ಜಾಜೆ
ತರ್, "ರಾ೦ದ್ವಯ್ ಜೆ೦ವ್ಚೆ೦ ಫೆಸ್ತ್" ಮ್ಹಣಾಜೆ..! ಫೆಸ್ತ್ ಮ್ಹಳ್ಳ್ಯಾಫರಾ ಆದ್ಲ್ಯಾ
ಕಾಳಾಚಾ ನೆಣ್ತ್ಯಾ೦ಚಾ ತೊ೦ಡಾರ್ ಪರ್ಜಳ್ಚಾ ಪ್ರಕಾಸಾ
ಬದ್ಲಾಕ್ ಹಾ೦ಚಾ ದೊಳ್ಯಾನಿ೦ "ಎಬ್ಬೇ
ತೇ೦ಗೀ" ಮ್ಹಳ್ಳ್ಯಾ ಜಿನ್ಸಾಚೊ ಕಾ೦ಟಾಳೊ ದಿಸ್ಲೊ ತರ್
ಆಜಾಪ್ನಾಕಾತ್.!
ತಶೆ೦
ಮ್ಹಣ್, ಚೂಕ್ ತ್ಯಾ ನೆಣ್ತ್ಯಾ೦ಚಿ
ಖ೦ಡಿತ್ ನ್ಹ೦ಯ್, ಆಮ್ಕಾ೦ ಪುರ್ವಜಾ೦
ಥಾವ್ನ್ ಮೆಳುಲ್ಲೆ೦ ದಾಯ್ಜ್ ತಾ೦ಕಾ೦ ಪಾಶರ್
ಕರ್ನಾತ್ಲ್ಯಾ, ಜಿಣಿ ಏಕ್ Race ಕಶೆ೦
ಘೆವುನ್ ತಾ೦ತು೦ ಜಿಕ್ಚೊ ಘೊಡೊ
ಆಪ್ಣಾಚೊ ಭುರ್ಗೊ/ಭುರ್ಗೆ೦ ಜಾಯ್ಜಯ್
ಮ್ಹಳ್ಳ್ಯಾ ಆಬ್ಲೆಸಾನ್ ತಾ೦ಕಾ೦ ಹ್ಯಾ ಸರ್ವಾ
ಥಾವ್ನ್ ಪಯ್ಸ್ ದವರ್ ಲ್ಲ್ಯ್ಯಾ
ಆಮಾ ಜಾಣ್ತ್ಯಾ೦ಚಿ.! ಆಧುನಿಕ್ ಜೀವನ್ ಶೈಲೆಕ್
ಆಮಿ ಅಶೆ೦ಯೀ ವೊಳ್ಸೊನ್ ಗೆಲ್ಯಾ೦ವ್
ಕೀ, ಜಿಣ್ಯೆ ಮೊಲಾ೦ ಶಿಕ೦ವ್ಚಾ
ತ್ಯಾ ಅದ್ಲ್ಯಾ ಶಿಕ್ಪಾ೦ಪ್ರಾಸ್, ಆಮ್ಚಾ
ಭುರ್ಗ್ಯಾ೦ಕ್ ಕೊ೦ಪಿಟಿಶನಾಕ್ ತಯಾರ್ ಕರ್ಚಿ ಆಯ್ಚಿ
ಶಿಕ್ಪಾ ವೆವಸ್ತಾ ಆಮಿ ದೊಳೆ
ಧಾ೦ಪುನ್ ಆಪ್ಣಾವ್ನ್ ಘೆತ್ಲ್ಯಾ. ಸಕಾಳಿ೦ ಉಟ್ಲಿ೦ ತರ್
ಟಿಪ್ ಟೊಪ್ ನೆಸವ್ನ್, ಕೊ೦ಪ್ಲೆನ್
ಆನಿ ಮ್ಯಾಗಿ ದೀವ್ನ್ ತಾ೦ಕಾ೦
ಇಸ್ಕೊಲಾಚಾ ವ್ಯಾನಾರ್ ಚಡಯ್ಲೆ೦ ತರ್, ಇಸ್ಕೊಲಾಚೆ೦
ಶಿಕಾಪ್ ಸ೦ಪವ್ನ್, ಮುಗ್ಧುನ್, ಟ್ಯೂಶನ್ ಸ೦ಪವ್ನ್ ಕಾಳೊಕ್
ಪಡ್ಲ್ಯಾ ಉಪ್ರಾ೦ತ್ ತ್ಯಾಚ್ ವ್ಯಾನಾರ್ ಘರಾ
ಪಾಟಿ೦ ಪಾಟಿ೦ ಯೇವ್ನ್ ಟಿ.ವಿ ಚೆರ್ ಕಾರ್ಟೂನ್
ಪಳೆವ್ನ್ ನಿದ್ಲಿ೦ ತರ್ ತಾ೦ಚೊ
ದೀಸ್ ಸ೦ಪ್ಲೊ. ಆತಾ೦ ಕೊಣಾಕ್
ದುರ್ಸೊ೦ಚೆ ಸಾ೦ಗಾ..? ಆಮ್ಚಿ ಭುರ್ಗಿ೦ ಆಜ್
ಜಿಯೆತಾತ್ ತಿ ಜಿಣಿ, ತಾ೦ಚಿ
ಜಿಣ್ಯೆ ಶೈಲಿ ಕಾ೦ಯ್ ತಾ೦ಚಿ
ಸ್ವ೦ತ್ ವಿ೦ಚವ್ನ್ ಯಾ Race ತ್ ಮುಕಾರ್
ರಾ೦ವ್ಚಾ, ಆಮ್ಚೆ೦ ಮಟ್ಟ್ ಸಾ೦ಭಾಳ್ಚಾ
ಆಬ್ಲೆಸಾನ್ ಆಮಿ ಜಾವ್ನ್ ತಾ೦ಚೆರ್
ಥಾಪುಲ್ಲಿ..? "ಇಸ್ಕೊಲಾಕ್ ವರು೦ಕ್ ಫುಲಾ೦ ಜಾಯ್
ಮಮ್ಮಾ, ಪೆಲ್ಯಾ ಘರ್ಚಾ ಹಿತ್ಲಾಕ್
ವಚೊನ್ ಹಾಡಿಜೆಗೀ..?" ಮಳ್ಯಾರ್; ಆಯ್ಚ್ಯೊ ಆವಯೊ ಮ್ಹಣ್ತಾತ್,
"ಪುತಾ ತುಜೆ೦ ಲಿಸಾ೦ವ್ ಪಳೆ,
ಯೆ೦ವ್ಚಾ ಹಪ್ತ್ಯಾ೦ತ್ Exam ಆಸಾ, ಬಸೊನ್ ಬರೆ೦
ಕರ್ನ್ ಶಿಕ್. ಒಫಿಸಾ ಥಾವ್ನ್
ಪಾಟಿ೦ ಯೆತಾನಾ ಆ೦ಗ್ಡಿಥಾವ್ನ್ ಫುಲಾ೦
ಹಾಡು೦ಕ್ ಡ್ಯಾಡಿಲಾಗಿ೦ ಸಾ೦ಗ್ಲಾ೦ ಹಾವೆ೦.!" ಅರ್ಥ್ ಕಿತೆ೦..? 'ಆಮ್ಚೆಲಾಗಿ೦
ಆಜ್ ಪಯ್ಶೆ ಆಸಾತ್. ಬಜಾರಾ೦ತ್
ಜಾಯ್ ಕಿತೆ೦ ತೆ೦, ಫಾವೊತೆ೦
ಮೋಲ್ ದಿಲ್ಯಾರ್ ಮೆಳ್ತಾ. ಮೋಲ್ ದಿಲ್ಯಾರ್
ಬಜಾರಾ೦ತ್ ಮೆಳ್ಚಿ ವಸ್ತ್ ಸೊಧುನ್
ವಚೊನ್ ವೇಳ್ ವಿಭಾಡ್ಚಾ೦ತ್ ಕಾ೦ಯ್
ಅರ್ಥ್ ಆಸಾ..?!' ಹಿ ಆಮ್ಚಿ ಮನಾಸ್ಥಿತಿ..!
ವೇಳ್ ಆಮ್ಕಾ೦ ಆಜ್ ಪಯ್ಶ್ಯಾ೦ಚಾಕೀ
ಮೊಲಾದಿಕ್, ಆನಿ ಆಮ್ಕಾ೦ ಲಾಭ್
ಜಾ೦ವ್ಚಾ ಸ೦ಗ್ತಿ೦ಖಾತಿರ್ ಮಾತ್ರ್ ಆಮಿ ತೊ
ಖರ್ಸಿತಾ೦ವ್.! ಆತಾ೦ ಸಾ೦ಗಾ ಮಾಕಾ
- ಪುರ್ಶಾ೦ವಾರ್ ಆಮಿ ಭಾರಿಚ್ ಹುಮೆದಿನ್
ಗಾಯ್ತಾ೦ವ್, ವೊಡ್ತಾ ಹಿತ್ಲಾನಿ೦ ಸೊಧ್ಯಾ೦,
ಫುಲಾ೦ ಎಕ್ಟಾ೦ಯ್ ಕರ್ಯಾ೦, ತಾ೦ಚೊ ಏಕ್
ಮುಕುಟ್ ಗು೦ತ್ಯಾ೦ ಆನಿ ಮಾಯೆಕ್ ದಿವ್ಯಾ೦
- ಆಮ್ಚಾ ಉತ್ರಾ೦ಕ್ ಆನಿ ಕ್ರತ್ಯಾ೦ಕ್ ಕಾ೦ಯ್
ತಾಳ್ ಪಡ್ತಾ.?! ಇತ್ಲ್ಯಾಕೀ, ಮರಿಯೆ ಮಾಯೆಕ್ ಕಿತೆ೦
ಫುಲಾ೦ಚೊ ಹೊರ್ಬೊಸ್ ದೆಕುನ್ ಇಗರ್ಜ್ ಮಾತೆನ್
ಭುರ್ಗ್ಯಾನಿ೦ ತೊಟಾ ಹಿತ್ಲಾನಿ೦ ಸೊಧುನ್
ವಚೊನ್ ವಿವಿಧ್ ರಿತಿಚಿ೦ ಫುಲಾ೦
ಎಕ್ಟಾವ್ನ್ ಮರಿಯೆಕ್ ಭೆಟಯ್ಜೆ ಮ್ಹಳ್ಳೊ
ಕಾಯ್ದೊ ದಿಲೊ..? ಜರ್ ತಶೆ೦
ವಯ್ ತರ್, ಕಿತೆ೦ ಮರಿಯೆಕ್
ಜಾಯ್ ತಿತ್ಲಿ೦ ಫುಲಾ೦ ಮೊಲಾಕ್
ಘೆ೦ವ್ಚಿ ತಾ೦ಕ್ ಆಮ್ಚಾ ಗಿರೇಸ್ತ್
ಇಗರ್ಜ್ ಮಾತೆಕ್ ನಾ೦ ದೆಕುನ್,
ಆಮ್ಚ್ಯಾ ಭುರ್ಗ್ಯಾ೦ಚೆ ಡ್ಯಾಡಿ ತಿ೦ ಮೊಲಾಕ್
ಘೆವ್ನ್ ಹಾಡು೦ದಿ ಮ್ಹಣ್ಚಾ ಮತ್ಲಬಾನ್
ಹೊ ಕಾಯ್ದೊ ಆಮ್ಕಾ೦ ದಿಲೊ..?!
ಯಾ - ಆಮ್ಚಾ ಭುರ್ಗ್ಯಾನಿ೦ ಪ್ರಕ್ರತೆಸವೆ೦
ಭರ್ಸಾಜೆ, ಸೊಭಾಯೆನ್ ಭರೊನ್ ವೊಮ್ತೊ೦ಚಾ ಪ್ರಕ್ರತೆಚಾ
ಆ೦ಗ್ಣಾ೦ತ್ ತಾಣಿ೦ ಉಡ್ಕಾಣಾ೦ ಘಾಲಿಜೆ,
ರುಕಾ೦ ಝಡಾ೦ಚಿ, ಫುಲಾ೦ ಫಳಾ೦ಚಿ
ವಳಕ್ ತಾ೦ಕಾ ಮೆಳಾಜೆ, ಪ್ರಕ್ರತೆಚಾ
ಹರ್ ರಚ್ನೆ೦ತ್ ಏಕ್ ಲಿಪ್ತೆ೦ ಲಿಸಾ೦ವ್
ಆಸಾ ಆನಿ ತೆ೦ ಪಾಟ್
ಬುಕಾನಿ೦ ವಾಚು೦ಕ್ ಮೆಳಾನಾ, ಭುರ್ಗ್ಯಾನಿ೦
ತೆ೦ ಖುದ್ ಆನ್ಭೋಗಾನ್ ಶಿಕಾಜೆ,
ಆಪ್ಣಾಕ್ ಜಾಯ್ ಜಾಲ್ಲಿ೦ ಫುಲಾ೦
ತಾಣಿ೦ ಜಾವ್ನ್ ವಾ೦ವ್ಟ್ ಕಾಡ್ನ್
ವಿ೦ಚುನ್ ಹಾಡ್ಚಾ ಮಾರಿಫಾತ್ ತಾಣಿ೦
ಸ್ವಾವಲ೦ಬಿ ಜಾಯ್ಜಯ್, ನಾಜುಕ್ ಫುಲಾ೦ ಖು೦ಟಾನಾ
ಕಾ೦ಟ್ಯಾನಿ೦ ತಾ೦ಕಾ೦ ತೊಪಿಜೆ, ಗಾದ್ಯಾ
ಮೆರೆನ್ ಚಲೊನ್ ನಿಸ್ರೊನ್ ಪಡೊನ್
ಉಟೊನ್ ಪರ್ತ್ಯಾನ್ ಚಲೊ೦ಕ್ ಶಿಕಾಜೆ. ಅಶೆ೦
ಆಮ್ಕಾ೦ ಜಾಯ್ ಜಾಲ್ಲೆ೦ ಜೋಡ್ನ್
ಘೆಜೆ ತರ್ ಕಶ್ಟ್, ಸಾಕ್ರಿಫಿಸ್
ಕರಿಜೆ ಮ್ಹಳ್ಳೆ೦ ಲಿಸಾ೦ವ್ ಮತ್ ವಾಡೊನ್
ವಿಕಾಸುನ್ ಯೆ೦ವ್ಚಾ ತ್ಯಾ ಪ್ರಾಯೆರ್
ತಾ೦ಚಾ ಮತಿ೦ತ್ ಖ೦ಚಯ್ಜೆ, ಸಾ೦ಗಾತಿ ಭುರ್ಗ್ಯಾ೦ಸ೦ಗಿ ಗ್ರೇಸ್ತ್ ಕಾಯ್ ದುಬ್ಳಿಕಾಯ್, ಲಾನ್ ವ್ಹಡ್ ಮ್ಹಳ್ಳೊ
ಫರಕ್ ನಾಸ್ತಾ೦ ಭರ್ಸಾಜೆ, ಸ್ವಾರ್ಥ್,
ಮೊಸೊರ್ ಸಾ೦ಡುನ್ ಎಕಾಮೆಕಾ ವಾ೦ಟುನ್
ಘೆ೦ವ್ಚೊ ಮನೋಭಾವ್ ಲಾನ್ಪಾರುಚ್ ತಾಣಿ೦
ಆಪ್ಣಾಯ್ಜೆ - ಅಸಲೊ ಏಕ್ ಲಿಪ್ತೊ
ಉದ್ದೇಸ್ ಇಗರ್ಜ್ ಮಾತೆಕ್ ಆಸುಲ್ಲೊ
ದೆಕುನ್ ತಿಣೆ೦ ಹೊ ಕಾಯ್ದೊ
ದಿಲೊ.? ಚಿ೦ತುನ್ ಪಳೆಜೆ ಜಾಲ್ಲೊ
ವೇಳ್ ಹೊ.!
ಆಜ್
ಆಮ್ಚಾ ಘರಾನಿ೦ ಮೊ೦ತಿ ಫೆಸ್ತ್
ಆದ್ಲೆಪರಿ೦ ಸ೦ಭ್ರಮ್ಚಿ ತಿ ಹುಮೆದ್, ಉರ್ಬಾ
ಉರ್ಲ್ಯಾ.? ನಾ..! ಮಿಸಾಕ್ ತರೀ
ಭಾರಿಚ್ ಸು೦ರ್ಗಾರಾರ್ ವೆತಾ೦ವ್, ಪುರ್ಶಾ೦ವ್ ಕಾಡ್ತಾ೦ವ್, ಕೊಯರಾಚಾ ಘರ್ಜವ್ಣೆಕ್ ಆಮ್ಚೊಯೀ
ತಾಳೊ ಮೆಳವನ್ ಕ೦ತಾರಾ೦ ಗಾಯ್ತಾ೦ವ್,
ಮಿಸಾಚಾ ಲಿತುರ್ಜಿ೦ತ್ ಸಯ್ತ್ ಆಮ್ಚೊ ವಾ೦ಟೊ
ಆಸ್ತಾ,! ಪುಣ್ ಮೊ೦ತಿ ಫೆಸ್ತಾಚೊ
ಉದ್ದೇಸ್ ಇತ್ಲೊಚ್..? ವಯ್ ತರ್ ತ್ಯಾ
ಫೆಸ್ತಾಕ್ ಕುಟ್ಮಾಚೆ೦ ಫೆಸ್ತ್ ಮ್ಹಣ್ಚಾ೦ತ್ ಮತ್ಲಬ್
ಕಿತೆ೦..? ಮೀಸ್ ಮುಗ್ಧುನ್ ಘರಾ
ಗೆಲ್ಯಾ೦ವ್ ತರ್, ನಾ ತಿ
ಆದ್ಲಿ, ಸಕ್ಡಾನಿ೦ ಸಾ೦ಗಾತಾ ಮೆಳೊನ್ ರಾ೦ದುನ್
ಜೆ೦ವ್ಚಿ ಹುಮೆದ್. ಘರಾ ಪಾವುಲ್ಲೆ೦ಚ್,
ಮೊಬೈಲಾರ್ ಎಸ್ಸೆಮ್ಮೆಸ್ ಟೈಪ್ ಕರ್ನ್ ಸಗ್ಳ್ಯಾ೦ಕ್
ಧಾಡ್ಲೆ೦, ಥೊಡ್ಯಾ೦ಕ್ ಫೋನ್ ಕರುನ್ ವಿಶ್
ಕೆಲೆ೦ ಉಪ್ರಾ೦ತ್ ಕಾರಾಚೆರ್ ಬಸೊನ್ ಭೊ೦ವ್ಡೆಕ್ ಗೆಲ್ಲಿ೦,
ದನ್ಪಾರಾ೦ ಪಿಜ್ಜಾ ಹಟ್, ಕೆ.ಎಫ್.ಸಿ, ನಾ
ತರ್ ಮೆಕ್ ಡೊನಾಲ್ಡ್.. ಭುರ್ಗ್ಯಾ೦ಸಮೇತ್
ರಿಗ್ಲ್ಯಾ೦ವ್ ತರ್ ಫೆಸ್ತಾಚೆ೦ "ಜೆವಾಣ್"
ಸ೦ಪವ್ನ್ ಮಾಗಿರ್ ಮೊಲಾನಿ೦ ಶೊಪಿ೦ಗ್,
ಪಾರ್ಕಾ೦ತ್ ಏಕ್ ರಾ೦ವ್ಡ್ ಭೊ೦ವೊನ್
ಘರಾ ಪಾವ್ಲ್ಯಾ೦ವ್ ತರ್ ದೀಸ್ ಸ೦ಪ್ಲೊ,
ಸವೆ೦ ಫೆಸ್ತ್ ಯೀ.! ಕೊಣೆ೦
ಘರಾ ರಾ೦ದುನ್ ಮೊರ್ಚೆ೦..? ರಾ೦ದ್ಲ್ಯಾರೀ
ರಾ೦ದ್ವಾಯ್, ಖಾ೦ವ್ಚಿ ಕೊಣೆ೦..? ಮೋಲ್
ದಿಲ್ಯಾರ್ ಸಗ್ಳೆ೦ ಮೆಳ್ತಾ, ಎಕಾ
ದಿಸಾಚೆ೦ Outing ಸಯ್ತ್ ಜಾತಾ, ಭೆಶ್ಟೆ೦
ವಾ೦ವ್ಟ್ ಕಿತ್ಯಾಕ್..? ಕೊಣೆ೦ ಕಿತ್ಲೆ೦ ನೆಗಾರ್ಲ್ಯಾರೀ
ಮ೦ಗ್ಳುರ್ಚಾ ಅರ್ವಾಸ್ ಚಡ್ ಕುಟ್ಮಾಣಿ೦
ಹಿ ಪರಿಗತ್ ಆಸಾ, ಹೆ೦
ಹಾ೦ವ್ ಧಯ್ರಾನ್ ಸಾ೦ಗ್ತಾ೦.! ಹಳ್ಳೆನಿ೦
ತರೀ, ಆಪಾಪ್ಲ್ಯಾ ಮ್ಹಾಲ್ ಘರಾ ಸಕ್ಡಾನಿ೦
ಸಾ೦ಗಾತಾ ಮೆಳೊನ್ ನವೆ೦ ಜೆ೦ವ್ಚಿ
ರಿವಾಜ್ ಥೊಡ್ಯಾ ವಾ೦ಟ್ಯಾಕ್ ತರೀ
ಪಾಳ್ತಾತ್, ಪುಣ್ ಶೆರಾ೦ಚಾ ಮಟ್ಟಾಕ್
ತೆ೦ಚ್ ಕೆ.ಎಫ್.ಸಿ
ಆನಿ ಸಿಟಿ ಸೆ೦ಟರ್..!
ಪರಿಗತ್
ಅಶಿಚ್ ಮುಕಾರತ್ ತರ್, ಮುಕಾರಿ೦
ಏಕ್ ದೀಸ್ ಹೆ೦ ಫೆಸ್ತ್
ಯೀ ಆಪ್ಲೆ೦ ಮೋಲ್ ಹೊಗ್ಡಾವ್ನ್
ಘೆವ್ನ್ ಧಾ೦ ವಯ್ರ್ ಏಕ್
ಇಕ್ರಾ ಮಳ್ಳೆಪರಿ೦ "ನಾಮ್ ಕೇ ವಾಸ್ತೆ"
ಜಾ೦ವ್ಚಾ೦ತ್ ದುಬಾವ್ ನಾ. ತ್ಯಾ
ಭಿತರ್ ಆಮ್ಚಿ ಭ್ರಮಿದ್ ಸುಟೊನ್
ಆಮ್ಚಾ ಸ೦ಸಾರಾ೦ತ್ಲೆ೦ ಭಾಯ್ರ್ ಯೇವ್ನ್, ಆಮಿ
ಸುದ್ರೊನ್ ಆಮ್ಚಾ ಭುರ್ಗ್ಯಾ೦ಕ್ ಸಾರ್ಕೊ
ರಾಸ್ತೊ ದಾಕಯ್ಲೊ ತರ್, ಪುರ್ವಜಾ೦ಥಾವ್ನ್
ಆಯಿಲ್ಲಿ ಹಿ ಆಪುರ್ಬಾಯೆಚ್ಯೊ ರಿವಾಜ್ಯೊ
ಅಟಾಪ್ಲೆಲಿ ಪರಬ್ ಮುಕ್ಲ್ಯಾ ಪಿಳ್ಗೆಕ್
ಪಾವ್ತೆಲಿ. ನಾ ತರ್ - ಆತಾ೦ಚ್
ಥೊಡ್ಯಾ ಫಿರ್ಗಾಜಾನಿ೦ ಕಣ್ಶಾ೦ಕ್ ತತ್ವಾರ್ ಆಸಾ, ಮೊಲಾಕ್
ದೀವ್ನ್ ಕಣ್ಶೊ ಹಾಡ್ಚೊ ಪಡ್ತಾತ್,
ಭುರ್ಗ್ಯಾ೦ಕ್ ಫುಲಾ೦ ಮೊಲಾಚಿ೦ ಘೆವ್ನ್
ಹಾಡ್ನ್ ದಿತೆ ಆಸಾ೦ವ್, ಮುಕಾರ್
ಆಮ್ಚಾ ಇಗರ್ಜಾನಿ೦ ಪ್ಲಾಸ್ಟಿಕಾಚೊ ಕಣ್ಶೊ ವಾ೦ಟ್ಚೊ ಪಡ್ತೆಲ್ಯೊ
ಆನಿ ಆಮ್ಚಾ ಭುರ್ಗ್ಯಾನಿ೦ ಸಯ್ತ್
ಪ್ಲಾಸ್ಟಿಕಾಚಿ ಫುಲಾ೦ ವರ್ಚಿ೦ ಪಡ್ತೆಲಿ೦.
ಪ್ಲಾಸ್ಟಿಕಾಚಿ೦
ಫುಲಾ೦ ಆನಿ ಕನ್ಶೊ ವಾಪಾರ್ಲ್ಯೊ
ತರ್ ಮುಕ್ಲ್ಯಾ ವರ್ಸಾ ತ್ಯೊ ಕರ್ನ್
ಖರ್ಚ್ ಉರವ್ಯೆತ್. ಮಾಗಿರ್ ಆಮ್ಚಾ ಮೊ೦ತಿ
ಫೆಸ್ತಾ೦ತ್ ಫರ್ಮಳ್ ಆಸ್ಚೊ ನಾ,
ಕೊಡ್ಸಾಣ್ ಆಸ್ಚಿ ನಾ, ಗೊಡ್ಸಾಣ್
ಸಯ್ತ್.!
(ಹೆಂ ಲೇಖನ್ ದಿರ್ವೆಂ ಪತ್ರಾಚಾ ಸಪ್ತೆಂಬರ್ 2013 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)
