ಭುರ್ಗ್ಯಾಂಚೊ ದೀಸ್ 'ತ್ಯಾ' ಭುರ್ಗ್ಯಾಂಚೊಯೀ ಜಾಂವ್...

ಆಮ್ಚಾ ದೇಶಾಂತ್ ವಿಶೇಸ್ ದಿಸಾಂಕ್ ಕಾಂಯ್ ಬರ್ಗೊಳ್ ನಾ. ಹರ್ಯೇಕಾ ಹಫ್ತ್ಯಾಂತ್, ಮಹಿನ್ಯಾಂತ್ ಕಿತೆಂ ನಾ ಕಿತೆಂ ವಿಶೇಸ್ ದೀಸ್ ಆಸ್ತಾಚ್.! ಪುಣ್ ಅಮ್ಚಾ ದೇಶಾಚೊ ವಿಪರ್ಯಾಸ್ ಮ್ಹಳ್ಯಾರ್ ಹಾಂಗಾಸರ್ ವಿಶೇಸ್ ದೀಸ್ ಕಿತ್ಲೆ ಚಡ್‍ಗೀ, ತಾಂಚಾ ಸಂಭ್ರಮಾಪಾಟ್ಲೊ ಅರ್ಥ್ ಮಾತ್ರ್ ತಿತ್ಲೊಚ್ ಉಣೊ. ಅಸಲ್ಯಾ ಆಮ್ಚಾ ದೇಶಾಂತ್ ನವೆಂಬ್ರಾಚೊ ಚವ್ದಾವೊ ದೀಸ್ - ಭುರ್ಗ್ಯಾಂಚೊ.! ಇಸ್ಕೊಲಾಂತ್ ಭುರ್ಗ್ಯಾಂಕ್ ಖೆಳ್, ನಾಚ್ ಆನಿ ಹೆರ್ ಮನೋರಂಜನ್, ಗಾಂವ್ಚಾ ದಾನಿಂನಿ ದಿಲ್ಲಿ ಮಿಠಾಯ್, ಆನಿ ಅರ್ಧ್ಯಾ ದಿಸಾಚಿ ರಜಾ.! ಹರೇಕಾ ದಿಸಾಳ್ಯಾರ್ ಭುರ್ಗ್ಯಾಂಚಾ ತಸ್ವೀರೆಂಚೊ ಸ್ಪರ್ದೊ ಆನಿ ಆಜ್ ಕಾಲ್ ಟಿ.ವಿ ಚಾನೆಲಾನಿಂ ಸಯ್ತ್ ಭುರ್ಗ್ಯಾಂಚಿಂ ಫಿಲ್ಮಾಂ. ದೀಸ್ ಸಂಪ್ಲೊ, ಸವೆಂ ಸಂಭ್ರಮ್‍ಯೀ. ದುಸ್ರ್ಯಾ ದಿಸಾಥಾವ್ನ್ ಸುರು ಪರತ್ ತೆಂಚ್ ಯಾಂತ್ರಿಕ್ ಜೀವನ್.! ಹಿ ಆಮಿ ಪಳೆಂವ್ಚಿ ಯಾ ಆಮ್ಕಾಂ ದಿಸ್ಚಿ, ದೆಕುನ್ ಆಮಿ ಜಾಣಾಸ್ಚಿ ಏಕ್ ಕೂಸ್.! ವಾಟ್ಲೆಂತ್ ಭರ್ನ್ ನೂಡಲ್ಸ್ ಘೆವ್ನ್ ಕುಲೆರಾಂತ್ ತೆಂ ವೊಳಾವ್ನ್, ಎದೊಳ್‍ಚ್ ಪೋಟ್ ಭರ್‍ಲ್ಲ್ಯಾ ಭುರ್ಗ್ಯಾಚಾ ತೊಂಡಾಕ್ ಚೆಪುನ್ ಭುರ್ಗ್ಯಾನ್ ತೆಂ ಸೆಂವ್ಕ್ ನೆಗಾರ್ತಾನಾ 'ಮ್ಹಜೊ ಭುರ್ಗೊ ಜೇಂವ್ಕ್‍ಚ್ ಆಯ್ಕಾನಾಮೂ' ಅಶೆಂ ಶಿಣ್ ಉಚಾರ್ಚಿ ಆವಯ್ ಏಕ್‍ಕಡೆಂ ತರ್; ತ್ಯಾ ಘರಾ ಕಾಮಾಕ್ ಆಯಿಲ್ಲಿ - 'ತ್ಯಾ ಭುರ್ಗ್ಯಾಂಚಾ ವಾಟ್ಲೆಂತ್ ಉರುಲ್ಲೆಂ ಕಾಂಯ್ ಆಪ್ಣಾಕ್ ಭಾಂದುನ್ ವರುಂಕ್ ದಿತಿತ್ ತರ್ ಮ್ಹಜಾ ಭುಕೆಲ್ಲ್ಯಾ ಪುತಾಚಾ ಪೊಟಾಕ್ ಕಾಂಯ್ ಇಲ್ಲೊ ಗ್ರಾಸ್ ಜಾಯ್ತ್' ಅಶೆಂ ಸಪ್ಣೆಂವ್ಚಿ ಆನ್ಯೇಕ್ ಆವಯ್.! ರಿಬೋಕ್, ಆಲೆನ್ ಸೋಲಿ, ಕ್ಯಾಟರ್ ಪಿಲ್ಲರ್ ಆನಿ ಕಿತೆಂ ಮಾತ್ತಿ ಗೊಬೊರ್ ಮ್ಹಣ್ ಬಾಪಯ್ಚಾ ಕುಸ್ತಾಂತ್ಲೆಂ ಹಜಾರಾನಿಂ ಯೆಟುನ್ ಮುಸ್ತಾಯ್ಕಿ, ವ್ಹಾಣೊ, ವೊಚಾಂ, ಗೋಗಲ್ಸ್ ಘೆವುನ್ ಏಕ್‍ಪಾವ್ಟಿಂ ವಾಪ್ರುನ್ ಕುಶಿಕ್ ಉಡವ್ನ್ ನವ್ಯಾನ್ ಶೊಪಿಂಗಾಕ್ ವೆಚಿಂ ಭುರ್ಗಿಂ ಏಕ್‍ಕಡೆ ತರ್, ಪ್ರಾಯೆತೆಕಿದ್ ಕೂಡ್ ವಾಡ್ತಾನಾ 'ಮಾನ್ ಧಾಂಕುಂಕ್ ಗರ್ಜೆ ಪುರ್ತೊ ಲುಗ್ಟಾ ತೀರ್ ಕೊಣಾಯ್ಚೊ ಮೆಳಾತ್‍ಗಾಯ್' ಅಶೆಂ ಸಪ್ಣೆಂವ್ಚಿ ಭುರ್ಗಿಂ ಅನ್ಯೇಕಾ ಕುಶಿನ್.! ಆಮಿ ಪಳೆಲ್ಲ್ಯಾ, ಆಮ್ಕಾಂ ದಿಸ್ಪೊಡ್ತೆಂ ದಿಸ್ಚಾ ಎಕಾ ಕುಶಿ ಬಿತಲ್ರ್ಯೊ ದೋನ್ ಕುಶಿ ಹ್ಯೊ.! ಹ್ಯಾ ಶಿವಾಯ್ ಆಮ್ಕಾಂ ದಿಸಾನಾತ್‍ಲ್ಲಿ ಆನ್ಯೇಕ್ ಕೂಸ್ ಆಸಾ - ನೆಹರುಚಾ ಜಲ್ಮಾ ದಿಸಾ ಹರ್ಶೆಂಚೆಪರಿಂ ನೆಹರುಕ್ ಆನಿ ತಾಚಾ ಖಾಂದಾನಾಕ್ ಫುಲಾಂ ಘಾಲ್ಚಾಪ್ರಾಸ್ ಆಮ್ಕಾಂ ಕಳಿತ್ ನಾತುಲ್ಲ್ಯಾ ಯಾ ಕಳಿತ್ ಆಸೊನೀ ಆಮಿ ಚಡ್ ಗುಮಾನ್ ದೀನಾತುಲ್ಲ್ಯಾ ಹ್ಯಾ ದುಸ್ರ್ಯಾ ಕುಶಿಂತ್ಲ್ಯಾ ನಾಗ್ಡ್ಯಾ ಸತಾಂವಯ್ರ್ ಉಜ್ವಾಡ್ ಘಾಲ್ಯಾರ್ ಕಾಂಯ್ ಪುಣೀ ಉಪ್ಕಾರಾಕ್ ಪಡಾತ್.!

ಆಮ್ಚಾ ದೇಶಾಂತ್...

• ಆಮ್ಚಾ ದೇಶಾಚಾ ಒಟ್ಟು ಲೊಕಾಸಂಖ್ಯಾಂಚಾ ತಿನಾಂತ್ ಏಕ್ ವಾಂಟೊ ಭುರ್ಗಿಂ, ಮ್ಹಣ್ಜೇ 18 ವರ್ಸಾ ಭಿತರ್ಲಿಂ ಆಸಾತ್.
• ಎಕಾ ಸಮೀಕ್ಶೆ ಪ್ರಕಾರ್ 1000 ಚೆಡ್ಯಾಂಚಾ ಸಂಖ್ಯಾಕ್ ತುಕುನ್ ಪಳೆತಾನಾ ಚೆಡ್ವಾಂಚೊ ಸಂಖೊ ಫಕತ್ 927.
• ಹರೇಕಾ ಶೆಂಭರಾಂತ್ಲಿಂ 16 ಭುರ್ಗಿಂ ಅರ್ಧ್ಯಾರ್ ಇಸ್ಕೊಲಾಕ್ ವೆಚೆಂ ರಾವಯ್ತಾತ್
• ಅಶೆಂ ಇಸ್ಕೊಲಾಕ್ ವೆಚೆಂ ಬಂಧ್ ಕೆಲ್ಲ್ಯಾ 100 ಭುರ್ಗ್ಯಾಂ ಪಯ್ಕಿಂ 66 ಚೆಡ್ವಾಂ.
• ಹ್ಯಾ ಪಯ್ಕಿಂ 65% ಚೆಡ್ವಾ ಭುರ್ಗ್ಯಾಂಕ್ 18 ವರ್ಸಾಂ ಪ್ರಾಯ್ ಭರ್ಚಾ ಪಯ್ಲೆಂ ಕಾಜಾರ್ ಜಾತಾ ಆನಿ ಹಾಂತ್ಲಿಂ ಜಾಯ್ತಿಂ ಎಕಾಚ್ ವರ್ಸಾ ಭಿತರ್ ಆವಯ್ ಜಾತಾತ್.
• ಹರೇಕ್ ಸೊಳಾ0ತ್ಲೆಂ ಏಕ್ ಭುರ್ಗೆಂ ಏಕ್ ವರಸ್ ಪ್ರಾಯ್ ಭರ್ಚಾ ಭಿತರ್‍ಚ್ ಮರಣ್ ಪಾವ್ತಾ.
• ಅಭಿವ್ರಧ್ಧಿ ಜಾವ್ನ್ ಯೆಂವ್ಚಾ ರಾಷ್ಟ್ರಾಂಪಯ್ಕಿಂ, ಸತ್ವಾ ಭರಿತ್ ಖಾಣ್ ಮೆಳಾನಾಸ್ತಾಂ ವಿವಿಧ್ ಪಿಡೆಂಕ್ ಬಲಿ ಜಾಂವ್ಚಿಂ 40% ಭುರ್ಗಿಂ ಆಮ್ಚಾ ದೇಶಾಂತ್ ಆಸಾತ್.
• ಸಂಸಾರಾಂತ್ಲ್ಯಾ ಖಂಚಾಯೀ ಎಕಾ ದೇಶಾಂತ್ ಆಸ್ಚೆಪ್ರಾಸ್ ಚಡ್ ಬಾಳ್ ಕಾಮೆಲಿ ಆಮ್ಚಾ ದೇಶಾಂತ್ ಆಸಾತ್.
• ಹರೇಕಾ 155 ಮಿನುಟಾನಿಂ 16 ಭುರ್ಗ್ಯಾಂಚೆರ್ ಲೈಂಗಿಕ್ ಅತ್ತ್ಯಾಚಾರ್ ಚಲ್ತಾ.

Info Change ಮ್ಹಳ್ಳ್ಯಾ ಅಂತರ್ಜಾಳಿ ಥಾವ್ನ್ ಆರಾಯಿಲ್ಲೆ ಆಂಕ್ಡೆ ಹಾವೆಂ ವಯ್ರ್ ದಿಲ್ಯಾತ್. ಹೆ ಕಿತ್ಲೆ ಪಾತ್ಯೆಣೆ ಯೋಗ್ಯ್ ತೆಂ ಸ್ಪಷ್ಟ್ ಸಾಂಗೊಂಕ್ ಕಷ್ಟ್ ತರೀ ಹಾಂತ್ಲೆ ಭೋವ್‍ತೇಕ್ ಆಂಕ್ಡೆ ವಾಸ್ತವ್ ಸಂಗ್ತಿ ಭೊಂವ್ತಿಲ್ಯಾನ್ ಘುಂವ್ತಾತ್ ತೆಂ ಖಂಡಿತ್. ಪುಣ್ ಹ್ಯಾ ಆಂಕ್ಡ್ಯಾಂಕ್ ಪೂರಕ್ ಥೊಡ್ಯೊ ಸಂಗ್ತಿ ಜ್ಯೊ ಹಾವೆಂ ಮ್ಹಜಾಚ್ ದೊಳ್ಯಾನಿಂ ಪಳೆಲ್ಲ್ಯೊ ತ್ಯೊ ಅಶ್ಯೊ ಆಸಾತ್..

2009 ಅಕ್ಟೋಬರ್ 8

ತವಳ್ ಹಾಂವ್ L & T Ltd   ಕಂಪೆನಿಂತ್ ಬೆಂಗ್ಳುರ್ ಕಾಮ್ ಕರ್ನ್ ಆಸ್‍ಲ್ಲೊಂ. ಆಮ್ಚಾ ಎಕಾ ಸಹವಾವ್ರಾಡ್ಯಾಚಾ ಕಾಜಾರಾಕ್ ಮ್ಹಣ್ ಆಮಿ ಸಾತಾಟ್ ಮಿತ್ರ್ ತಮಿಳ್‍ನಾಡುಚಾ ಸತ್ತೂರ್ ಮ್ಹಳ್ಳ್ಯಾ ಗಾಂವಾಕ್ ಪಾವ್‍ಲ್ಲ್ಯಾಂವ್. ಕಾಜಾರ್ ಮುಗ್ಧುನ್ ಪಾಟಿಂ ಘುಂವ್ತಾನಾ ತಮಿಳ್‍ನಾಡುಚಾಚ್ ಆಮ್ಚಾ ಎಕಾ ಮಿತ್ರಾನ್ ಲಾಗಿಂಚ್ ಆಸ್ಚಾ ಶಿವಕಾಶಿ ಮ್ಹಳ್ಳ್ಯಾ ಲಾನ್ಶಾ ಶ್ಹೆರಾಕ್ ಭೆಟ್ ದಿಂವ್ಚಿ ಆಲೋಚೆನ್ ದಿಲಿ. ಕಾರಣ್ ಶಿವಕಾಶಿ ಧಾರುಂಚಾ ಕಾರ್ಖಾನ್ಯಾಂಕ್ ಭೋವ್ ನಾಂವಾಡ್ಧಿಕ್. ಆಮ್ಚಾ ದೇಶಾಂತ್ ತಯಾರ್ ಜಾಂವ್ಚಾ ಧಾರುಂತ್ ಸುಮಾರ್ 70% ಚಾಕೀ ಚಡ್ ಧಾರು ಹ್ಯಾ ಗಾಂವಾಂತ್ ಉತ್ಪತ್ ಜಾತಾ. ಧಾರು ಮಾತ್ರ್ ನ್ಹಂಯ್, ಪ್ರಿಂಟಿಂಗ್ ಆನಿ ಕಾಡಿಯಾಂಪೆಟಿಂಚೆ ಕಾರ್ಖಾನೆಯೀ ಹಾಂಗಾ ಜಾಯ್ತೆ ಆಸಾತ್. ಸುಮಾರ್ ಧೋನ್ ಹಪ್ತ್ಯಾಂ ಉಪ್ರಾಂತ್ ದಿವಾಳಿಚಿ ಪರಬ್ ಆಸ್‍ಲ್ಲ್ಯಾನ್, ಆನಿ ತ್ಯಾ ಪರ್ಬೆಕ್ ಆಮಿ ಸಾಂಗಾತಾ ಮೆಳೊನ್ ಧಾರು ಲಾಸ್ಚೆಂ ಆಸ್‍ಲ್ಲೆಂ ದೆಕುನ್, "ಕಶೆಂಯೀ ಸತ್ತೂರ್ ಅಯ್ಲ್ಯಾಂವ್ ಹಾಂಗಾಥಾವ್ನ್ 25 ಕಿಲೋಮೀಟರ್ ಪಯ್ಸ್ ಶಿವಕಾಶಿ ಆಸಾ. ಪಟಾಕ್ಯಾಂಚೆ ಕಾರ್ಖಾನೆ ಹಾಂಗಾ ಜಾಯ್ತೆ ಆಸಾತ್ ಜಾಲ್ಲ್ಯಾನ್ ಸವಾಯೆರ್ ಘೆವ್ಯೆತ್" ಅಶೆಂ ಆಮ್ಚಾ ಮದ್ರಾಸಿ ಮಿತ್ರಾಚಾ ಉಲ್ಯಾಕ್ ತಾಳೊ ದೀವ್ನ್ ಆಮಿ ಶಿವಕಾಶಿ ಪಾವ್ಲ್ಯಾಂವ್. ಹಳ್ತಾಚೆ ಪೇಂಟ್ ತಿ. ಆತ್ತಾಂಗೀ ಮಾಗಿರ್‍ಗೀ ಪಡ್ತಾಂ ಮ್ಹಳ್ಳೆಪರಿಂ ಭೊಂವ್ತಣಿಂ ಆಸ್‍ಲ್ಲಿಂ ಗುಡ್ಸುಲಾಂ ಥಂಯ್ಚಾ ಲೊಕಾಚಾ ಆರ್ಥಿಕ್ ಸ್ಥಿತೆಕ್ ಆರ್ಸೊ ಧರ್ತಾಲಿಂ. ಗಾಂವ್ ಉತ್ರೊನ್ ಪೆಂಟೆ ಭಿತರ್ ಸರ್ತಾನಾ ಥಂಯ್ ಹಾಂಗಾ ಚಡ್‍ಶೆಂ ಪಟಾಕೆಚಿಂ ದುಖಾನಾಂ, ಗೋಡೌನಾಂ. ಮಧೆಂ ತೆಣೆಂ ಹೆಣೆಂ ಪ್ರಿಂಟಿಂಗ್ ಪ್ರೆಸ್ಸಾಂ. ಹಳ್ತಾಚಾ ಎಕಾ ಆಂಗ್ಡಿಮುಕಾರ್ ರಾವೊನ್ ಧಾರು ಮೊಲಾಯ್ತಾನಾ ಮ್ಹಜಿ ದೀಶ್ಟ್ ಮುಕ್ಲ್ಯಾನ್ ಪಾಟಾಪಾಟ್ ಪಾಶಾರ್ ಜಾಲ್ಲ್ಯಾ ತೀನ್ ಬಸ್ಸಾಂಚೆರ್ ಗೆಲ್ಲಿ.! ಎಕೇಕಾ ಬಸ್ಸಾರ್ ಕಾಂಯ್ ಶೆಂಭೊರಾಚಾಕೀ ಚಡ್ ಭುರ್ಗಿಂ. ತಾಂಚಿ ಪ್ರಾಯ್ ಕಾಂಯ್ 6 ಥಾವ್ನ್ 12 ಬಿತರ್ ಅಸ್ಯೆತ್. ತಿಂ ಭುರ್ಗಿಂ ಬಸ್ಸಾರ್ ಬಸೊನ್ ಖಂಯ್‍ಗೀ ವೆತಾಲಿಂ ಮ್ಹಣ್ಚಾಕೀ ತಾಂಕಾಂ ತ್ಯಾ ಬಸ್ಸಾ ಭಿತರ್ ಚೆಪುನ್ ಖಂಯ್ಸರ್‍ಗೀ ವರ್ತಾಲೆ ಮ್ಹಣ್ಚೆಂ ಚಡ್ ಸಾರ್ಕೆಂ.! ಆತುರಾಯ್ ತಡ್ವುಂಕ್ ಜಾಯ್ನಾಸ್ತಾನಾ ತ್ಯಾ ದುಖಾನಾಕ್ ಆಯಿಲ್ಲ್ಯಾ ಎಕಾ ಗಿರಾಯ್ಕಾಲಾಗಿಂ ವಿಚಾರ್ಲೆಂ ಹಾವೆಂ. ತಾಚಿ ಜಾಪ್ ಆಯ್ಕೊನ್ ಹಾಂವ್ ಥಟಾಕ್ ಜಾಲ್ಲೊಂ. ತ್ಯಾ ಸರ್ವ್ ಭುರ್ಗ್ಯಾಂಕ್ ದಾರುಂಚಾ ಕಾರ್ಖಾನ್ಯಾಂಕ್ ಕಾಮಾಕ್ ಆಪವ್ನ್ ವರ್ಚಿಂ ಆನಿ ಪಾಟಿಂ ಘರಾ ಪಾಂವ್ಚಿಂ ಬಸ್ಸಾಂ ತಿಂ. ತ್ಯಾ ಗಾಂವಾಂತ್ ಭುರ್ಗ್ಯಾಂಕ್ ಇಸ್ಕೊಲಾಕ್ ಧಾಡ್ಚೆಂ ಉಣೆಂ. ಧಾಡ್ಲ್ಯಾರೀ ದೋನ್ ತೀನ್ ವರ್ಸಾಂಕ್ ಇಸ್ಕೊಲ್ ಕಯ್ದ್ ಕರ್ನ್ ಪಟಾಂಕ್ಯಾಚಾ ಕಾರ್ಖಾನ್ಯಾನಿಂ ಕಾಮಾಕ್ ಲಾಯ್ತಾತ್. ಕಾರ್ಖಾನ್ಯಾನಿಂ ಸಯ್ತ್ ಹ್ಯಾ ಬಾಳ್ ಕಾಮೆಲ್ಯಾಂಕ್‍ಚ್ ಚಡ್ ಡಿಮಾಂಡ್. ಪಟಾಕ್ಯೊ ತಯಾರ್ ಕರ್ಚೆಂ ಕಾಮ್ ಭಾರೀ ಸುಲಭಾಯೆಚೆಂ. ಬಾರಾ ತೆರಾ ವರ್ಸಾಂಚಾ ಭುರ್ಗ್ಯಾನಿಂ ಸುಲಾಭಾಯೆನ್ ಆನಿ ಆಪುರ್ಬಾಯೆನ್ ಕರ್ಯೆತ್ ತಸಲೆಂ. ಆನಿ ಕಾರ್ಖಾನ್ಯಾಚಾ ಧನಿಯಾಂಕೀ ಹ್ಯಾ ಬಾಳ್ ಕಾಮೆಲ್ಯಾಂವರ್ನಾಂ ಕಾಮ್ ಕರಂವ್ಚೆಂ ಆರ್ಥಿಕ್ ರಿತಿನ್ ಭಾರಿಚ್ ಫಾಯ್ದ್ಯಾಚೆಂ. ವ್ಹಡಾಂಕ್ ದಿಸಾಕ್ ಉಣ್ಯಾರ್ ತರೀ ದೆಡ್ಶೆಂ ರುಪಯ್ ಸಾಂಭಾಳ್ ದೀಜೆ ತರ್ ಹ್ಯಾ ಭುರ್ಗ್ಯಾಂಕ್ ದಿಸಾಕ್ 40 ರುಪಯ್ ಮೆಜ್ಲ್ಯಾರ್ ಪುರೊ, ತೆಂಯೀ ದಿಸಾಕ್ ಬಾರಾ ವೊರಾಂಚಾ ಕಾಮಾಕ್.! ಮಾತ್ರ್ ನ್ಹಂಯ್, ಭುರ್ಗಿಂ ದೆಕುನ್, 'ಯೂನಿಯನ್ ಭಾಂದ್ತಿತ್, ಸ್ಟ್ರೈಕ್ ಕರ್ತಿತ್' ಅಸಲಿ ಭಿರಾಂತ್ ಸಯ್ತ್ ನಾಂ.! ಘರಾಂ ಘರಾಂನಿ ವಚೊನ್ ಭುಗ್ರ್ಯಾಂಕ್ ಆಪವ್ನ್ ಹಾಡ್ನ್ ಕಾಮ್ ಕರವ್ನ್ ತಾಂಚಾ ಆದಾಯಾಂತ್ಲೆಂ ಇಲ್ಲೆಂ ಕಮಿಶನ್ ಘೆವ್ನ್ ತಾಂಕಾಂ ಪಾಟಿಂ ಘರಾ ಪಾವಂವ್ಚಾ ಏಜೆಂಟಾಂಚೆಂ ವೆವಸ್ತಿತ್ ಜಾಳ್‍ಚ್ ಹಾಂಗಾಸರ್ ಆಸಾ. ತವಳ್ ಪರ್ಯಾಂತ್ ಹಾಂವ್ ತೆಣೆಂ ಹೆಣೆಂ ವಾಚುನ್ ಜಾಣಾಸ್‍ಲ್ಲೊಂ ಕೀ, ಪಟಾಕೆಂಚಾ ಕಾರ್ಖಾನ್ಯಾನಿಂ ಬಾಳ್ ಕಾಮೆಲ್ಯಾಂಕ್ ಚಡ್‍ಶೆಂ ವಾಪಾರ್ತಾತ್ ಮ್ಹಣ್. ಪುಣ್ ತೆಂ ಕಿತ್ಲ್ಯಾ ತೀವ್ರ್ ಮಾಪಾನ್ ಮ್ಹಳ್ಳೆಂ ತವಳ್ ಕಳ್‍ಲ್ಲೆಂ.! ಪಟಾಕ್ಯೊ ಘೆಂವ್ಚಿ ಮ್ಹಜಿ ಉರ್ಬಾ ಪುರ್ತಿ ನಿವ್‍ಲ್ಲಿ. ತ್ಯಾ ಮದ್ರಾಸಿಲಾಗಿಂ ಹೆರ್ ಸಬಾರ್ ಮಾಹೆತ್ ಹಾವೆಂ ಘೆತ್ಲಿ. ತ್ಯಾ ಗಾಂವಾಂತ್ ಸುಮಾರ್ ಪಾಂಯ್ಶಿಂ ಲಾಗಿಂ ಪಟಾಕೆಂಚೆ ಕಾರ್ಖಾನೆ ಆಸಾತ್. ಆನಿ ತ್ಯಾ ವ್ಯಕ್ತಿನ್ ಮಾಕಾ ದಿಲ್ಲ್ಯಾ ಮಾಹೆತಿ ಫರ್ಮಾಣೆಂ ಲೇಕ್ ಘಾಲ್ಚೆಂ ತರ್ ಸುಮಾರ್ ದೋನ್ ಲಾಕಾಂವಯ್ರ್ ಕಾಮೆಲಿ ತಾಂತುಂ ಕಾಮ್ ಕರ್ತಾತ್ ಆನಿ ತಾಂತುಂ 80% ಮ್ಹಣ್ಜೆ ಸುಮಾರ್ ದೇಡ್ ಲಾಖ್ ಬಾಳ್ ಕಾಮೆಲಿ.! ತ್ಯಾ ಲ್ಹಾನ್ ಕುದ್ರ್ಯಾತಸ್ಲ್ಯಾ ಗಾವಾಂತ್ ತಿತ್ಲೆ ಬಾಳ್ ಕಾಮೆಲಿ ತರ್ ಆಖ್ಖ್ಯಾ ದೇಶಾಂತ್ ಕಿತ್ಲೆ ಆಸ್ತಿತ್..?!

ಶಿಕಾಪ್ ಸೊಡ್ಯಾಂ.. ತ್ಯಾ ಗಾಂವ್ಚಾ ಲೊಕಾಕ್ ಪೊಟಾಚೊ ಗ್ರಾಸ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ಪಡೊನ್ ಗೆಲ್ಲೆಂ ನಾ, ತಿತ್ಲಿಯೀ ದುಬ್ಳಿಕಾಯ್.! ದೀಸ್‍ಭರ್ ತ್ಯಾ ಪಟಾಕೆಂಚಾ ಕಾರ್ಖಾನ್ಯಾನಿಂ ಕಾಮ್ ಕರ್ಚಾ ಭುರ್ಗ್ಯಾಂಚಾ ಭಲಾಯ್ಕೆ ವಿಶಿಂ ಕಾರ್ಖಾನ್ಯಾಚಾ ಧನಿಯಾಂಕ್ ಕಾಂಯ್ ಪಡೊನ್ ಗೆಲ್ಲೆಂ ನಾ. ಪಡೊನ್ ವೆತೆಲೆಂ ತರೀ ಕಿತ್ಯಾಕ್, ತ್ಯಾ ಭುರ್ಗ್ಯಾಂಥಾವ್ನ್ ತಿದೊಡೊ ಮುನಾಫೊ ಮೆಳ್ತಾನಾ.?! ತ್ಯಾ ನೆಣ್ತ್ಯಾಂಚಾ ವಡಿಲಾಂಕ್ ಸಯ್ತ್ ತೆ ವಿಶಿಂ ಕಳಿತ್ ಆಸ್ಚೆಂ ದುಬಾವಾಚೆಂ. ಕಳಿತ್ ಆಸ್ಲ್ಯಾರೀ ಭುರ್ಗ್ಯಾಂಕ್ ಪೊಸ್ಚಿ ತಾಂಕ್ ನಾತ್‍ಲ್ಲ್ಯಾ ತಾಂಕಾಂ ಆಪ್ಲ್ಯಾ ಭುರ್ಗ್ಯಾಂಕ್ ತ್ಯಾ ಕಾರ್ಖಾನ್ಯಾನಿಂ ಕಾಮಾಕ್ ಧಾಡ್ಲ್ಯಾ ಶಿವಾಯ್ ನಿರ್ವೊಗ್ ನಾಂ. ಗನ್ ಪೌಡರ್, ಸಲ್ಫರ್, ಅಲ್ಯುಮೀನಿಯಂ ಪೌಡರ್, ನೈಟ್ರಿಕ್ ಆಸಿಡ್ ತಸಲ್ಯೊ ಮಾರೆಕಾರ್ ರಾಸಾಯನಿಕ್ ವಸ್ತು ರಿತ್ಯಾ ಹಾತಾನಿಂ ಆಪಡ್ಲ್ಯಾರ್ ಕಾತಿಚಿ ಅಲರ್ಜಿ ಜಾಯ್ತ್, ಮುಕಾರ್ ತಿ ಅಲರ್ಜಿ ಕಾತಿಚೆಂ ಕ್ಯಾನ್ಸರ್ ಜಾವ್ನ್ ಬದ್ಲಾತ್ ಯಾ ತ್ಯಾ ರಾಸಾಯನಿಕಾಂ ಥಾವ್ನ್ ಉಬ್ಚೊ ಪಿಟೊ ಉಸ್ವಾಸಾ ಸವೆಂ ಪೊಪ್ಸಾಂಭಿತರ್ ರಿಗಾತ್ ತರ್ ಮುಕಾರ್ ತಾಂಕಾಂ ಅಸ್ತಮಾ, ಟಿ.ಬಿ. ಯಾ ಪೊಪ್ಸಾಚೆಂ ಕ್ಯಾನ್ಸರ್ ತಸಲ್ಯೊ ಮಾರೆಕಾರ್ ಪಿಡಾ ಯೆತಿತ್ ಮ್ಹಳ್ಳೆಂ ಸತ್ ತ್ಯಾ ನೆಣ್ತ್ಯಾ ಭುರ್ಗ್ಯಾಂಕ್ ಸಯ್ತ್ ಕಳಿತ್ ನಾಂ ದೆಕುನ್ ತಿಂ ಭುರ್ಗಿಂ ಅಸಲ್ಯಾ ಕಾರ್ಖಾನ್ಯಾನಿಂ ಪೆಪರಾಂಚ್ಯೊ ಬಿಡಿಯೊ ಭಾಂದ್ಚೆಂ, ತಾಂಚೆ ಬಿತರ್ ವೊಕಾತ್ ಭರ್ನ್ ವಾತಿ ಚೆಪ್ಚೆಂ ಅಸಲಿಂ ಕಾಮಾ ಕರ್ನ್ ಆಪ್ಲೆಂ ಬಾಳ್ಪಣ್ ಹ್ಯಾ ಧಾರುಂಚಾ ಕಾರ್ಖಾನ್ಯಾನಿಂ ಆಡವ್ ಘಾಲ್ನ್ ಗ್ರೇಸ್ತಾಂಚಿಂ ಕಾರ್ಯಿಂ ಸುಂರ್ಗಾರಾಂವ್ಕ್ ಜಾಯ್ ಆಸ್ಚೊ ರೊಕೆಟಿ, ಪಾವ್ಸ್, ಗರ್ನಾಳಿ, ಸುರ್‍ಸುರ್ ಕಾಡಿ ತಯಾರ್ ಕರ್ಚಾ ಮಿಸಾವಾಂತ್ ಬುಡ್ಲ್ಯಾಂತ್.!

ಆನಿಕೀ ಆಜ್ಯಾಂಪಾಚಿ ಗಜಾಲ್ ತ್ಯಾ ವೆಕ್ತಿನ್ ಮಾಕಾ ಸಾಂಗ್‍ಲ್ಲಿ ಜಾವ್ನಾಸಾ - ಹ್ಯೊ ಪಟಾಕ್ಯೊ ತಯಾರ್ ಕರುಂಕ್ ಲಾಗ್ಚೊ ಖರ್ಚ್ ಆನಿ ತಾಂಚೆಂ ವಿಕ್ರ್ಯಾ ಮೋಲ್ ತುಕುನ್ ಪಳೆಲ್ಯಾರ್ ಸುಮಾರ್ 80% ಚೊ ಮುನಾಫೊ. ಮ್ಹಣ್ಜೆ, ಶೆಂಭರ್ ರುಪಯ್ ಯೆಟುನ್ ಆಮಿ ಘೆಂವ್ಚಾ ಪಟಾಕೆಂಚಿ ಪೆಕೆಟ್ ತಯಾರ್ ಕರುಂಕ್ ಲಾಗ್ಚೊ ಖರ್ಚ್ ವೀಸ್ ರುಪಯ್ ಮಾತ್ರ್, 80 ರುಪಿಯಾಂಚೊ ಮುನಾಫೊ.! ಹೆಂ ಸಗ್ಳೆಂ ಆಟವ್ನ್ ಪಳೆತಾನಾ ಧಾರು ಲಾಸ್ಚಿ ಮ್ಹಜಿ ಉರ್ಬಾ ಪುರ್ತಿ ನಿವ್‍ಲ್ಲಿ ಆನಿ ಮ್ಹಜ್ಯಾ ಸಾಂಗಾತ್ಯಾಂಕೀ ತ್ಯಾ ವಿಶಿಂ ಸೊಡವ್ನ್ ಸಾಂಗ್ತಾನಾ ತಾಣಿಂಯೀ ತಿ ಆಶಾ ಸಾಂಡ್‍ಲ್ಲಿ.! ಏಕ್ ನವೊ ನಿರ್ಧಾರ್ ಆಮಿ ಗೆತ್‍ಲ್ಲೊ.. ಕಿತೆಂಯೀ ಕಾರ್ಯೆಂ ಆಸೊಂ, ಫೆಸ್ತ್ ಆಸೊಂ ಆಮಿ ಧಾರು ಲಾಸ್ಚೆನಾಂವ್.! ಆನಿ ಸಾಧ್ಯ್ ತರ್ ಅಸಲ್ಯಾ ಭುಗ್ರ್ಯಾಂ ಪಾಸತ್ ವಾವುರ್ತೆಲ್ಯಾ ಸರ್ಕಾರೇತರ್ ಸಂಸ್ಥ್ಯಾ(N G O )ಕ್ ತೊ ದುಡು ದಾನ್ ದಿತೆಲ್ಯಾಂವ್.!

22 ಜುಲೈ 2012

ಮಾಕಾ ಕಂಪೆನಿಚಾ ಕಾಮಾರ್ ಪಶ್ಚಿಮ್ ಬಂಗಾಳಾಂತ್ ಅಸ್ಚ್ಯಾ ಹಳ್ದಿಯಾ ಮ್ಹಳ್ಳ್ಯಾ ಗಾಂವಾಕ್ ವಚೊಂಕ್ ಆಸ್‍ಲ್ಲೆಂ. ಕಲ್ಕತ್ತಾ ಏರ್‍ಪೋರ್ಟಾಂತ್ ದೆಂವ್‍ಲ್ಲ್ಯಾ ಹಾವೆಂ ಥಂಯ್ ಥಾವ್ನ್ ಟೆಕ್ಸಿ ಕೆಲ್ಲಿ. ವಾಟೆರ್ ಆಮ್ಕಾಂ 'ಸೋನಾಗಾಚಿ' ಮ್ಹಳ್ಳೊ ಏಕ್ ಕುಖ್ಯಾತ್ ಗಾಂವ್ ಉತ್ರೊನ್ ವಚೊಂಕ್ ಆಸ್‍ಲ್ಲೆಂ. ತ್ಯಾ ಗಾಂವಾಂವಿಶಿಂ ಆನಿ ತಾಚಾ ಕುಖ್ಯಾತೆ ವಿಶಿಂ ಹಾವೆಂ ಮ್ಹಜ್ಯಾ ಬೆಂಗಾಲಿ ಇಷ್ಟಾಂಥಾವ್ನ್ ಜಾಯ್ತೆಂ ಆಯ್ಕಾಲ್ಲೆಂ ತರೀ ತೆಂ ರೂಪ್ ರೂಪ್ ದೆಕ್ಚೊ ಆವ್ಕಾಸ್ ಮಾಕಾ ತ್ಯಾ ದೀಸ್ ಮೆಳ್‍ಲ್ಲೊ.! ಅಖ್ಖ್ಯಾ ಭಾರತಾಂತ್ ಚಲ್ಚಾ ವೇಶ್ಯ್ ವ್ರತ್ತೆಚೊ ಜಲ್ಮಾಜಾಗೊ ಹೊ ಗಾಂವ್.! ಸಕಾಳಿಂಫುಡೆಂ ಧಾ ವೊರಾರ್‍ಚ್ ಥಂಯ್ಸರ್ ಕೂಡ್ ವಿಕ್ಚೊ ಧಂದೊ ಸುರು ಜಾಲ್ಲೊ. ವಿಶೇಸ್ ಕಿತೆಂಗೀ ಮ್ಹಳ್ಯಾರ್ ಉಗ್ತ್ಯಾ ರಸ್ತ್ಯಾನಿಂ ಕೊಣಾಚಿಚ್ ಭಿರಾಂತ್ ನಾ ಮಳ್ಳೆಪರಿಂ ಚಲೊನ್ ಆಸ್‍ಲ್ಲ್ಯಾ ತ್ಯಾ ವೆಪಾರಾಂತ್ ವಿಕ್ರ್ಯಾಕ್ ದವರ್ಲೆಲ್ಯೊ ಕುಡಿ ಮಾತ್ರ್ ಚಡ್‍ಶೊ ಭುರ್ಗ್ಯಾಂಚ್ಯೊ, ಮ್ಹಣ್ಜೆ 18 ವರ್ಸಾ ಭಿತರ್ಲ್ಯಾಂಚ್ಯೊ.. ಹಿ ಸಂಗತ್ ಮಾಕಾ ಕಳಿತ್ ನಾತ್‍ಲ್ಲಿ.! ಆಜಾಪ್ಲೆಲ್ಯಾ ಹಾವೆಂ ಟೆಕ್ಸಿ ಡ್ರಾಯ್ವರಾಕಡೆಂ ಹ್ಯಾ ವಿಶಿಂ ವಿಚಾರ್ಲೆಂ. ಥಂಯ್ಸ್ ಲಾಗ್ಸಾರ್ ತಾಚೊ ಗಾಂವ್ ಆಸ್ಲೊ ದೆಕುನ್ ಹ್ಯಾ ಮ್ಹಜೆಪರಿಂ ಜಾಯ್ತ್ಯಾ ಪಯ್ಣಾರ್ಯಾಂಕ್ ಜಾಪ್ ದೀವ್ನ್ ತಾಕಾ ಸವಯೆರ್ ಪಡ್‍ಲ್ಲೆಂ ತೆಂ ನೆಣಾಂ. ಪುಣ್ ತ್ಯಾ ಜಾಪಿನ್ ಮಾಕಾ ಎಕಾ ಖಿಣಾಕ್ ಹಾಲವ್ನ್ ದವರ್‍ಲ್ಲೆಂ - "ಹಾಂಗಾಸರ್ ಅಶೆಂಚ್ ಘಡ್ತಾ ಸರ್.! ಹಾಂಗಾಚಾ ಲೊಕಾಚಿ ದುಬ್ಳಿಕಾಯ್ ತಶಿ ಆಸಾ. ಆನಿ ದುಬ್ಳಿಕಾಯ್ ಆಸ್‍ಲ್ಲೆಕಡೆಂ ತಾಚೊ ಫಾಯ್ದೊ ಉಟಯ್ತೆಲೆಯೀ ಆಸ್ತಾತ್. ಹಾಂಗಾಸರ್ ಚೆಡ್ವಾಭುರ್ಗ್ಯಾಂಕ್ ತಾಂಚಿ ಕುಡಿಚಿ ವಾಡಾವಾಳ್ ಜಾಲ್ಲೆ ತಕ್ಶಣ್ ಧಂದ್ಯಾಕ್ ಧೆಂವಯ್ತಾತ್. ಕಲ್ಕತ್ತಾ 'ಹೆರಿಟೇಜ್ ಸಿಟಿ' ದೆಕುನ್ ಹಾಂಗಾಸರ್ ಟೂರಿಸ್ಟ್ ಚಡ್. ಧಂದ್ಯಾಕ್ ಧೆಂವುಲ್ಲ್ಯಾ ಸುರ್ವೆರ್ ಥೊಡಿಂ ಚೆಡ್ವಾಂ ಭುರ್ಗಿಂ ಅಸಲ್ಯಾ ಟೂರಿಸ್ಟ್ ಗಿರಾಯ್ಕಾಂಕ್ ಬಲಿ ಜಾತಾತ್ ತರ್ ಜಾಯ್ತಿಂ ಅರಬ್ ರಾಷ್ಟ್ರಾಂತ್ ಅಬ್ಲೆಶ್ಯಾಂಚೆಂ ಖಾಣ್ ಜಾತಾತ್.! ಹ್ಯಾ ಚೆಡ್ವಾಂಕ್ ಟೂರಿಸ್ಟ್ ಗಿರಾಯ್ಕಾಂಕ್ ಸಪ್ಲೈ ಕರ್ಚೆಂ, ದೇಶಾ ಥಾವ್ನ್ ಭಾಯ್ರ್ ಸಾಗ್ಸುಂಚೆಂ, ಮನ್ಶಾ ಚೊರ್ಯಾಂ ಸಾಗ್ಸಣೆಚೆಂ ಜಾಳ್ (Human Trafficking  Network ) ಇತ್ಲೆ ವೆವಸ್ತಿತ್ ರಿತಿನ್ ಕಾಮ್ ಕರುನ್ ಆಸಾಕೀ, ಕಾನೂನಾಚಾ ದಾವ್ಲೆಕೀ ತೆಂ ಮೆಳಾನಾ.! ಕಲ್ಕತ್ತಾಚಾ ಆಸ್‍ಪಾಸ್‍ಚಾ ಗಾಂವ್ಚಿಂ ಚೆಡ್ವಾಂ ಭುರ್ಗಿಂ ಮಾತ್ರ್ ನ್ಹಂಯ್, ಲಾಗ್ಶಿಲ್ಯಾ ಬಾಂಗ್ಲಾದೇಶ್, ನೇಪಾಳ್ ದೇಶಾಂ ಥವ್ನ್ ಸಯ್ತ್ ಮಾಸೂಮ್ ಚೆಡ್ವಾಂಕ್ ಕಾಮ್ ದಿಂವ್ಚಿ ಆಶಾ ಲಾವ್ನ್ ಆಪವ್ನ್ ಹಾಡ್ನ್ ಧಂದ್ಯಾಕ್ ದೆಂವಯ್ತಾತ್. ಅಶೆಂ ಮನ್ ಆಸುನ್ ಥೊಡಿಂ ಆನಿ ಮನ್ ನಾಸ್ತಾಂ ಜಾಯ್ತಿಂ ಚೆಡ್ವಾಂ ಭುರ್ಗಿಂ ಆಪ್ಲ್ಯಾ ನೆಣ್ತ್ಯಾ ಪ್ರಾಯೆರ್ ಕೂಡ್ ವಿಕ್ಚಾ ಧಂದ್ಯಾಕ್ ದೆಂವ್ತಾತ್, ಕ್ರಮೇಣ್ ತಾಂಕಾಂ ತೆಂಚ್ ಸವಯೆರ್ ಪಡ್ತಾ ಯಾ ಮನ್ ನಾಸ್ತಾಂ ತರೀ ವಾಸ್ತವ್ ಸಂಗತ್ ಸಮ್ಜೊನ್ ಘೆವ್ನ್ ತಿಂ ಹ್ಯಾ ವೆವಸ್ತೆಕ್ ವೊಳ್ಸೊನ್ ಯೆತಾತ್ ಆನಿ ಪ್ರಾಯ್ ವಾಡೊನ್ ಬಳ್ ಜಾತಾನಾ ಕಲ್ಕತ್ತ ಭಾಯ್ರ್ ವಚೊನ್ ಹೆರ್ ಶೆರಾನಿಂ ಅಸಲ್ಯಾಚ್ ಧಂದ್ಯಾಕ್ ಧೆಂವ್ತಾತ್ ಆನಿ ಸೊಭಾಯ್ ಮಾಜ್ವೊನ್ ವೆಚಾ ಹಂತಾರ್ ತಿಂಚ್ 'ಮಾಶೀ' ಜಾವ್ನ್ ಆಪ್ಲ್ಯಾಚ್ ಮಟ್ಟಾರ್ ಸ್ವಂತ್ ಧಂದೊ ಆರಂಭ್ ಕರ್ತಾತ್ ಆನಿ ತರ್ನ್ಯಾ ಚೆಡ್ವಾಂ ಭುರ್ಗ್ಯಾಂಕ್ ಧಂದ್ಯಾಕ್ ದೆಂವಯ್ತಾತ್.!" ತಾಣೆಂ ಸಾಂಗೊನ್ ಮುಗ್ಧಿತಾನಾ ಮಾಕಾ ಉಲವ್ಯಾಂ ಮ್ಹಳ್ಯಾರೀ ಉತ್ರಾಂ ಸುಟೊಂಕ್ ನಾತ್‍ಲ್ಲಿಂ.!

ಭಾಗೆವಂತ್ ಮದರ್ ತೆರೇಜಾಚೆಂ ಕಾರ್ಯಾಶೆತ್, ಕಲ್ಕತ್ತಾ ಶ್ಹೆರ್ ಆಜ್ ವೇಶ್ಯ್ ವ್ರತ್ತೆಂತ್ ಏಶ್ಯಾಂತ್‍ಚ್ ಪಯ್ಲ್ಯಾ ಸ್ಥಾನಾರ್ ಆಸಾ. ಪೊಟಾಚಾ ಭುಕೆನ್ ಆನಿ ಮನ್ಶಾಂಚಾ ಅಬ್ಲೆಸಾನ್ ಸಾಂಗಾತಾ ಮೆಳೊನ್ ಜಲ್ಮ್ ದಿಲ್ಲ್ಯಾ ಹ್ಯಾ ವ್ರತ್ತೆಕ್ ಲಾಗೊನ್ ಕಲ್ಕತ್ತಾ ಶ್ಹೆರ್ ಆನಿ ಹ್ಯಾ ವ್ರತ್ತೆಕ್ ದೆಂವುಲ್ಲಿಂ ಲಾಖಾನಿಂ ಚೆಡ್ವಾಂ ಭುರ್ಗಿಂ ಆಜ್ ಏಯ್ಡ್ಸ್ ಪಿಡೆಚೆಂ ವೈರಸ್ ವಾಂಟ್ಚಿಂ ಏಜೆಂಟಾಂ ಜಾಲ್ಯಾಂತ್.! 'ಆಯ್ಚಿಂ ಭುರ್ಗಿಂ ಫಾಲ್ಯಾಂಚಿ ಪರ್ಜಾ' ಮ್ಹಣ್ತಾತ್. ಫುಡಾರಾಂತ್ ಆಮ್ಚಾ ದೇಶಾಕ್ ತೆಂಕೊ ಜಾಂವ್ಕ್ ಆಸ್ಚಾ ಹ್ಯಾ ಪರ್ಜೆಚೊ ಭೋವ್‍ತೇಕ್ ವಾಂಟೊ ಹಾವೆಂ ವಯ್ರ್ ಉಲ್ಲೇಖ್ ಕೆಲ್ಲ್ಯಾ ಸಮಸ್ಸ್ಯಾಂಕ್ ಲಾಗೊನ್ ಕಶ್ಟಾತಾ ತರ್, ಆನಿ ಥೊಡೊ ವಾಂಟೊ ಭ್ರೂಣ್ ಹತ್ಯಾ, ಫಾವೊತೆಂ ಘಟಾಯೆಚೆಂ ಖಾಣ್ ಮೆಳ್ನಾಸ್ತಾಂ ಮರಣ್ ಪಾಂವ್ಚೆಂ, ಫಾವೊತ್ಯಾ ಪ್ರಾಯೆರ್ ಜಾಯ್ ಜಾಲ್ಲೆಂ ವಕಾತ್ ಮೆಳಾನಾಸ್ತಾಂ ಅಪಾಂಗ್ ಜಾಂವ್ಚೆಂ, ಮರಣ್ ಪಾಂವ್ಚೆಂ ಅಸಲ್ಯಾ ಕಾರಣಾಂಕ್ ಲಾಗೊನ್ ಕಶ್ಟೊನ್ ಆಸಾ. ಮುಂಬೈ, ಚೆನ್ನೈ ತಸ್ಲ್ಯಾ ಮೆಟ್ರೊ ಶ್ಹೆರಾನಿಂ ಲ್ಹಾನ್ ಭುರ್ಗ್ಯಾಂಕ್ ಕಿಡ್ನ್ಯಾಪ್ ಕರ್ನ್ ತಾಂಕಾಂ ಕುರ್ಡೆ ಯಾ ಅಪಾಂಗ್ ಕರ್ನ್ ತಾಂಚೆ ವರ್ನಾಂ ಭಿಕ್ ಮಾಗವ್ನ್ ಕೊರೊಡಾನಿಂ ಕಾಸ್ ಕರ್ಚೆಂ ಭೋವ್ ವೆವಸ್ತಿತ್ ಮಾಫಿಯಾ ಉಧ್ಯಮ್ ಆಜೂನ್ ಚಾಲು ಆಸಾ.

ಹಿ ದುಸ್ರಿ ಕೂಸ್.! ಹ್ಯಾ ಕಠೋರ್ ಕುಶಿಚಾ ದಾವ್ಲೆಂತ್ ಆಜ್ ಕೊರೊಡೊಂ ಭುರ್ಗಿಂ ಸಾಂಪ್ಡಾಂಲ್ಯಾಂತ್ ಆನಿ ಆಪ್ಣಾಕ್ ಸುಟ್ಕಾ ದೀಂವ್ಕ್ ಕೋಣ್ ತರೀ ಸೊಡ್ವೊಣ್ದಾರ್ ಉದೆವ್ನ್ ಯೇತ್ ಅಶೆಂ ಆಶೆವ್ನ್ ಆಸಾತ್. ಥೊಡ್ಯಾ ಬರ್ಯಾ ಮನಾಚಾ ಸಮಾಜ್ ಸೆವಕಾನಿಂ ಆರಂಭ್ ಕೆಲ್ಲೆ Save The Children, Give India   ತಸಲೆ ಸರ್ಕಾರೇತರ್ ಸಂಸ್ಥೆ (N G O) ಅಸಲ್ಯಾ ಭುರ್ಗ್ಯಾಂಕ್ ಮಜತ್ ಕರ್ಚಾ ಮಿಸಾಂವಾಂತ್ ಅಸಾತ್ ಆನಿ ಜಾಯ್ತ್ಯಾ ಬಾಳ್ ಕಾಮೆಲ್ಯಾಂಕ್, ಬಲತ್ಕಾರಾನ್ ವೇಶ್ಯ್ ವ್ರತ್ತೆಕ್ ದೆಂವ್‍ಲ್ಲ್ಯಾ ಚೆಡ್ವಾಭುರ್ಗ್ಯಾಂಕ್ ತಾಣಿಂ ಎದೊಳ್‍ಚ್ ಸುಟ್ಕಾ ದಿಲ್ಯಾ ಸಯ್ತ್. ತರೀಪುಣ್ ಹ್ಯಾ ಸಂಸ್ಥ್ಯಾಂಕ್ ಜಾಯ್ತೆ ಸಮಸ್ಯೆ ಫುಡ್ ಕರ್ಚೆಂ ಪಡ್ತಾತ್. ಮುಖೆಲ್ ಜಾವ್ನ್ ಹ್ಯಾ ಸಂಸ್ಥ್ಯಾಂನಿಂ ಭುರ್ಗ್ಯಾಂಕ್ ಬಚಾವ್ ಕರ್ಚಾ ವೆಳಾರ್ ಸಮಾಜೆಂತ್ಲ್ಯಾ ದುಷ್ಟ್ ಸಕ್ತ್ಯಾಂಕ್ ಫುಡ್ ಕರ್ಚೆಂ ಪಡ್ತಾ. ಅಧಿಕಾರಿ ವರ್ಗಾಚೊ ಬರೊಚ್ ಪಾಟಿಂಬೊ, ಆನಿ ದುಡ್ವಾ ಬಳ್ ಬರೆಂಚ್ ಆಸ್ಚಾ ಅಸಲ್ಯಾ ದುಷ್ಟ್ ಸಕ್ತ್ಯಾಂಕ್ ಫುಡ್ ಕರ್ಚೆಂ ಕಾಂಯ್ ಸುಲಾಭಾಯೆಚೆಂ ನ್ಹಂಯ್. ಫಾವೊತೆ ದಾಖ್ಲೆ ನಾತ್ಲ್ಯಾ ವೆಳಾರ್ ತೆ ಸುಲಭಾಯೆನ್ ಚುಕವ್ನ್  ಘೆತಾತ್ ಮಾತ್ರ್ ನ್ಹಂಯ್ ಭುರ್ಗ್ಯಾಂಕ್ ರಾಕೊಂಕ್ ಗೆಲ್ಲ್ಯಾ N G O ಚಾ ಕಾರ್ಯ್‍ಕರ್ತಾಂಚೆರ್ ಬದ್ಲಾಮ್ ಕಾಡ್ಚಿ ಸಾಧ್ಯತಾ ಸಯ್ತ್ ಆಸ್ತಾ ದೆಕುನ್ ಅಸಲ್ಯಾ ಕಾರ್ಯಾಕ್ ದೆಂವ್ಚಾ ಪಯ್ಲೆಂ ತಾಣಿಂ ಫಾವೊತಿ ಮಾಹೆತ್, ದಾಖ್ಲೆ ಆಪ್ಣಾಂವ್ಚಾ ಖಾತಿರ್ ಜಾಸೂಸಿ (Sting Operation ) ಸಯ್ತ್ ಕರಿಜೆ ಪಡ್ತಾ ಆನಿ ಹ್ಯಾ ಸಗ್ಳ್ಯಾ ಪಾಟ್ಲ್ಯಾನ್ ತಾಂಕಾಂ ಜಾಯ್ತೊ ದುಡ್ವಾ ಖರ್ಚ್ ಪಡ್ತಾ. ತಾಣಿಂ ಕರ್ಚೊ ವಾವ್ರ್ ಕಾಂಯ್ ಮುನಾಫೊ ಹಾಡ್ಚೊ ನ್ಹಂಯ್ ದೆಕುನ್, ಬರ್ಯಾ ಮನಾಚಾ ಉದಾರ್ ದಾನಿನಿಂ ದಿಂವ್ಚಾ ದಾನಾಚಾ ಕುಮ್ಕೆನ್ ಆನಿ ಕೊರ್ಪೊರೆಟ್ ಕಂಪ್ಣೆನಿಂ ದಿಂವ್ಚಾ ಕಾಂಯ್ ಇಲ್ಲೆಶಾ ಅನುದಾನಾಚಾ ಆಧಾರಾನ್ ಮಾತ್ರ್ ಹೆ ಸಂಸ್ಥೆ ಚಲ್ತಾತ್. ತಶೆಂಮ್ಹಣ್ ಹ್ಯಾ ಸಂಸ್ಥ್ಯಾಂಚೆ ಕಾರ್ಬಾರಿ ಕಾಂಯ್ 'ದುಡು ದಾನ್ ದಿಯಾ' ಮ್ಹಣ್ ಪುಲ್ಪುತ್ರೆರ್ ರಾವೊನ್ ವಿಚಾರಿನಾಂತ್ ಆನಿ ಲೊಕಾ ಸಾಮ್ಕಾರ್ ವಾಟ್ಲಿ ಸಯ್ತ್ ಭೊಂವ್ಡಾಯ್ನಾಂತ್. ಯಾ ಲಾಖ್ ದಿಲ್ಯಾಂಕ್ ಶೊಲ್ ಘಾಲ್ತಾಂವ್, ಅರ್ಧೊ ಕೊರೊಡ್ ದಿಲ್ಯಾಂಚಿ ತಸ್ವೀರ್ ಘಾಲ್ತಾಂವ್, ಆನಿ ಕೊರೊಡ್ ಪುರ್ತೊ ದಿಲ್ಲ್ಯಾಂಚಿಂ ನಾಂವಾಂ ಮಾರ್ಬಲ್ ಫೊಳ್ಯಾಚೆರ್ ಕಾಂತಯ್ತಾಂವ್ ಅಶೆಂ ಓಫರ್ ಸಯ್ತ್ ದೀನಾಂತ್ ದೆಕುನ್ ಜೆ ಕೋಣ್ 'ಮಹಾದಾನಿ' ಆಸಾತ್ ತೆ ಹಾಂಚೆಕುಶಿನ್ ಘುಂವೊನ್ ಸಯ್ತ್ ಪಳೆನಾಂತ್. ಹಾಂಕಾಂ ಅಧಾರ್ ಜಾಂವ್ಚೆಂ ಆಪ್ಲ್ಯಾ ತಾಂಕಿಪುರ್ತೆಂ ಉದಾರ್ ಮನಾನ್ ದಿಂವ್ಚಾ ಒಪಾರಿಂತ್ಲ್ಯಾ ವಿಧ್ವಿ ತಸಲ್ಯಾ ಆಮ್ ಲೊಕಾನಿಂ ಮಾತ್ರ್.!

ಆಮ್ಚಾ ಭೊವಾರಾಂತ್ ಏಕ್ ದೀಶ್ಟ್ ಘಾಲ್ಯಾಂ...

ಬುದ್ವಂತಾಂಚೊ ಜಿಲ್ಲೊ ಮ್ಹಣ್ ಫಾಮಾದ್ ಜಾಲ್ಲೊ ಗಾಂವ್ ಆಮ್ಚೊ. ಮಿಶೊನರಿಂಚಿ ಮಿನತ್ ಯಾ ಆಮ್ಚೆಂ ನಶೀಬ್ ತೆಂ ಹಾಂವ್ ನೆಣಾಂ ತರೀ ಶಿಕ್ಪಾಚೊ ಮಹತ್ವ್ ಆಮ್ಕಾಂ ಹೆರ್ ಲೊಕಾಂಚಾಕೀ ಇಲ್ಲೊ ಚಡ್ ಸಮ್ಜಾಲ್ಲ್ಯಾನ್ ಕೊಣ್ಣಾ, ಹಾಂಗಾಸರ್ ಉಣ್ಯಾರ್ ಉಣೆಂ ಭುರ್ಗ್ಯಾಂಕ್ ಹೈಸ್ಕೂಲ್ ಶಿಕಾಪ್ ತರೀ ಮೆಳ್ತಾ. ಉರುಲ್ಲ್ಯಾ ಗಾಂವಾಂಕ್ ತುಕುನ್ ಪಳೆಲ್ಯಾರ್ ಬಾಳ್ ಕಾಮೆಲಿ, ಭಿಕ್ ಮಾಗಂವ್ಚೆಂ, ವೇಶ್ಯಾವ್ರತ್ತಿ ಹೆಂ ಸರ್ವ್ ಆಮ್ಚಾ ಗಾವಾಂತ್ ಉಣೆಂ ಯಾ ನಾಂಚ್ ಮ್ಹಣ್ಯೆತ್. ತ್ಯಾ ಅರ್ಥಾರ್ ಆಮಿ ಮಾತ್ಶೆ ಭಾಗಿ ಮ್ಹಣ್ಯೆತ್ ತರೀ, ತಶೆಂ ಮ್ಹಣ್ಚೆಪರಿಂ ನಾ.! ಪೊಟಾ ಭುಕೆಖಾತಿರ್ ಕಾರ್ಖಾನ್ಯಾನಿಂ ಕಾಮ್ ಕರ್ಚಿಂ ಭುರ್ಗಿಂ ಆಮ್ಚೆ ಸಮಾಜೆಂತ್ ನಾಂತ್ ತರೀ, ಭುಕ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂಚ್ ನೆಣಾಸ್ತಾನಾ 'ವಿಚಾರ್‍ಲ್ಲೆಂ ಸಕ್ಕಡ್ ಮೆಳ್ತಾ' ಮ್ಹಳ್ಳ್ಯಾ ಎಕಾಚ್ ಧಯ್ರಾನ್ ಕಿತೆಂಚ್ ಕಾಮ್ ಕರುಂಕ್ ಶಿಕಾನಾಸ್ತಾಂ ಟಿ.ವಿ. ಕಂಪ್ಯೂಟರ್, ಐಪೋಡ್ ಆನಿ ಐಪ್ಯಾಡ್ ಸಂಸ್ರಾಂತ್ ಆಮ್ಚಿಂ ಭುರ್ಗಿಂ ಸಾಂಡುನ್ ಗೆಲ್ಯಾಂತ್ ತಿ ಗಜಾಲ್ ಭೋವ್ ಬೆಜಾರಾಯೆಚಿ. ನ್ಹೆಸೊಂಕ್ ವಸ್ತುರ್ ನಾಸ್ತಾಂ ವಿಣ್ಗಿಂ ಭೊಂವ್ಚಿಂ ಭುರ್ಗಿಂ ಆಮ್ಚೆ ಸಮಾಜೆಂತ್ ನಾಂತ್ ತೆರೀ ಫೆಶನಾಂಚಾ ನೀಬಾನ್ ಆಮ್ಚಿಂ ಭುರ್ಗಿಂ ಅರ್ಧೆಂಕುರೆಂ ನ್ಹೆಸೊನ್ ಭೊಂವ್ತಾತ್ ತಿ ಗಜಾಲ್ ಭೋವ್ ನಾಲಿಸಾಯೆಚಿ.! ವ್ಹಯ್, ಆಧುನಿಕ್ ಮಾಧ್ಯಮಾನಿಂ ಆಮ್ಚಾ ಭುಗ್ರ್ಯಾಂಚಾ ತಕ್ಲೆಂತ್ ಪಿಂರ್ಗಿ ಸಂಸಾರಾಚಿ ಪಿಸಾಯ್ ಕಿರ್ಲಾಯ್ಲ್ಯಾ ಆನಿ ತಾಂಚಿಂ ವ್ಹಡಿಲಾಂ ಗಲ್ಫಾಚೊ ದುಡು ವೊತುನ್ ಹ್ಯಾ ಪಿಸಾಯೆಚೊ ಪೋಸ್ ಕರಿತ್ ಆಸಾತ್.! ಹ್ಯಾ ಮಧ್ಘಾತ್ ಕೊಣಾಯ್ಚಾ ಹೆಳ್ಕೆವಿಣೆಂಚ್ ಅಮ್ಚಿಂ ಭುರ್ಗಿಂ ಜಿಣ್ಯೆಂತ್ ಭೋವ್ ಗರ್ಜೆಚಿ ಸಂಗತ್ ಹೊಗ್ಡಾಯ್ತೇ ಆಸಾತ್ - ಜಿಣ್ಯೆಮೊಲಾಂ.!

ಹ್ಯಾ ವರ್ಸಾಚಾ ಭುಗ್ಯಾಂಚಾ ದಿಸಾಚಾ ಧಾ ದಿಸಾಂ ಪಯ್ಲೆಂ ಮ್ಹಣ್ಜೇ ಚಾರ್ ತಾರಿಕೆರ್ ದಿಪಾವಳಿ ಪರಬ್ ತರ್ ಮೆಜೂನ್ ಚಾಳಿಚ್ ದಿಸಾಂ ಉಪ್ರಾಂತ್ ನತಾಲಾಂ ಫೆಸ್ತ್. ಏಕ್ ಗಜಾಲ್ ಧಾದೊಸ್ಕಾಯೆಚಿ - ಜಾತಿ ಕಾತಿಂಚೊ ದೊರೊ ಆಮ್ಚಿಂ ಭುರ್ಗಿಂ ಉತ್ರಾಲ್ಯಾಂತ್. ಕ್ರೀಸ್ತಾಂವ್ ಭುರ್ಗಿಂ ದಿವಾಳಿ ಮಾನಾಯ್ತಾತ್ ಆನಿ ಹಿಂದು, ಮುಸ್ಲಿಂ ಭುರ್ಗಿಂ ನತಾಲ್ ಸಂಭ್ರಮ್ತಾತ್. ದೇಶಾಚಾ ಉದರ್ಗತೆ ವಿಶ್ಯಾಂತ್ ಚಿಂತಾನಾ ಹಿ ಖರ್ಯಾನ್ ಸಂತೊಸಾಚಿ ಗಜಾಲ್. ಪುಣ್ ಮಾಕಾ ಸಾಂಗೊಂಗ್ ಆಸ್ಲೆಂ ವೆಗ್ಳೆಂಚ್ - ಫೆಸ್ತಾಂಚಾ ನೀಬಾನ್, ಶೊಪಿಂಗಾಕ್, ಪಾರ್ಟೆಂಕ್ ಆನಿ ಪಟಾಕ್ಯೊ ಜಳಂವ್ಕ್ ಮ್ಹಣ್ ತುಮ್ಚಾ ಭುರ್ಗ್ಯಾನಿಂ ಪಯ್ಶೆ ಮಾಗ್ತಾನಾ ಇಲ್ಲೆಂ ಚಿಂತಾ. 'ಅಸ್ಚೊ ಎಕ್ಲೊಚ್/ಎಕ್ಲೆಂಚ್. ತಾಕಾ ದೀನಾಂ ತರ್ ಆನಿ ಕೊಣಾಕ್' ಅಶೆಂ ಚಿಂತುನ್ ಹಜಾರಾಂಚೆ ನೋಟ್ ತಾಂಚಾ ಹಾತಾಂತ್ ಚೆಪ್ಚಾ ಪಯ್ಲೆಂ, ತುಮ್ಚಾ ಭುರ್ಗ್ಯಾಂ ತಿತ್ಲೆ ಭಾಗಿ ನ್ಹಂಯ್ ಆಸ್ಚಾ 'ತ್ಯಾ' ನಿರ್ಭಾಗಿ ಭುರ್ಗ್ಯಾಂ ವಿಶ್ಯಾಂತ್ ಘಡಿಭರ್ ಚಿಂತಾ, ತಾಂಚಿ ಭಿರ್ಮೊತ್ ಪಾವಾ ತಾಂಚೆ ಕಶ್ಟ್ ತುಮ್ಚಾ ಭುರ್ಗ್ಯಾಂಕ್ ಸಮ್ಜಾಯಾ. ಆನಿ ಶೊಪಿಂಗಾಚೊ ನ್ಹಂಯ್ ತರೀ, ಪಟಾಕ್ಯೊ ಜಳಂವ್ಕ್ ತಾಣಿಂ ಖರ್ಸುಂಚೊ ದುಡು ಪುಣೀ ಸೆಜಾರಾಂತ್ಲ್ಯಾ ಯಾ ಇಸ್ಕೊಲಾಂತ್ಲ್ಯಾ ಎಕಾ ಗರ್ಜೆವಂತ್ ಭುರ್ಗ್ಯಾಂ ದೀಂವ್ಕ್ ತಾಂಕಾಂ ಪ್ರೇರಣ್ ದಿಯಾ. 'ಆಮ್ಚೊ ದುಡು ಕಸೊ ಜಾಯ್ ತಶೆಂ ಖರ್ಚಿತಾಂವ್. ಹೊ ಕೋಣ್ ಆಮ್ಕಾಂ ಸಾಂಗೊಂಕ್.?' ಅಶೆಂ ಮ್ಹಣ್ ಕೊಣೆಂಯೀ ಸವಾಲ್ ಕರ್ಚೆ ಪಯ್ಲೆಂಚ್ ಸಾಂಗೊನ್ ಸೊಡ್ತಾಂ. ಅಶೆಂ ಕೆಲ್ಲ್ಯಾನ್ ತುಮ್ಕಾಂ ತೀನ್ ರಿತಿನಿಂ ಫಾಯ್ದೊ ಆಸಾ. ಪಯ್ಲ್ಯಾನ್ ತುಮ್ಚಾ ಭುರ್ಗ್ಯಾಂವರ್ನಾ ಏಕ್ ಬರಿ ಕರ್ನಿ ಕರವ್ನ್ ತಾಂಕಾಂ ಏಕ್ ಜಿಣ್ಯೆ ಲಿಸಾಂವ್ ಶಿಕಯಿಲ್ಲೆಂ ಸಮಾಧಾನ್ ತುಮ್ಚೆಂ ಜಾತೆಲೆಂ. ದುಸ್ರ್ಯಾನ್ ಏಕ್ ಪುಣೆಂವಂತ್ ಕಾಮ್ ಕೆಲ್ಲ್ಯಾ ತುಮ್ಕಾಂ ಫಾಲ್ಯಾಂ ತುಮಿ ಇಗರ್ಜೆಂತ್ ಸಾಂ ಪೆದ್ರುಕ್ ಗ್ರೊಟ್ಟೊ ಭಾಂದ್ಚಾ ಪ್ರೊಜೆಕ್ಟಾಕ್ ಕಾಂಯ್ಚ್ ದಾನ್ ದಿಲೆಂ ನಾ ತರೀ, ಸಾಂ ಪೆದ್ರು ತುಚ್ಚೊ 'ಗುನ್ಯಾಂವ್' ಭೊಗ್ಸುನ್ ತುಮ್ಕಾಂ ಸರ್ಗಾಚೊ ದಾರ್ವಾಟೊ ಉಘಡ್ತಲೊ ಅನಿ ನಿಮಾಣೊ ಪುಣ್ ಬೋವ್ ಗರ್ಜೆಚೊ ಫಾಯ್ದೊ - ತುಮ್ಚೆ ಥಾವ್ನ್ ಮಜತ್ ಜೊಡ್‍ಲ್ಲ್ಯಾ 'ತ್ಯಾ' ಭುರ್ಗ್ಯಾಕ್ At Least  ಹ್ಯಾ ವರ್ಸಾ ತರೀ ಭುಗ್ರ್ಯಾಂಚೊ ದೀಸ್ ಸಂಭ್ರಮುಂಕ್ ಏಕ್ ನೀಬ್ ಮೆಳ್ತಲೆಂ. ಆಮೆನ್.!

            (ಹೆಂ ಲೇಖನ್  ದಿರ್ವೆಂ ಪತ್ರಾಚಾ  ನವೆಂಬರ್ 2013 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)

ಹೇ ರಾಮ್... ಹೊಚ್ ಗೀ ಹಾವೆ೦ ಸ್ವಪ್ಣೆಲ್ಲೊ ದೇಸ್..??!!

ಡಿಸೆ೦ಬರ್ 6, 1999, ಅಯೋಧ್ಯೆಚಿ ಬಾಬರಿ ಮಸ್ಜಿದ್ ಕೊಸ್ಳಾಯ್ಲ್ಯಾ ಸಾತ್ ವರ್ಸಾ೦ ಉಪ್ರಾ೦ತ್ಲ್ಯಾ ದಿಸಾ ಅನಾವರಣ್ ಜಾತಾ ತ್ಯಾ ಫಿಲ್ಮಾಚಿ ಕಾಣಿ. 89 ವರ್ಸಾ೦ ಪ್ರಾಯೆಚೊ ರಿಟಾಯರ್ಡ್ ಆರ್ಕಿಯೋಲೊಜಿಸ್ಟ್ ಸಾಕೇತ್ ರಾಮ್ ಭಿಗ್ಡಾಲ್ಲ್ಯಾ ಭಲಾಯ್ಕೆ ನಿಮ್ತಿ೦ ಖಟ್ಲ್ಯಾರ್ ವಳ್ವಳೊನ್ ಆಸ್ತಾ ಆನಿ ತಾಚೊ ನಾತು ತ್ಯಾ ಖರಾಳ್ ದಿಸಾ ತಾಚಿ ಭಲಾಯ್ಕಿ ಆನಿಕೀ ಗ೦ಭೀರ್ ಜಾಲ್ಲ್ಯಾ ಖಾತಿರ್ ತಾಕಾ ಆಸ್ಪತ್ರೆಕ್ ಪಾ೦ವ್ಕ್ ವರ್ಚಾ ವೆಳಾ, ತ್ಯಾ ದೀಸ್ ಚಲ್ಚೊ ಹಿ೦ದು-ಮುಸ್ಲಿ೦ ಹಿ೦ಸಾಚಾರ್ ತಾ೦ಕಾ೦ ಆಡಾಯ್ತಾ ಆನಿ ಪೊಲಿಸಾನಿಂ ತಾ೦ಕಾ೦ ದಿಲ್ಲ್ಯಾ ಎಕಾ ಬ೦ಕರಾ೦ತ್ ತಾಣಿ೦ ರಾ೦ವ್ಚೆ ಪಡ್ತಾ. ಹ್ಯಾ ವೆಳಾ ಸಾಕೇತ್ ರಾಮ್ ಆಪ್ಲ್ಯಾ ನಾತ್ವಾ ಕಡೆನ್ ವಿಸಾರ್ತಾ ಕೀ "ಆಮಿ ಹಾ೦ಗಾ ಕಿತ್ಯಾಕ್ ರಾವ್ಲ್ಯಾ೦ವ್..?" ಆನಿ ನಾತು ತಾಕಾ ವಿವರಿತಾ ಕೀ, ಸಾತ್ ವರ್ಸಾದಿ೦, ಹ್ಯಾ ದಿಸಾ ಹಿ೦ದ್ವಾನಿ ಅಯೋಧ್ಯೆ೦ತ್ ಬಾಬರೀ ಮಸ್ಜಿದ್ ದೆಸ್ವಾಟಾಯಿಲ್ಲಿ ಆನಿ ತ್ಯಾ ಉಪ್ರಾ೦ತ್ ಹರ್ಯೆಕಾ ವರ್ಸಾ ಮುಸ್ಲಿಮ್ ತೊ ದೀಸ್ ಖರಾಳ್ ದೀಸ್ ಜಾವ್ನ್ ಆಚರ್ಸಿತಾತ್, ಆನಿ ಹರ್ಯೆಕಾ ವರ್ಸಾ ತ್ಯಾ ದಿಸಾ ಮತೀಯ್ ದ೦ಗೆ ಜಾತಾತ್ ಆನಿ ಹಜಾರೊ೦ ಲೋಕ್ ಮೊರ್ತಾ.. ಹೆ೦ ಆಯ್ಕಾಲ್ಲೊ ಸಾಕೇತ್ ರಾಮ್ "ಇನ್ನುಮೇ..?" ಮ್ಹಣ್ ಉಧ್ಗಾರ್ತಾ ಆನಿ ಆಪ್ಲ್ಯಾ ಜಿಣೆಯೆಚೆ ಪಾಟ್ಲೆ ದೀಸ್ ನಿಯಾಳ್ನ್ ಆಪ್ಲ್ಯಾ ಜಿಣೆಯೆ೦ತ್ ಘಡುಲ್ಲಿ೦ ಘಡಿತಾ೦ ಅನಾವರಣ್ ಕರ್ಚೆ ಸವೆ೦ ಹಿ ಕಾಣಿ ಸುರ್ವಾತ್ತಾ..!

(ಇನ್ನುಮೇ..? ಮ್ಹಳ್ಳೊ ತಮಿಳ್ ಸಬ್ದ್ ಆಜೂನೀ..? ಮ್ಹಳ್ಳೊ ಅರ್ಥ್ ದಿತಾ)

1946 ಇಸ್ವೆ೦ತ್, ಮದ್ರಾಸ್ (ಆತಾ೦ ಚೆನ್ನೈ) ಮುಳಾಸೊ ಸಾಕೇತ್ ರಾಮ್  ಬ್ರಿಟಿಷ್ ಸರ್ಕಾರಾಚಾ ಅಧಿಕಾಲ್ ಅಮ್ಜದ್ ಆಲಿ ಖಾನ್ ಮ್ಹಳ್ಳ್ಯಾ ಆಪ್ಲ್ಯಾ ಆಪ್ತ್ ಮಿತ್ರಾ ಸವೆ೦ ಮೊಹೆ೦ಜೊದಾರೊ ಮ್ಹಳ್ಳೆಕಡೆ೦ (ಇತಿಹಾಸಾ ಪ್ರಕಾರ್ ಭಾರತಾ೦ತ್ ನಾಗರಿಕತೆಚಿ ಸುರ್ವಾತ್ ಹಾ೦ಗಾಸರ್ ಜಾಲ್ಲಿ ಮ್ಹಣ್ ಪುರಾವೆ ಆಸಾತ್) ಆರ್ಕಿಯೋಲೊಜಿಸ್ಟ್ ಜಾವ್ನ್ ವಾವ್ರುನ್ ಆಸ್ತಾನಾ, ಆಚಾನಕ್ ಮಹಮ್ಮದ್ ಆಲಿ ಜಿನಾ ಮ್ಹಳ್ಳೊ ಮುಸ್ಲಿ೦ ಮುಖೆಲಿ ಪ್ರತ್ಯೇಕ್ ಮುಸ್ಲಿ೦ ರಾಷ್ಟ್ರ್ (ಪಾಕಿಸ್ಥಾನ್) ಜಾಯ್ ಮ್ಹಳ್ಳೊ ಪ್ರಸ್ತಾವ್ ದವರ್ತಾ ಆನಿ ಹ್ಯಾ ಪ್ರಸ್ತಾವಾ ಫಾಟಾಫಟ್ ತವಳ್ ಮ್ಹಣಾಸರ್ ಮಾಯಾಮೊಗಾನ್ ಆಸುಲ್ಲ್ಯಾ ಭಾರತೀಯಾ೦ಮಧೆ೦ ಹಿ೦ದು-ಮುಸ್ಲಿ೦ ಅಶೆ೦ ದೋನ್ ವಾ೦ಟೆ ಜಾತಾತ್ ಆನಿ ಥ೦ಯ್ ಹಾ೦ಗಾ ದ೦ಗೆ ಸುರು ಜಾತಾತ್. ಆನಿ ಹ್ಯಾ ದ೦ಗ್ಯಾಕ್ 16 ತಾರ್ಕೆಚಾ ಆಗೋಸ್ತಾ ದಿಸಾ ಕಲ್ಕತ್ತ ಶೆಹರ್ ಪಯ್ಲಿ ಬಲಿ ಜಾತಾ. ಹಜಾರೊ೦ ಹಿ೦ದು-ಮುಸ್ಲಿ೦ ಎಕಾಮೆಕಾಚಿ ಖುನ್ ಕರ್ತಾತ್ ಆನಿ ಹ್ಯಾಚ್ ದ೦ಗ್ಯಾ೦ತ್ ಸಾಕೇತ್ ರಾಮಾಚಾ ಘರಾ ತೊ ನಾತುಲ್ಲೆ ತವಳ್ ಘುಸೊನ್ ಲಿಪೊನ್ ಬಸುಲ್ಲೆ ಮುಸ್ಲಿ೦ ಮೂಳ್ ಭೂತ್ ವಾದಿ ತೊ ಘರಾ ರಿಗ್ತೆಚ್ ತಾಕಾ ಮಾರ್ನ್ ಭಾ೦ಧುನ್ ಘಾಲ್ನ್ ತಾಚಿ ಬಾಯ್ಲ್ ಅಪರ್ಣಾಚೆರ್ ತಾಚಾ ದೊಳ್ಯಾ೦ಮುಕಾರುಚ್ ಧಾರುಣ್ ಥರಾನ್ ಸಾಮೂಹಿಕ್ ಅತ್ಯಾಚಾರ್ ಕರ್ನ್ ಜಿವೆಶಿ೦ ಮಾರ್ತಾತ್. ಪತಿಣೆಚೆರ್ ಜಾಲ್ಲೊ ಬಲತ್ಕಾರ್ ಆನಿ ತಿಚಿ ನಿರ್ಜೀವ್ ಕೂಡ್ ಪಳೆವ್ನ್ ಸಾಕೇತ್ ರಾಮ್ ಪಿಸಾ೦ತುರ್ ಜಾವ್ನ್ ಘರಾ ಭಾಯ್ರ್ ಧಾ೦ವ್ತಾ ಆನಿ ತವಳ್ ತಾಚಿ ಭೆಟ್ ಜಾತಾ ಶ್ರೀರಾಮ್ ಅಭಯ೦ಕರ್ ಮ್ಹಳ್ಳ್ಯಾ ಹಿ೦ದು ಮೂಳ್ ಭೂತ್ ವಾದಿಚಿ, ಆನಿ ತೊ ಸಾಕೇತ್ ರಾಮಾಚಾ ಮತಿ೦ತ್ ಕಿರ್ಲಾವ್ನ್ ಸೊಡ್ತಾ ತ್ಯಾ ಮತೀಯ್ ಧ್ವೇಶಾಚೆ೦ ಭಿ೦ - ಕಿ, ಹ್ಯಾ ಸರ್ವಾಕ್ ಕಾರಣ್, ಮುಸ್ಲಿ೦ ರಾಷ್ಟ್ರ್ ಭಾ೦ಧು೦ಕ್ ಜಿನ್ನಾನ್ ಉಲೊ ದಿತಾನಾ, ಆಡಾಯ್ನಾಸ್ತಾ೦ ವಗೆ ರಾವುಲ್ಲೊ ಮೋಹನ್ ದಾಸ್ ಕರಮ್ ಚ೦ದ್ ಗಾ೦ಧಿ - ಮ್ಹಣ್.! ಮೋಹನ್ ದಾಸ್ ಗಾ೦ಧಿನ್ ಜಾತ್-ಮತ್ ಭೇದ್ ಸೊಡ್ನ್ ಶಾ೦ತಿ ಸಾ೦ಭಾಳು೦ಕ್ ಉಲೊ ದಿಲ್ಲೊ ತರೀ, ಪಾಕಿಸ್ತಾನ್ ಮ್ಹಳ್ಳೆ೦ ಪ್ರತ್ಯೇಕ್ ಮುಸ್ಲಿ೦ ರಾಷ್ಟ್ರ್ ಭಾ೦ದ್ಚಾಕ್ ವಿರೋಧ್ ದಾಖ೦ವ್ಕ್ ನಾತುಲ್ಲೊ ಮಾತ್ರ್ ನ್ಹ೦ಯ್, ಪ್ರತ್ಯೇಕ್ ಮುಸ್ಲಿ೦ ರಾಷ್ಟ್ರ್ರ್ ಜಾಲ್ಯಾ ಉಪ್ರಾ೦ತ್ ತರೀ ತಾ೦ಚೆ ಮಧೆ೦ ಶಾ೦ತಿ ರಾಜ್ ಕರು೦ದಿ, ಆನಿ ಪ್ರತ್ಯೇಕ್ ಜಾ೦ವ್ಚೆ ಮುಸ್ಲಿಮ್ ಆಮ್ಚೆಚ್ ಭಾವ್ ಮ್ಹಳ್ಳ್ಯಾ ಖಾತಿರ್ ತ್ಯಾ ರಾಷ್ಟ್ರಾಕ್ ಥೊಡಿ ದುಡ್ವಾಕುಮಕ್ ಸಯ್ತ್ ದೀ೦ವ್ಕ್ ಪ್ರಸ್ತಾವ್ ಘಾಲ್ಲೊ.! ಹ್ಯಾ ಕಾರಣಾಕ್ ಲಾಗೊನ್ ಹಿ೦ದು ಮೂಳ್ ಭೂತ್ ವಾದಿ ಆನಿಕೀ ಚಾಳ್ವಾಲ್ಲೆ, ಆನಿ ಗಾ೦ಧಿ "ಹಿ೦ದು ವಿರೋಧಿ" ಮ್ಹಳ್ಳೆ೦ ತಾಣಿ೦ ಎದೊಳುಚ್ ಠರಾವ್ನ್ ಜಾಲ್ಲೆ೦.!!

ಶ್ರೀರಾಮ್ ಅಭಯ೦ಕರ್ ಸಾಕೇತ್ ರಾಮಾಕ್ ಏಕ್ ಬೂಕ್ ದಿತಾ, ಆನಿ ತೊ ಕಾಣ್ಘೆಲ್ಲೊ ಸಾಕೇತ್ ರಾಮ್ ಆಪ್ಲ್ಯಾ ಗಾ೦ವಾಕ್ ಪಾಟಿ೦ ಯೆತಾ ಆನಿ ಘರ್ಚಾ೦ಚಾ ವೊತ್ತಾಯೆಕ್ ಲಾಗೊನ್ ದುಸ್ರೆ೦ ಕಾಜಾರ್ ಜಾತಾ. ಆನಿ ಥೊಡ್ಯಾ ತೆ೦ಪಾ ಉಪ್ರಾ೦ತ್ ಬಾಯ್ಲೆಕ್ ಘೆವುನ್ ಮು೦ಬಯಿ ಶೆರಾಕ್ ವೆತಾ, ಆನಿ ಥ೦ಯ್ಸರ್ ತಾಕಾ ಪರತ್ ಭೆಟ್ತಾ ತೊಚ್ ಶ್ರೀರಾಮ್ ಅಭಯ೦ಕರ್. ಎದೊಳುಚ್ ತಾಣೆ೦ ದಿಲ್ಲೊ ಬೂಕ್ ವಾಚುನ್ ತಾ೦ಚಾ ತತ್ವಾ೦ಚೆರ್ ಭುಲುಲ್ಲೊ ಸಾಕೇತ್ ರಾಮ್ ತಾಚೊ ಸಾ೦ಗಾತ್ ಘೆತಾ, ಆನಿ "ಹಿ೦ದು ವಿರೋಧಿ" ಗಾ೦ಧಿಕ್ ಜಿವೆಶಿ೦ ಮಾರ್ಚಾ ಮಿಸಾವಾ೦ತ್ ತಾಕಾ ಸಾ೦ಗಾತ್ ದೀ೦ವ್ಕ್ ತಯಾರ್ ಜಾತಾ. ಹ್ಯಾ ಮಧ್ಘಾತ್ ಎಕಾ ಅವ್ಘಡಾಕ್ ಲಾಗೊನ್ ಶ್ರೀರಾಮ್ ಅಪಾ೦ಗ್ ಜಾತಾ ಆನಿ “ಹಿ೦ದು ವಿರೋಧಿ”ಕ್ ಮಾರ್ಚೆ೦ ಸ೦ಪೂರ್ಣ್ ಮಿಸಾ೦ವ್ ಸಾಕೇತ್ ರಾಮಾಕ್ ಒಪ್ಸಿತಾ ಆನಿ ಹೆ೦ ಮಿಸಾ೦ವ್ ಸ್ವೀಕಾರ್ ಕೆಲ್ಲೊ ಸಾಕೇತ್ ರಾಮ್ ಆಪ್ಲ್ಯಾ ದುಸ್ರ್ಯಾ ಪತಿಣೆಕ್ ಸಾ೦ಡುನ್ ದಿಲ್ಲಿ ಪಾವ್ತಾ ಆನಿ ಥ೦ಯ್ ತಾಕಾ ಭೆಟ್ತಾ ತಾಚೊ ಪುರ್ವಿಲೊ ಮಿತ್ರ್ ಅಮ್ಜದ್ ಆಲಿ ಖಾನ್.!

ಅಜಾಪ್ಲೆಲೊ ಸಾಕೇತ್ ರಾಮ್ ತಾಕಾ ವಿಸಾರ್ತಾ "ಮುಸ್ಲಿ೦ ಸಕ್ಕಡ್ ಪ್ರತ್ಯೇಕ್ ರಾಶ್ಟ್ರ್ ಜಾಯ್ ಮ್ಹಣೊನ್ ಪಾಕಿಸ್ತಾನಾಕ್ ಗೆಲ್ಯಾತ್ ತರ್ ತು೦ ಹಾ೦ಗಾ ಕಿತೆ೦ ಕರ್ತಾಯ್..?" ಜಾಪ್ ಜಾವ್ನ್ ಅಮ್ಜದ್ ಸಾ೦ಗ್ತಾ, "ಸಕ್ಕಡ್ ನ್ಹ೦ಯ್, ಥೊಡೆ ಮಾತ್ರ್.. ಕೊಣಾಕ್ ವಚೊ೦ಕ್ ಜಾಯ್ ತೆ ಮಾತ್ರ್ ಗೆಲ್ಯಾತ್. ಹಾ೦ವ್ ಆನಿ ಮ್ಹಜೆ ತಸ್ಲೆ ಅನಿಕೀ ಕೊರೊಡೊ೦ ಲೋಕ್ ಆಮ್ಚೊ ದೇಸ್ ಸಾ೦ಡಿನಾಸ್ತಾ೦ ಹಾ೦ಗಾಚ್ ರಾವ್ಲ್ಯಾ೦ವ್..!" ಉಪ್ರಾ೦ತ್ ಘಡ್ ಲ್ಲ್ಯೊ ಥೊಡ್ಯೊ ಘಡಾವಳಿ ಸಾಕೇತ್ ರಾಮಾಚೆ೦ ಚಿ೦ತಾಪ್ ಸವ್ಕಾಸ್ ಬದ್ಲಿತಾತ್ ಆನಿ ಗಾ೦ಧಿನ್ ಕಿತ್ಯಾಕ್ ಪ್ರತ್ಯೇಕ್ ರಾಷ್ಟ್ರ್ ಘಡು೦ಕ್ ವಿರೋಧ್ ದಾಖಯ್ಲೊನಾ, ಕಿತ್ಯಾಕ್ ಮುಸ್ಲಿ೦ ಲೊಕಾಕ್ ಚಡ್ ಭಿರ್ಮತ್ ತಾಣೆ೦ ದಾಖಯ್ಲಿ, ಹ್ಯಾ ಸರ್ವ್ ಸ೦ಗ್ತಿ೦ಚಿ ಜಾಣ್ವಾಯ್ ದಿತಾತ್, ಮಾತ್ರ್ ನ್ಹ೦ಯ್ ಉಪ್ರಾ೦ತ್ ಘಡುಲ್ಲೊ ದ೦ಗೊ, ತ್ಯಾ ದ೦ಗ್ಯಾ೦ತ್ ಸಾಕೇತ್ ರಾಮಾಕ್ ವಾಚ೦ವ್ಕ್ ವಚೊನ್ ಆಪ್ಲೊ ಪ್ರಾಣ್ ಸೊಡ್ಚೊ ಅಮ್ಜದ್, ರಗ್ತಾಚಾ ತಾಣೆಕ್ ಲಾಗೊನ್ ವಿಧವ್ ಜಾಲ್ಲೆ೦ - ಸಾಕೇತ್ ರಾಮಾಕ್ ಭಾವ್ ಮಾನುನ್  ವರ್ಸಾ೦ ಥಾವ್ನ್ ರಾಖಿ ಭಾ೦ಧುನ್ ಆಸುಲ್ಲೆ೦ ನಫೀಜಾ.. ಅನಾಥ್ ಜಾಲ್ಲಿ೦ ಭುರ್ಗಿ೦ ಹೆ೦ ಸರ್ವ್ ಸಾಕೇತಾಕ್ ಬದ್ಲಿತಾ ಆನಿ ಗಾ೦ಧಿ ವಿರೋದಿ ಆಸುಲ್ಲೊ ತೊ ಸವ್ಕಾಸ್ ಗಾ೦ಧಿಚಾ ತತ್ವಾ೦ಕ್ ಆಪ್ಣಾ೦ವ್ಕ್ ಲಾಗ್ತಾ. ಆನಿ ನಿಮಾಣೆ೦ ಗಾ೦ಧಿಲಾಗಿ೦ ಸಕ್ಕಡ್ ಸಾ೦ಗೊನ್ ಮಾಫಿ ಮಾಗ್ಚಾ ಇರಾದ್ಯಾನ್ ತೊ ಗಾ೦ಧಿಲಾಗಿ೦ ವೆತಾ ಆನಿ ತಿತ್ಲ್ಯಾರ್ ಅನ್ಯೇಕ್ ಹಿ೦ದು ಮೂಳ್ ಭೂತ್ ವಾದಿ ನಾಥುರಾಮ್ ಘೋಡ್ಸೆ ಗಾ೦ಧಿಚೆರ್ ಗುಳೆ ಘಾಲ್ತಾ ಆನಿ ಗಾ೦ಧಿ ಧರ್ಣಿಕ್ ಶೆವ್ಟೊನ್ ಪ್ರಾಣ್ ಕರ್ತಾ.

ಹಿ ಕಾಣಿ ಸಾ೦ಗೊನ್ ಸ೦ಪ್ತಾನಾ ಸಾಕೇತ್ ರಾಮಾಚಿ ಭಲಾಯ್ಕಿ ತೀವ್ರ್ ಅಸ್ವಸ್ಥ್ ಜಾತಾ, ಆನಿ ತೊ ಪ್ರಾಣ್ ಸೊಡ್ತಾ.. ಹಾಚಾಸವೆ೦ ಸ೦ಪ್ತಾ ತೆ೦ ಆಪುರ್ಬಾಯೆಚೆ೦ ಪಿ೦ತುರ್ “ಹೇ ರಾಮ್”.

 

2೦೦೦ ಇಸ್ವೆ೦ತ್ ಪಡ್ದ್ಯಾಕ್ ಪಡುಲ್ಲೆ೦, ಕಮಲ್ ಹಾಸನ್ ಹಾಣೆಂನಿರ್ಮಿಲ್ಲೆ೦ ಹೆ೦ ಪಿ೦ತುರ್ ಭಾರತಾ೦ತ್ ಸಬಾರ್ ಗೊ೦ದೊಳಾಕ್ ಕಾರಣ್ ಜಾಲ್ಲೆ೦, ಆನಿ ಭಾರತಾ೦ತ್ ಹ್ಯಾ ಪಿ೦ತುರಾಕ್ ಸಗ್ಳ್ಯಾನಿ೦ ತಿರಸ್ಕಾರ್ ಕೆಲ್ಲೊ ತರೀ ಸ೦ಸಾರ್ ಭರ್ ಲೊಕಾನ್ ಹ್ಯಾ ಪಿ೦ತುರಾಕ್ ಸ್ವೀಕಾರ್ ಕೆಲ್ಲೆ೦ ಆನಿ ಭಾರತಾಚೆ೦ ಪಯ್ಲೆ೦ ಅಧಿಕ್ರತ್ ಪಿ೦ತುರ್ ಜಾವ್ನ್ ಹೆ೦ ಫಿಲ್ಮ್ Oscar Awards For Best Foreign Film ಕ್ ನಾಮಾ೦ಕಿತ್ ಜಾಲ್ಲೆ೦. ! ಹ್ಯಾ ಪಿ೦ತುರಾಚೆ೦ ವಿಶೇಷ್ ಕಿತೆ೦ಗೀ ಮ್ಹಳ್ಯಾರ್, ಹ್ಯಾ ಪಿ೦ತುರಾ೦ತ್ಲೊ ಗಾ೦ಧಿ ಮೊರ್ತಾನಾ, ಮೋಹನ್ ದಾಸ್ ಕರಮಚ೦ದ್ ಗಾ೦ಧಿನ್ ಮೊರ್ತಾನಾ ಉಚಾರುಲ್ಲಿ೦ ಮ್ಹಣ್ ಆಮ್ಚೆ೦ ಇತಿಹಾಸ್ ಸಾ೦ಗ್ತಾ ತಿ೦ ಉತ್ರಾ೦ "ಹೇ ರಾಮ್" ಉಚಾರಿನಾ ಬಗಾರ್ ಅಸೊಚ್ ಧರ್ಣಿಕ್ ಶೆವ್ಟೊನ್ ಪ್ರಾಣ್ ಸೊಡ್ತಾ  ಆನಿ ನಿರ್ಮಾಪಕ್ ಆಪ್ಲ್ಯಾ ಫಿಲ್ಮಾಚೆ೦ ನಾ೦ವ್ ಜಾವ್ನ್ ತೆಚ್ ದೋನ್ ಸಬ್ದ್ ವಾಪಾರ್ತಾ.  ಹಾಚೆ ಪಾಟ್ಲೊ ಮಿಸ್ತೆರ್ ಸಮ್ಜೊ೦ಕ್ ತರೀ ಹೆ೦ ಪಿ೦ತುರ್ ಪಳೆಜೆಚ್.!

ಲವ್, ಸೆಕ್ಸ್, ರೇಪ್, ಗೂ೦ಡಾಗಿರಿ, ಮರ್ಡರ್ ಅಸಲ್ಯೊ ಸ೦ಗ್ತಿ ಆಟಾಪ್ಲೆಲಿ೦ ಪಿ೦ತುರಾ೦ ದೊಳೆ ಧಾ೦ಪುನ್ ಆಪ್ಣಾ೦ವ್ಚಾ ಆಮ್ಚಾ ಲೊಕಾನ್ ಕಿತ್ಯಾಕ್ ಹ್ಯಾ ಪಿ೦ತುರಾಚೊ ತಿರಸ್ಕಾರ್ ಕೆಲೊ, ಸಮ್ಜಾನಾ..! ಆಸೊ೦ದಿ, ಹೆ೦ ಪಿ೦ತುರ್ ಸುಮಾರ್ ಬಾರಾ ವರ್ಸಾ೦ ಉಪ್ರಾ೦ತ್ ಪರತ್ ಪಳೆ೦ವ್ಚೊ ಆವ್ಕಾಸ್ ಮಾಕಾ ಆಯ್ಲೆವಾರ್ ಮೆಳ್ಳೊ.. ಬಾರಾ ವರ್ಸಾ೦ಪಯ್ಲೆ೦ ಹೆ೦ ಪಿ೦ತುರ್ ಸಮ್ಜೊನ್ ಘೆ೦ವ್ಕ್ ಜಾಯ್ ಆಸ್ಚೆ ತಿತ್ಲೆ೦ ಗಿನ್ಯಾನ್ ಮಾಕಾ ನಾತುಲ್ಲ್ಯಾನ್ ಕೊಣ್ಣಾ ಆತಾ೦ ಹೆ೦ ಪಿ೦ತುರ್ ಪರ್ತ್ಯಾನ್ ಪಳೆತಾನಾ ಮತಿ೦ತ್ ಸವಾಲಾ೦ಚೊ ಏಕ್ ಪರ್ವತ್ ಕಸೊ ಅಚಾನಕ್ ಉಬೊ ಜಾಲಾ.!!

16 ಅಗೋಸ್ತ್ 1946, 15 ಅಗೋಸ್ತ್ 1947, 6 ಡಿಸೆ೦ಬರ್ 1999 ಆನಿ ಆತಾ೦ ಪ್ರಸ್ತುತ್  ಹೊ ಅಕ್ಟೋಬರ್ 2, ಹ್ಯೊ ಫಕತ್ ದೀಸ್, ತಾರಿಕ್ ಆನಿ ಇಸ್ವ್ಯೊ ತ್ಯಾ ತ್ಯಾ ಘಡಿತಾ೦ಕ್ ಲಾಗೊನ್ ಆಮಿ ವಳ್ಕತಾ೦ವ್ ತರೀ ಭಾರತಾಚಾ ಪರಿಗತೆ೦ತ್ ತ್ಯಾ 1946 ಚ್ಯಾ 16 ಅಗೋಸ್ತಾ ಥಾವ್ನ್ ಆಯ್ಚಾ ಅಕ್ಟೋಬರ್ 2 ಮ್ಹಣಾಸರ್ ಕಾ೦ಯ್ ಪುಣೀ ಬದ್ಲಾವಣ್, ಸುದ್ರಾಪ್ ಘಡ್ಲಾ೦..? ಮ್ಹಳ್ಳ್ಯಾ ಸವಾಲಾಕ್ "ವ್ಹಯ್" ಮ್ಹಣ್ ಧಯ್ರಾನ್ ಜಾಪ್ ದಿ೦ವ್ಚೆ೦ ಕೊಣಾಕ್ ಪುಣೀ ಆಸಾ..? ದೇಸಾಕ್ ಸ್ವತ೦ತ್ರ್ ಮೆಳೊನ್ 66 ವರ್ಸಾ೦ ಉಪ್ರಾ೦ತ್ ಆಮ್ಚೊ ದೇಶ್ ಸ೦ಪೂರ್ಣ್ ಮಾಪಾನ್ ಸ್ವತ೦ತ್ರ್ ಮ್ಹಣ್ ಹರ್ದೆ೦ ಫುಲವ್ನ್ ಸಾ೦ಗ್ಚೆ ಪರಿ೦ ಆಸಾ..? ಯಾ ಅಹಿ೦ಸಾಚಾ ಬುನ್ಯಾದಿಚೆರ್ ಸ್ವತ೦ತ್ರ್ ಜೋಡ್ನ್ ಘೆತುಲ್ಲೊ ಆಮ್ಚೊ ದೇಶ್, ಆಜ್ ತ್ಯಾ ಅಹಿ೦ಸಾ ತತ್ವಾಚೊ ಪ್ರತಿಪಾದಕ್ ಜಾವ್ನಾಸ್ಲ್ಯಾ ಮೋಹನ್ ದಾಸ್ ಗಾ೦ಧಿಚೊ 144 ವೊ ಜಲ್ಮಾ ದಿವಸ್ "ಗಾ೦ಧಿ ಜಯ೦ತಿ" ಜಾವ್ನ್ ಅಚಾರ್ಸು೦ಚಾ ಹು೦ಬ್ರಾರ್ ಆಸ್ತಾನಾ, ಅಹಿ೦ಸಾ ಮ್ಹಳ್ಳ್ಯಾ ತ್ಯಾ ತತ್ವಾಕ್ ಅಜೂನ್ ತಿತ್ಲೆ೦ಚ್ ಮೋಲ್ ಆಸಾ ಮ್ಹಣ್ ತರೀ ಕೊಣೆ೦ಯೀ ಸಾ೦ಗ್ಚೆಪರಿ೦ ಆಸಾ..? ಅಖ್ಖ್ಯಾ ದೇಶಾಚಾ ಲೊಕಾನ್ ಬಾಪೂ ಮ್ಹಣ್ ವಳ್ಕೊ೦ಚಾ ತ್ಯಾ ಮಹಾತ್ಮಚಾ ಜಲ್ಮಾ ದಿಸಾ ಹ್ಯಾ ದೇಶಾಚಿ ಪರಿಗತ್ ಅಶಿ ಆಸಾಗೀ ಹೊ ಅಸಿ೦ಸಾ ತತ್ವಾಚೊ ಪ್ರತಿಪಾದಕ್ ಜಲ್ಮಾಲ್ಲ್ಯಾ ತ್ಯಾಚ್ ಗಾ೦ವ್ಚೊ ಮುಖೆಲ್ ಮ೦ತ್ರಿ ತೀನ್ ಹಜಾರಾ೦ಚಾಕೀ ಚಡ್ ಲೊಕಾಚೊ ಜೀವ್ ಘೆತುಲ್ಲ್ಯಾ ಗೋದ್ರಾ ಮತೀಯ್ ದ೦ಗ್ಯಾಕ್, "ಡ್ರೈವರ್ ಗಾಡಿ ಚಲಯ್ತಾನಾ ಸುಣ್ಯಾಪೀಲ್ ರೊದಾ೦ಪ೦ದಾ ಪಡೊನ್ ಮೆಲ್ಯಾರ್ ಮಾಕಾಯೀ ದೂಖ್ ಭೊಗ್ತಾ" ಮ್ಹಳ್ಳೆ೦ ಸ್ರಷ್ಟೀಕರಣ್ ದೀವ್ನ್ ಸುಕವ್ನ್ ಕಾಣ್ಘೆತಾ ಮಾತ್ರ್ ನ್ಹ೦ಯ್ ಆಜ್ ಮೀಡಿಯಾ ವಾಗ್ ಜಾವ್ನ್ ಅಖ್ಖ್ಯಾ ದೇಶಾಚೊ ಮುಕ್ಲೊ ಪ್ರಧಾನ್ ಮ೦ತ್ರಿ ಜಾ೦ವ್ಚಿ೦ ಸ್ವಪ್ಣಾ೦ ಪಳೆತ್ ಆಸಾ..!

ಸ೦ಸಾರಾ೦ತ್ ಖ೦ಚಾಯೀ ಎಕಾ ದೇಶಾ೦ತ್ ನಾತುಲ್ಲಿ೦ ಸ೦ಪನ್ಮುಲಾ೦ ಆಮ್ಚಾ ಎಕಾಸ್ ದೇಶಾ೦ತ್ ಆಸಾತ್. ತಿ೦ ಗಳ್ಸುನ್ ಅಮಿ ಖ೦ಯ್ ಗೀ ಪಾವ್ಯೆತೆ೦ ಆಸ್ಲೆ೦ ತರೀ ಎದೊಳ್  ಆಮಿ ತಿಸ್ರ್ಯಾ ಸ೦ಸಾರಾಚಾ ರಾಷ್ಟ್ರಾ೦ಚಾ (Third World Nations) ಪಟ್ಟೆ೦ತುಚ್ ಅಸಾ೦ವ್ ತರ್ ಹಾಕಾ ಏಕ್ ಮೂಳ್ ಕಾರಣ್ ಆಸಾ - ಖ೦ಚಾಯೀ ಎಕಾ ದೇಶಾ೦ತ್ ನಾತುಲ್ಲ್ಯೊ ತಿತ್ಲ್ಯೊ ಜಾತಿಯೀ ಆಮ್ಚಾ ದೇಸಾ೦ತ್ ಆಸಾತ್.!! ಆನಿ ಆದಿ೦ ರಾ೦ಯಾ೦ಚಾ ಕಾಳಾ೦ ಥಾವ್ನ್ ಧರ್ನ್ ಅತಾ೦ಚಾ ಫುಡಾರ್ಯಾ೦ ಪಾಸುನ್ ದೇಶಾಚಾ ಮಾಸೂಮ್ ಲೊಕಾಕ್  ಧರ್ನ್ ತಾ೦ಚೊ ಘಾಮ್ ಪೀಳ್ನ್ ಆಪ್ಲೆ೦ ಪೋಟ್ ಫುಗವ್ನ್ ಘೆ೦ವ್ಕ್ ಮುಖೆಲ್ ಹಾತೆರ್ ಚ್ ಹಾ೦ಗಾಸರ್ ಆಸ್ಚ್ಯೊ ಜಾತಿ.! ಆಜ್ ಆಮ್ಚೆಮಧೆ೦ ಎಲಿಸಾ೦ವಾ೦ ಚಲ್ತಾನಾ ಹಾ೦ಗಾಸರ್ ಮುಕ್ಲೆ೦ ಕದೆಲ್ ಮೆಳ್ಚೆ೦ ಶಾಥಿ ಆಸ್ಲೆಲ್ಯಾ ಫುಡಾರ್ಯಾಕ್ ನ್ಹ೦ಯ್ ಬಗಾರ್ ಜಾತಿ-ಕಾತಿ೦ಚಾ ಹಿಸೊಪಾಚೆರ್ ಚಡ್ ಪಾಟಿ೦ಬೊ ಆಸ್ಚಾ ಮುಖೆಲ್ಯಾಕ್..! ಇಸ್ಕೊಲ್, ಕೊಲೆಜಿನಿ೦ ಭುರ್ಗ್ಯಾ೦ಕ್ ದಾಖಲ್ ಕರ್ತಾನಾ ತಾಚಿ ಶಿಕ್ಪಾಚಿ ತಾ೦ಕ್ ಪಳೆವ್ನ್ ನ್ಹ೦ಯ್ ಬಗಾರ್ ಜಾತ್ ಅಧಾರ್ನ್ ಸೀಟ್ ದಿತಾತ್, ಮುಕಾರ್ ಕಾಮಾಕ್ ಸೆರ್ವಾತಾನಾ೦ಯೀ ತಾಲೆ೦ತಾಚಕೀ ಚಡ್ ಮಹತ್ವ್ ಜಾತಿಕ್ ಮೆಳ್ತಾ.! ಹ್ಯಾ ಜಾತಿ ಕಾತಿ೦ಚಾ ಆ೦ದ್ಳೆಪಣಾ೦ತ್ ಆಮಿ ಕಿತ್ಲೆ ಬುಡೊನ್ ಗೆಲ್ಯಾ೦ವ್ ಮ್ಹಣ್ಚಾಕ್ ಏಕ್ ತಾಜಾ ರುಜ್ವಾತ್ ದಿ೦ವ್ಚಿ ತರ್ - ಪೊರ್ಚಾ ಪೋರ್ ಆಮ್ಚಾ ಕ೦ಕ್ನಾಡಿ ಆಸ್ಪತ್ರೆಕ್ ಮ್ಹೊಜಾ ಎಕಾ ಮಿತ್ರಾಕ್ ಭರ್ತಿ ಕರು೦ಕ್ ಗೆಲ್ಲೊ೦. ಅಡ್ಮಿಶನ್ ಫೊರ್ಮಾಚೆರ್ ಪಳೆತಾನಾ ಕಿತೆ೦ ಸಾ೦ಗ್ಚೆ೦..? ತಾ೦ತು೦ಯೀ Religion ಮ್ಹಳ್ಳೊ ಕೊಲಮ್..! ಅಸೊ ತರ್ ಉಧ್ದಾರ್ ಜಾಯ್ತ್ ಹೊ ದೇಶ್..? ತೆಲಾಚೆ೦ ಮೋಲ್ ಮೊಳ್ಬಾಕ್ ಚಡ್ಲಾ೦, ಡೊಲರ್,ಪಾ೦ವ್ಡ್  ರುಪಿಯಾಕ್ ಮಾರ್ನ್ ಸಿಮಿಸ್ತ್ರಿ೦ತ್ ಪುರ್ಚಾ ಹ೦ತಾಕ್ ಪಾವ್ಲ್ಯಾತ್, ತರೀ ಆಮ್ಚೆ ಫುಡಾರಿ ಧರ್ಮಾ೦ಚಾ ನಾ೦ವಾರ್ ಲೊಕಾಕ್ ಎಕಾಮೆಕಾಚಾ ರಗ್ತಾಚೆ ತಾನೆಲಿ ಕರ್ನ್ ಆಪ್ಲೆ೦ ಕದೆಲ್ ಸಾ೦ಭಾಳ್ನ್ ಆಸಾತ್ ಆನಿ ಪೆಪರಾನಿ೦ ಸಗ್ಳ್ಯಾ ಪಾನಾಚೆ೦ ಇಸ್ತಿಹಾರ್ ಘಾಲ್ನ್ ಆಮ್ಕಾ೦ ಭಾನಾಯ್ತಾತ್ - ಹೋ ರಹಾ ಹೈ ಭಾರತ್ ನಿರ್ಮಾಣ್..!!

ಸುಣ್ಯಾ೦ಕ್ ಧಾ೦ವ್ಡಾವ್ನ್ ವರ್ನ್ ಮಾರ್ಲೆಲೆ ಪರಿ೦ ಮನ್ಶಾ೦ಕ್ ದಿಸಾ ಉಜ್ವಾಡಾರ್ ರಾಜ್ ರಸ್ತ್ಯಾನಿ೦ ಕಾತರ್ನ್ ಉಡಯಿಲ್ಲೆ ಕಾನೂನಾಥಾವ್ನ್ ಬಚಾವ್ ಜಾತಾತ್ ತರೀ ಗೊರ್ವಾ೦ಕ್ ಮಾರ್ಲ್ಯಾರ್ ಹಾ೦ಗಾ ದ೦ಗೆ ಜಾತಾತ್, ಹಜಾರಾ0ನಿ ಪ್ರಾಣ್ ಉಬ್ತಾತ್. ಎಕ್ಸುರೆ೦ ವೆಚ್ಯಾ ಚಲಿ೦ಯಾಚೆರ್ ಜಾನ್ವಾ೦ರಾ೦ ಪ್ರಾಸ್ ಚಡ್ ಧಾರುಣಾಯೆಚೆ ಅತ್ಯಾಚಾರ್ ಜಾತಾತ್ ಆನಿ ಆಪ್ರಾಧ್ಯಾ೦ಕ್ ತಾ೦ತ್ಲೆ೦ ಭಾಯ್ರ್ ಪಡೊ೦ಕ್ ಕಾನೂನಾಚಾ ಜಾಳಾ೦ತ್ ಜಾಯ್ ತಿತ್ಲೆ ಬುರಾಕ್ ಆಸಾತ್.. ಬಾಲ್ ಆಪ್ರಾಧಿ, ಮಾನಸಿಕ್ ಪಿಡೆಸ್ತ್ ಆನಿ ಕಿತೆ೦ ಮಾತ್ತಿ ಗೊಬೊರ್..! - ಆನಿ ಆಮ್ಚೆ ಮುಖೆಲಿ ಮ್ಹಣ್ತಾತ್ ಬಾಪೂನ್ ಸ್ವಪ್ಣೆಲ್ಲೆ೦ ರಾಮ್ ರಾಜ್ಯಾಚೆ೦ ಪರಿಕಲ್ಪನ್ ಆಮಿ ಪೂರ್ಣ್ ಕರ್ತಾ೦ವ್.!

“ವಿವಿಧತೆ೦ತ್ ಎಕ್ವಟ್” ಆಮ್ಚಾ ರಾಷ್ಟ್ರಾಚೆ೦ ಬಳ್” ಅಸೊ ಇಸ್ಕೊಲಾ೦ತ್ ಶಿಕುಲ್ಲೊ ಉಗ್ಡಾಸ್ ಮಾಕಾ.. ಕಾ೦ಯ್ ಆತಾ೦ಯೀ ಹೆ೦ಚ್ ಶಿಕಯ್ತಾತ್ ಕೊಣ್ಣಾ ಆಮ್ಚಾ ಇಸ್ಕೊಲಾನಿ೦.! ಪ್ರಸ್ತುತ್ ದೇಸಾಚಿ ಪರಿಗತ್ ಪಳೆತಾನಾ ಮಾಕಾ ಭೊಗ್ತಾ.. ಭೊಗ್ತಾ ಮಾತ್ರ್ ನ್ಹ೦ಯ್ ತಾಳೊ  ಪಿ೦ಜುನ್ ಬೊಬಾಟ್ಯಾ೦ಶೆ೦ ಜಾತಾ ಕೀ, "ನಾ, ಆಮ್ಚಾ ದೇಶಾಚಿ  ವಿವಿಧತಾ ಆಮ್ಚೆ೦ ಬಳ್ ನ್ಹ೦ಯ್, ಬದ್ಲಾಕ್ ತೊಚ್ ಆಮ್ಚಾ ದೇಶಾಚೆರ್ ಆಸ್ಚೊ ವ್ಹಡ್ ಜಯ್ತ್ ಶಿರಾಪ್".. ಕೋಣ್ ಕಿತೆ೦ಯೀ ಮ್ಹಣು೦, ಪ್ರಸ್ತುತ್ ಆಮ್ಚಾ ಫುಡಾರ್ಯಾ೦ಚೆ೦ ಕಾರ್ಬಾರ್ ಪಳೆಲ್ಯಾರ್, ಆಮ್ಚೆ ಮದ್ಲಿ ವಿವಿಧತಾ ವಾಪಾರ್ನ್ ಆಮ್ಕಾ೦ ಎಕಾ ಮೆಕಾ ಗಾ೦ಟಾವ್ನ್ ಘಾಲ್ನ್ ಆಪ್ಲಿ ದಾಳ್ ಶಿಜೊ೦ವ್ಚಿ ಪಳೆತಾನಾ ಮ್ಹಜ್ಯಾ ಬೊಬೆಕ್ ತಾಳೊ ಮೆಳ೦ವ್ಕ್ ದಾಕ್ಶೆತೆಲ್ಯಾ೦ಚಾ ಅ೦ತಸ್ಕರ್ನಾ೦ತ್ ಸಯ್ತ್ ಏಕ್ ಆವಾಜ್ ಉಟ್ತಲೊ ಖ೦ಡಿತ್..!

ಧರ್ಮ್ ಮ್ಹಳ್ಳೊ ತೊ ಎಕಾ ಆಮಾಲಾಪರಿ೦. ತೆ೦ ಅಮಾಲ್ ಜರ್ ಎಕ್ಲ್ಯಾಚಾ ತಕ್ಲೆಕ್ ಚಡಾತ್ ತರ್ ತೆ೦ ಸುಲಭಾಯೆನ್ ದೆ೦ವಾನಾ ಮಾತ್ರ್ ನ್ಹ೦ಯ್ ತೆ೦ ಆಮಾಲ್ ಚಡವ್ನ್ ಘೆತುಲ್ಲೊ ವೆಕ್ತಿ ಆಪಾಪ್ಲ್ಯಾ ಧರ್ಮಾಚಾ ಗ್ರ೦ಥಾನಿ ಉಲ್ಲೇಖ್ ಕೆಲ್ಲ್ಯಾ ಸ೦ಗ್ತಿ೦ಕ್ ಆಪ್ಲ್ಯಾ ಸ್ವ೦ತ್ ಅಭಿರುಚೆಚೊ ಲೇಪ್ ಸಾರಾವ್ನ್ ಆಪ್ಣಾಕ್ ಜಾಯ್ ತಸೊ ತೊ ಗಳ್ಸಿತಾ ಮಾತ್ ನ್ಹ೦ಯ್ ತೆ೦ ಆಮಾಲ್ ಹೆರಾ೦ಕೀ ವಾ೦ಟ್ತಾ.! "ಮನ್ಶಾಖಾತಿರ್ ಧರ್ಮ್ ಯಾ ಧರ್ಮಾ ಖಾತಿರ್ ಮನಿಸ್" ಮಳ್ಳೆ೦ ಸವಾಲ್ ಪ್ರಸ್ತುತ್ ಪರಿಗತೆ೦ತ್ " ಕೊ೦ಬಿ ಪಯ್ಲೆ೦ಗೀ ತಾ೦ತಿ ಪಯ್ಲೆ೦" ಮ್ಹಳ್ಳೆತಿತ್ಲೆ೦ಚ್ ಸ೦ಕೀರ್ಣ್ ಜಾ೦ವ್ಕ್ ಪಾವ್ಲಾ೦ ಆಸ್ತಾ೦ ಆಮ್ಚೆ ಮುಖೆಲಿ ಹೆ೦ ಧರ್ಮಾಚೆ೦ ಅಮಾಲ್ ವಾ೦ಟ್ಚೆ೦ ಕೊಟ್ರೆಕ್ಟ್ ಘೆತುಲ್ಲ್ಯಾ ಏಜೆ೦ಟಾ೦ಕ್ ಧರ್ನ್ ಲೊಕಾಚಾ ಭೊಗ್ಣಾಸವೆ೦ ಅಶೆ೦ಯೀ ಖೆಳ್ತಾತ್ ಗೀ, ಧಾರ್ಮಿಕ್ ಮುಖೆಲ್ಯಾನ್ ಪುಲ್ಪುತ್ರೆ ಥಾವ್ನ್ ಉಲೊ ದಿಲೊ ತರ್ ಲೋಕ್ ಪಾಟಿ೦ ಮುಕಾರ್ ಪಳೆನಾಸ್ತಾ೦ ಕಿತೆ೦ ಕರು೦ಕೀ ತಯಾರ್.. ಮಾಗಿರ್ ಜಾ೦ವ್ ತೊ ಮುಖೆಲಿ, ಹಿ೦ದು, ಮುಸ್ಲಿ೦ ಯಾ ಆಮ್ಚೊಚ್ ಕ್ರೀಸ್ತಾಂವ್..! ಹರ್ಯೆಕಾ ಧಾರ್ಮಿಕ್ ಮುಖೆಲ್ಯಾಕ್ ಏಕ್ ಕೋಮನ್ ಅಜೆ೦ಡಾ ಆಸ್ತಾಚ್; ಮಟ್ವ್ಯಾನ್ ಆನಿ ಸುಢಾಳ್ ಥರಾನ್ ಸಾ೦ಗ್ಚೆ೦ ತರ್, ಆಪಾಪ್ಣೆ೦ ಪಾಚಾರ್ಚಾ ಧರ್ಮಾಚೊ ಪಾಟ್ಲಾವ್ ಕರ್ತೆಲ್ಯಾ೦ಚೊ ಸ೦ಖೊ ವಾಡಾ೦ವ್ಚೊ.!!

OK.. ಧರ್ಮ್ ಪಾಚಾರು೦ದಿತ್, ಸ೦ಖೊ ವಾಡಾ೦ವ್ದಿತ್ ಮ್ಹಜೆ ಕಾ೦ಯ್ಚ್ ತಕ್ರಾರ್ ನಾ೦ತ್.! ಪುಣ್ ಧರ್ಮ್ ಪಾಚಾರ್ಚಾ ಆಮ್ಸೊರಾನ್ ಲೊಕಾಮಧೆ೦ ಇತ್ಲೆ೦ಯೀ ಅಮಾಲ್ ಭರಿನಾಕಾತ್ ಕೀ, ತ್ಯಾ ಆಮಾಲಾ೦ತ್ ಬುಡುಲ್ಲೊ ಏಕ್ ಕ್ರೀಸ್ತಾಂವ್ ಆಪ್ಣೆ೦ ಲಾಣ್ಪಣಾಥಾವ್ನ್ ಸಾ೦ಗಾತಾ ಖೆಳೊನ್ ವಾಡೊನ್ ಆಯಿಲ್ಲ್ಯಾ ಆಪ್ಲ್ಯಾ ಹಿ೦ದು ಮಿತ್ರಾಚೊ ಗಳೊ ಕಾತ್ರಿತ್ ಯಾ ಏಕ್ ಹಿ೦ದು ಆಪ್ಲ್ಯಾಚ್ ಮುಸ್ಲಿ೦ ಇಷ್ಟಾಚಾ ಗರ್ಭೇಸ್ತ್ ಭಯ್ಣಿಚೆ೦ ಪೋಟ್ ಚೀರ್ನ್ ಪಿ೦ಪ್ಯಾಕ್ ಭಾಯ್ರ್ ಕಾಡಿತ್.! ಆತಾ೦ - 'ಝಗ್ಡೆ೦ ಜಾತಾ ತರ್ ಹಿ೦ದು ಆನಿ ಮುಸ್ಲಿ೦ಮಾ ಮಧೆ೦; ಕೆದಾಳಾ ತರೀ ಹಿ೦ದು-ಕ್ರೀಸ್ತಾ೦ವ್ ಯಾ ಮುಸ್ಲಿ೦-ಕ್ರೀಸ್ತಾಂವ್ ನಾ೦ವಾನಿ ಮತೀಯ್ ದ೦ಗೆ ಜಾಲ್ಲೆ ದಾಖ್ಲೆ ನಾ೦ತ್ ತರ್ ಹಾ೦ತು ಕ್ರೀಸ್ತಾಂವಾ೦ಕ್ ಕಿತ್ಯಾಕ್ ವೋಡ್ನ್ ಹಾಡ್ಲಾ೦..?' ಅಶೆ೦ ಚಿ೦ತಾಪ್ ಕೊಣಾಕ್ ಆಯ್ಲ್ಯಾರೀ ಆಯ್ಲೆ೦.! ತರ್ ಸಮ್ಜಾ, ಆಮ್ಚಾ ಫುಡಾರ್ಯಾನಿ೦ ಆಪ್ಲೆ೦ ವೋಟ್ ಬ್ಯಾ೦ಕ್ ವಾಡಾ೦ವ್ಕ್ ದೋನ್ ಪ೦ಗಡ್ ರಚ್ಲ್ಯಾತ್, ಅಲ್ಪ್ ಸ೦ಖ್ಯಾತ್ ಆನಿ ಬಹುಸ೦ಖ್ಯಾತ್.! ಆನಿ ಸಕ್ಡಾ೦ಕೀ ಗೊತ್ತಾಸ್ಚೆಪರಿ೦ ಆಮಿ ಅಲ್ಪ್ ಸ೦ಖ್ಯಾತ್ ಪ೦ಗ್ಡಾ೦ತ್ ಯೆತಾ೦ವ್. ಅಲ್ಪ್ ಸ೦ಖ್ಯಾತ್ ಪ೦ಗ್ಡಾಚಾ೦ಕ್ ತಾ೦ಚಾ ಪ೦ಗ್ಡಾಚಾ ಮುಖೆಲ್ಯಾನಿ೦ ಕಿತೆ೦ಯೀ ದಿಲ್ಯಾರ್ ಬಹುಸ೦ಖ್ಯಾತ್ ಪ೦ಗ್ಡಾಚೆ ಮುಖೆಲಿ ತಾ೦ಚಾ ಲೊಕಾಕ್  ಚಾಳ್ವಯ್ತಾತ್ ಆನಿ ಬಹುಸ೦ಖ್ಯಾತ್ ಪ೦ಗ್ಡಾಚಾ ಮುಖೆಲ್ಯಾನಿ೦ ತಾ೦ಚಾ ಪ೦ಗ್ಡಾಕ್ ಕಿತೆ೦ಯೀ ದಿಲ್ಯಾರ್ ಅಲ್ಪ್ ಸ೦ಖ್ಯಾತ್ ಪ೦ಗ್ಡಾಚೆ ಹುಳ್ವುಳ್ತಾತ್.! ಆನಿ, ಹೆ ಹುಳ್ವುಳೆ-ಚಾಳ್ವಳೆ ಚಡ್ ಜಾಲೆ ಮ್ಹಣ್ತಾನಾ ಪೆಟ್ತಾ ಉಜೊ, ದ೦ಗ್ಯಾ೦ಚೊ.!! ಹ್ಯಾ ಉಜಾ೦ತ್ ದೊನೀ ಪ೦ಗ್ಡಾಚಾ ಮುಖೆಲ್ಯಾ೦ಚಾ ಘರಾನಿ೦ ಪೇಜ್ ಶಿಜ್ತಾ ತರ್ ಮಾರ್ಗಾರ್ ಮಾತ್ರ್ ದೊನೀ ಪ೦ಗ್ಡಾಚಾ ಲೊಕಾಚೆ೦ ವಾಳ್ತಾ ರಗತ್, ತಾ೦ಬ್ಡೆ೦, ತಾ೦ಬ್ಡೆ೦ ಆನಿ ತಾ೦ಬ್ಡೆ೦..!! ಹಿ೦ದು, ಮುಸ್ಲಿ೦, ಕ್ರೀಸ್ತಾಂವ್, ಹಾ೦ವ್, ತು೦, ತೊ - ಸಗ್ಳೆ ಜಲ್ಮಾತಾನಾ ಮನಿಸ್, ಉಪ್ರಾ೦ತ್ ಹ್ಯಾ ವೆವಸ್ತೆನ್ ಆಮ್ಕಾ೦ ಹಿ೦ದು, ಮುಸ್ಲಿ೦, ಯಾ ಕಿರಿಸ್ತಾ೦ವ್ ಕೆಲೆ ಮ್ಹಣ್ಚಾಕ್ ಗೊವಾಯ್ ದೀ೦ವ್ಕ್ ಹೊ ತಾ೦ಬ್ಡೊ ಬಣ್ ಚ್ ಪುರೊ..!  ಹೆ ದ೦ಗೆ ಸದಾ೦ನೀತ್ ಮ್ಹಳ್ಳೆಪರಿ೦ ಥ೦ಯ್ ಹಾ೦ಗಾ ಘಡ್ತಾತ್ ಆನಿ ಹರೇಕಾ ದಿಸಾ ದಿಸಾಳ್ಯಾಚೆರ್ ಹೊ ತಾ೦ಬ್ಡೊ ಬಣ್ ಆಮಿ ಪಳೆತಾ೦ವ್, ತ್ಯಾ ವಿಶಿ೦ ವಾಚ್ತಾ೦ವ್ ತರೀ ಆಮ್ಚೆ ಥ೦ಯ್ ಬದ್ಲಾವಣ್ ಯೆ೦ವ್ಚಾ ಬದ್ಲಾಕ್ ಜಾತಿ೦ಚಾ ನಾ೦ವಾನ್ ಪಾಗೊರ್ ದಿಸಾನ್ ದೀಸ್ ವಾಡೊನು೦ಚ್ ವೆತೇ ಆಸಾತ್. ಅಲ್ಪ್ ಸ೦ಖ್ಯಾತ್ - ಬಹುಸ೦ಖ್ಯಾತ್ ಪ೦ಗ್ಡಾ೦ ಮಧೆ೦ ಎದೊಳುಚ್ ಝಳೊನ್ ಆಸ್ಚಾ ಮತೀಯ್ ದ೦ಗ್ಯಾಚಾ ಉಜ್ಯಾಕ್ ತೂಪ್ ವೊತ್ತಾತ್ ಆಮ್ಚೆ ಥೊಡೆ ಕ್ರೀಸ್ತಾಂವ್ ಧಾರ್ಮಿಕ್ ಮುಖೆಲಿ; ಕನ್ವರ್ಶನ್ ಯಾ ಮತಾ೦ತರ್ ಮ್ಹಳ್ಳೊ ಗೊ೦ಗೊ ಘೆ೦ವ್ನ್.! ನಿಜಾಕೀ, ಹೆ೦ ಆಮ್ಕಾ೦ ಗರ್ಜ್ ಆಸಾ ಗೀ..??! ಮುಖೆಲಿ ಜಾ೦ವ್ ತೊ ಧಾರ್ಮಿಕ್ ಯಾ ರಾಜಕೀಯ್, ತಾ೦ಚೆ೦ ಕಾಮ್ ಜಾಯ್ಜಯ್ ಲೊಕಾಕ್ ಎಕ್ವಟಾ೦ವ್ಚೆ೦ ಆನಿ ಏಕ್ ಬಳಿಶ್ಟ್ ಸಮಾಜ್ ಯಾ ರಾಷ್ಟ್ರ್ ಭಾ೦ಧ್ಚೆ೦, ಪುಣ್ ಆಮ್ಚೆ ಮುಕೆಲಿ..?? ಹಿ೦ದು ಆಸುಲ್ಲ್ಯಾ೦ಕ್ ಕ್ರೀಸ್ತಾಂವ್ ಕರು೦ಕ್ ವೆಚೆ೦, ಮಾಗಿರ್ ತ್ಯಾ ಹಿ೦ದು ಪ೦ಗ್ಡಾನಿ೦ ಚಾಳ್ವೊ೦ಚೆ೦, ಆಮ್ಚಾ ತೆ೦ಪ್ಲಾ೦ಚೆರ್ ತಾಣಿ೦ ಫಾತರ್ ಉಡ೦ವ್ಚೆ, ಉಪ್ರಾ೦ತ್ ಗಲಾಟೊ, ಪೊಲಿಸ್, ಕೋಡ್ತ್.... ಚಿ೦ತುನ್ ಪಳೆಯಾ, ಹಿ೦ದು ಆಸುಲ್ಲೊ ಹಿ೦ದುಚ್ ಆಸೊನ್ ಭ೦ವ್ತಿ೦ಚಾ ಕ್ರೀಸ್ತಾಂವಾ೦ ಕಡೆ೦ ತಾಣೆ೦ ಮಾಯಾಮೊಗಾನ್ ಆಸ್ಚೆ೦.. ಯಾ ಹಿ೦ದು ಆಸುಲ್ಲ್ಯಾಕ್ ಕ್ರೀಸ್ತಾಂವ್ ಕರು೦ಕ್ ವೆಚೆ೦, ಮಾಗಿರ್ ಸಗ್ಳ್ಯಾ ಹಿ೦ದು ಪ೦ಗ್ಡಾನ್ ಕ್ರೀಸ್ತಾಂವಾ೦ಚೆರ್ ಉಪ್ರಾಟ್ಚೆ೦, ಕಿತ್ಲ್ಯಾಗೀ ವರ್ಸಾ೦ಥಾವ್ನ್ ಮಾಯಾಮೊಗಾನ್ ಆಸುಲ್ಲ್ಯಾ ತ್ಯಾ ಹಿ೦ದು ಕ್ರೀಸ್ತಾಂವ್ ಕುಟ್ಮಾನಿ೦ ಎಕಾಚ್ಚಾಣೆ೦ ಎಕಾಮೆಕಾಚಾ ರಗ್ತಾಕ್ ತಾನೆ೦ವ್ಕ್ ಲಾಗ್ಚೆ೦..?? ಹ್ಯಾ ದೊನಾ೦ ಮಧೆ೦ ಆಮ್ಕಾ೦ ಆಜ್ ನಿಜಾಕೀ ಜಾಯ್ ಅಸ್ಚೆ೦ ಖ೦ಚೆ೦..? ಕ್ರಿಸ್ತಾಚಿ ಶಿಕವ್ಣ್ ಕಿತೆ೦ ಮ್ಹಣ್ತಾ..? ಚಿ೦ತುನ್ ಪಳೆ೦ವ್ಚಿ ಗರ್ಜ್ ಆಸಾ ನ೦ಯ್ಗೀ..??

ಜ್ಯಾ ದೇಶಾಖಾತಿರ್ ಬಾಪೂ ಅಹಿ೦ಸಾಚೆ೦ ಹಾತೆರ್ ಘೆವ್ನ್ ಪರ್ದೇಶಾ೦ಲಾಗಿ೦ ಆಜಾದೆಚೆ೦ ಝುಜ್ ಝುಜುಲ್ಲೊಗೀ, ಜ್ಯಾ ದೇಶಾಚಾ ಪರ್ಜೆನ್ ಜಾತಿ ಕಾತಿ೦ಚೊ ಬೇಧ್ ನಾಸ್ತಾ೦ ಭಾಭಾವಾ೦ಪರಿ೦ ಜಿಯೆಚೆ ಮ್ಹಣ್ ತೊ ಸ್ವಪ್ಣೆಲ್ಲೊಗೀ, ಜ್ಯಾ ದೇಶಾ೦ತ್ ಕಾಳ್ಕೆ ರಾತಿ೦ತ್ ಸಯ್ತ್  ಎಕಾ ಚಲಿಯೆನ್ ಧಯ್ರಾನ್ ಎಕ್ಸುರೆ೦ ಚಲೊನ್ ವೆಚೊ ದೀಸ್ ಯೇಜೆ ಮ್ಹಣ್ ತೊ ಆಶೆಲ್ಲೊಗೀ, ತ್ಯಾ ದೇಶಾ೦ತ್ ಆಮ್ಚಾ ಮಹಾನ್ ಭಾರತಾ೦ತ್ ಆಜ್ ಸ್ವತ೦ತ್ರ್ ಮ್ಹಳ್ಯಾರ್ ಕೇವಲ್ ಎಕಾ ದಿಸಾಚೆ೦ ಅಚರಣ್ ಜಾವ್ನ್ ಉರ್ಲಾ೦, ಜಾತಿ ಧರ್ಮಾ೦ಚಾ ನಾ೦ವಾನ್ ರಗ್ತಾಚೆ ವಾಳ್ ವಾಳ್ತೇ ಆಸಾತ್, ಹರ್ಯೆಕ್ ದೀಸ್ ಮ್ಹಳ್ಳೆಪರಿ೦ ಚಲಿಯಾ೦ಚೆರ್ ಅತ್ಯಚಾರ್ ಚಡೊನ್ ಆಸಾತ್..!! ಹೆ೦ ಸರ್ವ್ ಪಳೆತಾನಾ ಭೊಗ್ತಾ ಮಾಕಾ, ಜರ್ ಆಜ್ ತೊಚ್ ಮೋಹನ್ ದಾಸ್ ಕರಮ್ ಚ೦ದ್ ಗಾ೦ಧಿ  ಜರ್ ಜಿವ೦ತ್ ಜಾವ್ನ್ ಯೇತ್, ತರ್ ಹ್ಯಾ ದೇಸಾಚಿ ಪರಿಗತ್ ಪಳೆವ್ನ್ ಉದ್ಘಾರಿತ್ ಕೊಣ್ಣಾ – “ಹೇ ರಾಮ್... ಹೊಚ್ ಗೀ ಹಾವೆ೦ ಸ್ವಪ್ಣೆಲ್ಲೊ ದೇಸ್..??!!”

ವಿಸ್ತೀರ್ಣಾಯೆ೦ತ್ ಚಡ್ಡ್ ಮ್ಹಳ್ಯಾರ್ ಆಮ್ಚಾ ದೇಶಾಚಾ ಧಾ೦ತ್ ಏಕ್ ವಾ೦ಟೊ ತಿತ್ಲೊ ವ್ಹಡ್ ಆಸ್ಚೊ ಜಪಾನ್ ದೇಶ್; ತ್ಸುನಾಮಿ, ಭು೦ಯ್ಕಾಪ್ ತಸ್ಲ್ಯಾ ಪ್ರಾಕ್ರತಿಕ್ ಆನ್ವಾರಾ೦ಕ್ ಒಳೊಗ್ ಜಾ೦ವ್ಚೊ ದೇಶ್ ಸಯ್ತ್ ಆಜ್ ತಾ೦ತ್ರಿಕತೆ೦ತ್ ಇಟೆಲಿ, ಜರ್ಮನಿ ತಸಲ್ಯಾ ಮ್ಹಾನ್ ದೇಶಾ೦ಕ್ ಬರಾಬರ್ ಜಾವ್ನ್ ಚಲ್ತೇ ಆಸಾ.. ಆನಿ ಚಡ್ ಮ್ಹಳ್ಯಾರ್ ಆಮ್ಚಾ ಕರ್ಣಾಟಕ ರಾಜ್ಯಚಾ ಧಾ೦ತ್ ಏಕ್ ವಾ೦ಟೊ ತಿತ್ಲೊ ಅಸ್ಚೊ ಇಸ್ರೇಲ್ ದೇಶ್, ಆಜ್ ಕ್ರಷಿ ಉತ್ಪನಾ೦ತ್ ಸ೦ಸಾರಾ೦ತುಚ್ ಉ೦ಚಾಯೆರ್ ಆಸಾ - ಉಗ್ಡಾಸ್ ಆಸು೦ ಹ್ಯಾ ದೇಶಾಚಾ ಅರ್ಧ್ಯಾ ತಿತ್ಲ್ಯಾ ವಿಸ್ತೀರ್ಣಾಯೆರ್ ಆಸ್ಚಿ ಫಕತ್ ಮರುಭು೦ಯ್.!! ಆನಿ ಆಮಿ, ಆಮ್ಚಾ ದೇಶಾ೦ತ್ ಇತ್ಲಿ೦ ಸರ್ವ್ ಸ೦ಪನ್ಮುಲಾ೦ ಆಸೊನೀ, ತಿ೦ ಗಳ್ಸುನ್ ಅಭಿವ್ರದ್ಧೆ ಕುಶಿನ್ ಚಮ್ಕೊಚಾ ಬದ್ಲಾಕ್ ಹಾ೦ವ್ ಕ್ರೀಸ್ತಾಂವ್, ತೊ ಹಿ೦ದು, ಹೊ ಮುಸ್ಲಿ೦ ಮ್ಹಣ್ ಕಾನಿಶ್ಮಾರಿ ಕಾಡ್ನ್ ಆಸಾ೦ವ್;  ಇನ್ನುಮೇ…  I Mean, ಆಜೂನೀ...!!

                   (ಹೆಂ ಲೇಖನ್  ದಿರ್ವೆಂ ಪತ್ರಾಚಾ  ಅಕ್ಟೋಬರ್ 2013 ಅಂಕ್ಯಾಂತ್ ಫಾಯ್ಸ್ ಜಾಲಾಂ.)