ಪೋಟ್ ಭರ್ನ್ ಪಾತೊಳ್ಯೊ ಖಾವ್ಯೆತ್ ಮ್ಹಣ್ ಆಶೆವ್ನ್ ಶಕ್ತಿನಗರ ಜಂಕ್ಷನಾರ್ ರಾವೊನ್ ಬೊಬಾಟುನ್ ಆಸ್ಲೆಲ್ಯಾ ಇಂಟ್ರ್ಯೂ ಬಾಬಣ್ಣಾನ್ ಆಪ್ಣಾಕ್ ಜಿಲ್ಲಿಬಾಯೆಚ್ಯಾ ಹಾತಾಂತ್ ಪಾಟ್ ಫುಟ್ತಾಸರ್ ಮಾರ್ ಖಾಂವ್ಕ್ ಮೆಳ್ತೆಲೆಂ ಮ್ಹಣ್ ಸ್ವಪ್ಣಾಂತೀ ಚಿಂತುಂಕ್ ನಾತ್'ಲ್ಲೆಂ. ಆಂಬ್ಯುಲೆನ್ಸ್ ಯೆಂವ್ಚ್ಯಾ ಪಯ್ಲೆಂ ಕಶೆಂ ಪುಣೀ ಕರ್ನ್ ಜಿಲ್ಲಿಬಾಯೆಚ್ಯಾ ಹಾಂತಾತ್ಲೊ ಚುಕಾರಿ ಮಾರ್ನ್ ಧಾಂವೊನ್ ಮೆಳ್'ಲ್ಲ್ಯಾ ಬಸ್ಸಾರ್ ಚಡ್'ಲ್ಲೊ ತೊ ಬೈತುರ್ಲಿ ದೆಂವೊನ್, ಸದಾಂ ವೆಚ್ಯಾ ಸುರೆಚ್ಯಾ ಗಡಂಗಾಕ್ ರಿಗ್'ಲ್ಲೊ ಆಪ್ಲಿ ಕುಜಿಲಿ ಘೆವುನ್.
ಹ್ಯಾ ದಿಸಾನಿಂ ಆಪ್ಣೆಂ ಕಿತೆಂ ಕೆಲ್ಯಾರೀ ಉಲ್ಟಾಚ್ ಜಾತಾ, ಏಕ್ ಕರುಂಕ್ ಗೆಲ್ಯಾರ್ ಆನ್ಯೇಕ್ ಜಾತಾ, ಮ್ಹಜೆ ಗ್ರಹಚಾರ್'ಚ್ ಸಾರ್ಕೆ ನಾಂತ್... ಮ್ಹಣ್ ಚಿಂತುನ್ ಚಿಂತುನ್ ತಕ್ಲಿ ಪೂರಾ ವಿರಾರ್ ಜಾವ್ನ್ ಗೆಲ್ಲಿ. ದೋನ್ ಕುಜಿಲಿ ಸುರ್ ಖಾಲಿ ಜಾವ್ನ್ ತಿಸ್ರಿ ಕುಜಿಲಿ ಅರ್ಧಿ ಮುಗ್ಧೊನ್ ಯೆತಾನಾ ಬಾಬಣ್ಣಾಚ್ಯಾ ಮುಕ್ಕಾಲ್ ಕಿಲೊ ಮೆಂದ್ವಾಕ್ ಸಡನ್ನ್ ಏಕ್ ಐಡಿಯಾ ಆಯ್ಲಿ. ಹ್ಯಾ ಜ್ಯೋತಿಶಿಂಕಡೆಂ ಸಂಸಾರಾಚ್ಯಾ ಹರ್ಯೆಕ್ ಸಮಸ್ಯಾಂಕ್ ಪರಿಹಾರ್ ಆಸಾ ಖಂಯ್, ಮ್ಹಜ್ಯಾ ಸಮಸ್ಯಾಕ್ ಪರಿಹಾರ್ ಆಸ್ಚೊ ನಾಂಗೀ.? ಅಶೆಂ ಚಿಂತ್'ಲ್ಲೆಂಚ್ ಕುಜಿಲಿಂತ್ ಉರುಲ್ಲಿ ಎಕಾಚ್ ಘೊಟಾಕ್ ಖಾಲಿ ಕರ್ನ್ ಜೋಳಿಗೆಂತ್ಲೆಂ ಹಳ್ದುವೆಂ ಪೇಪರ್ ಬಾಯ್ರ್ ಕಾಡ್ನ್ ಜಾಹಿರಾತಾಂ ಮಧೆಂ ಜ್ಯೋತಿಷಿಂಚಿ ನಂಬ್ರಾಂ ಸೊಧುನ್ ಮೊಬೈಲ್ ಕಾಡ್ನ್ ಎಕಾ ನಂಬರಾಕ್ ಡಯಲ್ ಕೆಲೆಂ. ಅಪೊಂಯ್ಟ್'ಮೆಂಟ್ ಫಿಕ್ಸ್ ಕರ್ನ್ ಹಂಪನ್'ಕಟ್ಟೆ ಜ್ಯೋತಿಷಿಚ್ಯಾ ದಫ್ತರಾಕ್ ಯೇವ್ನ್ ಪಾವ್ಲೊ ಬಾಬಣ್ಣ.
ಹಲೋ, ಮೈಸೆಲ್ಫ್ ಬಾಬಣ್ಣ, ಐ ಮೀನ್ ಇಂಟ್ರ್ಯೂ ಬಾಬಣ್ಣ. ಚೀಪ್ ಎಡಿಟರ್ ಓಫ್ ಕುಜಿಲಿ.ಕೊಮ್. ವರ್ಲ್ಡ್ ಫೇಮಸ್ ಕೊಂಕಣಿ ಜರ್ನಲಿಸ್ಟ್, ಇಂಟ್ರ್ಯೂ ಮೇಕರ್ ಆಪ್ಲ್ಯಾ ವೆಬ್ಸೈಟಿ ತಿತ್ಲೆಚ್ ಹಳ್ದುವೆ ಆಪ್ಲೆ ದಾಂತ್ ದಾಖವ್ನ್ ಮ್ಹಣಾಲೊ ಬಾಬಣ್ಣ.
ಜ್ಯೋತಿಷಿನ್ ಹಾಕಾ ಏಕ್ಪಾವ್ಟಿಂ ವಯ್ರ್ ಥಾವ್ನ್ ಸಕಯ್ಲ್ ಸಮಾ ಪಳೆಲೆಂ. ಹಾಚೆ ಸ್ಕ್ರೂ ಸಡಿಳ್ ಜಾಲ್ಯಾತ್ ಮ್ಹಣ್ ಎಕಾಚ್ ನದ್ರೆನ್ ಪಾರ್ಕಿಲ್ಯಾ ತಾಣೆಂ ಸಾಂಗ್ ಕಿತೆಂ ಗಜಾಲ್? ಮ್ಹಣ್ ಗಂಭೀರ್ ತಾಳ್ಯಾನ್ ವಿಚಾರ್ಲೆಂ.
ಗಜಾಲ್ ಕಿತೆಂ ಮ್ಹಣ್ ಸಾಂಗ್ಚಿ ಸಾಯ್ಬಾನೊಂ, ಆಜ್'ಕಾಲ್ ಹಾವೆಂ ಕೆಲ್ಲೆಂ ಖಂಚೆಂಯೀ ಸಮಾ ಜಾಯ್ನಾ. ಏಕ್ ಚಿಂತುನ್ ಕೆಲ್ಯಾರ್ ಆನ್ಯೇಕ್'ಚ್ ಜಾತಾ ಪಾಟ್ಲ್ಯಾ ದಿಸಾನಿಂ ಘಡ್ಲೆಲೆಂ (ಜಿಲ್ಲಿಬಾಯೆಚ್ಯಾ ಹಾತಿಂ ಸರ್ಸರಿ ಮಾರ್ ಖೆಲ್ಲಿ ಏಕ್ ಗಜಾಲ್ ಸೊಡ್ನ್) ಸಕ್ಕಡ್ ವಿವರಿಲೆಂ ಬಾಬಣ್ಣಾನ್.
ನ್ಹಂಯ್ ಸಾಯ್ಬಾ, ತುಕಾ ಮಾಗಿರ್ ಕಾಲ್ಯಾಕ್ ಜಾಯ್ ಹೊ ಕೊಣಾ ಕೊಣಾಕ್ ಪೊವ್ಲಿ ಧರ್ಚೊ ಧಂದೊ? ಪಾಟ್ ಬಾಗಾವ್ನ್ ಕಿತೆಂ ಪುಣೀ ಕಾಮ್ ಕರ್ನ್ ದೀಸ್ ಕಾಡುಂಕ್ ಜಾಯ್ನಾಂಗೀ ತುಕಾ?
ತಶೆಂ ನ್ಹಂಯ್ ಸಾಯ್ಬಾನೊಂ, ಹಾಂವ್ ಆದಿಂ ಎಕಾ ದಿಸಾಳ್ಯಾಂತ್ ಕಾಮ್ ಕರ್ತಾಲೊಂ. ಥಂಯ್ ಲಾಗ್'ಲ್ಲೆಂ ಜರ್ನಲಿಸಂಚೆಂ ಪಿಶೆಂ ಆತಾಂ ಸುಟೊಂಕ್ ಆಯ್ಕಾನಾ. ದೆಕುನ್ ಹಾಂವ್ ಆತಾಂ ಹಿ ಮಲ್ಟಿ ಲ್ಯಾಂಗ್ವೇಜ್ ಕಮ್ ಮಲ್ಟಿ ಸ್ಟ್ಯಾಂಡರ್ಡ್ ವೆಬ್ಸೈಟ್ ಚಲಯ್ತಾಂ.
ವ್ಹಯ್ ಗೀ, ಥಂಯ್ ಕಾಲೆಂ ಜಾವ್ನಾಸ್ಲೊಯ್ ತುಂ? ರಿಪೋರ್ಟರ್, ಸಬ್ ಎಡಿಟರ್ ಯಾ ಎಡಿಟರ್.?
ನಾಂ ಸಾಯ್ಬಾನೊಂ.. ಥರ್ಡ್ ಎಟೆಂಪ್ಟ್ ಎಸ್ಸೆಲ್ಸಿ ಪಾಸ್ ಹಾಂವ್, ತೆಂಯೀ ಕೋಪಿ ಕರ್ನ್. ಮಾಕಾ ತೆದೊ ವ್ಹಡ್ಲೊ ಪೋಸ್ಟ್ ಕೋಣ್ ದಿತಾ.? ಹಾಂವ್ ಟೆಂಪ್ಯಾರ್ ನೀವ್ಸ್ ಪೇಪರಾಂ ಲೋಡ್ ಕರ್ತಾಲೊಂ. ಥಂಯ್ಸರ್ ಕಾಮ್ ಕರ್ಚ್ಯಾ ರಿಪೋರ್ಟರ್, ಎಡಿಟರಾಂಕ್ ಪಳೆವ್ನ್ ಮಾಕಾಯೀ ತಾಂಚೆಬರಿಂಚ್ ಜಾಯ್ಜೆ ಮ್ಹಣ್ ಆಶಾ ಜಾತಾಲಿ. ಪುಣ್ ದುಸ್ರ್ಯಾಂಚ್ಯಾ ಪೇಪರಾಂತ್, ವೆಬ್ಸೈಟಿಂತ್ ಮಾಕಾ ಕೋಣ್ ತೆಂ ಕಾಮ್ ದಿತಾ? ದೆಕುನ್ ಹಾವೆಂ ಮ್ಹಜಿಚ್ ವೆಬ್ಸೈಟ್ ಕೆಲಿ. ಹಾಂಗಾ ಹಾಂವ್'ಚ್ ಎಡಿಟರ್ ಆನಿ ಹಾಂವ್'ಚ್ ಎಟೆಂಡರ್. ಒನ್ ಮ್ಯಾನ್, ಮೆನೀ ವರ್ಕ್ಸ್. ಬರಂವ್ಚೆಂ, ಎಡಿಟ್ ಕರ್ಚೆಂ, ಮೈಕ್ ಧರ್ಚೆಂ, ಇಂಟ್ರ್ಯೂ ಕರ್ಚೆಂ, ಫೋಟೋ ಕಾಡ್ಚೆಂ, ಪಬ್ಲಿಶ್ ಕರ್ಚೆಂ, ವೆಬ್ಸೈಟಿಚೆಂ ಲಿಂಕ್ ಶೇರ್ ಕರ್ಚೆಂ, ಆಲ್ ಟು ಗೆದರ್ ಎವ್ರಿಥಿಂಗ್
ತುಜೆ ತಸ್ಲ್ಯಾ ನಾಪಾಸಾನಿಂ ಜರ್ನಲಿಸಂಕ್ ದೆಂವ್'ಲ್ಲ್ಯಾನ್ ಆಜ್ ಆಮ್ಚಿ ಸಮಾಜ್ ಹ್ಯಾ ಗತಿಕ್ ಪಾವ್ಲ್ಯಾ. ನ್ಹಂಯ್ ಸಾಯ್ಬಾ, ನೀವ್ಸ್ ಪೇಪರ್ ಲೋಡ್ ಕರ್ತೆಲ್ಯಾನ್ ವೆಬ್ಸೈಟ್ ಸುರು ಕರ್ಚೆಂ, ಮೆಳ್ಳ್ಯಾಂ ಮೆಳ್ಳ್ಯಾಂ ಕಡೆಂ ಇಂಟರ್ವ್ಯೂಚ್ಯಾ ನಾಂವಾರ್ ಭಿಕ್ ಮಾಗ್ಚಿ ಮ್ಹಳ್ಯಾರ್ ಕಿತೆಂ ಖೆಳಾಚಿ ಗಜಾಲ್'ಗೀ.? ತುಜಿ ವೆಬ್ಸೈಟ್ ಏಕ್ ದೋನ್ ಪಾವ್ಟಿಂ ವಾಚ್'ಲ್ಲಿ ಹಾವೆಂ.. ತುವೆಂ ಬರಂವ್ಚ್ಯಾಕ್ ತಾಳ್ ಮೂಳ್ ಏಕೀ ಆಸಾನಾ ಮೂ? ಪೊರ್ಚಾ ಪೋರ್'ಚ್ ಪಳೆ, ತುವೆಂ ಬರಯ್ಲಾಂಯ್ ವಿಲ್ಫಿ ಏಕ್ ಸಾಹಿತಿ ಮ್ಹಣ್ ತುವೆಂ ಪಾಚಾರಿಜೆ ಪಡ್ಲೆಂ ಮ್ಹಣ್? ಪೊಟಾಕ್ ಕಾಲೆಂ ಖಾತಾಯ್ ತುಂ, ಶೆಣ್?
ನ್ಹಂಯ್ಗೀ ಮಾಗಿರ್? ವಿಲ್ಫಿಕ್ ಸಗ್ಳೊ ಸಂಸಾರ್ ಗೀತ್'ಕಾರ್ ಮ್ಹಣ್' ವಳ್ಕಾತಾಲೊ. ಕೋಣ್'ಚ್ ತಾಕಾ ಸಾಹಿತಿ ಮ್ಹಣೊನ್ ವಳ್ಕಾನಾತ್'ಲ್ಲೊ. ಹಾಂವ್ 2008ತ್ ಅಧಿಕೃತ್ ಕೊಂಕ್ಣಿ ಬರವ್ಪಿ ಜಾಲ್ಯಾ ನಂತರ್ ವಿಲ್ಫಿ ಏಕ್ ಸಾಹಿತಿ ಮ್ಹಣ್ ಹಾವೆಂ ಪಾಚಾರಿಲ್ಲೆಂ.
ನ್ಹಂಯ್'ರೇ ತುಕಾ ಇಲ್ಲಿ ಪುಣೀ ಜನರಲ್ ನೋಲೆಜ್ ಅಸಾಯೆ..? ವಿಲ್ಫಿ ಕಾಂಯ್ 1960 ಇಸ್ವೆ ಥಾವ್ನ್ ಸಾಹಿತಿಕ್ ವಾವ್ರ್ ಕರಿತ್ತ್ ಆಸ್ಲೊ. ತಾಣೆಂ ಸುಮಾರ್ ಪಾಂಚ್ ಧಾಕ್ಡೆಭರ್ ಕೆಲ್ಲ್ಯಾ ಸಾಹಿತಿಕ್ ವಾವ್ರಾಕ್ ವಳ್ಕೊನ್ 2007 ಇಸ್ವೆಂತ್ ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾನ್ ತಾಕಾ 'ದಾಯ್ಜಿ ಪುರಸ್ಕಾರ್' ದಿಲ್ಲೊ. ಹಾಂಗಾ ಪಳೆ ದಾಯ್ಜಿ ವೆಬ್ಸೈಟಿಚೆರ್ ಆಯಿಲ್ಲೊ ನ್ಯೂಸ್ ವಾಟ್ಸಾಪಾಚೆರ್ ಫೊರ್ವಡ್ ಕರುನ್ ಸಕ್ಕಡ್ ತುಜ್ಯಾ ಹಣೆಬರ್ಪಾಕ್ ಥುಕುನ್ ಆಸಾತ್...
ಚೀಟಿಂಗ್, ಚೀಟಿಂಗ್, ಚೀಟಿಂಗ್ ದಿಸ್ ಈಸ್ ಪಕ್ಕಾ ಚೀಟಿಂಗ್. ದಾಯ್ಜಿನ್ ಮಾಕಾ ಅಶೆಂ ಚೀಟ್ ಕರುಂಕ್ ನಜೊ ಆಸ್ಲೆಂ. ವಿಲ್ಫಿಕ್ ಪುರಸ್ಕಾರ್ ದಿಲ್ಲಿ ಗಜಾಲ್ ತಾಣಿಂ ಮಾಕಾ ಸಾಂಗೊಂಕ್'ಚ್ ನಾ. ಪಳೆಯಾ ಸಾಯ್ಬಾನೊಂ, ಮ್ಹಜೆ ವಿಶ್ಯಾಂತ್ ಕೆದಾಳಾಯೀ ಅಶೆಂಚ್ ಜಾಂವ್ಚೆಂ.. ಹಾಂವೆ ಸತ್ತ್ಯಾನ್ ಕಾಲೆಂಗೀ ಕರುಂಕ್ ಗೆಲ್ಯಾರ್ ಕಾಲೆಂಗೀ ದುಸ್ರೆಂಚ್ ಜಾಂವ್ಚೆಂ.. ಬಾಬಣ್ಣಾಚೆಂ ಮುಸ್ಕಾರ್ ಇಂಗ್ಳ್ಯಾರ್ ಕರ್ಪಾಯಿಲ್ಲ್ಯಾ ವಾಂಯ್ಗ್ಯಾಬರಿಂ ಬಾವೊನ್ ಗೆಲ್ಲೆಂ.
ಅಯ್ಯೋ ಪೆದ್ದಾ, ತುಕಾ ಅಕ್ಕಲ್ ನಾ ಮ್ಹಣ್ ದಾಯ್ಜಿಕ್ ದುರ್ಸಾತಾಯ್.? ಆಪ್ಣಾಕ್'ಚ್ ಏಕ್ ಭೋವ್ ಹುಶಾರ್ ಜರ್ನಲಿಸ್ಟ್ ಮ್ಹಣ್ ಆಪಂವ್ಚ್ಯಾ ತುವೆಂ ಕೊಣೆ ಕೊಣೆ ಶಿಕವ್ನ್ ದಿಲ್ಲೆಂ ವೆಬ್ಸೈಟಿಚೆರ್ ಬರವ್ನ್ ಮರ್ಯಾದ್ ಹೊಗ್ಡಾವ್ನ್ ಘೆಂವ್ಚ್ಯಾ ಬದ್ಲಾಕ್ ಇಲ್ಲಿಶಿ ಮಾಹೆತ್ ಆರಾವ್ನ್ ಘೆವ್ನ್ ಬರಂವ್ಕ್ ಶಿಕ್ಲ್ಯಾರ್, ವೇಳಾ ಕಾಳಾ ತೆಕೀದ್ ತುಜೊ ಮೆಂದು ಅಪ್ಡೇಟ್ ಕರ್ನ್ ಘೆತ್ಲ್ಯಾರ್ ತುಕಾ ಹಿ ಗತ್ ಯೆತಿ ನಾತ್ಲಿ. ವಿಲ್ಫಿಕ್ ಕೊಣೆಂಯೀ ಉಣೆಪಣ್ ಹಾಡ್ಲ್ಯಾರ್ ಹಾಂವ್ ತಾಂಕಾಂ ಬೆಂಡುನ್ ಘಾಲ್ತಾಂ ಮ್ಹಣ್ ಬರವ್ನ್ ಘಾಲಾಂಯ್ ನೇ? ಪೊರ್ಚಾ ಪೋರ್ ಪರ್ವಣ್ಗಿ ನಾಸ್ತಾನಾ ವಿಲ್ಫಿಚೆಂ ಪದ್ ವಾಪಾರ್'ಲ್ಲೆ ವಿಶಿಂ ಇತ್ಲೊ ವ್ಹಡ್ ಆವಾಜ್ ಜಾತಾನಾ ತುಂ ಕಿತ್ಯಾಕ್ ಬೆಂಡುಂಕ್ ವಚೊನಾಂಯ್..? ತುಜಿ ತಲ್ವಾರ್ ಘೆವ್ನ್ ಖಂಯ್ ಕೆಲ್ಶಿಚೆಂ ಕಾಮ್ ಕರುಂಕ್ ಗೆಲ್ಲೊಯ್.?
ಬಾಬಾಚಿ ತುತ್ತೂರಿ ಫುಂಕ್ಚೆಂ ಕೊಂಟ್ರೆಕ್ಟ್ ಘೆತ್'ಲ್ಲೆಂ ನೇ ಹಾವೆಂ, ತಾಂತುಂಚ್ ಇಲ್ಲೊ ಬಿಸಿ ಜಾಲೊಂ. ಬಾಬಾನ್ ಮಾಕಾ ತೆದಿ ವ್ಹಡ್ಲಿ ಪ್ಯಾಕೇಜ್ ದಿಲ್ಲಿ, ತಿ ಸೊಡ್ನ್ ವಿಲ್ಫಿಚ್ಯಾ ಪಾಟ್ಲ್ಯಾನ್ ಗೆಲ್ಯಾರ್ ಮಾಕಾ ಕಾಲೆಂ ಮೆಳ್ತಾ.? ಬಾಬ್ ಕಿತ್ಲೊ ರಾಗಿಷ್ಟ್ ಮ್ಹಣ್ ಗೊತ್ತಾಸಾಗೀ ತುಮ್ಕಾಂ? ತಾಕಾ ಫುಗಾರ್ತಾನಾಂಯೀ ತಾಣೆಂ ಸಾಂಗ್'ಲ್ಲೆಬರಿಂಚ್ ಫುಗಾರಿಜೆ, ನಾಂ ತರ್ ತೊ ಮಾಕಾ ಬೆಂಡುನ್ ಘಾಲಿತ್.! ಹಾವೆಂ ಬರಯಿಲ್ಲೆಂ ವಾಚುನ್ ವಿಲ್ಫಿಚ್ಯಾ ಘರ್ಚಿಂ ಮಾಕಾ ನೆಕ್ಸ್ಟ್ ಕಾಂಯ್ ತಾಂಚಿ ಇಂಟ್ರ್ಯೂ ಕರುಂಕ್ ದಿತಾತ್ ಮ್ಹಳ್ಳ್ಯಾ ಆಶೆನ್ ವೆಬ್ಸೈಟಿಚೆರ್ ತಶೆಂ ಬರಯಿಲ್ಲೆಂ ವ್ಹಯ್, ತುಮಿ ತೆಂ ಸಕ್ಕಡ್ ಅಸ್ಲೆಂ ಆಸ್ಲೆಬರಿಂಚ್ ಸೀರಿಯಸ್ಲಿ ಘೆತ್ಲ್ಯಾರ್ ಜಾತಾಗೀ..? ಆಮಿ ಪ್ರ್ಯಾಕ್ಟಿಕಲ್ ಜಾವ್ನ್ ಚಿಂತಿಜೆ ಪಡ್ತಾ. ಹಾಂವ್ ಫ್ರೀ ಆಸ್ತಾನಾ ಕೊಣೆಂಯೀ ವಿಲ್ಫಿಕ್ ಉಣೆಪಣ್ ಕೆಲ್ಲೆಂ ತರ್ ತಾಂತುಂ ಮ್ಹಜೊ ಫಾಯ್ದೊ ಕರ್ನ್ ಘೆಂವ್ಕ್ ಹಾಂವ್ ಖಂಡಿತ್ ವಚೊನ್ ತಾಂಕಾಂ ಬೆಂಡುನ್ ಘಾಲ್ತೊಂ.
ಕಿತೆಂ ಮ್ಹಣ್?
ಕಿತೆಂಯಿ ವಿಚಾರ್ಚ್ಯಾ ಪಯ್ಲೆಂ ಎಕಾ ಪ್ರಬುಧ್ಧ್ ಮನ್ಶ್ಯಾಚ್ಯಾ ಕಟ್ಟ್ಯಾ ಭಿತರ್ ಕಿತ್ಲೊ ಬೊಂಡು ಯಾನೆ ಮೆಂದು ಆಸಾ ಕಳಿತ್ ಆಸಾಯೇ ತುಕಾ..?
ನಾ, ಸಾಯ್ಬಾನೋ ಮಾಕಾ ಕಳಿತ್ ನಾ.
ಮಾಗಿರ್ ಖಂಚೊ ಸೈನ್ಸ್ ಸ್ಟೂಡೆಂಟ್'ರೇ ತುಂ? ಹರ್ಯೆಕಾ ಪ್ರಬುಧ್ಧ್ ಮನ್ಶ್ಯಾಚ್ಯಾ ಕಟ್ಟ್ಯಾಂತ್ ಸರಾಸರ್ 1.5 ಕಿಲೋ ಬೊಂಡು ಆಸ್ತಾ. ಪುಣ್ ತಜ್ಯಾ ಕಟ್ಟ್ಯಾಂತ್ ತಾಚ್ಯಾ ಅರ್ಧೊ ಮಾತ್ರ್ ಆಸಾ. ದೆವಾನ್ ಇತ್ಲೊ ಘೋರ್ ಅನ್ಯಾಯ್ ತುಕಾ ಕಿತ್ಯಾಕ್ ಕೆಲೊ? ಮ್ಹಣ್ ಕೆದಾಳಾ ಪುಣೀ ಸವಾಲ್ ಕೆಲಾಂಯ್ಗೀ ತುವೆಂ?
ಮ್ಹಳ್ಯಾರ್ ಹಾಂವ್ ಪ್ರಬುಧ್ಧ್ ನ್ಹಂಯ್ ಮ್ಹಣ್ಚೆಂ ತುಮಿ.? ದಿಸ್ ಈಸ್ ಬಿಗ್ ಇನ್ಸಲ್ಟ್ ಫೋರ್ ಮೀ.. ಐ ವಿಲ್ ಪುಟ್ ಡಿಫೇಮೇಶನ್ ಕೇಸ್ ಓನ್ ಯೂ.. ಐ ವಿಲ್ ಸೀ ಯೂ ಇನ ದ ಕೋರ್ಟ್... ಬಾಬಾನ್ ಶಿಕಯಿಲ್ಲೆಂ ಇಂಗ್ಲಿಷ್ ಭಾಯ್ರ್ ಘಾಲೆಂ ಬಾಬಣ್ಣಾನ್.
ಅರೇ, ಮರ್ಯಾದ್ ಆಸ್'ಲ್ಲ್ಯಾಂಕ್ ಮಾತ್ರ್ ಇನ್ಸಲ್ಟ್ ಜಾಂವ್ಚೆಂ. ಮೆಳ್'ಲ್ಲ್ಯಾ ಚಿಲ್ಲರ್ ಪಯ್ಶಾಂಕ್ ಆಸ್'ಲ್ಲಿ ಮಾನ್ ಮರ್ಯಾದ್ ಪೂರಾ ವಿಕುನ್ ಆಯಿಲ್ಲ್ಯಾ ತುಕಾ ಇನ್ಸಲ್ಟ್ ಜಾಂವ್ಚೆಂ ಮ್ಹಳ್ಯಾರ್ ತೆಂ ಸಂಸಾರಾಚೆಂ ಆಟ್ವೆಂ ನವಾಲ್ ಮ್ಹಣ್ಯೆತ್. ತುಂ ಕೆದೊ ವ್ಹಡ್ ಬೆಕೂಫ್'ಗೀ ಮ್ಹಳ್ಯಾರ್ ಕೊಣಾ ಕೊಣಾಚೆಂ ನಕಲ್ ಕರ್ನ್ ಬರಯಿಲ್ಲೆಂ ಲೇಖನ್ ತುಜೆಂ ಮ್ಹಣ್ ಫಾಯ್ಸ್ ಕರವ್ನ್ ಆತಾಂ ಸಗ್ಳ್ಯಾ ಪತ್ರಾಂತ್ ಮ್ಹಜೆಂಚ್ ಲೇಖನ್ ಸೂಪರ್ ಹಿಟ್ ಮ್ಹಣ್ತಾಯ್. ದುಸ್ರ್ಯಾಂಕ್ ಸ್ವಕುಚಮರ್ದನ ಕರ್ತಾತ್ ಮ್ಹಣ್ಚೊ ತುಂ ಕಾಲೆಂ ದಾಂಬುನ್ ಆಸಾಯ್, ತುಜ್ಯೊಚ್..???
ತಶೆಂ ನ್ಹಂಯ್ ಸಾಯ್ಬಾನೊಂ.. ಆಕ್ಚುವಲಿ 2002 ಇಸ್ವೆಂತ್ ಜೊಸ್ಸಿ ಪಿಂಟೊ ಕಿನ್ನಿಗೋಳಿ ಹಾಣಿಂ ಕಾಣಿಕ್ ಪತ್ರಾಚೆರ್ ಮಂಗ್ಳುರಿ ಕ್ರೀಸ್ತಾಂವ್ ಸಮಾಜೆಚಿ ಓಪನ್ ಹಾರ್ಟ್ ಸರ್ಜರಿ ಮ್ಹಳ್ಳ್ಯಾ ನಾಂವಾನ್ ಬಾರೀ ಅಪುರ್ಬಾಯೆಚೆಂ ಏಕ್ ಲೇಖನ್ ಬರಯಿಲ್ಲೆಂ, ತ್ಯಾ ಲೇಖನಾಚ್ಯಾ ಅಕ್ರೇಕ್ ಹಾಂವ್ ತಯಾರ್ ಆಸಾಂ, ತುಂ ತಯಾರ್ ಆಸಾಯ್? ಮ್ಹಣ್ ಏಕ್ ಸವಾಲ್ ವಿಚಾರ್ನ್ ತಾಣೆ ಲೇಖನ್ ಸಂಪಯಿಲ್ಲೆಂ. ತಾಚೆಂ ಸವಾಲ್ ಹಾವೆಂ, ಹಾಂವ್ ತಯಾರ್ ಆಸಾಂ ತುಮಿ? ಮ್ಹಣ್ ಇಲ್ಲೆಶೆಂ ಬದ್ಲುನ್ ವಾಪಾರ್ನ್ ಮ್ಹಜೆಂ ಸೂಪರ್ ಹಿಟ್ ಲೇಖನ್ ಬರಯಿಲ್ಲೆಂ. ಜೊಸ್ಸಿ ಪಿಂಟೊಚೆಂ ಲೇಖನ್ ಮೊಸ್ತು ಜಣಾನಿಂ ವಾಚ್ಲಾಂ ಮ್ಹಣ್ ಮಾಕಾ ಕಿತೆಂ ಗೊತ್ತು? ತಾಣಿಂ ಸಕ್ಡಾನಿಂ ಮಾಕಾ ತ್ಯಾ ವಿಶ್ಯಾಂತ್ ಸವಾಲ್ ಕರುಂಕ್ ಸುರು ಕೆಲೆಂ. ತೆಂ ಮ್ಹಜೆಂಚ್ ಲೇಖನ್ ಮ್ಹಣ್ ಫಟಂವ್ಚೆ ಖಾತಿರ್ ಆತಾಂ ಹಾಂವ್ ಹರ್ಯೆಕ್ ಪಾವ್ಟಿಂ ತ್ಯಾ ಲೇಖನಾಂಚಿ ಜಿಕ್ರ್ ಕರ್ತಾನಾ 'ಸೂಪರ್ ಹಿಟ್' ಮ್ಹಣ್ ಬರಂವ್ಕ್ ವಿಚ್ರಾನಾ.
ನಂಯ್, ದೊಂಪ್ಳ್ಯಾಚಿ ಕಟ್ಟಿ ಖಂಯ್ ಪುಣೀ ಮೆಳೊನಾಂಯೆರೇ ತುಕಾ? ತೊ ದಾಕ್ಷೆಣ್ ನಾತ್ಲೊ ವಿಮರ್ಶಕ್ ಆಸಾ ನೇ, ತಾಕಾ ತುಂ ಆತಾಂ ಮೊಸ್ರಿ, ನಂಜೆಲ ಮ್ಹಣ್ತಾಯ್.. ತ್ಯಾಚ್ ತುಜ್ಯಾ ಸೂಪರ್ ಹಿಟ್ ಲೇಖನಾಮಧೆಂ ತಾಕಾ ಉತ್ತೀಮ್ ಚಿಂತ್ಪಿ ತಶೆಂ ಅಶೆಂ ಮ್ಹಣ್ ಸಾಂಗೊನ್ ಒಟ್ರಾಶಿ ಪುಗಾರ್ಲಾಂಯ್..? ತೆಂ ಪಾವಾನಾತ್ಲ್ಯಾಕ್ ಹೆಂ ಪಳೆ ಹಾಂಗಾ, ತಾಚೆ ವಿಶ್ಯಾಂತ್ ಉಲ್ಲೇಕ್ ಕರ್ನ್ ಇತ್ಲೊ ವ್ಹಡ್ ಕಮೆಂಟ್ ಬರಯ್ಲಾಯ್..? ಮೊಬೈಲಾಂಲಾಂತ್ಲೆ ಸ್ಕ್ರೀನ್ ಶೋಟ್ ಕಾಡ್ನ್ ದಾಖಯ್ಲೆ ಜ್ಯೋತಿಷಿನ್..
ಪಳೆವ್ನ್ ಪುರ್ತೊ ಬೊಲ್ಚೆವ್ನ್ ಗೆಲ್ಲೊ ಬಾಬಣ್ಣ ಉಲಂವ್ಕ್ ಗಾಗೆಲೊ.. ತೆಂ ತಶೆಂ ನ್ಹಂಯ್ ಸಾಯ್ಬಾನೊಂ.. ಎಗೇಯ್ನ್ ಚೀಟಿಂಗ್ ಚೀಟಿಂಗ್ ಚೀಟಿಂಗ್. ದಿಸ್ ಈಜ್ ಟೆಕ್ನೋಲೊಜಿ ಫೋಲ್ಟ್. ತಾಣಿಂ ಪೂರಾ ಅದ್ಲೆ ಸ್ಕ್ರೀನ್ ಶೋಟ್ ಕಾಡ್ನ್ ದವರ್ಲ್ಯಾತ್ ಮ್ಹಣ್ ಮಾಕಾ ಕಿತೆಂ ಗೊತ್ತು? ಹಿ ಸ್ಕ್ರೀನ್ ಶೋಟ್ ಟೆಕ್ನೋಲೊಜಿ ಯೇವ್ನ್ ಮ್ಹಜೆ ತಸ್ಲ್ಯಾ ಸತ್ತಿ, ಪ್ರಾಮಾಣಿಕ್, ನಿಷ್ಟುರ್ ಪತ್ರಕರ್ತಾಕ್ ದೀಸ್ ಕಾಡುಂಕ್ ಕಷ್ಟ್ ಜಾಲ್ಯಾತ್. ಆಪ್ಣಾಕ್ ಏಕ್ ವೆಬ್ಸೈಟ್ ಘಡುಂಕ್ ಆಸಾ ಮ್ಹಣ್ ತೊ ವಿಮರ್ಷಕ್ ಆನಿ ತಾಚೊ ಸಾಂಗಾತಿ ಕೆದಾಳಾರೀ ಸಾಂಗೊನ್ ಆಸ್'ಲ್ಲೆ. ಹಾಂವ್ ತೊ ಕಾಂಯ್ ಮಾಕಾ ತಾಚ್ಯಾ ವೆಬ್ಸೈಟಿಂತ್ ಚೀಪ್ ಎಡಿಟರ್ ಯಾ ಇಂಟ್ರ್ಯೂ ಮೇಕರ್ ಪೋಸ್ಟ್ ದೀತ್ ಮ್ಹಣ್ ಚಿಂತ್'ಲ್ಲೆಂ. ಪುಣ್ ಮಾಕಾ ತಾಣೆ ಎಟೆಂಡರಾಚೊ ಪೋಸ್ಟ್'ಯೀ ದಿಲೊನಾ. ಮಾಗಿರ್ ಹಾಂವೆಂ ತಾಚೊ ಸಹವಾಸ್ ಸೊಡ್ನ್ ಕುಜಿಲಿ.ಕೊಮ್ ಸುರು ಕೆಲೆಂ. ತ್ಯಾ ದೀಸ್ ಥಾವ್ನ್ ಧರ್ನ್ ಆಜ್ ಪರ್ಯಾಂತ್ ದಿಸಾಚಿಂ ಚೊವೀಸ್ ವೊರಾಂಯೀ ತಾಕಾ ನಂಜೆಲ, ಮೊಸ್ರಾಳೊ ಮ್ಹಣ್ ಯೆಟುನ್ ತಾಚೆವಯ್ಲೊ ರಾಗ್ ಆನಿ ಮ್ಹಜೆ ಜಿಬೆಚಿ ಖೊರೊಜ್ ದೊನೀ ಕಾಡ್ತೆ ಆಸಾಂ. ಪುಣ್ ತೊ ಆನಿ ತಾಚೆ ಸಾಂಗಾತಿ ಮಾತ್ರ್ ಆದಿಂ ಕಾಡ್ನ್ ದವರ್'ಲ್ಲೆ ಸ್ಕ್ರೀನ್ ಶೋಟ್ ಉಸ್ತುನ್ ವಯ್ರ್ ಘಾಲ್ನ್ ಮಾಕಾ ಸಾಂಪ್ಡಾಂವ್ಕ್ ಪಳೆತಾತ್.
ಎಬ್ಬೇ ತುಜೊಯೀ ಏಕ್ ಜಲ್ಮ್'ಗೀ...? ಪತ್ರಕಾರ್ ಮ್ಹಣ್ ವೆಬ್ಸೈಟ್ ಕರ್ನ್ ತಿ ಆತಾಂ ಫಕತ್ ಎಕಾ ಮನ್ಶ್ಯಾಚಿ ಸ್ತುತಿ ಕರುಂಕ್ ವಾಪ್ರುನ್ ಆಸಾಯ್ ನೇ, ತಾಚ್ಯಾ ಬದ್ಲಾಕ್ ತುಕಾ ಹ್ಯಾಂಡ್ ಬಿಲ್ಲಾಂ, ಫ್ಯಾಂಫ್ಲೆಟಾಂ ಪ್ರಿಂಟ್ ಕರ್ನ್ ವಾಂಟ್ಚೆಂ ಬಿಸ್ನೆಸ್ ಕರ್ಯೆತೆಂ. ಅಶೆಂ ಪತ್ರ್'ಗಾರಿಕೆಚ್ಯಾ ನಾಂವಾನ್ ಭಿಕ್ ಮಾಗೊನ್ ತೀನ್ ತಿರ್ಕುಟ್ ಜಾಲ್ಲಿ ತುಜಿ ಮರ್ಯಾದ್ ಪುರ್ತಿ ಹೊಗ್ಡಾವ್ನ್ ಘೆಂವ್ಚಿ ಗರ್ಜ್ ಆಸ್ಲಿಗೀ..? ಸಾಂಗ್'ಲ್ಲೆಬರಿಂ ತುಜ್ಯಾ ವೆಬ್ಸೈಟಿವಿಶಿಂ ಖಬ್ರೊ ಬರಯಿಲ್ಲ್ಯಾ ತ್ಯಾಚ್ ಪತ್ರಾಂತ್ ವಚೊನ್ ಕಾರ್ಯಕಾರಿ ಸಂಪಾದಕ್ ಜಾಲ್ಲೊ ಮಹಾನ್ ಮನಿಸ್ ಕೊಂಕ್ಣೆಂತ್ ತುಂ ಎಕ್ಲೊ ಮಾತ್ರ್ ಮ್ಹಣ್ ದಿಸ್ತಾ.
ಕಾಲೆಂ ಉಲಯ್ತಾತ್ ಸಾಯ್ಬಾನೊಂ ತುಮಿ.? ತಶೆಂ ಕಾಂಯ್ ವಾಯ್ಟ್ ಬರೊವ್ನಾ ಮ್ಹಜೆ ವೆಬ್ಸೈಟಿ ವಿಶ್ಯಾಂತ್.
ಹೆಂ ಕಾಲೆಂ ಪಳೆ ತುಜೆಂ ಹಣೆಬರಪ್. ಮೊಬೈಲಾಂತ್ಲಿ ಅನ್ಯೇಕ್ ತಸ್ವೀರ್ ಭಾಯ್ರ್ ಕಾಡ್ಲಿ ಜ್ಯೋತಿಷಿನ್.
ಹೆಹೆಹೆ ಕಾಲೆಂ ಸಾಯ್ಬಾನೊಂ ತುಮಿ.? ಮ್ಹಜೆ ವೆಬ್ಸೈಟಿ ವಿಶ್ಯಾಂತ್ ಬರೆಂಚ್ ಬರಯ್ಲಾಂ ತಾಂತುಂ. ತಾಣಿಂಚ್ ಮಾಕಾ ಇತ್ಲ್ಯಾ ಅಪುರ್ಬಾಯೆಚೆಂ ನಾಂವ್ ಸಯ್ತ್ ದಿಲಾಂ ಕುಜಿಲಿ.ಕೊಮ್. ತ್ಯಾಚ್ ಮೊಗಾನ್ ಹಾಂವ್ ತಾಚ್ಯಾ ಪತ್ರಾಂತ್ ಕಾರ್ಯಕಾರಿ ಸಂಪಾದಕ್ ಜಾಲ್ಲೊಂ. ಹಿ ಮ್ಹಜಿ ವೆಬ್ಸೈಟ್ ಕೊಂಕ್ಣೆಂತ್ ಏಕ್ ದಾಖ್ಲೊ ಜಾತಾ ಪಳೆಯಾ ತುಮಿ. ಮುಕ್ಲಿ ಪಿಳ್ಗಿ ಮ್ಹಜೆ ವೆಬ್ಸೈಟಿವಿಶಿಂ ಅಧ್ಯಯನ್ ಕರ್ನ್ ಕೊಂಕ್ಣಿವಿಶಿಂ ನೋಲೆಜ್ ಜೊಡ್ತೆಲಿಂ. ಕೊಂಕ್ಣೆಚ್ಯಾ ಹಿಸ್ಟ್ರಿಂತ್ ಮ್ಹಜಿ ವೆಬ್ಸೈಟ್ ಯಾದ್'ಗಾರ್ ಜಾವ್ನ್ ಉರ್ತೆಲಿ.
ಯಾದ್'ಗಾರ್ ಜಾಂವ್ಚಿ ಗಜಾಲ್ ಸೊಡ್, ತುಂ ಮಾತ್ರ್ ಏಕ್ 'ಗಾರ್' ಮ್ಹಣ್ ತುವೆಂ ಎದೊಳ್'ಚ್ ರುಜು ಕೆಲಾಂಯ್ ತುವೆಂ. ತುವೆಂ ಇತ್ಲ್ಯಾ ಜಣಾ ರಾಜಕಾರಣಿಂಚ್ಯೊ ಇಂಟರ್ವ್ಯೂ ಕರ್ನ್ ಘಾಲ್ಯೊಯ್ ನೇ, ತಾಂತುಂ ಎಕ್ಲೊ ಪುಣೀ ಜಿಕ್ಲೊ ಗೀ..? ನವ್ಯಾನ್ ರಾವ್'ಲ್ಲ್ಯಾಕ್ ಸೊಡ್ಯಾಂ, ತೊ ಸಲ್ವೊಂಕ್'ಚ್ ಮ್ಹಣ್ ರಾವ್'ಲ್ಲೊ. ಪುಣ್ ನಿರಂತರ್ ಜಿಕೊನ್ ಆಸ್'ಲ್ಲೆಯೀ ತುಕಾ ಇಂಟರ್ವ್ಯೂ ದಿಲ್ಯಾ ಉಪ್ರಾಂತ್ ಸಲ್ವಾಲೆ. ತುಳ್ವೆಂತ್ 'ಒಡು ಪತ್ತಿಲೆಕ್ಕ' ಮ್ಹಣ್ ಏಕ್ ಸಾಂಗ್ಣಿ ಆಸಾ ನೇ, ತುಜಿ ಕಾಣಿ ತಶಿಚ್ ಜಾಲ್ಯಾ, ತುಕಾ ಇಂಟರ್ವ್ಯೂ ದಿಲ್ಲ್ಯಾ ಹರ್ಯೆಕ್ಲ್ಯಾಕೀ 'ಒಡು ಪತ್ತಿಲ್ಲೆ'ಬರಿಂಚ್ ಜಾಲಾಂ. ತೊ ತೀನ್ ಭಾಸಾಂಚೊ ಸೂಪರ್ ಸ್ಟಾರ್ ಪಳೆ, ಪೊಲಿಸಾಚ್ಯಾ ಫಿಲ್ಮಾಕ್ ತುಕಾ ಇಂಟರ್ವ್ಯೂ ದಿಲ್ಲಿಚ್ ದಿಲ್ಲಿ, ಆತಾತಾಂ ತಾಕಾ ಫೋನ್ ಕಾನಾಂಕ್ ದರ್ನ್ ಭೊಂವ್ಚೆ ಪಾತ್ರ್'ಯೀ ಕೊಣೀ ದೀನಾಂತ್ ಖಂಯ್. ಪಯ್ಲೆಂ ಥೊಡ್ಯಾ ತರ್ನಾಟ್ಯಾಂಕ್ ಪಯ್ಶೆ ದೀವ್ನ್, ಫುಲಾಂ, ಫಳಾಂ, ಝೆಲೊ ಆಪುಣ್'ಚ್ ಕಾಣ್ಘೆವ್ನ್ ದೀವ್ನ್ ತಾಂಚೆ ಕರ್ನಾಂ ಸನ್ಮಾನ್ ಕರವ್ನ್ ಘೆವ್ನ್ ಫೋಟೋ ಕಾಡ್ನ್ ಘಾಲ್ತಾಲೊ, ಆತಾಂತಾಂ ತೆ ತರ್ನಾಟೆಯೀ ತಾಕಾ ಲಾಗಿಂ ಕರಿನಾಂತ್ ಖಂಯ್.. ಹೆಂ ಚಿಂತಾನಾ ಮಾಕಾ ತ್ಯಾ ಕೊಂಕ್ಣೆಚ್ಯಾ ಅಪುಟ್ ಸಂಘಟನಾಂಚಿ ಆನಿ ತಾಂಚ್ಯಾ ಗುರ್ಕಾರಾಚಿ ಭಿರ್ಮೊತ್ ದಿಸ್ತಾ.. ಉಣ್ಯಾರ್ ಉಣೆಂ ತೆಂ ಮ್ಯೂಸಿಯಂ ಭಾಂದುನ್ ಮುಗ್ದಿತಾ ಮ್ಹಣಾಸರ್ ತರೀ ತಾಕಾ ಧೊಸುಂಕ್ ವಚೊನಾತ್ಲೆಂಯ್ ತರ್ ಬರೆಂ ಆಸ್ಲೆಂ.. ಉಪ್ರಾಂತ್ ತರೀ ತಾಕಾ ಒಡು ಪತ್ತಿಲ್ಲೆಂ ತರ್, ತಾಕಾ ಆನಿ ತುಜ್ಯಾ ಕುಜಿಲಿಕ್ ದೊನಾಂಯ್ಕೀ ಉಕಲ್ನ್ ತ್ಯಾಚ್ ಮ್ಯೂಸಿಯಮಾಂತ್ ದವರ್ನ್ ತುಕಾ ಭಾಯ್ರ್ ಪಾರೊ ರಾವವ್ಯೆತೆಂ.. ಪುಣ್ ತಾಕಾ ಆತಾಂಚ್ ಒಡು ಪತ್ತಿಲ್ಲಿಂ ಲಕ್ಷಣಾಂ ದಿಸೊನ್ ಆಯ್ಲ್ಯಾಂತ್ ಭಿರ್ಮತ್...
ಹಿಹಿಹಿ ಹೆಹೆಹೆ ತುಮ್ಕಾಂ ಕೊಂಕ್ಣಿ ಸಂಸಾರಾಚೆ ಸಕ್ಕಡ್ ಘುಟ್ ಕಳಿತ್ ಆಸಾತ್.. ತೆಂ ಕಶೆಂ..? ಹಾಂಕ್ರೆವ್ನ್ ವಿಚಾರ್ಲೆಂ ಬಾಬಣ್ಣಾನ್.
ಕಶೆಂ ಮ್ಹಣ್ ವಿಚಾರ್ತಾಯ್.? ಪಳೆ ಹಾಂಗಾ ಮ್ಹಣುನ್ ಜ್ಯೋತಿಷಿನ್ ಆಪ್ಲೆ ನಕ್ಲಿ ಕೇಸ್, ಕಾಡ್ ಆನಿ ಮಿಶಿಯೊ ನಿಕ್ಳಾವ್ನ್ ಮೆಜಾರ್ ದವರ್ಲ್ಯೊ.
ಏ ಮ್ಹಜ್ಯಾ ಬೊರ್ಕಾತಾ, ಟೆನ್ಶನ್ ಅಂಕಲ್... ತುಂ ಹಾಂಗಾ... ಹೆಂ ಜ್ಯೋತಿಷಿ... ವೇಸ್.. ಉಲಂವ್ಕ್ ಉತ್ರಾಂ ಮೆಳ್ನಾಸ್ತಾನಾ ಪಾದ್ದೆಲೊ ಬಾಬಣ್ಣ
ಮ್ಹಯ್ ಹಾಂವ್'ಚ್ ತೊ.. ಜಿಲ್ಲಿಬಾಯೆಚ್ಯಾ ಹಾತಾಂತ್ಲೊ ಚುಕೊನ್ ಧಾಂವೊನ್ ಗಡಂಗಾಕ್ ರಿಗ್ತಾನಾಂಚ್ ತುಕಾ ಪಳೆಲ್ಲೆಂ ಹಾವೆಂ. ಥಂಯ್ ಥಾವ್ನ್ ತುಕಾ ಹಾಂಗಾ ಮ್ಹಣಾಸರ್ ಫೋಲೋ ಕರ್ನ್ ಆಯಿಲ್ಲೊಂ. ಹಾಂಗಾಚ್ಯಾ ಜ್ಯೋತಿಷಿಕ್ ಇಲ್ಲೆ ಪಯ್ಶೆ ದೀವ್ನ್ ಎಕಾ ಘಂಟ್ಯಾಕ್ ತಾಚ್ಯಾ ಜಾಗ್ಯಾರ್ ಬಸ್ಲಾಂ ಹಾಂವ್ ತುಜಿ ಅಸ್ಲಿಯತ್ ಭಾಯ್ರ್ ಘಾಲುಂಕ್..
ಟೆನ್ಶನ್ ಅಂಕಲ್, ಟೆನ್ಶನ್ ಅಂಕಲ್ ದಮ್ಮಯಾ, ತುಜೆ ಪಾಂಯ್ ಧರ್ತಾಂ, ಭೊಗ್ಶಿಯಾ ಮಾಕಾ, ತಾಣಿಂ ಪಯ್ಶೆ ದಿಲೆ ಮ್ಹಣ್ ಹಾವೆಂ ತುಮ್ಚೆವಿರೋಧ್ ನಾಕಾ ಜಾಲ್ಲೆಂ ಬರಯ್ಲೆಂ. ಮ್ಹಜಿ ಚೂಕ್ ಜಾಲಿ, ಮಾಫ್ ಕರಾ. ಹಾವೆಂ ತುಮ್ಚೆಲಾಗಿಂ ಸಾಗ್'ಲ್ಲ್ಯೊ ಗಜಾಲಿ ಕೊಣಾಕೀ ಸಾಂಗಿನಾಕಾತ್, ಪಯ್ಲೆಂಚ್ ಮ್ಹಜಿ ಗತ್ ನಿಮಾಣಿ ಜಾಲ್ಯಾ.. ಪಾಯಾಂಕ್'ಚ್ ಆಡ್ ಪಡ್ಲೊ ಬಾಬಣ್ಣ.
ತುಕಾ ಭೊಗ್ಸುಂಚೆಂ..? ಆನ್ಯೇಕ್ಲ್ಯಾಚೆಂ ಪರ್ಸನಲ್ ಲೈಫ್ ಬರಂವ್ಚೆಂ, ಪಯ್ಶಾಂಖಾತಿರ್ ಮನ್ಶಾಂಕ್ ಧುಂಪವ್ಚೆಂಚ್ ಜರ್ನಲಿಸಂ ಮ್ಹಣ್ ಚಿಂತ್ಚ್ಯಾ ತುಕಾ ಭೊಗ್ಶಿಲ್ಯಾರ್ ಮಾಕಾ ಭೊಗ್ಸಾಣೆಂ ಆಸ್ಚೆಂ ನಾ.. ರಾವ್ ತುಜೊ ಫೋಟೋ ಕಾಡ್ತಾಂ.. ಮ್ಹಣ್ ಟೆನ್ಶನ್ ಅಂಕಲಾನ್ ಬೊಲ್ಸಾಂತ್ಲೆಂ ಮೊಬೈಲ್ ಭಾಯ್ರ್ ಕಾಡ್ಲೆಂ.
ದಮ್ಮಯ ದಮ್ಮಯ ಮಾಫ್ ಕರಾ, ತುಮಿ ಮಾಫ್ ಕೆಲಾಂ ಮ್ಹಣ್ತಾಸರ್ ತುಮ್ಚೆ ಪಾಯ್ ಸೊಡಿನಾಂ ಹಾಂವ್, ಬಾಬಣ್ಣ ಗಳ್ಗಳ್ಯಾಂ ರಡ್ತಾಲೊ
ತುಕಾ ಗ್ರಹಚಾರ್ ಲಾಗ್ಲಾಂ ಮ್ಹಣ್ ಚಿಂತುನ್ ಜ್ಯೋತಿಶಿಕಡೆಂ ಆಯ್ಲಾಯ್.. ತುಕಾ ಗ್ರಹಚಾರ್ ಲಾಗ್ಲಾಂ ನ್ಹಂಯ್, ಕೊಂಕ್ಣೆಕ್ ಗ್ರಹಚಾರ್ ಲಾಗ್'ಚ್ಲೆ ಬರಿಂ ತುಂ ಲಾಗ್ಲಾಯ್. ತುಜೆ ತಸ್ಲ್ಯಾ ಹಳ್ದುವೆಂ ವೀಕ್ ವೊಂಕ್ತೆಲ್ಯಾಕ್ ಬರವ್ಪ್ಯಾಚೊ ದರ್ಜೊ ದೀವ್ನ್ ತುಜೆ ಥಾವ್ನ್ ಪ್ರಚಾರ್ ಜೋಡ್ನ್ ಘೆತಾನ್ ನೇ ತಾಂಕಾಂ ಗ್ರಹಚಾರ್ ಲಾಗ್ಲಾಂ. ಕೊಣಾಕೊಣಾಚ್ಯಾ ಬಾಯ್ಲ್ ಭುರ್ಗ್ಯಾಂವಿಶಿಂ ಬರಯ್ತಾಯ್, ಹೆರಾಂಕ್ ಹಿಜ್ಡೆ ಮ್ಹಣ್ತಾಯ್.. ತುಜ್ಯಾ ಘರ್ಚಿ ಗಜಾಲ್ ಪುಣೀ ಬರಂವ್ನ್ ಗೆಲ್ಯಾರ್ ತುಕಾ ಮುಸ್ಕಾರ್ ಲಿಪಂವ್ಕ್ ಜಾಗೊ ಮೆಳ್ಚೊ ನಾಂ. ತುಜ್ಯಾ ಪುಣ್ಯಾಕ್ ಕೊಣೀ ಕೊಂಕ್ಣಿ ಲೇಖಕ್ ಎದೊಳ್ ಪರ್ಯಾಂತ್ ತ್ಯಾ ಮಟ್ಟಾಕ್ ದೆಂವೊಕ್ ನಾ.. ಪುಣ್ ತುಂ ಅನ್ಯೇಕ್ ಪಾವ್ಟಿಂ ಕೊಣಾಯ್ಚೆಂ ಖಾಸ್ಗಿ ಜಿವಿತ್ ಉಸ್ತುಂಕ್ ವೆಶಿ ತರ್ ಹಾಂವ್'ಚ್ ತೆಂ ಬರಯ್ತಾಂ
ನಾ ದಮ್ಮಯ ಸಾಯ್ಬಾನೊಂ, ಆನಿ ಮುಕಾರ್ ಹಾಂವ್ ಕೊಣಾಚ್ಯಾ ಖಬ್ರೆಕೀ ವಚಾನಾ. ಇಂಟ್ರ್ಯೂ ಕರ್ಚೆಂ ಕಾಮ್‍ಂಚ್ ಕರ್ನಾ. ಹೆಂ ಏಕ್ ಪಾವ್ಟಿಂ ಮಾಫ್ ಕರ್ ಮಾಕಾ.
ತುಂ ತಿತ್ಲ್ಯಾ ಸುಲಾಭಾಯೆನ್ ಸುದ್ರೊಂಚೊ ಮನಿಸ್ ನ್ಹಂಯ್. ಸುಣ್ಯಾಚಿ ಶಿಮ್ಟಿ ತರೀ ವ್ಹಯ್, ತುಂ ನ್ಹಂಯ್. ತರೀ ತುಕಾ ಏಕ್ ಅವ್ಕಾಸ್ ದಿತಾಂ, ಸುದ್ರಾಲೊಯ್ ತರ್ ತುಕಾ ಬರೆಂ, ಅಶೆಂಚ್ ಅನ್ನಾಡ್'ಪಣಾಂ ಕರ್ನ್ ರಾವ್ಲೊಯ್ ತರ್ ತುಜೆ ಆನಿಕೀ ಮೊಸ್ತು ಸ್ಕ್ರೀನ್ ಶೋಟ್ ಆಸಾತ್, ಪೂರಾ ಭಾಯ್ರ್ ಘಾಲ್ನ್ ತುಜೆಂ ಅಸ್ಲಿ ರೂಪ್ ಮುಕಾರ್ ಹಾಡ್ತಾಂ, ಆತಾಂ ನಿಕಳ್ ಹಾಂಗಾ ಥಾವ್ನ್.
ತಿತ್ಲೆಂ ಆಯ್ಕಾಲೆಂಚ್ ಟೆನ್ಶನ್ ಅಂಕಲಾಚ್ಯಾ ಪಾಯಾಂಕ್ ಪಡ್ 'ಲ್ಲೊ ಬಾಬಣ್ಣ ಉಟ್ಲೊ, 'ವಾಂಚೊನ್ ಉರ್ಲ್ಯಾರ್ ಹ್ಯಾಂಡ್ ಬಿಲ್ಲಾಂ ವಾಂಟುನ್ ದೀಸ್ ಕಾಡ್ತಾಂ' ಮ್ಹಣ್ ಚಿಂತುನ್ ಎಕಾಚ್ ದಮ್ಮಾರ್ ಧಾಂವೊನ್ ವಚೊನ್ ಬೆಳ್ತಂಗಡಿ ವೆಚ್ಯಾ ಬಸ್ಸಾರ್ ಚಡ್ಲೊ.
No comments:
Post a Comment